1 Crónicas 14

₁So Jirán maye nta'a ye tiro, ỹamaxa so David so ltaxaỹaxanaxanecpi, nataqa'en so nỹec lo'opi, qataq som qo'oipaq lo'opi maye ỹachetac na qo'oipaq cedro da yaqto' ỹo'ot so lma' lta'araic so David ₂Qaq huaña nache so David, ỹaỹaten da Ñim Nataxala', ỹataqta ipacchigui da ỹanem somaye da lta'a so Israel le'ecpi, cha'aye ỹo'ot da nquictasheguem da lo'onataxanaxac da ilo'ogue so Israel le'ecpi maye lalamaxat Ñimaye.

₃Qaq so David nataqa'en huo'o aso laỹepi lamoxouapi ye Jerusalén, nache huo'o so llalaqpi ỹalleppi, qataq so 'alpi. ₄Qaq 'ena na le'enaxatpi so llalaqpi maye lañoqo' ye Jerusalén: Samúa, Sobab, Natán, Salomón, ₅Ibejar, Elisúa, Elpelet, ₆Noga, Nefeg, Jafía, ₇Elisama, Eliada qataq so Elifelet.

₈Qaq so filisteopi co'ollaq la'axaỹaxac da so David qoỹaneuo da nta'a da ilo'ogue ye Israel, nache 'enauac somayepi da taỹa da dataỹa'aguet so David, qalaxaye somaye la'axaỹaxac co'ollaxa de'era, nache ca'ata'aguet somayepi. ₉Nache so filisteopi co'ollaq ivi' nache nlagaxaañi da talec so ca'amegue ye Refayin. ₁₀Qaq huaña, nache so David inat Ñim Lo'onatac 'Enauacna, 'eeta':

¿Peta'a seloquiaxan ye filisteopi?

¿Peta'a aỹem 'aỹa'anem da ỹoxonec yemayepi?

Nache Ñim Nataxala' 'enapeco': Aja', 'auloquiaxan, cha'aye 'am sanem da 'oxonec qome yemayepi.

₁₁Ime, nache so David tasheguema ye Baal Perasín, qaq nache huaña yemaye da loxonec somayepi. Qaq ỹoqo'oye somaye 'enapeco': «Ñim Lo'onatac 'Enauacna, 'eeta'am naqa'en ca la'auaxac na 'etaxat, da ỹauategue som ỹec da ñellecchiguingui na ñepa'aguenaxauapi.» Qaq ỹoqo'oye yemaye, nache qoỹanagui da le'enaxat Baal Perasín. ₁₂Qaq so filisteopi, ỹalat co'ollaxa som natamnaxala'pi, nache so David damaxasoxoolec da qaỹavigaxat somayepi.

₁₃Qalaxaye som filisteopi ỹe'eguelaxa co'ollaxa da nlagaxaañi da talec so ca'amegue ye Refayin, ₁₄huaña nache so David, qaltaq ỹe'eguelaxalec da inat Ñim Lo'onatac 'Enauacna, nache ñimaye 'enapeco': «Saishet qome da 'auatateguet da 'auloquiaxan, nacherata da 'aucoleesop nache 'auloquiaxan qom 'avita yem huaña anam qo'oipaqpi bálsamo. ₁₅Qaq qom 'aua'axaỹa ca l-lamaxa ana nmilo ana qo'oipaqpi da 'eeta'am da qanayectalec, nache 'auloquiaxan qome cha'aye de'era naigui da aỹem, sa'auta'ague da 'ata'ague da yaqto' nmichiguiñi ñaqa'en ye alleppi filisteopi.»

₁₆Qaq huaña, nache so David ỹo'ot dam ỹamaxalec Ñim Nataxala', nache loxonec som nalleppi so filisteopi, chegoqchiguiña naqa'en ye Gabaón, nache ivitta'a som hueta'a ye Guézer. ₁₇Huaña nache da llo'oxoyec so David ỹataqta imattalec yi'iye 'alhuapi, qataq Ñim Nataxala' ỹo'ot da 'enauac nam ỹotta'a't shiỹaxauapi ñi'iỹa somaye.