So David loxonec ye Rabá
1Qaq huo'o so na'a'q, maye huetoigui so nauoxo, maye huetoigui naxa da so nta'alpi jec da nalat, nache so Joab, laỹona't so qalotoigui nalleppi nache inoxotaua'a ye na'alhua so amoniitapi. Ime, nache taỹa ye Rabá, nache coleesop da iloquiaxan, nache nlachiguiñi naqa'en yemaye, qaq so David, qalaq hueta'a co'ollaxa ye Jerusalén. 2Qaq ime co'ollaxa nache so David, ỹacona aso naro'o so nta'a ye Rabá, qaq asomaye ndota't oro, qataq llo'oxoraxat so no'on coma', qaq ye lsallaxa asomaye ivi' treinta y tres kilos, nache asomaye qoỹanagui na lqaic so David. Qataq somaye ỹacona so qalota nogoxoshetpi maye huo'o da lyac, ỹachegoxotaigui se'eso huaqta'a't nỹecpi. 3Qataq nataqa'en nqatec 'enauac se'eso shiỹaxauapi maye no'onaigui co'ollaxa se'eso huaqta'a't nỹecpi, nache ỹamaxalec da dechegaxaatac, qataq da do'onataxana na nchegoxosoxonaxat lcat, qataq ana qachepe. Qaq nache 'eetec nataqa'en 'enauac so laỹepi huaqta'a't nỹecpi maye ỹotta'a't naua nañalo maye lalamaxat so amoniitapi, ime co'ollaxa nache so David, ỹe'eguelaxa ye Jerusalén, lỹatac 'enauac so nalleppi.
Co'ollaq qailogui' so logoraicpi ỹalleppi
4Qaq co'ollaq ime de'era, nache huo'o so loquiaxac da qailogui' so filisteopi, huaña ye Guézer. Qaq nache huetoigui co'ollaxa da so Sibecay, maye lma' ye Jusá, ỹalauat so Sipay, som chegoxoguet som logoraic ỹalleppi. 5Qaq co'ollaq qaỹata'ague de'era, nache huo'o so lỹa alaataxac da qanalattague' so filisteopi, nache huaigui da so Eljanán, maye llalec so Yaír, ỹalauat so Lamí, som lqaỹa so Goliat, maye lma' ye Gat, qaq aso lataquiaxai somaye ỹataqta late'erai.
6Qaq ime de'era nache qaltaq huo'o so lỹa alaataxac huaña ye Gat, yem netaña co'ollaxa so logoraic ỹale, maye ñi 'oonolec naua lhua'q, seis naua llaxaata, qataq ñi 'oonolec naua lapia'ate, seis naua lqona, qaq da ima'a't nache ivi' veinticuatro. Qaq somaye nataqa'en chegoxoguet som logoraic ỹalleppi, 7qaq se'eso ỹale, nshegueetacot co'ollaxa so Israel le'ecpi, qalaxaye so Jonatán, som llalec so Simea, maye lqaỹa so David, ỹalauat co'ollaxa somaye. 8Qaq se'eso logoraic ỹalleppi, somayepi chegoxoguetpi co'ollaxa so Refaj, maye lma' ye Gat, qalaxaye so David qataq so nalleppi ỹalauat co'ollaxa somayepi.
