Da l-leuaxa so Saúl qataq soua llalqa
1Qaq so filisteopi delogui' co'ollaxa so Israel le'ecpi, nache so Israel le'ecpi dataueeguesop somayepi, qalaxaye qalota so ileu se'eso Israel le'ecpi, huaña añi qasoxonaxa Gilboa. 2Qaq so filisteopi, icaalec co'ollaxa so Saúl qataq soua llalqa, nache ỹalauat so Jonatán, Abinadab qataq so Malquisúa. 3Qaq co'ollaq ime, nache qaltaq qaimalec da qailoquiaxan so Saúl, nache aso lchecna so nchecna lo'opi, ivira'a da ique'emaqchet somaye. 4Huaña, nache so Saúl, 'enapega so lpaqtaxanaqte lo'o, 'eeta': «'Anqatsheguem na 'ainec, nache aỹem 'aualauat, yaqto' saishet da aỹem ỹa'ashaxan qom aỹem nvita ne'ena shiỹaxauapi maye qaica ca la'anaxat na lo'oc.»
Qalaxaye so lpaqtaxanaqte lo'o saishet da ỹo'ot de'era, cha'aye ỹataqta lta'araic da lcolanaxa, nache so Saúl ỹacona so maiche lainec, nache nqapaxanguit. 5Qaq so npaqtaxanaqte lo'o co'ollaq ila'a da mashe ileu so Saúl, nache somaye nataqa'en nqapaxanguit so maiche lainec, nache ileu. 6Qaq 'era da 'eetec co'ollaq ileu so Saúl qataq soua tres llalqa, qataq 'enauac so lauo' le'ecpi somaye, da ileu se'eso na'a'q. 7Qaq 'enauac so Israel le'ecpi maye netaña ye ca'amegue co'ollaq ila'a da datauec so alleppi, qataq da ileu so Saúl qataq soua llalqa, nache nataqa'en somayepi datauec, ca'ai so huaqta'a't nỹecpi maye netaigui somayepi. Huaña, nache anac so filisteopi, nache naigui se'eso nỹecpi.
8Qaq so lỹa na'a'q co'ollaq so filisteopi tauga da ỹacona so logoxoshetpi so leuaxaicpi, nache ilalec so Saúl qataq soua llalqa da ileu', huetralec añi qasoxonaxa Gilboa. 9Qaq huaña nache ỹaconalo soua alogo somaye, nache icheguec so lqaic da yaqto' ỹache, qataq soua lo'ogoxonaqa'ate, ime nache ỹauo'o so lamaxashecpi da ỹamaxa 'enauac nam netaña ye filistea maye na'alhua somayepi da yaqto' ỹauo'o da la'axaỹaxac so lauo' le'ecpi qataq som natamnaxala'pi. 10Qaq ime, nache soua lo'ogoxonaqa'ate so Saúl, qoỹaaraigui aso atamnaxaqui maye netaigui so atamnaxala'pi, qataq qoỹanasheguem so lqaic so Saúl, qoỹanaigui aso atamnaxaqui maye netaigui so Dagón.
11Qaq so lma' ye Jabés maye huaigui ye Galaad, co'ollaq ỹaỹaten da so filisteopi ỹo'otec de'era so Saúl, 12nache 'enauac so ỹalleppi maye 'añaxaicpi ñisheguem, da ỹe'eguena'a so lo'ocỹaxac so Saúl, qataq soua llalqa. Nache ira'a ye Jabés, yem huaña da ilayiñi ỹachetot aso qo'oipaq le'enaxat encina, maye naña ye Jabés, nache ỹo'ot so nqouaqchetaxac soua siete na'axa'te.
13Qaq 'era da 'eetec da l-leuaxa so Saúl, souaxat nam qauem ỹo'otpi, qataq da saỹalaxagueta nam lamaxasoxonaxaco Ñim Nataxala', nache nqo'ona da inat aso 'alo maye ilaviigui ca lỹa. 14Qaq saishet da ichemaxata cam 'eetapeguec Ñim Nataxala', ỹoqo'oye Ñimaye nqat da nachaalataxac, nache de'era lo'onataxanaxac talec naqa'en so David, som llalec so Yesé.
