So David ỹo'ot aso le'enaxat lmalate so nhuo' le'ecpi
1Qaq se'eso pa'aguenataxanaxaic dataỹa'aguet co'ollaxa so Israel le'ecpi, nache ỹayena'a so David da ỹo'ot aso le'enaxat lmalate so Israel le'ecpi. 2Huaña nache so David ỹamaq so Joab, qataq som lataxala'pi so nhuo' le'ecpi, 'eeta':
Qoqui qome nache qauo'oche aca le'enaxat lmalate na Israel le'ecpi, chegoqchiguiña qanqa'eñi ye Berseba, nache ivitta'a na netaña ye Dan, qaq qom ime nache aỹem qandoiua'a aca le'enaxat lmalate namayepi, da yaqto' saỹaten cam lcata nam huo'o.
3Qalaxaye so Joab, 'enapeco':
Ñim Nataxala', cien qome da ỹe'eguelaxalec da nquigaxatec ye lcata na nhuo' le'ecpi; qalaxaye 'am ỹataxala'! ¿Peta'a saisheto' da 'enauac namayepi da 'aramaxashecpi? Qaq 'am ỹataxala' ¿ta'ainco' da 'auauotaique da 'auo'ot de'era maye taỹa'a da ỹo'ot ca lasouaxashet na Israel le'ecpi?
4Qalaxaye da lamaxasoxonaxac so nta'a, napacalec da lhuennataxa so Joab, qaq ỹoqo'oye so Joab jec co'ollaxa da coleelec 'enauac ye 'alhua Israel. Ime, nache ỹe'eguelaxa ye Jerusalén, 5nache ỹanot so David ye lcata se'eso nhuo' le'ecpi, nache som hueta'a ye Israel ivi' un millón cien mil so ỹalleppi, maye lhuotta da nalat, qataq cuatrocientos setenta mil so hueta'a ye Judá. 6Qalaxaye saishet da qaỹalecneua'a asa'aso ne'enaxat lmalate som chegoxoguetpi so Leví, qataq so Benjamín, cha'aye so Joab, saỹaỹamaxaren de'era lamaxasoxonaxac so nta'a. 7Qaq Ñim Lo'onatac 'Enauacna, saỹaỹamaxaren co'ollaxa de'era, nache ỹo'ot da nhuaxanaguec so Israel le'ecpi. 8Huaña nache so David, 'enapega co'ollaxa Ñim Lo'onatac 'Enauacna, 'eeta':
Aỹem, ỹataqta lta'araic da ỹasouaxashet, souaxat da so'ot de'era. Qaq ỹoqo'oye 'am ñachoxonnot da 'auapalaxat da lasouaxashet ne'ena 'aramaxashec, souaxat da se'enaxat ca qaica ca ỹaỹaana'a.
9Huaña, nache Ñim Nataxala' 'enapega so Gad, som lamaxashec so David maye huo'oi naua l-loxoco, 'eeta': 10«'Anqo'ona qome ñi David, nache 'aua'aqtaxanem qome qoneta': Da la'aqtac Ñim Nataxala', 'eeta': 'Am sanema naua tres lataxaco da 'anhuaxanaguec, qalaxaye 'alca'aua'a qome ca 'oonolec naamaye, nache 'am talec ñaqa'en qome.» 11Nache so Gad nqo'ona so David, nache 'enapega 'eeta':
Da la'aqtac Ñim Nataxala', 'eeta': «'Alca'aua'a qome ca 'oonolec ne'enaua tres maye 'am sanema: 12Tres vi'iye ca nqouaxa, huo'otaq tres ca'agoxoiqa da 'ancanaguec, da 'am icaatac na 'ampa'aguenaxauapi da 'am irolec na lainec, huo'otaq caua tres na'axa'te da Ñim Nataxala' talec naqa'en ca nalolaxa 'enauac na 'alhua na Israel.» Qaq nagui ñaq 'auo'ot cam 'arasataxac yaqto' sa'aqtaxanem ñim aỹem namaq. 13Nache so David ỹasateguet so Gad, 'eeta': Aỹem, ỹataqta lta'araic da lqalaic ñaqa'en damaye. Qalaxaye 'onaxaico' da nache aỹem qome da ỹo'ot ca ñeuaxanaguec Ñim Nataxala', cha'aye Ñimaye ỹataqta lta'araic da lauotaxanaqtaic, qaq saishet qome da nachena na shiỹaxauapi da ỹo'ot ca ñeque'eenaxac.
14Qaq huaña nache Ñim Nataxala', talec naqa'en ye Israel so nalolaxa, nache ileu so setenta mil Israel le'ecpi. 15Qataq Ñim Nataxala' namaxa ye Jerusalén so lamaxashec piguem le'ec da yaqto' nlaxaañi yemaye, qalaxaye co'ollaq ñaq nlaxattapiguiñi yemaye, nache Ñim Nataxala' ilota'a somaye, nache huo'o da ntogotaxac da ỹauo'o da nhuaxanaguec somayepi. Nache 'enapega somaye 'eeta': «¡A'aye qome, saishet da qoqueto'ot de'era!»
Qaq som lamaxashec piguem le'ec Ñim Nataxala' hueta'a co'ollaxa ye sa qaỹapeque so lchegoxosoxonqa' so Ornán, som jebuseo. 16Qaq co'ollaq namatasheguem so David, nache ila'a so lamaxashec piguem le'ec Ñim Nataxala', da huaỹoteguelec na piguem qataq ana 'alhua, nasoqta'a so lainec, nache ỹareetalec ye Jerusalén. Huaña, nache so David, qataq so nqueroxonecpi, ỹaayiñi naua sa nsattegueta logo, nache nqollemta'aguet na 'alhua. 17Nache so David, 'enapega Ñim Lo'onatac 'Enauacna, 'eeta': Aỹem so'ot da qauem, qataq nache aỹem da huo'o da ỹasouaxashet, qalaxaye ne'ena shiỹaxauapi ¿negue'to' cam ỹo'ot? Qaq ỹoqo'oye 'Am Nataxala' maye 'Am Ñatamnaxala', 'am ñachoxonnot da aỹem talec 'anqa'en qome ca ñeuaxanaguec qataq nam ỹalaqpi, qalaxaye saishet da talec 'anqa'en da nhuaxanaguec ne'ena 'aralamaxat nhuo' le'ecpi.
So David no'oxoosheguem aso nca'atoxonaxalate
18Qaq huaña nache so lamaxashec piguem le'ec Ñim Nataxala', 'enapega so Gad, da no'oxoosheguem aca nca'atoxonaxalate da lalamaqte Ñim Nataxala', ỹanaña so lchegoxosoxonqa' so Ornán, som jebuseo. 19Huaña nache so David jec, da ỹo'ot dam la'aqtac so Gad, maye Ñim Nataxala' ỹanem co'ollaxa somaye. 20Qaq so Ornán maye ichegoqtac co'ollaxa na trigo, co'ollaq nqoilec nache ila'a so lamaxashec piguem le'ec Ñim Nataxala', qaq soua cuatro llalqa maye nnaictagueto somaye, nqañoxooyiñi. 21Qaq so David, co'ollaq mashe nayeeta'a som hueta'a so Ornán, nache somaye namatasheguem nache ila'aguet so David, nache ca'ai som hueta'a da ichegoqtac na trigo, nache nqollemñi da ỹa'aldoto naua l-llecte so David. 22Ime, nache so David 'enapega so Ornán, 'eeta':
Ñaq aỹem 'aỹa'anem qome ne'ena 'archegoxosoxonqa' da yaqto' sanaña aca nca'atoxonaxalate maye lalamaqte Ñim Nataxala', qalaxaye 'analoqchiichigui qome aca lasheue namaye da aỹem 'aumenot, yaqto' vi'iiguet nam nalolaxa maye icogaxaatac ne'ena nhuo' le'ecpi.
23Nache so Ornán ỹasateguet so David, 'eeta':
'Am 'amaqtaqaic, aỹem 'am sanem namaye, nache maicheye cam 'auataxaateuga. Qaq aỹem 'am sanem naua nauegaxanaxala'ate huaca da yaqto' nachetaqtaxanaqte qaỹavigaxatta, qataq na nchegoxosoxonaxat da yaqto' nalonaxanaxat, qataq na trigo da yaqto' nachetaqtaxanaxat. Qaq 'enauac ne'ena, choche 'am saatem.
24Qalaxaye so nta'a David, 'enapego' so Ornán, 'eeta':
Saishet, cha'aye saishet da choche sacoolec cam 'aralamaxat da sanot Ñim Nataxala', qataq saishet da sanot Ñimaye cam nachetaqtaxanaxat qaỹavigaxatta da saishet da isheenaxanaxat.
25Qaq 'era da 'eetec da so David desheenaxana so lma' so Ornán, nache ỹanem aso seiscientos lcatpiole maye nda'a't oro da lasheue somaye. 26Qaq so David, nache ỹaachiguiña somaye da no'oxoosheguem aso nca'atoxonaxalate maye lalamaqte Ñim Nataxala', nache huaña da ỹaneuo so lachetaqtaxanaxat qaỹavigaxatta qataq aso lachetaqtaxanaqte qanhuaachigui. Ime, nache iỹaxanot Ñim Nataxala', nache Ñim Nataxala' ỹasateguet somaye, nache namaq so norec chegoqtot na piguem nache talec naqa'en aso nca'atoxonaxalate maye qaỹachalec naxa nam nachetaqtaxanaxat qaỹavigaxatta. 27Huaña, nache Ñim Nataxala' 'enapega so lamaxashec piguem le'ec da ỹoxochigui so laỹe' so lainec.
28Qaq so David, co'ollaq ila'a da Ñim Nataxala' hua'axaỹa somaye huaña ye lchegoxosoxonqa' so Ornán, som jebuseo, qaq nache huaña yemaye da ỹaneuo so lachetaqtaxanaxat. 29Cha'aye so npe'l maye lanataqa' naxa Ñim Nataxala', maye nauaxaỹaxaasheguem co'ollaxa so Moisés huaña ye toolec 'alhua, qataq aso nca'atoxonaxalate maye qaỹachalec naxa na nachetaqtaxanaxat qaỹavigaxatta, ñaq netraña co'ollaxa ye qaỹoqotcheguema 'alhua ye Gabaón, 30ỹoqo'oye so David, saishet co'ollaxa da taỹa yemaye da ichemaxata cam 'eetapeguec Ñim Lo'onatac 'Enauacna, cha'aye ỹataqta lta'araic da lcolanaxa souaxat da ỹauaachigui so lamaxashec Ñim Nataxala' da nasoqta'a so lainec.
