1 Crónicas 18

₁Qaq co'ollaq ime de'era, nache so David loxonec so filisteopi, nache choche ilattac qataq deuotaxanec so huaqta'a't nỹecpi ye Gad, qataq som lauoreuapi nma'piolec. ₂So David, nataqa'en loxonec co'ollaxa so moabiitapi, nache choche ilattac, qataq desheetenaxaatac naqa'en somayepi.

₃So David, nataqa'en loxonec so Hadad Ezer, som nta'a ye Soba, yem huaña da pa'aỹa'ague ye Jamat, co'ollaq taỹa ye 'alhua maye hueto'ot na loigue so tala Éufrates da yaqto' nquigaxatec da lo'onataxanaxac. ₄Qaq so David, ỹacona aso cuatro mil alaataxaquipi naigonapi, qataq loxonec so siete mil alleppi maye netalec so caipi, qataq veinte mil alleppi maye petañepi, nataqa'en ỹacagaxat na lapia'pi so caipi maye lauegaxala' aso alaataxaquipi naigonapi, qaq nacherata da no'onaxatañi so laỹepi caipi da yaqto' lauegaxala' aso cien naigonapi.

₅Ime, nache nvi' so siiriopi maye chegaqa'a ye Damasco da yaqto' itauan so Hadad Ezer, som nta'a ye Soba, qalaxaye so David, loxonec co'ollaxa so siiriopi nache ỹalauat so veintidós mil maye laỹepi somayepi. ₆Huaña, nache so David ỹauo'o so lauanaxanaxanecpi da hueta'a ye Siria maye huaigui ye Damasco, nache so David choche ilattac so siiriopi, qataq desheetenaxaatac naqa'en. Qaq 'era da 'eetec da Ñim Nataxala' ỹanem da lauegaxanaxac so David, 'enauac nam ivira'a 'alhuapi.

₇Qaq so David, ỹacona nataqa'en aso npaqtaxanaqtepi oro maye lpaqtaxanaqtepi so 'amaqtaqaic ltauapi so Hadad Ezer, nache ira'a ye Jerusalén. ₈Nataqa'en ỹacona so qalota lcat bronce, maye chegaqaña so huaqta'a't nỹecpi ye Tibejat qataq ye Cun, maye lalamaxat so Hadad Ezer. Qaq nacheso so do'onataxana so Salomón co'ollaq ỹo'ot aso late'erai laỹe' na 'etaxat, qataq aso nhuoqtepi, qataq so no'onataxanaxatpi maye lalamaxat aso atamnaxaqui.

₉Qaq so Toy, som nta'a ye Jamat, co'ollaq ỹaỹaten da so David loxonec 'enauac so nalleppi so Hadad Ezer, maye nta'a ye Soba, ₁₀nache somaye ỹamaq so llalec Adoram, somaye ỹachetac so qalota nogoxoshetpi chegaqaigui na oro, plata qataq na bronce, da yaqto' taỹa da nquine' so David, qataq ntootapeguec somaye, souaxat da iloquiaxan qataq nauec so Hadad Ezer, cha'aye so Toy, nataqa'en deloctague' co'ollaxa so Hadad Ezer. ₁₁Qaq so David, ỹanot co'ollaxa Ñim Nataxala' se'eso nogoxoshetpi, lỹateuo naqa'en so oro qataq so plata maye lhuotaxanaxatpi co'ollaq nhuo' so laỹepi shiỹaxauapi, maye lma' ye Edom, Moab, Amón, Filistea qataq ye Amalec.

₁₂Nataqa'en so Abisay, maye llalec aso Seruyá, nauec nache ỹalauat so dieciocho mil edomiitapi, huaña so ca'amegue maye huaña na toue. ₁₃Ime, nache so David ỹauo'o so lauanaxanaxanecpi da hueta'a ye Edom, nache choche ilattac so edomiitapi, qaq Ñim Nataxala', ỹanem da lauegaxanaxac so David, 'enauac nam ivira'a 'alhuapi.

₁₄Qaq so David, ilotague' co'ollaxa 'enauac ye Israel, qaq da lo'onataxanaxac somaye da nmit so lauo' le'ecpi, ỹataqta ỹaỹamaqchiguiñi qataq nalochiguiñi. ₁₅Qaq so Joab, som llalec aso Seruyá, nacheso so 'amaqtaqaic lataxala' so alleppi, qaq so Josafat, som llalec so Ajilud, nacheso so leraxanaxanec so nta'a. ₁₆Qaq so Sadoc, maye llalec so Ajitob, qataq so Ajimélec, som llalec so Abiatar, nachesoua soua ntaxaỹaxanaxanaqa, qaq so Savsá, nacheso so neraxanaxanec. ₁₇Qaq so Benaías, maye llalec so Joyadá, nacheso so ilotague' so quereteopi qataq so peleteopi. Qaq so llalaqpi so David, nacheso so ltauapi so nta'a.