So David qoỹaneuo da nta'a ye Israel
1Huaña nache 'enauac so Israel le'ecpi, laỹona't da yaqto' nqo'ona da na'aqtaxane' so David, huaña ye Hebrón. Qaq huaña yemaye, nache somayepi 'enapega, 'eeta': «Qomi', maiche qomi' 'arhuo' le'ecpi, 2qaq na'aictaxa co'ollaxa da nta'a so Saúl, qalaxaye 'am mashe nache 'eetai' da 'aulotague' co'ollaxa na Israel le'ecpi da taỹa naxa na alaataxac. Qaq nataqa'en Ñim Nataxala' maye 'Anatamnaxala', mashe 'am 'enapega co'ollaxa, 'eeta': ‹Nache 'am qome da 'am lataxala' qataq 'aulo'ogue na ỹalamaxat nhuo' Israel le'ecpi.›» 3Huaña nache 'enauac so nqueroxonecpi ye Israel, nqo'ona da na'aqtaxane' so nta'a David huaña ye Hebrón, nache somaye naỹamaxate' somayepi, ỹauaachigui naqa'en Ñim Nataxala', qaq huaña nache somayepi ỹaneuo so David da yaqto' lta'a so Israel le'ecpi, nache ipacchigui dam ỹan la'aqtac co'ollaxa Ñim Nataxala', maye ỹachegoxotchigui so Samuel.
So David deuotaxanec ye Jerusalén
4Huaña nache so David, qataq 'enauac so Israel le'ecpi taỹa ye Jerusalén, maye le'enaxat nataqa'en da Jebús, qaq so jebuseopi nache netaña co'ollaxa yi'iye 'alhua, 5nache somayepi 'enapego' so David, 'eeta': «'Am, saishet da 'aunoxoneua'a ne'ena». Qalaxaye so David, loxonec co'ollaxa ye ỹataqta qanpaxatteua'a Sión, qaq da nauattonatac nagui, le'enaxat huaqta'a't nỹecpi maye lalamaxat so David. 6Nache so David 'enapeco': «Ca hua'auñi da iloquiaxan ye jebuseopi, qaq nacheca qome ca sanagui da lataxala' na alleppi.» Qaq so la'auaxanec da iloquiaxan somayepi, nacheso som Joab, som llalec aso Seruyá, qaq somaye nacheso so qoỹanagui da nataxala'. 7Qaq ime co'ollaxa nache so David, naña ye ỹataqta qanpaxatteua'a Sión, ỹoqo'oye qoỹanagui huaqta'a't nỹecpi maye lalamaxat so David. 8Nache so David, nquigaxatec da no'oxoosheguem som huaqta'a't nỹecpi, chegoqchiguiña ye Milo, nache ivitta'a so npaqtaxanaxat, qaq so Joab qalaq ỹaỹamaxaañi som laỹepi nỹecpi. 9Qaq da la'añaxac so David, ỹataqta nquictauec, cha'aye Ñim Nataxala' maye qaica ca Ỹaqalanapec hueta'aguet somaye.
Som 'añaxaicpi lataxala'pi so nalleppi so David
10Qaq 'eso som 'añaxaicpi lataxala'pi som nalleppi so David, som itauaatacpi de'era lo'onataxanaxac somaye, qataq huaxaiguet 'enauac som Israel le'ecpi da ỹaneuo da nta'a da ilo'ogue somayepi, nache ipacchigui da la'aqtac Ñim Nataxala', maye ỹanem co'ollaxa so Israel le'ecpi.
11Qaq 'ana ana le'enaxat lmalate som 'añaxaicpi nalleppi so David: Yasobeán, som llalec so Jacmoní, maye lataxala' som tres maye ỹataqta 'añaxaiqa, qaq somaye huo'o so huaña co'ollaxa da ỹalauat so trescientos ỹalleppi, irota'a aso lataquiaxai. 12Qaq som ca'atalec somaye le'enaxat Eleazar, maye llalec so Dodo, som ahohíta, som 'oonolec se'esoua tres maye ỹataqta 'añaxaiqa. 13Qaq somaye nache nnaictague' so David co'ollaq hueta'a ye Pasdamín, yem huaña co'ollaxa da laỹona't so filisteopi da yaqto' nalat. Qaq yi'iye huo'o so no'onaxa maye huetalec so nañiguishec cebada, qaq co'ollaq datauec so Israel le'ecpi da dataueeguesop so filisteopi, 14nache so David, tañigui ye laiñi se'eso no'onaxa, huaña nache dataỹa'aguet da delogui', nache loxonec so filisteopi. Qaq 'era da 'eetec da Ñim Nataxala', ỹanem da dauegaxan somaye.
15Qataq huo'o so huaña da se'esoua tres se'eso treinta maye ỹataqta 'añaxaicpi, nqo'oora aso coma' da yaqto' nauaare' so David, maye netaigui so auac maye naña ye Adulán. Qaq so lanataqa' so alleppi filisteopi naña ye ca'amegue ye Refayin. 16Qaq so David hueta'a co'ollaxa so lle'eguenaqa', qaq so alleppi filisteopi hueta'a ye Belén. 17Qaq so David ye ỹataqta ỹaguec na laquip, nache 'enapeco': «¡Capegue' taxa da huo'o ca aỹem ỹanem da ñeỹomgui ca 'etaxat maye le'ec añi nshere maye naña ye ñegueuo ye Belén!»
18Qaq huaña nache se'esoua tres 'añaxaiqa, huenoxotraua'a so lanataqa' so filisteopi, nache nqatsheguem so 'etaxat ỹachegoxotrangui aso nshere maye naña ye ñegueuo ye Belén, nache ira'alo so David. Qalaxaye so David saishet da nỹomgui somaye, nacherata da icorec da yaqto' lachetaqtaxanaxat da ỹanot Ñim Nataxala', 19qataq 'enapeco': «¡Ñim Lo'onatac 'Enauacna ñaq aỹem ntelaqna'aguet qome da ñeỹomgui ne'ena 'etaxat! ¡Cha'aye da ñeỹomgui, nache 'ena'am da ñiỹomguilo naua ltago'q ne'enaua ỹale't maye saire'n da nachaalataxac da ỹe'egueera'a na 'etaxat!» Nache somaye saishet da nỹomgui so 'etaxat.
Qaq 'era da ỹo'o't se'esoua tres ỹale't 'añaxaiqa.
20Qaq so Abisay, maye lqaỹa so Joab, nacheso so lataxala' co'ollaxa so treinta 'añaxaicpi, somaye huo'o so huaña co'ollaxa da iloquiaxan so trescientos ỹalleppi, nache ỹalauat irota'a aso lataquiaxai. Huaña nache huo'o da llo'oxoyec da ỹalectaigui somayepi, 21qataq ỹactec da llo'oxoyec da ỹalectaigui somayepi, ỹoqo'oye ivira'a da lataxala' somayepi, qalaxaye saishet da ivi' da 'ena'ama soua tres maye hua'auchiyiñi nataxala'ate. 22Qaq so Benaías, som llalec so Joyadá, maye Cabsel le'ec, se'eso ỹale ỹataqta 'añaxaic, ỹoqo'oye qalota na lta'araicpi ỹo'otpi co'ollaq nalattac. Qaq somaye nacheso so ỹalaua't soua dos llalqa so Ariel, maye Moab le'ec. Qataq huo'o so na'a'q co'ollaq nattañi aso aloñi, nache somaye tañigui aso lcheque, qaq huangui asomaye da ỹalauat so llon. 23Nataqa'en ỹalauat so Egipto le'ec maye napactelec ye dos metros ye lalogaxa, somaye nasoqta'a aso lataquiaxai maye locta'am ye lalogaxa na lpataxasoxot na no'oxonec. Qaq so Benaías, irota'a so 'epaq da iloquiaxan somaye, nache deuotaxanec aso taquiaxai maye nasoqta'a so Egipto le'ec, nache ira'a da ỹalauat somaye. 24Qaq de'era ỹo'ot so Benaías, som llalec so Joyadá, nachera da ỹo'ot da llo'oxoyec da ỹalectaigui so treinta 'añaxaicpi, 25qaq somaye ỹactec da llo'oxoyec da ỹalectaigui somayepi, qalaxaye saishet da ivi' da 'ena'am da llo'oxoye'c soua tres hua'auchiyiñi nataxala'ate. Qaq so David, ỹanem somaye da ilo'ogue som lalamaxat lhuataxanaxanecpi.
26Qaq 'ena na le'enaxat se'eso 'añaxaicpi: Asael, som lqaỹa so Joab, Eljanán, maye llalec so Dodo, som Belén le'ec, 27Samot, som Jarod le'ec, Heles, som paltiita, 28Irá, maye llalec so Iques, som Tecoa le'ec, Abiezer, som Anatot le'ec, 29Sibecay, som Jusá le'ec, Ilay, som Ahohiita, 30Maray, som Netofa le'ec, Jéled som llalec so Baná, maye nataqa'en Netofa le'ec, 31Ilay, som llalec so Ribay, maye lma' ye Gabaa, yem huaigui ye na'alhua so Benjamín, Benaías, som Piratón le'ec, 32Juray, maye lma' so la'auaxac ye Gaas, Abiel, som arbatiita, 33Azmavet, som lma' ye Bajurín, Elijaba, som saalboniita, 34qataq som llalaqpi so Jasén, som guizoniita, Jonatán, maye llalec so Sage, som arariita, 35Ahiam, som llalec so Sacar, maye nataqa'en arariita, Elifal, som llalec so Ur, 36Jéfer, som mequeratiita, Ajías, som pelonita, 37Hesrai, som lma' ye Carmel, Naray, som llalec so Ezbay, 38Joel, som lqaỹa so Natán, Mibejar, som llalec so Hagrai, 39Selec, som amoniita, Najaray, maye lma' ye Berot, som no'ogoxonaxat lo'o maye ltaua so Joab, som llalec aso Seruyá, 40Irá, maye lma' ye Jatir, Gareb, maye nataqa'en lma' ye Jatir, 41Urías, som hitiita; Zabad, som llalec so Ajlay, 42Adina, maye llalec so Siza, som rubeniita, maye lataxala' so rubeniitapi, qataq treinta so ỹalleppi nnaictague' somaye, 43Janán, som llalec so Macá, Josafat, som mitniita; 44Uzías, maye lma' ye Astarot, Sama qataq so Yejiel, som llalqa so Jotán, maye lma' ye Aroer, 45Jediael, som llalec so Simerí, qataq so lqaỹa Joha, som tiziita, 46Eliel, maye lma' ye Majanayin, Yerebay qataq so Josavía, som llalqa so Elnaam, Itma, som moabiita, 47Eliel, Obed qataq so Jasiel, maye lma't ye Soba.
