Da 'eetec co'ollaq colaxagui da no'onataxanaxac
1So Roboán taỹa ye Siquén, cha'aye 'enauac so Israel le'ecpi taỹa co'ollaxa yemaye da yaqto' qoỹanagui da nta'a somaye. 2Qalaxaye la'axaỹaxac co'ollaxa de'era so Jeroboán, som llalec so Nabat, maye ñaq netaña co'ollaxa ye Egipto, yem ỹe'eguena co'ollaq dataueeguesop so nta'a Salomón. 3Qaq co'ollaq qaiỹaxana so Jeroboán, nache somaye lỹateuo 'enauac so Israel le'ecpi, da nqo'oneua'a so Roboán da detaxaỹapegue', nache 'eeta': 4So 'arta'a co'ollaxa, qomi' ỹamaxaleguete na ỹataqta qapa'atta no'onatacpi. Qaq 'am nagui, 'onaxaictaxa da 'anquigaxaañi da qanque'eenaxac da qomi' qailatta'ape, yaqto' nache 'am so'onataxanaqtacot qome. 5Nache so Roboán, 'enapeco':
Qoquiiuo qome, qaq qom ivi' caua tres na'axa'te, nache aỹem qañe'eguelaqaiua'a.
Nache se'eso shiỹaxauapi ỹe'eguelaq co'ollaxa, 6huaña nache so nta'a Roboán, nnate' so nqueroxonecpi maye ltauapi co'ollaxa so lta'a Salomón co'ollaq ña nca'altauec, nache 'eeta':
¿Ca 'eetec ca aỹem qaỹa'añim qarqataxaqui, da yaqto' sasateguet se'eso shiỹaxauapi maye aỹem inattac? 7Nache somayepi 'eeta':
Qom ỹoqta 'aulo'oguet se'eso shiỹaxauapi, qataq da ỹataqta 'anonaxa't naua 'ara'aqtaqa da 'auasateguet somayepi, nache somayepi nache 'eetai' qome da 'am do'onataxaatacot. 8Qalaxaye so Roboán, saishet co'ollaxa da ỹalaxaguet na lqataxacpi so ỹa'axaiquipi, maye nacherata da inat so nsoxoppi maye maiche naloxouapi, qataq maiche lo'onataxanaxanecpi somaye. 9Nache inat, 'eeta':
¿Ca 'eetec ca aỹem qaỹa'añim qarqataxaqui, da yaqto' sasateguet se'eso shiỹaxauapi maye aỹem inattac, 'eeta': 'Onaxaictaxa da 'anquigaxaañi da qanque'eenaxac da qomi' qailatta'ape, maye qomi' ỹo'oteque co'ollaxa so 'arta'a? 10Nache se'eso nsoxoppi maye naloxouapi somaye ỹasateguet co'ollaxa somaye, 'eeta':
Qom 'auasateguet se'eso shiỹaxauapi maye 'eeta': So 'arta'a co'ollaxa, qomi' ỹamaxaleguete na ỹataqta qapa'atta no'onatacpi, qaq 'am nagui, 'onaxaictaxa da 'anquigaxaañi da qanque'eenaxac da qomi' qailatta'ape, qalaxaye qoneta' qome da 'ara'aqtac: Añi ỹaxaata llale ỹataqta sansatta, napacalec na lasot so ita'a. 11Qaq somaye da qami' ỹamaxaleguete co'ollaxa na ỹataqta qapa'atta no'onatacpi, qaq aỹem nagui, ñequigaxattec qome da ỹataqta qapa'atta da lsallaxa ca qami' sacheleguete. Qataq da so ita'a qami' iroleguete co'ollaxa so nañec da qami' ỹalashe'n, qalaxaye aỹem, qami' seroleguete qome ca nalashenaxanaxat maye neta'aguet na lsheenec ca lcat. 12Qaq co'ollaq ivita so na'a'q tres, nache so Jeroboán qaltaq lỹateuo 'enauac so shiỹaxauapi da nqo'oneua'a so nta'a Roboán, cha'aye maiche la'aqtac co'ollaq 'enapega somayepi da ñe'eguelaxauo. 13Qalaxaye so nta'a, ỹataqta qapa'atteguet co'ollaxa da la'aqtac, nache saishet da ỹalaxaguet da lqataxac so ỹa'axaiquipi, 14nacherata da ỹe'enaxatchigui da lqataxac so nsoxoppi, 'eeta':
«So ita'a da qami' ỹamaxaleguete co'ollaxa na ỹataqta qapa'atta no'onatacpi, qalaxaye aỹem nagui, ñequigaxattec da ỹataqta qapa'atta da lsallaxa ca qami' sacheleguete, qataq da so ita'a qami' iroleguete co'ollaxa so nañec da qami' ỹalashe'n, qalaxaye aỹem, qami' seroleguete ca nalashenaxanaxat maye neta'aguet na lsheenec ca lcat.» 15Nache so nta'a, saishet da ỹalaxaguet da 'eetapeguec so shiỹaxauapi, cha'aye Ñim Nataxala' nache 'ena'ac co'ollaxa de'era, da yaqto' ipacchigui da la'aqtac Ñimaye, maye ỹanem co'ollaxa so Jeroboán, som llalec so Nabat, maye chegoqchigui naqa'en so la'aqtaxanaxanec Ajías, som lma' ye Silo. 16Nache se'eso nhuo' le'ecpi co'ollaq ila'a da so nta'a, saishet da ỹoqocha'a da 'eetapeguec somayepi, nache somayepi nmasheguem, da 'eeta':
«¡Qomi' saishet da saqtapegueua'a na lalamaxatpi so David!
¡Qataq saishet da ñeuanaqaua'a na lalamaxatpi so llalec so Yesé!
¡Qaq qomi' Israel le'ecpi, no'ono' da ñeqo'onaxalo naua qarpele'ete!
¡Qaq som David qalaq maiche ilo'ogue na maiche lalamaxatpi!»
Huaña nache so Israel le'ecpi ỹe'eguelaxalo naua lpele'ete.
17Qaq so Roboán qalaq nache queto'ot da ilotague' so Israel le'ecpi, maye netaigui som huaqta'a't nỹecpi ye Judá. 18Qaq so nta'a Roboán, co'ollaq ỹamaq so Adoram maye pa'aỹa'aguet da ilotague' so qapa'atta no'onatacpi, nache 'enauac so Israel le'ecpi, ỹalauat somaye ira'a so coma'. Qaq huaña, nache so nta'a Roboán, sanaỹaloxon da huenongui aso laigona nache datauec, taỹa ye Jerusalén. 19Qaq 'era da 'eetec so Israel le'ecpi, da dataỹa'aguet co'ollaxa so llalaqpi so David, nache ivitta'a nagui. 20Nache so Israel le'ecpi co'ollaq la'axaỹaxac da ñe'eguelaq so Jeroboán, nache damaxasoxoneuga da yaqto' taua'a qanqa'en so naponaxac, huaña nache somaye qoỹanagui da lta'a 'enauac so Israel le'ecpi. Nache ỹataqta qaica ca no'onañi se'eso nhuo' le'ecpi da ca'ategue so llalaqpi so David, qaq nachesota so maiche lalamaxat lauo' le'ecpi so Judá da no'onañi. 21Qaq so Roboán, co'ollaq ivireua'a ye Jerusalén, nache laỹona't so ciento ochenta mil alleppi, nca'aguishecpi maye qaỹachegoxotaigui so maiche lauo' le'ecpi so Judá, qataq so lauo' le'ecpi so Benjamín, cha'aye huotaique da nalaate' so laỹepi Israel le'ecpi, da yaqto' ỹe'eguelaxa somaye da nache 'oonolec da nta'a. 22Qalaxaye Ñim Lo'onatac 'Enauacna 'enapega co'ollaxa so Semaías, som ỹale maye la'aqtaxanaxanec Ñim Lo'onatac 'Enauacna, nache 'eeta': 23«Qonapega qome ñi Roboán, ñim llalec so Salomón maye nta'a ye Judá, qataq 'enauac na lauo' le'ecpi so Judá, Benjamín, qataq na laỹepi nhuo' le'ecpi, qoneta': 24Ñim Nataxala', da la'aqtac, 'eeta': Saishet qome da qoqui da qauloqui' ye maiche qarqaỹaipi Israel le'ecpi. Cha'aye nache shena'ac de'era qanayeuaigui, ỹoqo'oye qavi'iguelaqỹalo qome naua qarma'achilli'.»
Qaq somayepi co'ollaq hua'aqchigui de'era la'aqtac Ñim Nataxala', nache somayepi ỹalaxaguet Ñimaye, nache ỹe'eguelaxalo naua lma'ate.
So Jeroboán ỹo'o't soua dos huaca llalqa da yaqto' qanatamnoto
25Qaq so Jeroboán, qaltaq no'oxoosheguem so huaqta'a't nỹecpi ye Siquén, maye nalec aye qasoxonaxapi ye Efraín, qaq somaye nache naña co'ollaxa yemaye. Ime, nache no'oxoosheguem nataqa'en ye Peniel. 26Qalaxaye somaye deuennataxaatac co'ollaxa, nache 'enapeco': «Yo'oqta da ishet da qaỹe'eguelaxa da qaỹatalec qome na llalaqpi so David, 27cha'aye ne'ena shiỹaxauapi da taỹa ye Jerusalén maye naña añi atamnaxaqui maye lalamaqte Ñim Nataxala', da ỹaneuo aca lachetaqtaxanaqtepi, nache yo'oqta da qaltaq ỹe'eguelaxa da ỹauotec so lataxala' Roboán, som nta'a ye Judá. Huaña nache aỹem qaỹalauat qome, nache namayepi ỹe'eguelaxa da datalec so Roboán maye nta'a ye Judá.» 28Qaq co'ollaq ime da dechemaqtaxaateguelec de'era so nta'a, nache ỹo'o't soua dos le'enaqtaqa huaca llalqa do'onataxana so oro, nache 'enapega so shiỹaxauapi, 'eeta': «Qami' Israel le'ecpi, mashe qaỹoqtegue da qavi'iguelaqaita'a ye Jerusalén. Qaq 'enaua nagui naua qanatamnaxala'achilli', maye qami' nqateeguesopa co'ollaxa ye Egipto.» 29Ime, nache so 'oonolec ỹanaña ye Betel, qaq so lỹa qalaq ỹanaña ye Dan. 30Qaq de'era, nachera da chegoqchigui co'ollaxa da huo'o da lasouaxashet so Israel le'ecpi, cha'aye se'eso shiỹaxauapi, taỹa naxa ye Betel qataq ye Dan da yaqto' natamnoto soomaye. 31Qaq nataqa'en no'oxoosheguem so atamnaqa'pi, nalec naqa'en aso lcomaraxalatepi, qataq ỹauo'o so ntaxaỹaxanaxanecpi maye saishet da leviitapi. 32Qaq so Jeroboán, nataqa'en ỹo'ot co'ollaxa so laloxoqui da na'amqaanataxanaxac, huetoigui naqa'en so na'a'q quince so ca'agoxoic ocho, qaq 'eeta'am naqa'en so laloxoqui so na'amqaanataxanaxac maye huaña naxa ye Judá, qataq ỹo'ot so lachetaqtaxanaxat ỹachalec aso nca'atoxonaxalate. Qataq nache 'eeta'am naqa'en so huaña ye Betel, da ỹanot na lachetaqtaxanaxat som le'enaqtac huaca llalec. Nataqa'en ỹauo'o so ntaxaỹaxanaxanecpi da ilo'ogue se'eso atamnaqa' maye ỹo'ot somaye. 33Qaq so na'a'q quince so ca'agoxoic ocho, nache so Jeroboán ỹaneuo co'ollaxa so lachetaqtaxanaxat, ỹachalec aso nca'atoxonaxalate maye no'oxoosheguem co'ollaxa maye naña ye Betel, huetoigui se'eso na'a'q maye somaye maiche ỹo'ot da laloxoqui naqa'en da la'amqaanataxanaxac so Israel le'ecpi, qaq nache huetoigui nataqa'en se'eso ca'agoxoic da tasheguema aso nca'atoxonaxalate da ỹavigaxat so lchenaxanaxat.
