1Qaq 'era 'eetec co'ollaq qaiviraxat aso arca maye laỹe' soua lqataxaco Ñim Lo'onatac 'Enauacna, nache qoỹanaigui so npe'l maye iqataxanai' co'ollaxa so David, nache sa qaỹaỹaloxon da qoỹanot Ñim Nataxala' aso nachetaqtaxanaqte qaỹavigaxatta qataq aso qanhuaachigui. 2Qaq so David co'ollaq ime da ỹaneuo aso nachetaqtaxanaqtepi qaỹavigaxatta qataq aso qanhuaachigui, nache ỹasaxalec da nchoxonnataxanaxa se'eso nhuo' le'ecpi, ỹauota'a da le'enaxat Ñim Nataxala'. 3Nache 'enauac so Israel le'ecpi, ỹalleppi qataq 'alpi da ñi 'oonolec somayepi ỹanem aso 'oonole nauole 'ayiiña, qataq aso ntoñiguishe maye lalegue na lapat, qataq aso nauole maye lalegue ana nqaxaỹaqta ala na nañiguishe.
4Ime, nache so David huo'oi soua ỹaareuo leviita da pa'aỹa'agueta da iloregue aso laỹe' soua lqataxaco Ñim Nataxala', da yaqto' huapegueto da ỹa'n da 'achecỹaxac, qataq da ỹo'oxore'n Ñim Nataxala' maye Natamnaxala' so Israel le'ecpi. 5Qaq 'ena na le'enaxa't soomaye: Asaf, som lataxala' soomaye, qaq soua lỹa't: Zacarías, Jeiel, Semiramot, Yejiel, Matatías, Eliab, Benaías, Obed Edom qataq so Jeiel, som hueto'oto aso nviquepi, salteeriopi qataq aso arpapi. Qaq so Asaf, nacheso so pa'aỹa'aguet da iuaxaata'a't soua natoviaxanataqa lcat. 6Qaq soua ntaxaỹaxanaxanaqa Benaías qataq so Jahaziel, nachesoua soua ỹashettrapigui naxa soua nasheerel, da datatraua'a so hueta'a aso arca maye laỹe' soua lqataxaco Ñim Lo'onatac 'Enauacna.
So lo'onec so David da ỹan da na'achecỹaxac
7Qaq nacheso se'eso na'a'q so huaigui co'ollaxa da so David, ỹaneuo so Asaf qataq soua lqaỹa't da ilo'ogue da ño'oxonnataxanaxac da qaỹo'oxoren Ñim Nataxala', maye 'eeta':
8¡Qavio'oxoreñi qome Ñim Nataxala'!
¡Qaua'axacheeuec qome da le'enaxat!
¡Qaua'aqtaxañim nam ỹotta'a't shiỹaxauapi nam ỹo'otpi Ñimaye!
9¡Qauo'oñi na no'onecpi da qavio'oxoreñi da 'enec Ñimaye!
¡Qaua'axachiiuec da llo'oxoyec nam ỹo'otpi Ñimaye!
10¡Qavio'oxoreñi da ỹataqta qui'itta le'enaxat Ñimaye!
¡Ỹataqta machiguiñi qome da qarquiyaqteỹaxaqui,
qami' maye qanmichiitaique Ñim Nataxala'!
11¡Qanmichiỹaique Ñim Nataxala' qataq da la'añaxac,
qataq 'enauaque naua na'axa'te da qanmichiitaique Ñim Nataxala'.
12Qantooñita'ac da llo'oxoyec nam lta'araic ỹo'otpi,
qataq na sa qaỹauanapega ỹo'otpi, qataq nam ỹan lamaxasoxonaxacpi,
13qami' maye qauachegoqoiguet so Israel maye lamaxashec Ñimaye,
qami', maye qami' llalqa so Jacob, maye qami' lca'agui'she Ñimaye.
14Ñim Nataxala', nacheñi Ñim Qanatamnaxala',
nacheñi ñi ilotague' 'enauac ana 'alhua.
15Ñimaye nache 'eetai' da saishet da icoua'ai da naỹamaxataxac,
qataq da la'aqtac maye ỹanem na shiỹaxauapi,
16qataq da naỹamaxataxac co'ollaq naỹamaxate' so Abraham,
qataq da ỹan la'aqtac maye ỹanem co'ollaxa so Isaac,
17dam lapaxañi co'ollaxa lataxac maye ỹanem so Jacob,
dam chochaq tatec naỹamaxataxac maye ỹanem so Israel,
18co'ollaq 'enapec:
«Aỹem 'am sanem qome ye 'alhua ye Canaán, maye 'am taalec qome da 'aralamaxat.»
19Co'ollaq ñaq saq 'amaqtaq ye lcata somayepi,
qataq saq 'amaqtaq chegaqauecpi maye netalec yi'iye 'alhua,
20maye chochaq tateua'alo co'ollaxa na ỹotta'a't 'alhuapi,
qataq quetagui som ỹotta'a't nta'alpi,
21qaq Ñim Lo'onatac 'Enauacna saỹasheneguet
da saqaiyacnapec somayepi,
qaq souaxat da lauotaxanaqtaic nache nhuogaxa so nta'alpi, 'eeta':
22«¡Saishet da qavi'iguiñiita'a na ica'aguishecpi,
qataq saishet da saqauaỹamaxachiỹapec na ỹa'aqtaxanaxanecpi!»
23Qauo'onaxañiito'ot Ñim Nataxala',
'enauac qami' maye qoñiitalec ana 'alhua,
qataq 'enauaque naua na'axa'te da qaua'axacheeteguec da lca'alaqtaxanaxac Ñimaye.
24Qaua'axacheetac da llo'oxoyec Ñimaye, da qaualliquiitaigui na ỹotta'a't shiỹaxauapi,
qataq qaua'aqtaxañim 'enauac na nhuo' le'ecpi, nam ỹo'ot da na'aalaxa maye ỹo'ot Ñimaye.
25Cha'aye Ñim Nataxala' ỹataqta lta'araic da la'amaqchec,
qataq ỹataqta 'itchiguiñi da qaỹo'oxoreetac,
qataq da lchec Ñimaye napacalec na laỹepi atamnaxala'pi.
26Cha'aye nam natamnaxala'pi nam laỹepi shiỹaxauapi, qaica ca 'enec,
qaq Ñim Nataxala' qalaq nacheñi ñim ỹo'ot na piguem.
27¡Qaq Ñimaye hueto'ot da lta'araic la'amaqchec!
¡Qataq huo'o da na'añaxac qataq da tonaxac ye hueta'a Ñimaye!
28Qaq qami' maye qami' llalaqpi na nhuo' le'ecpi,
qavio'oxoyiñi da llo'oxoyec qataq da la'añaxac Ñim Nataxala',
29qavio'oxoyiñi da la'amaqchec Ñim Nataxala',
qataq qauacheetauo aca qarachetaqtaxanaqche da qanqo'oñiiua'a Ñimaye,
qavio'oxoyiñi Ñim Nataxala' da huaña ñim ỹataqta 'onaxaic npe'l maye lanataqa'.
30¡Qaq 'enauac nam huetalec ana 'alhua ỹataqta iviloxol da lcolanaxa da dataỹot Ñimaye!
¡Ñimaye ỹo'ot co'ollaxa ana 'alhua da yaqto' saishet da deraỹapigui'!
31¡Qaq ỹataqta machiguiñi qome na piguem qataq ana 'alhua!
Qataq na ỹotta'a't shiỹaxauapi, 'enapec qome:
«¡Ñim Nataxala', nacheñi ñi nta'a!»
32¡Qataq dellimigui qome aso auaxai, qataq 'enauac nam huetangui asomaye!
¡Qataq machiguiñi qome na no'onaxa qataq 'enauac nam huetalec namaye!
33¡Huaña qome nache do'onaxaato'ot Ñim Nataxala' ana qo'oipaqpi
maye huetaigui na aviaq souaxat da ntonaxac,
cha'aye Ñimaye mashe anacta da ilo'ogue ana 'alhua!
34Qavio'oxoyiñi qome Ñim Nataxala' cha'aye Ñimaye ỹataqta soxoraic,
qataq da lauotaxanaqtaic Ñimaye chochaq tatec.
35Qataq qoñiỹapec: «¡Ña qomi' 'anca'alaxatrec
'am maye 'Auo'otapecna maye 'am qarca'alaxaqui!
Qomi' 'alaỹona't qataq qomi' 'ausoueeguesopa nam ỹotta'a't shiỹaxauapi,
yaqto' sho'oxorenaqtac dam qui'itta 'are'enaxat,
qataq qaramachiguiñi da 'am sho'oxorenaqtac.»
36¡Qaq ỹataqta qaỹo'oxoren Ñim Nataxala' maye Natamnaxala' na Israel le'ecpi,
qataq chochaq tatec da ño'oxonnataguec Ñimaye!
Nache 'enauac so nhuo' le'ecpi da, 'eeta': «¡Aja', nache 'eetec!» nache ỹo'oxoren Ñim Nataxala'.
37Huaña nache so David, ipataxagueta so Asaf, qataq soua lqaỹa't da ilo'oguelo aso arca maye laỹe' soua lqataxaco Ñim Nataxala', yaqto' nache quetro'ot da huetrague' nam qaỹo'otpi ye na'a'q. 38Qaq so Obed Edom, qataq so sesenta y ocho lqaỹañecpi, qataq so Obed Edom, maye llalec so Jedutún, qataq so Josá, nacheso somayepi so ilotague' so ñegueuo so npe'l. 39Qaq so ntaxaỹaxanaxanec Sadoc, qataq so lqaỹañecpi maye nataqa'en ntaxaỹaxanaxanecpi, nacheso so ipataxaguet da ilo'ogue so npe'l maye lanataqa' Ñim Nataxala', maye netasheguema so pa'asheguem ye Gabaón, 40da yaqto' nache queto'ot da ỹaatrapegueuo ana nachetaqtaxanaqtepi qaỹavigaxatta, da ỹachalec aso nca'atoxonaxalate ye nte'eta qataq ye avit, nache ipacchigui 'enauac nam nanettañepi maye lqataxacpi Ñim Nataxala', maye no'onaxatañi da ỹamaxalec so Israel le'ecpi. 41Qaq nataqa'en ỹalecnoigui somayepi so Hemán, Jedutún qataq som laỹepi lca'aguishecpi da ipataxalec da no'onaxanaxac da qaỹo'oxoren Ñim Nataxala', cha'aye da lauotaxanaqtaic Ñimaye chochaq tatec. 42Qaq so Hemán qataq so Jedutún, nachesoua soua ỹashettrapigui soua nasheerel, qataq da iuaxaata'a't soua natoviaxanataqa lcat, qataq aso laỹe nviquepi, da yaqto' ỹaueca'aguet da no'onaxanaxac da qaỹo'onaxaato'ot Ñim Lo'onatac 'Enauacna. Qaq soua llalqa so Jedutún, nachesoua soua ilotrague' so ñegueuo so npe'l.
43Qaq co'ollaq ime de'era, nache 'enauac somayepi da ỹe'eguelaxalo naua lma'ate, nataqa'en so David, ỹe'eguelaxa so lma' da yaqto' talec naqa'en da no'on la'aqtac so llalaqpi.
