Nam lo'onataxanaxacpi so leviitapi
1Qaq co'ollaq mashe ỹataqta ỹa'axaiquiolec so David, nache ỹaneuo so llalec Salomón da yaqto' lta'a so Israel le'ecpi, 2nache laỹona't 'enauac so lataxala'pi so Israel le'ecpi, ntaxaỹaxanaxanecpi qataq so leviitapi. 3Huaña nache qanaloqten so leviitapi maye napactelec ye treinta vi'iye da nachaalataxac, nache ye lcata somayepi ivi' treinta y ocho mil ỹalleppi. 4Qaq somayepi nache qaỹachegoxotaigui so veinticuatro mil da yaqto' ilo'ogue da no'onataxanaxac asom atamnaxaqui, qaq so seis mil, qoỹanem da 'amaqtaqaic nataxala'pi, qataq da nmit nam nasouaxashetpi, 5qataq cuatro mil so lasom lo'opi, qataq so laỹe cuatro mil, nache pa'aỹa'aguet da no'onaxanaxac da qaỹo'oxoren Ñim Nataxala' ỹauota'a aso lviquepi, asom damaxasoxoolec co'ollaxa so David, da yaqto' qaỹo'ogoxona da qaỹo'ot dam ño'oxonnataxanaxac. 6Nache so David, naloqchiiñi co'ollaxa somayepi, ilo'oguet ye lcata so llalaqpi so Leví: So Gersón, Coat qataq so Merari.
7Qaq soua llalqa so Gersón: Laadán qataq so Simey. 8Qaq soua llalqa so Laadán, le'enaxa't: Yejiel som ỹe llalec, qataq Zetán, qataq so Joel. 9Qaq soua llalqa so Simey, le'enaxa't: Selomit, Jaziel qataq Harán. Qaq soomaye nachesoua soua lataxala'ate so ñalaqpi maye chegoxoguetpi so Laadán. 10Qaq soua llalqa so Simey, le'enaxa't: Yajat, Zina, Jeús qataq so Beria. 11Qaq so Yajat, nacheso so ỹe, qaq so Zina, nacheso som ca'atalec somaye, qaq so Jeús qataq so Beria, soomaye saishet da qalota som llalaqpi, ỹoqo'oye qaimata'a't da qanaloqten somayepi.
12Qaq soua llalqa so Coat, le'enaxa't: Amirán, Isar, Hebrón qataq so Uziel. 13Qaq soua llalqa so Amirán, le'enaxa't: Aarón qataq so Moisés. Qaq so Aarón, nacheso so lca'aguishec Ñim Lo'onatac 'Enauacna, da yaqto' ỹaneuo ana nachetaqtaxanaqte maye sa qaishetapec, qataq da ỹavigaxat na nchenaxanaxat da ỹanot Ñim Nataxala', qataq da huapegue' qataq da talec naqa'en da nchoxonnataxanaxa so nhuo' le'ecpi, qaq de'era no'onataxanaxac, nachera da qaipa'axaneguet da nache 'eetai' da ỹo'ottac so Aarón qataq soua llalqa. 14Qaq so llalaqpi so Moisés maye lo'onataxanaxanec Ñim Lo'onatac 'Enauacna, qaimata'aguet da qanaloqten som chegoxoguetpi so Leví.
15Qaq soua llalqa so Moisés, le'enaxa't: Gersón qataq so Eliezer. 16Qaq so la'auaxanec llalec so Gersón, le'enaxat: Sebuel. 17Qaq so Eliezer, 'oonolec so llalec le'enaxat Rejabías, qaq se'eso Rejabías ỹataqta qalota so llalaqpi. 18Qaq so la'auaxanec llalec so Isar, le'enaxat Selomit. 19Qaq soua llalqa so Hebrón, le'enaxa't: Jerías, Amarías, Jahaziel qataq so Jecamán. 20Qaq soua llalqa so Uziel, le'enaxa't Micaía qataq so Isías.
21Qaq soua llalqa so Merari, le'enaxa't Mali qataq Musi. Qaq soua llalqa so Mahli, le'enaxa't Eleazar qataq so Cis. 22Qaq so Eleazar, co'ollaq ileu nache qaica ca llalec ỹale, qalaxaye huo'oi soua llale 'alo, qaq soomaye huaronegueta soua maiche lauo' lashe', maye llalqa so Cis. 23Qaq soua llalqa so Musi, le'enaxa't Mali, Edar qataq Jeremot.
24Qaq se'esopi nacheso som chegoxoguetpi so Leví, ỹataqtac som chegoxoguet lta'alpi co'ollaq qoỹerelec aso ne'enaxat lmalate da yaqto' lataxala' nam maiche llalaqpi, maye napactelec ye veinte vi'iye da nachaalataxac. Qaq somayepi, nacheso som huetague' na no'onatacpi aso atamnaxaqui maye lalamaqte Ñim Nataxala'.
25Cha'aye so David, 'enapeco': «Ñim Nataxala' maye Natamnaxala' na Israel le'ecpi, ỹanem da l-lagaxayec nam lalamaxat nhuo' Israel le'ecpi, qaq Ñimaye lca'ateua'a ye Jerusalén da nache 'eetai' da hueta'a. 26Ỹoqo'oye na leviitapi saishet qome da qaltaq ỹe'eguelaxa da nquigaxattac ñi npe'l maye lalamaxat Ñim Nataxala', qataq nam no'onataxanaxatpi da qaỹo'ot da ño'oxonnataxanaxac.»
27Qaq 'era da 'eetec da ipacchigui qanqa'en da la'aqtac so David, nache qaỹo'ot aso le'enaxat lmalate nam chegoxoguetpi so Leví, maye napactelec ye veinte vi'iye da nachaalataxac, 28qaq da lo'onataxanaxac somayepi nache itauaatac som llalaqpi so Aarón, da huetague' nam no'onatacpi aso atamnaxaqui maye lalamaqte Ñim Nataxala', qataq so nqasoxoc qataq so nanataxaquipi, qataq da qui'itta naqa'en som no'onataxanaxatpi maye sa qaishetapec, qataq nam laỹepi no'onataxanaxacpi da huaña aso atamnaxaqui maye lalamaqte Ñim Nataxala'. 29Qaq nataqa'en somayepi pa'aỹa'aguet da ilo'ogue aso nauolepi maye sa qaishetapec da lapotcheguem naqa'en, qataq so 'ayiiña maye nachetaqtaxanaxat, qataq aso nauole maye sa qaỹauo'o ca lalegue ỹasheeraxachigui, qataq aso ntoñiguishe huo'otaq aso qoỹaatauaq, qataq 'enauac som no'onataxanaxat da qanaloqten qataq da qaỹo'ot ye lcata. 30Qataq nataqa'en ye nte'eta qataq ye avit, nache iuen da hueta'a aso atamnaxaqui, da yaqto' ỹanot da 'achecỹaxac, qataq da ño'oxonnataxanaxac Ñim Nataxala'. 31Nataqa'en nachesopi som ỹanot Ñim Nataxala' 'enauac so nachetaqtaxanaxat qaỹavigaxatta, qataq ye na'a'q mataxaqui, qataq da dalaxaic so ca'agoxoic, qataq nam laỹepi maye laloxoquipi da ño'oxonnataxanaxac, nache queto'ot da huetague' na lalamaxatpi Ñim Nataxala'. 32Qaq somayepi nataqa'en ilotague' so npe'l maye naỹonqa', qataq so ndaqa' maye sa qaishetapec, qataq da ỹo'ottac na no'onatacpi da huaña aso atamnaxaqui, nache ntaueetague' som lqaỹañecpi maye chegoxoguetpi so Aarón.
