2 Corintios 1

₁Qami' qanauochaxauapi qarqaỹañicpi maye qoñiitaña na nỹecpi na Corinto qataq na 'alhua Acaya: Aỹem Pablo qataq ñi Timoteo, qami' samaxasaxalo da qarquinaxanaxac. ₂Ñim Lo'onatac 'Enauacna maye Qarta'a qataq So Qarataxala' Jesucristo, Som aỹem lca'aua'a da ỹauo'o aỹem lamaxashec, Somaye qami' ỹaaleguete da lsoxoyec qataq da l-lagaxayec.

₃¡Sanaqtacot da qana'achecỹaxac Ñim Lo'onatac 'Enauacna maye Lta'a So Qarataxala' Jesucristo! Cha'aye Ñimaye ỹataqta soxoraic qataq huotaxanaqtaqaic qataq nache 'eetai' da qomi' itauaata'ape. ₄Da ivita da seviraxaguet da qarqalaic huo'otaq da qanque'eenaxac, nache Ñim Lo'onatac 'Enauacna qomi' itaua'n, da yaqto' ishet da nataqa'en setauanaq ca huetapoigui da nque'eenaxac huo'otaq ca ivireguet ca lqalaic. ₅Qomi' ỹataqta lta'araic da qanque'eenaxac shenaqta'am da nque'eenaxac So Cristo. Qalaxaye nataqa'en chegoqchigui Somaye, da Ñim Lo'onatac 'Enauacna qomi' ỹa'añaqche't. ₆Huo'o da qanque'eenaxac da yaqto' qami' ishet da qauamaichiguiñi, qataq qauacoñiiguet da nca'alaxa. Ñim Lo'onatac 'Enauacna qomi' itaua'n da yaqto' seshetaq da qami' sa'añaqcheta'q. Yaqto' qami' ishet da qauañoxoche da qoviilec da qarhualaxaviqui da qauataiỹa'aguet da qarqalaiqui qataq da qanque'eenaxaqui maye nataqa'en qomi' sataqta'aguet. ₇Qomi' huo'o da qanaquitaxac da qoñiita, cha'aye saỹaanaq da nagui da huo'o da qanque'eenaxaqui, nache nataqa'en Ñim Lo'onatac 'Enauacna qami' ỹa'añaqche't.

₈Qami' qarqaỹañicpi, sauoqtaique da qauaỹaañita da qalota da souaqaigui da lta'araic qarqalaic qataq da qanque'eenaxac co'ollaq souaqta'a ye 'alhua Asia. Damaye ỹataqta lta'araic, ỹoqo'oye mashe sepetaqa'a da saishet da yaloxoguet. Mashe seviraqa'a da qaica ca qanaquitaxac da ñeca'alaqtauec. ₉Mashe sanomaqta da shenaqta'am ca ỹaguec na lasouaxashet da taỹa'a qanqa'en da nalaataguec. Qalaxaye damaye qomi' ỹapaxagueneque da saishet da maiche ñipi'iỹaqteguela't, nachaqrata da sepi'iỹaqa'a Ñim Lo'onatac 'Enauacna, Ñim ishet da na leuaxaicpi ỹe'eguelaxa naqa'en da nca'alec. ₁₀Qaq Ñimaye, nacheñi ñi qomi' nca'alaxateeguesopa co'ollaxa da lchec da nleuaxa. Qataq huo'o da qanaquitaxac da queto'ot da qomi' nteltegalo, ₁₁da qami' qomi' qautauñiita'ape da qomi' qanqouagaxauñiitaleguete. Qaq da saqalota na shiỹaxauapi qomi' nqouagaxaueetaleguete, qaq nache 'ena'am saqalota na ỹaatacot da na'achecỹaxac Ñim Lo'onatac 'Enauacna, souaxat da ltaunaxanaxac qataq 'enauac nam no'on maye qomi' ỹanema.

₁₂Qomi' ỹa'añaqche't da saỹaanaq da ỹaỹamaqchiguiñi da qarataxac, qataq ỹataqta qomi' 'eesora nagui da souaqta'aguet 'enauac na shiỹaxauapi, qataq ỹactec naxa da qami' souaqta'agueta. Qaq de'era saishet da so'otaq da seca'ataqtague' da maiche qaraỹaanec, nachaqrata da ltaunaxanaxac Ñim Lo'onatac 'Enauacna, qataq sanaqtac da qana'achecỹaxac souaxat da lta'araic lsoxoyec. ₁₃Qaq nagui seraxayiñi naua na'aqtaqa qataq nhuennataxaco maye saq ala'q da qaỹaỹate'n. Qaq huo'o da ñaquitaxac da 'enauac da qauaỹachiñi, ₁₄nam saxanaxa da ỹoqta qauaỹaañita. Huaña, nache qom ñe'eguelaq So Qarataxala' Jesucristo, nache qomi' qantoñiitapegueque, qaq nache 'ena'ama qomi' da qami' ñetonaqtapegueque.

₁₅Da hua'auchiguiñi sheetapeguec, sauotaique da sa'auaxaañi da qami' ñeqo'onalo, yaqto' qauamaichiguiñi da dos da she'eguelaxalec da qami' ñamaqtegalo. ₁₆Huo'o da iuennataxac da qami' ñamaqtegalo co'ollaq saỹa'a ye 'alhua Macedonia. Qaq da she'eguelaq, nache qaltaq qami' saỹaleguete da qami' ñamaqtegalo, yaqto' qami' ishet da aỹem qautauañi da ỹecỹaxac da saigue da Judea. ₁₇Qaq ¿qaupi'itaxañiitega peta'a da saishet da seuennataxaatelec de'era? ¿Qami' qaupi'itaxañiitega peta'a da aỹem da huo'o ca so'ot, qaq shena'am da lhuennataxac ca choche shiỹaxaua da saq ỹataxalec da huo'o ca la'aqtac? ¡Qami' ỹataqta qaupe'enaxañi! ₁₈Qalaxaye Ñim Lo'onatac 'Enauacna qomi' ỹaỹate'n da ỹataqta sepagaqtelec ca qara'aqtac. ₁₉So Timoteo, Silas qataq aỹem qami' sa'aqtaxanaqteguema dam na'aqtaguec So Jesucristo, Som Llalec Ñim Lo'onatac 'Enauacna. Somaye saishet da nasaxauec ca la'aqtac, ime, nache sa ipaguelec. Nachaqrata da huo'o da la'aqtac, nache ỹataqta ipaqueelec. ₂₀Cha'aye Somaye, nacheso so ipacchigui naqa'en 'enauac na ỹachaxanapecpi Ñim Lo'onatac 'Enauacna. Qaq ỹoqo'oye da sho'oxorenaq Ñim Lo'onatac 'Enauacna, qaq chegoqchigui So Cristo Jesús da shenaqta' da qarasataxac, «Aja', nachera lataxac.» ₂₁Qataq nacheñi Ñim Lo'onatac 'Enauacna, Ñim qomi' ỹanema qataq da qoñiita da ña'araqtaua'a So Cristo, qataq nacheñi Ñi qomi' lca'agui'she. ₂₂Qataq da ỹachaxan da qomi' lalamaqa'ate, nache ỹauo'o da qana'anaxat: qomi' ỹanema So Saqcha'a Na'añaxac Qui'itta.

₂₃Qaq aỹem huo'o da iuennataxac da qami' ñamaqtegalo. Qalaxaye saxanaxa nagui da qami' seviralo, cha'aye nachera da 'enec ñaqa'en da qoñiita. ¡Qaq Ñim Lo'onatac 'Enauacna ishet da nqat da ñachaalataxac qom choche satenataxaatac! ₂₄Qomi' saishet da sauoqtaique da qami' sa'aqtaxanaxama cam iuen da qaua'amaqchiñi, cha'aye qami' mashe qauaỹaañita da lataxac. Nachaqrata da qomi' sauoqtaique da qami' setauana'q da yaqto' ỹataqta qauamaichiguiñi.