Ñim Lo'onatac 'Enauacna naỹamaxate' so David
1Qaq so David, co'ollaq mashe netaigui so lma' lta'araic, nache 'enapega so na'aqtaxanaxanec Natán, 'eeta':
Ña 'aumeten da aỹem, sootaigui na nỹec lta'araic maye nda'a't na 'epaq cedro, qaq añi arca maye laỹe' soua lqataxaco Ñim Nataxala', qalaq netaigui ñi qaica ca la'amaqchec npe'l.
2Nache so Natán, ỹasateguet so David, 'eeta':
Ñaq 'auo'ot 'enauac cam huetaigui da 'arhuennataxac, cha'aye Ñim Lo'onatac 'Enauacna, 'am hueta'aguet.
3Qalaxaye nacheso se'eso pe, da Ñim Lo'onatac 'Enauacna da 'enapega so Natán, 'eeta': 4«'Anqo'ona ñi ỹamaxashec David, nache qonapega da Aỹem Nataxala' da ỹa'aqtac, 'eeta': ‹Saishet da nache 'am da 'ano'oxoosheguem aca atamnaxaqui maye ỹalamaqte da yaqto' ỹanataxaqui. 5Qaq chegoqta'a se'eso na'a'q co'ollaq ñeqatec na Israel le'ecpi, choche ivitta'a nagui da saishet da sootaigui aca atamnaxaqui, nacherata da sootaigui naxa ñi npe'l maye choche qanqochenaxatta. 6Qaq 'enauaque se'esoua vi'iye da ñenaictague' somayepi, qalaq saishet da huo'otaq seỹaxaatacot ca 'oonolec se'eso nataxala'pi maye sepataxaguet da ilo'ogue na Israel le'ecpi, da huo'otaq no'oxoosheguem aca atamnaxaqui maye nda'a't na 'epaq cedro. 7Qaq ỹoqo'oye qonapega qome ñi ỹamaxashec David, da Aỹem Nataxala' maye qaica ca Seqalanapec, da ỹa'aqtac 'eeta': Aỹem, 'am sachegoxottoigui co'ollaxa aso laỹe' ana qagueta, da 'am ñeqateeguesop da 'aulotague' asomayepi da yaqto' 'am sanagui da 'am lataxala' na ỹalamaxat nhuo' Israel le'ecpi. 8Nache 'am ñenaictague' 'enauac da 'icỹaxac, qataq 'am setauaatac da yaqto' 'anmatchiguiñi so 'anpa'aguenaxauapi maye 'am dataỹa'aguet co'ollaxa, nache 'am sanem da 'ayo'oxoyec, da qoneta'am nam ỹalleppi maye ỹo'oxoraicpi maye huetalec ana 'alhua. 9Nataqa'en seqataxanai' ye lma' na ỹalamaxat nhuo' Israel le'ecpi, da yaqto' nache lalamaxat ñaqa'en, nache qaica ca iraxanai', huo'otaq da ca qauemaicpi ỹe'enai' namayepi, da 'eeta'ama soua hua'au' na'axa'te, 10som na'axa'te co'ollaq sauo'o so nataxala'pi da ilo'ogue na ỹalamaxat nhuo' Israel le'ecpi, nacherata da qaica ca la'amaqchec ñaqa'en so 'anpa'aguenaxauapi. Qataq 'am saỹaanaxanaxanec da huo'o ca 'aỹa'alaqpi qome, 11qaq qom ivita ca loga't da 'anachaalataxac, nache nachaañi ñaqa'en cam 'am chegoxoguet da yaqto' nache queta da 'aro'onataxanaxac. 12Nache camaye nacheca ca no'oxoosheguem qome aca atamnaxaqui maye ỹalamaqte, qaq aỹem sanem da nache 'eetai' da qaica ca iraxanai' da lo'onataxanaxac. 13Qaq nache aỹem lta'a, qataq camaye nache ỹalec, qataq saishet da ñeqateeguesop qome da ỹauotaxanaqtaic, da huo'otaq 'eeta'am som 'auca'atalec co'ollaxa, 14nacherata da qaica ca iraxanai' da hueta'a na ima' qataq da ỹo'onataxanaxac. Qaq de'era lo'onataxanaxac nache 'eetai' da qaica ca iraxanai'.›»
15Nache so Natán da'aqtaxanem so David, nache ipacchigui 'enauac de'era ỹauaachigui qataq da hua'aqchigui somaye. 16Huaña nache so nta'a David, nachaateua'a so lanataqa' Ñim Nataxala', nache 'enapeco': «'Am Nataxala' maye 'Aro'onatac 'Enauacna, ¿che negue'to' aỹem qataq na ỹalaqpi, da yaqto' aỹem 'anviraxata'a ne'ena? 17¡Qaq ye ỹataqta qaica ca la'amaqchec 'anqa'en de'era, 'Am Nataxala' maye 'Aro'onatac 'Enauacna, ye ỹataqta 'avira'a da 'aua'axat cam ñaq natauo llalaqpi ne'ena 'arlatac, qataq da aỹem 'aulota'a qalaq aỹem 'ena'am 'anqa'en ca 'amaqtaqaic ỹale! 18¡Negue'to' ca lỹa sa'axat da sa'axattac de'era na'amaqchec maye 'aỹa'anem ne'ena 'aramaxashec, ye ỹataqta 'auauatton nam 'aramaxashec! 19Qaq 'enauac na 'auo'otpi maye huo'o da llo'oxoyec 'Am Nataxala', souaxat da 'arauotaxanaqtaic ne'ena 'aramaxashec, qaq damaye chegoqchigui da maiche qonetapeguec. 20'Am Nataxala', qaica ca lỹa 'am 'eeta'am, qataq qaica ca lỹa ỹaqauga atamnaxala' da sa'axasoqteguelec da 'am 'eeta'am. 21Qaq ỹoqo'oye negue'tom ca 'eeta'am ne'ena 'aralamaxat nhuo' Israel le'ecpi, cha'aye nachenata namayepi da 'ausoueeguesop co'ollaxa da nlataguec da yaqto' 'aralamaxatpi, nache 'auo'ot da la'amaqchec da 'are'enaxat, 'auachegoxotchigui na lta'araicpi maye ỹo'ot da na'aalaxa, co'ollaq 'auamaqauec nam ỹotta'a't shiỹaxauapi, ỹauaachigui 'anqa'en na 'aralamaxat nhuo' le'ecpi, maye 'anqateeguesop co'ollaxa ye Egipto. 22Cha'aye 'am, 'auacona co'ollaxa da 'aralamaxat na Israel le'ecpi, yaqto' chochaq tatec da 'aralamaxat namayepi, qaq 'Am Nataxala', nache 'am da 'Am Natamnaxala' namayepi.
23Qaq ỹoqo'oye nagui, 'Am Nataxala', nache 'eetai' qome da qoqueto'ot da 'auo'ottac da 'ara'aqtac maye 'aỹa'anem co'ollaxa na 'aramaxashec, qataq nam llalaqpi namaye. Nache 'aupaqueelec qome da qonapec, 24yaqto' da 'are'enaxat nache 'eetai' qome, qataq da 'ayo'oxoyec chochaq tatec, yaqto' 'enauac na shiỹaxauapi, 'eeta': ‹¡Ñim Nataxala' maye Qaica ca Ỹaqalanapec, nacheñi Ñim Natamnaxala' na Israel le'ecpi!› ¡Qaq na llalaqpi so 'aramaxashec David, nache 'eetai' qome da 'ampaxattalec! 25'Am Ñatamnaxala', aỹem 'auaỹaanaxanaxanec co'ollaxa da taỹa'a da nache 'eetai' da nta'alpi na ỹalaqpi, ỹoqo'oye na'aictaxa da aỹem 'aramaxashec, qalaxaye 'am sanot da ñachoxonnaxac. 26'Am Nataxala', nache 'Am maye 'Auo'otapecna, qaq 'am 'auachaxana co'ollaxa da 'arsoxoyec ne'ena 'aramaxashec, 27qaq ỹoqo'oye nagui nache talec 'anqa'en ca nqouagaxa na llalaqpi ne'ena 'aramaxashec, yaqto' nache 'eetai' qome da 'ampaxattalec, cha'aye 'Am Nataxala', mashe talec 'anqa'en da nqouagaxa namayepi, qaq nache 'eetai' qome damaye.»
