1 Corintios 11

₁Qami' qoquiitelec qome da ỹataxac, 'eeta'am da sheetec da shectelec da lataxac So Cristo.

₂Qami' ỹaqaỹañicpi, ỹataqta qami' ñetootapegueque, cha'aye ỹataqta aỹem qarhuennataxache, qataq qaualaqailec da ỹapaxaguenataxanaxac maye qami' sanema. ₃Qaq nagui sauotaique da qauaỹachiñi de'era: So Cristo huo'o da 'enec da ilotalec ca ỹale, 'eeta'am ca ỹale da huo'o naq 'enec da ilotalec aca lhua. Qaq nache 'eetec Ñim Lo'onatac 'Enauacna da ilotalec So Cristo. ₄Ca ỹale da ỹapotalec na lqaic da huo'otaq nqouagaxaueetac, huo'otaq ỹa'axatta'ape naua na'aqtaqa maye chegoqo'oto Ñim Lo'onatac 'Enauacna, camaye huota'a naqa'en da ne'enaguec na lqaic souaxat da ỹapotalec. ₅Qalaxaye aca 'alo da nqouagaxaueetacot Ñim Lo'onatac 'Enauacna huo'otaq da ỹa'axatta'ape naua la'aqtaqa Ñimaye da saishet da ỹapolec na lqaic, nache acamaye qaica naqa'en ca 'enec ca lhua. Qaq acamaye 'eeta'am da ỹataqta imauec da npetec na laue. ₆Qaq aca 'alo da saishet da ỹapolec na lqaic, nache 'onaxaic da imauec da npetec na laue. Qalaxaye da 'enauac qaỹa'aguelec aca 'alo souaxat da npetec na laue, qaq no'on da ỹapolec na lqaic. ₇Ca ỹale saishet da iuen da ỹapotalec na lqaic, cha'aye co'ollaq qaỹo'ot, nache huac da 'eeta'am da lataxac Ñim Lo'onatac 'Enauacna qataq ỹaatañi da la'amaqchec Ñimaye. Qalaxaye aca 'alo ỹaatañi da llo'oxoyec ca ỹale. ₈Cha'aye Ñim Lo'onatac 'Enauacna co'ollaq ỹo'ot so ỹale, qaq saishet da ỹachegoxotaigui aso 'alo. Nachaqrata da co'ollaq ỹo'ot aso 'alo, nache ỹachegoxotaigui so ỹale. ₉Qaq aso 'alo qaỹo'ot da ltaua qanqa'en so ỹale. Qaq saishet da qaỹo'ot so ỹale souaxat aso 'alo. ₁₀Qaq 'era da huo'omshe aca 'alo iuen da ỹauo'o ca lapoxot na lqaic, souaxat da ỹachaxan da 'enec ca ỹale qataq na chegaqasheguem namaxashecpi. ₁₁Qalaxaye nagui da sa'amaqtenaq So Cristo, nache qaica ca ỹale da sa iuen aca 'alo, qataq qaca aca 'alo da sa iuen ca ỹale. ₁₂Qalaxaye da ỹoqta 'eesa da aso hua'auchiguiñi 'alo da qaỹachegoxotaigui so ỹale, qaq nataqa'en 'eesa da ca ỹale chegaqaigui aca 'alo. Qalaxaye so ỹale qataq aso 'alo qataq 'enauac nam huo'o, namayepi lo'onatac Ñim Lo'onatac 'Enauacna.

₁₃Maiche qauennataxañiilec da ỹaỹamaqchiguiñi aca 'alo da sa ỹapolec na lqaic da huo'otaq nqouagaxaueetacot Ñim Lo'onatac 'Enauacna. ₁₄Cha'aye da maiche qarataxac, de'era ỹataqta ỹo'ot da na'aloxo da ca ỹale nalogaxat na laue, ₁₅qalaxaye aca 'alo ỹataqta qaỹo'oxoren da nalogaxat na laue, cha'aye Ñim Lo'onatac 'Enauacna ỹanem da logoraic na laue da yaqto' ỹapolec na lqaic. ₁₆Qalaxaye da huo'o ca nshetaique da dataỹa'aguet de'era, qaq no'on da ỹaỹateeta da qomi' qataq nam ỹa'amaqteetac Ñim Lo'onatac 'Enauacna qaica ca lỹa saỹaanaq lataxac, nachaqrata de'era.

₁₇Huo'o da huo'omshe saishet da qami' ñetootegueque, qaq damaye nachera da lataxac da qaraponaxaqui maye qauo'ocheetac. Cha'aye saishet da qami' ỹaỹamaxaayiñi, nachaqrata da qami' na'aqche't. ₁₈Qaq sa'auaxaachiguiñi de'era, cha'aye aỹem qaỹa'aqtaxaateguem naxa da ivita da qalapoñiỹa't da qauo'onaxañi, nache saishet da qanhuooñiỹa't qataq qaucolaqaitagui. Qaq damaye sa'amaqten da 'eesa. ₁₉Qaq damaye iuen da nache 'eetec, yaqto' yo'oq na ỹoqta 'eesa da ca'attague' So Cristo. ₂₀Cha'aye souaxat da qami' qaucolaqaitagui, nache naxa da ivita da qauo'oche da nquia'axac maye naigui da qaiuennate So Qarataxala', nache de'era qarquia'axaqui saishet da nacheso Somaye da qauennache. ₂₁Cha'aye da ivita ye laloqo' da qauqui'i, nache ñi 'oonolec hua'aualec da deque'e, qaq saishet da iuata'a ca lỹa. Qaq ỹoqo'oye huo'o na iqouat, qaq na laỹepi qalaq ivira'a da taxaicpi. ₂₂¿Qaicaua peta'a naua maiche qarma'achilli' da qauqui'i qataq qanỹomi? Qaq da nache qoñiita'ac de'era, nache 'eeta'am da sa qauyacñiỹapec na laỹepi maye ỹa'amaqteetacpi Ñim Lo'onatac 'Enauacna qataq qauauoita'a da la'aloxo nam qaica ca ye. ¿Negue't ca qauacheetaique ỹa'aqtac da qami' sanema? ¿Qami' sho'oxoren peta'a? ¡'A'i, saishet da qami' sho'oxoreeta'ape!

₂₃Cha'aye aỹem saconeguet de'era napaxaguenataxanaxac maye chegoqo'ot So Qarataxala' Jesucristo, da se'eso pe co'ollaq yaqta'a da qoỹaneuo, nache ỹacona aso nauole 'ayiiña. ₂₄Nache ỹanot da na'achec Ñim Lo'onatac 'Enauacna. Ime, nache ncolaxaañi aso nauole, nache 'enapeco': «Qolliqui ne'ena; nachena na maiche ỹapat maye taỹa'a da qoỹaneuo da qami' qanqouagueque. Qaq da ivita da qolliqui, nache qaltaq qauennache Aỹem.» ₂₅Qaq co'ollaq mashe ime da lquia'axac, nache ỹacona aso ỹomaxaqui. Nache 'enapeco': «Ana'ana ỹomaxaqui, anamaye naigui da dalaxaic naỹamaxataxac Ñim Lo'onatac 'Enauacna da qami' naỹamaxatto, chegoqchiguilo naua itago'q. Qaq da ivita da qanỹomiigui, nache qaltaq qauennache Aỹem.» ₂₆Qaq da ivita da qolliqui ana'ana nauole, qataq qanỹomiigui ana'ana ỹomaxaqui, nache qaua'axacheetac da l-leuaxa So Qarataxala' Jesús, choche ivitta'a ca na'a'q da ñe'eguelaq Somaye.

₂₇Qaq ỹoqo'oye da huo'o ca chec ana nauole, huo'otaq nỹomgui ana ỹomaxaqui maye naigui da qaiuennate So Qarataxala', qaq da huo'otaq qaica ca naigui naqa'en, nache camaye huo'o da lasouaxashet cha'aye sa iyacnapec da lo'ocỹaxac qataq naua ltago'q So Qarataxala' Jesús. ₂₈Ỹoqo'oye ñi 'oonolec, iuen da ỹa'auaxaañi da ỹataqta naỹateetela't, da huo'otaq 'onaxaic cam ỹo'ottac huo'otaq qauem. Ime, nache ishet da chec aca nauole qataq ishet da nỹomgui aca ỹomaxaqui. ₂₉Cha'aye da huo'otaq deque'e qataq nỹom, qaq da saq taỹapigui lauel da chectac da lo'ocỹaxac So Qarataxala', nache de'era lquia'axac qataq de'era nỹomaxac maiche iỹaxaatega ca nhuaxanaguec. ₃₀Qaq nachera da huo'omshe huo'o da qoñiita na sa no'on qataq qaica ca la'añaxac. Nataqa'en huo'o na mashe ileu. ₃₁Cha'aye da qomi' ñaỹatenaqtela't, nache Ñim Nataxala' sa iuen da qomi' iuaxa'n. ₃₂Qalaxaye Ñimaye da huo'otaq ila'a da huo'o ca qarasouaxashet, nache ỹataqta na'axannec da qomi' 'enapegalo, cha'aye nshetaique da salaxasoq da yaqto' saishet da salegaqtoigui ca nhuaxanaguec na sa da'amqaanataxanpi.

₃₃Qaq qami' ỹaqaỹañicpi, da ivita da qalapoñiỹa't da qauqui'i, nache iuen da qauachiỹa'a da 'enauac da qanaloita't. ₃₄Qaq ca huo'o na lqouaxa, qaq no'on da lquia'aqa' ca maiche lma', yaqto' Ñim Lo'onatac 'Enauacna saishet da ỹauo'o ca qanhuaxanaguiiqui, souaxat de'era qarataxaqui da ivita da qalapoñiỹa't.

Qaq na laỹepi lataxacpi maye qanataxañeetapeguelec maiche saỹamaxaañi qom ivita da qami' sevitalo.