1 Corintios 16

₁Qaq qom qauo'oche aca ntaunaqte na qarqaỹañicpi 'amqaanataxanaxaicpi maye netaña ye Jerusalén, qalaq qaue'enaxachiichigui da ỹapaxaguenataxanaxac maye sanem na 'amqaanataxanaxaicpi maye netaña ye 'alhua, le'enaxat Galacia. ₂Da iviteuga ca na'a'q la'auaxanec naua siete na'axa'te, nache ñi 'oonolec da qoñiita huo'o aca iỹotauga, qalaxaye acatai' nalotaua'a nachaca ỹaỹamaxat, yaqto' saishet da iuen da ỹoltaq qaime'eguet da qalapootega't aca ntaunaxanaqte qom qami' sevitalo. ₃Qaq qom mashe qami' sevitalo, nache samaxaregue da Jerusalén caua shiỹaxau' maye qalca'aiua'alo, qataq sachoxonaxanaxaaleguete aca ỹere, da yaqto' ira'a ye qarqaỹañicpi aca qartaunaxanaqchi qataq da qaỹaỹamaxatte' caamaye. ₄Qaq qami' da qaupacỹapegue' da nataqa'en ashec, nache aỹem qaica ca shectega da ñenaicapegueto caamaye.

₅Da ỹecỹaxac sauotaique da sa'auaxaañi da satelec ye 'alhua, le'enaxat Macedonia, qaq qom ime, nache ñeqo'ona ye Corinto. ₆Qaq huo'otaq cara'ac da qami' soota'agueta, huo'otaq seviraxattec na no'omaxa da qami' soota'agueta, nache qom ime, qaq ishet da aỹem qautauañi da ỹecỹaxac cam sata'ague. ₇Cha'aye aỹem sa saỹamaxaren da choche qami' saỹaleguete. Chaqrata da ñeshetaique da loiguilo caua na'axa'te da qami' soota'agueta, qom huo'otaq aỹem ỹasheetem So Qarataxala' de'era ỹecỹaxac. ₈Qalaxaye sauotaique da sonaña qome ye nỹecpi ye Éfeso, sevittauga ca na'a'q Pentecostés, ₉cha'aye yemaye ỹataqta aỹem ỹaconeguet da so'onataxan, da yaqto' saqalota na ỹa'amaqten So Qarataxala'. Qaq na'aictaxa da saqalota na depa'aguenataxaatac.

₁₀Qom qami' ivitalo so Timoteo, qaq ỹataqta qanpogoxoiñiỹapegue' da machiguiñi qanqa'eñi, yaqto' qaica camachaqca. Cha'aye somaye ỹo'ottac da lo'onataxanaxac So Qarataxala', 'eeta'am aỹem. ₁₁Ỹoqo'oye qaica ca 'oonolec da qoñiita da ỹo'otan somaye. Nachaqrata da qautauñic da llecỹaxac, yaqto' qaica ca da. Cha'aye seuattaique somaye nataqa'en caua lỹa't qarqaỹa't da yaqto' ñauaneto.

₁₂Qaq so qarqaỹa Apolo ỹataqta ñachoxoreetacot da ñaq ca'atoiguilo soua qarqaỹa't da qami' nauaneto, qalaxaye somaye ñaq saxanaxa da jec nagui. Qalaxaye jec qom ivita da huo'o ca ldaqa'.

₁₃Ỹataqta qanloitec, qataq qana'añaxacheetec da qarpi'iỹaxaqui. Qaue'enaxache ca shiỹaxaua ỹataqta qaramchigui qataq 'añaxaic. ₁₄'Enauac na qauacoñiilec da qauo'oche, qaq ỹataqta qami' soxoraiqa.

₁₅Qaq nagui, qami' ỹaqaỹañicpi maye qoñiitaña na 'alhua Acaya, mashe qauaỹaañita da na Estéfanas qataq naua llalqa, nachenaua naua la'auaxanaqa da da'amqaanataxa'n da qoñiita, qataq naamaye ỹataqta nañaareguet da itauan na laỹepi qarqaỹañicpi 'amqaanataxanaxaicpi. ₁₆Ỹoqo'oye ñeshetaique da qami' ỹataqta qaualaqailec ca shiỹaxaua maye 'eeta'am na Estéfanas, qataq nataqa'en 'enauac nam detaunaxaatac qataq do'onataxaatacot Ñim Lo'onatac 'Enauacna, 'eeta'am namaye. ₁₇Ỹataqta ñetootapeguec da nvilda'a na soota'a na Estéfanas, qataq na Fortunato, qataq na Acaico, cha'aye naamaye ishe't da ỹo'o't dam sa qauañoxoche, souaxat da qomi' qaỹoqtache. ₁₈Naamaye ỹo'o't da ỹataqta ỹashettec naqa'en da ñachaalataxac, qataq nataqa'en da qoñiita. Ỹataqta qauauochec qataq huo'o naq 'enec qanqa'eñi ca shiỹaxaua maye 'eeta'ama naamaye.

₁₉Na 'amqaanataxanaxaicpi maye netalec ne'ena 'alhua Asia, qami' ỹamaxalo da lquinaxanaxac. Ñi Aquila qataq añi lhua Priscila qataq na 'amqaanataxanaxaicpi maye lo'onaxanaqa' ye lma', namayepi ỹataqta qalota da lquinaxanaxac qami' ỹamaxalo, cha'aye qami' la'amqaanataxanaxau'. ₂₀Qami' ỹamaxalo da lquinaxanaxac na qarqaỹañicpi. Qaq ñi 'oonolec da qoñiita da nquine' ca lỹa la'amqaanataxanaxaua, nache ỹataqta ỹachetoigui da lta'araic lauotaxanaqtaic.

₂₁Qaq nataqa'en aỹem Pablo qami' samaxalo da iquinaxanaxac, damaye maiche semapegue' da shiyiñi.

₂₂Da huo'o ca saishet da ỹauotec So Qarataxala' Jesucristo, nache Ñim Lo'onatac 'Enauacna talec naqa'en ca qauem. ¡'Am Qarataxala', saqaỹaloq qome da 'añe'eguelaq!

₂₃Qaq dam lauotaxanaqtaic So Qarataxala' Jesucristo, nache 'eetai' da qami' hueta'agueta. ₂₄'Enauac da qoñiita qami' samaxalo da iquinaxanaxac, chegoqchigui da nsoxoyec maye chegoqo'ot So Cristo Jesús. Aja', nache 'eetec de'era.