Da 'eetec da qaitaxaiguilo naua sa qaỹauanapegalo na'aqtaqa
1Qanpogoxoiñiỹapegue' da qarsoxoyiqui da ỹataqta 'eesa, qataq qauỹaxañiỹot So Saqcha'a Na'añaxac Qui'itta da qami' ỹapaxague'n da yaqto' qaua'axache' naua na'aqtaqa maye chegoqo'oto Ñim Lo'onatac 'Enauacna. 2-4Da qami' qautaqaiguilo naua sa qaỹauanapegalo na'aqtaqa, nache ñi 'oonolec da qoñiita detaqtague' Ñim Lo'onatac 'Enauacna. Qaq Ñimaye qami' ỹaỹateetegueta, cha'aye qaua'axacheetac da 'eesa qataq saqcha'a maye nachaqsota So Saqcha'a Na'añaxac Qui'itta da ỹaỹaten. Qaica ca lỹa da ỹaỹaten dam qanasaqaitapeguec, nachaqsota Somaye. Qalaxaye Ñim Lo'onatac 'Enauacna da ỹanema naua la'aqtaqa ca shiỹaxaua da ỹa'axa't, nache na laỹepi 'amqaanataxanaxaicpi ỹaỹateeteguet. Qaq da 'eetec damaye, nache itauan 'enauac na 'amqaanataxanaxaicpi da ỹataqta pi'iỹa'a So Cristo qataq da nomteguet da ỹaỹamaqchiguiñi qataq huo'o da lamaicỹaxac.
5Aỹem ỹataqta ỹaỹamaqchiguiñi ñaqa'en da 'enauac da qoñiita da qautaqaiguilo naua sa qaỹauanapegalo na'aqtaqa, qalaxaye ỹactec ñaqa'en da ỹaỹamaqchiguiñi da qami' qaua'axache' naua na'aqtaqa maye chegoqo'oto Ñim Lo'onatac 'Enauacna. Cha'aye ỹactec da naigui da qaỹa'axa't naua la'aqtaqa Ñimaye, qaq sa 'ena'am da qaitaxaiguilo naua na'aqtaqa maye sa qaỹaỹate'n, nachaqrata da huo'o ca ỹa'axa't ca naiguilo ne'enaua na'aqtaqa. Huaña nache na 'amqaanataxanaxaicpi ishet da nañaxat. 6Qaq ỹoqo'oye qami' ỹaqaỹañicpi, da huo'otaq qami' ñeqo'onalo da qami' ñamaqtegalo, nache da qami' seroleguete naua na'aqtaqa sa qaỹauanapegalo, nache ¿Negue't ca qauachegoxochiỹaigui de'era ỹa'aqtaxanaxac? ¡Qaica! Dam qami' itaua'n 'eeta': da qami' sauattonaxanaxaneque dam sa qaỹauanapega maye qomi' ỹachaxanalo Ñim Lo'onatac 'Enauacna qataq da nauattonaxanaxac dam 'eesa lataxac huo'otaq da qami' sa'aqtaxanema da na'aqtac maye chegoqo'ot Ñim Lo'onatac 'Enauacna qataq da qami' sanema da napaxaguenataxanaxac.
7Saloqnaxanaxa aca nviquepi. Nasheere huo'otaq aca nvique maye huo'o na lquet, da huo'otaq saishet da ỹataxague da lavilỹaxac da qaỹashettapigui, huo'otaq da qaiviqueetapigui, nache saishet da qaỹaỹaten ca lo'onec. 8Qataq da huo'o ca alaataxac da huo'otaq saishet da ỹataxague da l-lamaxa aca nasheere maye ỹa'axat da huo'o ca alaataxac, nache qaica ca ishet da naỹamaxat da taỹa ca alaataqa'. 9Qaq nache 'ena'am da qoñiita da qautaqaitapoiguilo naua na'aqtaqa maye sa qaỹauanapegalo. Da saishet da qaỹaỹaten ca naigui, nache 'eeta'am da choche qautaqaitapeecra'. 10Ana 'alhua ỹotta'a't na na'aqtacpi, qalaxaye 'enauac namayepi saishet da saqca ca naigui. 11Ỹoqo'oye aỹem da saishet da saỹate'n naua la'aqtaqa ca aỹem detaqtacot, qaq camaye 'eeta'am naqa'en aỹem ca ỹaqa'a ca chegaqa'ague, nataqa'en camaye 'eeta'am ñaqa'en ca ỹaqa'a ca chegaqa'ague. 12Qaq ỹoqo'oye qami' maye huo'o da qaryaqai da qauacoñiiguet na nachetaqtaxanaxatpi maye chegoqo'ot So Saqcha'a Na'añaxac, ỹataqta qanpogoxoiñiỹapegue' qome da qauacoñiiguet cam ishet da nañaxat naqa'en na 'amqaanataxanaxaicpi.
13Qaq qami' da ivita da qautaqaiguilo naua na'aqtaqa maye sa qaỹauanapegalo, nache no'on da qanqouagaxauñiỹot Ñim Lo'onatac 'Enauacna, da qami' ỹanema da qaua'axache ca naigui cam qaua'axacheetac. 14Cha'aye da huo'otaq saconalo naua na'aqtaqa sa qaỹauanapegalo da ñeqouagaxauen, nache ndotec da saqcha'a ica'alaxa da nqouagaxaueetac, cha'aye saishet da saỹaten ca naiguilo naua ñasaqtregue'c na'aqtaqa. 15¿Qaq ca sheeteco' qone'? Da ivita da ñeqouagaxauen qalaq nachera dam saqcha'a ica'alaxa da nqouagaxaueetac, qalaxaye nataqa'en da ỹauattonaxanaxac. Qataq da ivita da so'onaxan qalaq nachera da saqcha'a ica'alaxa da do'onaxan qataq nataqa'en da ỹauattonaxanaxac. 16Cha'aye 'am da huo'otaq 'aatacot da 'ana'achec Ñim Lo'onatac 'Enauacna, qaq chaqrata da saqcha'a 'arca'alaxa da ntootapigui', qaq da na'axaỹaxaatac ca shiỹaxaua maye ỹaqa'a ca chegaqa'ague, nache saishet da nhuanaua'a ca 'anqouagaxaunaxac da 'aatacot da 'ana'achecỹaxac Ñim Lo'onatac 'Enauacna, cha'aye camaye saishet da ỹaỹate'n naua 'ara'aqtaqa. 17Qaq de'era 'anqouagaxaunaxac ishet da ỹataqta ỹaỹamaqchiguiñi, qalaxaye saishet da huo'o ca itauan. 18Saatacot da ña'achecỹaxac Ñim Lo'onatac 'Enauacna, cha'aye seshet da setaxaiguilo naua na'aqtaqa maye sa qaỹauanapegalo saq shena'ama qami'. 19Qalaxaye da sootaigui ca laponaxac na 'amqaanataxanaxaicpi, qaq sepacapegue' da setaxaiguilo caua cincolqa na'aqtaqa, qalaxaye qaỹaỹateeteguet ca naigui, da yaqto' setauan ca iỹa, qaq saq 'ena'am da setaxaigui ca diez mil na'aqtacpi maye saishet da qaỹauanapega qataq sa qaỹaỹaten.
20Qami' ỹaqaỹañicpi, qoñiita'am qome ca nogotolec maye qaica ca lasouaxashet, qalaxaye saishet da qaue'enaxache da lhuennataxac. Nachaqrata da qaue'enaxache da lhuennataxac ca shiỹaxaua ỹe. 21Ana nere maye huetalec na la'aqtacpi Ñim Lo'onatac 'Enauacna, 'eeta':
«Setaxaigui ne'ena shiỹaxauapi
sachegoxotchigui na chegaqauec,
qataq naua na'aqtaqa maye sa qaỹauanapegalo.
¡Qalaxaye ñaqaiyeta saishet da aỹem ỹalaxaguet namayepi!»
22Qaq ỹoqo'oye da qaitaxaiguilo ne'enaua na'aqtaqa maye sa qaỹauanapegalo, nache la'anaqa qanqa'en na saxanaxa da da'amqaanataxan, qaq saishet da nachena na mashe da'amqaanataxan. Qalaxaye da qaỹa'axa't naua na'aqtaqa maye chegoqo'oto Ñim Lo'onatac 'Enauacna damaye la'anec qanqa'en na mashe da'amqaanataxan, qaq saishet da nachena na saxanaxa da da'amqaanataxan. 23Saloqnaxanaxa da 'enauac na 'amqaanataxanaxaicpi da huo'otaq lapoota'a't, qaq da 'enauac detaxaiguilo naua na'aqtaqa maye sa qaỹauanapegalo, qaq da huo'otaq nnoxoneuo ca shiỹaxaua maye saxanaxa da ỹa'amaqten So Cristo, nache ishet da ipettega da chochaq huo'o da aloic namayepi. 24Qalaxaye da 'enauac da qoñiita da qaua'axacheeta'ape naua na'aqtaqa maye chegoqo'oto Ñim Lo'onatac 'Enauacna, nache ne'ena shiỹaxauapi maiche nauattoola't da huo'o da lasouaxashet. 25Qaq 'enauac na saqcha'a lhuennataxacpi maye huetaigui añi lquiyaqte ishet da ya'aqalec. Ime, qaq ishet da ỹa'aroto naua l-llectel Ñim Lo'onatac 'Enauacna da ỹo'oxoren, qataq ỹa'axattac da 'eesa da Ñim Lo'onatac 'Enauacna ỹataqta qami' hueta'agueta.
Da lataxac da laponaxac na 'amqaanataxanaxaicpi
26Qami' ỹaqaỹañicpi, da ivita da qalapoñiỹa't, nache 'enauac nam qauo'oche, iuen da nañaxat naqa'en na 'amqaanataxanaxaicpi. Huo'o ca ishet da do'onaxaatac, qataq huo'o ca dapaxaguenataxaatac qataq huo'o ca ỹa'axat cam ỹachaxana Ñim Lo'onatac 'Enauacna qataq huo'o ca detaxaiguilo naua na'aqtaqa maye sa qaỹauanapegalo, huo'otaq ỹa'axa't cam naiguilo ne'enaua na'aqtaqa. 27Qaq da huo'otaq huo'oi caua detaxaiguilo naua na'aqtaqa sa qaỹauanapegalo, qalaq saishet da napacalec ye dos huo'otaq tres shiỹaxau', qataq ñi 'oonolec iuen da iuata'a ca lỹa da imat da ltaxaỹaxac, ime, nache chaxanaq detaqa. Nataqa'en iuen da huo'o ca ỹaỹaten da ỹa'axategue ca naigui cam la'aqtaxanaxac caamaye. 28Qalaxaye que'eca 'amqaanataxanaxaicpi da qaica ca ishet da ỹa'axat ca naigui que'ecaua na'aqtaqa, nache caamaye iue'n da ỹe'emaqte'. Chaqrata da ñi 'oonolec maiche nalemaqte' da detaqtague' Ñim Lo'onatac 'Enauacna. 29Qaq da huo'otaq huo'o cam ỹa'axa't naua na'aqtaqa maye chegoqo'oto Ñim Lo'onatac 'Enauacna, qaq iuen da dos huo'otaq tres caua da'aqtaxa'n. Qaq na laỹepi naloqten da la'aqtaxanaxa'c caamaye da ỹoqta 'eesa da chegoqtot Ñim Lo'onatac 'Enauacna qalqo' saishet. 30Qalaxaye ca nso'ootañi, da huo'otaq huo'o ca la'aqtaxanaxac chegoqtot Ñim Lo'onatac 'Enauacna qaq que'eca detaqtac no'on da nañaxaañi, nache na'axaỹaxana que'eca shiỹaxaua da da'aqtaxan. 31Yaqto' 'enauac da qoñiita nam ỹa'axatta'ape naua na'aqtaqa maye chegoqo'oto Ñim Lo'onatac 'Enauacna ishet da detaqa, qataq 'enauac nam na'axaỹaxana ishet da huo'o ca ỹaỹaten, qataq huo'o da la'añaxac. 32Qaq nam ỹa'axatta'ape naua na'aqtaqa maye chegoqo'oto Ñim Lo'onatac 'Enauacna, namayepi no'on da iloteguelo naua ltaxaỹaxaco, 33cha'aye Ñim Lo'onatac 'Enauacna saishet da lauela ca qaica ca laỹamqa' qataq da cotaxac, nachaqrata da nlagaxayec qataq ca ỹaỹamaqchiguiñi lataxac.
Cha'aye da lataxac 'enauac na ỹa'amaqten So Jesús, 'eeta': 34saishet da qaỹashenem na 'alpi da detaqa da huaigui ca naponaxac. Cha'aye na namaxasoxonaxacpi maye chegoqo'ot so Moisés 'eeta': Na 'alpi iuen da napaxaguena da ỹe'emaqta, 35qaq da huo'o ca huotaique da ỹaỹaten, nache iuen da inat ca lhua da hueta'a ca lma', cha'aye qaỹa'aguelec aca 'alo da nache 'eetec de'era, da huo'otaq huetaigui ca naponaxac.
36Qami' qauennachiỹa'a da saishet da nache qami' chegoqchiguilo da la'aqtac Ñim Lo'onatac 'Enauacna qataq saishet da nache qamiita da qauacoñiiguet damaye. 37Da huo'o ca 'eetega da la'aqtaxanaxanec Ñim Lo'onatac 'Enauacna, huo'otaq 'eetega da netanguit So Saqcha'a Na'añaxac Qui'itta, qaq no'on da ỹaỹateeteguet de'era shiyiñi da ỹataqta lqataxac So Qarataxala'. 38Qalaxaye da saishet da iqocha'a de'era, qaq camaye nataqa'en saishet da qauqocheetega.
39Qaq ỹoqo'oye qami' ỹaqaỹañicpi, iuen da qanpogoxoiñiỹapegue' da qaua'axache' naua na'aqtaqa maye chegoqo'oto Ñim Lo'onatac 'Enauacna, qataq saishet da sa qauashiñi da qaitaxaiguilo naua na'aqtaqa sa qaỹauanapegalo. 40Qalaxaye qauaỹamaxachiichiguiñi da llecỹaxac 'enauac namayepi.
