So David huotaique da nqochenaxat aso arca maye laỹe' soua nqataxaco
1Qaq so David, nnate' so 'amaqtaqaicpi maye ltauapi, qataq so lataxala'pi so nalleppi somaye, 2nache so David 'enapega so lapoota'a't Israel le'ecpi, 'eeta': «Da qauaỹamaxayiñiita, qataq da nachera da 'eetapeguec Ñim Nataxala' maye Qanatamnaxala', nache samaxasaxa ca la'axaỹaxac 'enauac na qarqaỹañecpi maye hueta'alo na ỹotta'a't nma'ate na Israel, qataq na ntaxaỹaxanaxanecpi qataq na leviitapi, maye hueta'a nam maiche lalamaxat huaqta'a't nỹecpi maye ỹotta'a't naua nañalo, qataq nam 'alhuapi maye lquia'aqa'pi na 'atetpi, da yaqto' qomi' huaxaigueta, 3da yaqto' she'eguenaqa'a da ñe'eguelaxataq añim arca maye laỹe' naua lqataxaco Ñim Qanatamnaxala', cha'aye chegoqta'a co'ollaq ña do'onataxaatac so Saúl, nache saishet da seqochaqtega añimaye.» 4Nache 'enauac som lapoota'a'tpi nhuo' le'ecpi, ỹataqta ỹaỹamaxareeta da qaỹo'ot de'era, cha'aye 'enauac se'eso nhuo' le'ecpi ỹaỹamaqchiguiñi naqa'en de'era qoỹeetapeguec.
5Huaña nache so David, laỹona't 'enauac so Israel le'ecpi, nache chegoqchiguiña naqa'en som hueta'a ye Sijor, yem loga't ye Egipto, nache ivitta'a so hueta'a so ñegueuo ye Jamat, da yaqto' qaỹachegoxotchiguiña ye Quiriat Yearin asom arca maye laỹe' soua lqataxaco Ñim Lo'onatac 'Enauacna. 6Ime, nache so David lỹatac 'enauac so Israel le'ecpi da tasheguema ye Quiriat Yearin, maye nataqa'en le'enaxat Baalá, yem huaigui ye 'alhua Judá, da yaqto' ỹachegoxotchiguiña yemaye da nquigaxat aso arca maye laỹe' soua lqataxaco Ñim Lo'onatac 'Enauacna, asom huaña naxa da qaiỹaxana da le'enaxat Ñim Nataxala', maye aso nso'onaxaqui natatañalo soua ne'enaqtaqa querubines. 7Nache somayepi ỹachangui aso dalaxaale naigona aso laỹe' soua nqataxaco nache ỹache ira'a ye lma' so Abinadab. Qaq so Uzá qataq so Ajió nachesoua so ilotegueto asa'aso naigona. 8Qaq so David qataq 'enauac so Israel le'ecpi nache queta da dasotto'ot Ñim Lo'onatac 'Enauacna qataq do'onaxaata'ai' aso nviquepi arpapi, salteeriopi, pandeeropi, platiillopi, qataq aso tronpeetapi. 9Qalaxaye co'ollaq ivita ye nchegoxosoqo' na trigo maye le'enaxat Quidón, nache so Uzá ỹauota'a na lhuaq da nllañi aso laỹe' soua nqataxaco, cha'aye soua nauegaxanaxala'ate huaca pogolaxaayiñi. 10Huaña nache Ñim Nataxala', dalemataỹa so Uzá souaxat da ỹauota'a na lhuaq da nllañi aso arca maye laỹe' soua nqataxaco, qaq nache huaña yemaye da nqat da nachaalataxac somaye.
11Qaq so David ỹataqta daquico souaxat da Ñim Nataxala' nqat da nachaalataxac so Uzá, qaq ỹoqo'oye yi'iye 'alhua nache ỹanagui da le'enaxat Peres Uzá, qaq nache ivitta'a nagui da nache le'enaxat de'era. 12Qalaxaye se'eso na'a'q so David ỹataqta huo'o da lcolanaxa Ñim Lo'onatac 'Enauacna, nache 'enapeco': «'Onaxaico' da saishet da sache añi arca maye laỹe' naua lqataxaco Ñim Lo'onatac 'Enauacna.» 13Nache so David, saishet da ỹache aso laỹe' soua nqataxaco da ira'a so huaqta'a't nỹecpi maye lalamaxat somaye, nacherata da damaxasoxoolec da qaira'a so lma' so Obed Edom, maye lma' ye Gat. 14Nache aso arca maye laỹe' soua lqataxaco Ñim Lo'onatac 'Enauacna, netaña so lma' so Obed Edom soua tres ca'agoxoiqa, qaq Ñim Nataxala' ỹataqta ỹanem da nqouagaxa som llalaqpi so Obet Edom, qataq 'enauac som lalamaxatpi.
