Da nsoxoyec maye ỹoqta 'eesa
1Aỹem da huo'otaq qaica ca isoxoyec, nache qaica ca naigui da saỹaten 'enauac na na'aqtacpi ana 'alhua qataq na piguem. Da qaica ca isoxoyec, nache sheeta'am ca lcat maye choche datoitapigui, qataq sheeta'am aca nasaquiaxanata maye choche dasactapigui.
2Da qaica ca isoxoyec, nache qaica ca naigui da sa'axattac da la'aqtaxanaxac Ñim Lo'onatac 'Enauacna qataq da sheetega da saỹaten nam saqcha'a lapaxañipi Ñimaye. Nataqa'en qaica ca naigui da ipi'iỹaxac Ñim Lo'onatac 'Enauacna, na'aictaxa da ishet da nqochenaxat aca qaỹoqotcheguemec 'alhua.
3Qataq da qaica ca isoxoyec, nache qaica ca naigui da sami' na choxoraqpi 'enauac nam ỹalamaxatpi. Nataqa'en qaica ca naigui da san da ỹo'ocỹaxac qataq da ñachaalataxac da setauan na shiỹaxauapi.
4Ca huo'o da lsoxoyec, nache ỹataqta huo'o da lhualaxavic qataq, nache 'eetai' da lauotaxanaqtaic.
Ca huo'o da lsoxoyec, nache saishet da quiỹaxanaqtaqaic qataq saishet da 'eetega da qaica ca 'ena'am.
Qataq saishet da ño'oxonnaxaic.
5Qataq saishet da sa ncherapec, qataq saishet da napagaqaanaxaic.
Qataq saishet da inogoqchet ca camachaqca.
Qataq saishet da ima'ape naua na'axa'te da iuennatega ca qaỹo'otec sa ỹaỹamaxañi.
6Qataq saishet da iuaxaata'a't naua lhua'q da ỹo'oxoreetac nam qauem da lataxac, nachaqrata da ntootapeguec nam ỹa'axattac da 'eesa lataxac.
7Ca huo'o da lsoxoyec, camaye nala'aguet 'enauac na chochaqna ivireguet.
8Da nsoxoyec qaica ca loga't. Cha'aye huo'o qome ca na'a'q, nache qaica ca ỹa'axa't naua na'aqtaqa maye chegoqo'oto Ñim Lo'onatac 'Enauacna qataq saq qaiue'n da qaitaxaiguilo naua na'aqtaqa maye sa qaỹauanapegalo, qataq sa iuen da qaỹaỹate'n naua saq cha'alo 'eetapegueco Ñim Lo'onatac 'Enauacna. 9Cha'aye da qara'aqtaxanaxac maye chegoqo'ot Ñim Lo'onatac 'Enauacna, qataq 'enauac nam sauattonaq nagui, saishet da nalogoñi. 10Qalaxaye qom ivita da nauattonaxanaxac da nalochiguiñi, huaña, nache imeuo 'enauac nam saishet da nalogoñi.
11Co'ollaq ñaq aỹem nogotolec, qalaq naua ỹa'aqtaqa qataq da ỹauattonaxanaxac qataq naua iuennataxaco ipacchigui da ñaq aỹem nogotolec. Qalaxaye nagui da mashe aỹem ỹe, nache saxanec da lataxac ca nogotolec. 12Nagui da qarauattonaxanaxac Ñim Lo'onatac 'Enauacna, damaye saxanaxa da yo'oqoolec, 'eeta'am da seloqtalec aca tannaxai da 'omalec. Qalaxaye da nauattonaxanaxac qom ivita da nalochiguiñi, huaña nache selaqa'a Ñim Lo'onatac 'Enauacna. Nagui da ỹauattonaxanaxac saxanaxa da nalochiguiñi. Qalaxaye qom ivita da nalochiguiñi, huaña nache sauattoota Ñimaye, 'eeta'am da 'eetec da aỹem ỹauattoota Ñimaye.
13Qaq ỹoqo'oye da npi'iỹaxac qataq da aquitaxac qataq da nsoxoyec ỹataqta qaica ca loga't. Qalaxaye da ỹoqta ỹactec ne'enaua tres, nachera da nsoxoyec.
