So na'aqtaxanaxanec nlaxa so Jeroboán
1Qaq so Jeroboán co'ollaq ñaq ỹavigaxattac so lchenaxanaxat, nache ivireuo so la'aqtaxanaxanec Ñim Lo'onatac 'Enauacna maye chegaqa'a ye Judá, som lamaxashec Ñim Nataxala'. 2Qaq somaye, na'axanneque co'ollaxa naua la'aqtaqa maye Ñim Nataxala' ỹamaxalec somaye da ỹa'axa't, 'eeta': «Nca'atoxonaxalate, nca'atoxonaxalate: Ñim Nataxala', 'eeta': ‹Huo'o qome ca ñiguiñi nogotolec chegaqaigui na llalaqpi so David, le'enaxat Josías, qaq camaye ỹalauat qome na ntaxaỹaxanaxanecpi maye 'am ilotague', nache 'am ỹachalec, nam 'am ỹachalec naxa da ỹavigaxat na nchenaxanaxat, qataq nache 'am hualec naqa'en da ỹavigaxat na lpi'inecpi na shiỹaxauapi.›» 3Qaq nacheso se'eso na'a'q da so na'aqtaxanaxanec ỹo'ot so na'anec maye saqaỹauanapega, nache 'eeta': «'Era da na'anec maye ỹan Ñim Nataxala': Ana'ana nca'atoxonaxalate nlaguiñi qome, qataq na alo maye huetalec anamaye laga't qome.» 4Nache so nta'a Jeroboán, co'ollaq hua'axaỹa da la'aqtac so na'aqtaxanaxanec, da detaqtega aso nca'atoxonaxalate maye naña ye Betel, nache so nta'a nauaxaỹaxaasheguem na lhuaq, huaña aso nca'atoxonaxalate, nache 'eeta':
«¡Ña qauacoñiiua'a damaye!» Qalaxaye so lhuaq maye nauaxaỹaxaasheguem somaye nache deqaqa, nache saishet da qaltaq iraxan. 5Huaña nache dolagui aso nca'atoxonaxalate, qataq so alo maye huetalec asomaye laga't, nache ipacchigui da la'aqtac Ñim Nataxala' maye ỹanem co'ollaxa so la'aqtaxanaxanec. 6Nache so nta'a 'enapega co'ollaxa so la'aqtaxanaxanec Ñim Lo'onatac 'Enauacna, 'eeta':
Ñaq aỹem 'anqouaguec taxa da 'auỹaxanot Ñim Nataxala' maye 'Anatamnaxala', da yaqto' no'oita na ihuaq.
Nache so la'aqtaxanaxanec Ñim Lo'onatac 'Enauacna natamnot Ñimaye, nache so lhuaq so nta'a qaltaq no'oita. 7Nache so nta'a 'enapego' so la'aqtaxanaxanec Ñim Lo'onatac 'Enauacna, 'eeta':
'Onaxaictaxa da ñeqo'onaxa ye ima', yaqto' 'auque'e, qataq sauo'o qome ca 'anme. 8Qalaxaye so la'aqtaxanaxanec Ñim Lo'onatac 'Enauacna 'enapega so nta'a, 'eeta':
Na'aictoxo' da aỹem 'aỹa'anem ca tachiguingui na laiñi nam 'aralamaxatpi, qalaxaye aỹem saishet da 'am seca'ategue, qataq saishet da sachec aca nauole, huo'otaq da ñeỹomgui ca 'etaxat da huaña ne'ena. 9Cha'aye Ñim Nataxala' aỹem 'enapega, 'eeta': «Saishet qome da qollec aca nauole, qataq saishet da 'anỹomgui ca 'etaxat, qataq da 'avi'eguelaq qalaq saishet da 'avi'eguelaqtegue ca 'ec»
10Qaq co'ollaq ỹe'eguelaq somaye, nache tateuga so lỹa nqa'aic, nache saishet da ỹe'eguelaqtegue da quegue so nqa'aic maye quetague' co'ollaq taỹa'a ye Betel. 11Qaq se'eso na'a'q, huo'o so na'aqtaxanaxanec ỹa'axaiquiolec maye naña ye Betel. Nache soua llalqa somaye, taỹalo somaye da da'aqtaxaarem 'enauac nam ỹo'otpi so la'aqtaxanaxanec Ñim Lo'onatac 'Enauacna, maye chegaqa'a ye Judá co'ollaq huaña ye Betel, nataqa'en da'aqtaxaarem so lta'a nam la'aqtacpi somaye co'ollaq 'eetega so nta'a. 12Nache so lta'a, ina't soomaye, 'eeta': ¿Hua'ague ca tateuga camaye?
Nache soua llalqa ỹachaxanalo so nqa'aic maye tateuga so la'aqtaxanaxanec Ñim Lo'onatac 'Enauacna, maye chegaqa'a ye Judá. 13Nache 'enapegalo soua llalqa, 'eeta':
Ñaq qauo'ocheelec ñi ilo 'ashena.
Nache soomaye ỹo'ooleguete so 'ashena, ime nache so na'aqtaxanaxanec nelec somaye. 14Nache icaalec so la'aqtaxanaxanec Ñim Lo'onatac 'Enauacna, qaq nache iviralec co'ollaxa somaye nso'ootañi neto'ot aso qo'oipaq late'erai, nache inat, 'eeta':
¿Peta'a nache 'am la'aqtaxanaxanec Ñim Lo'onatac 'Enauacna, maye 'arma' ye Judá?
Nache somaye, 'eeta': Aja', nache aỹem. 15Nache so na'aqtaxanaxanec ỹa'axaiquiolec, 'enapeco': Ñeqo'onaxa taxa ye ima' yaqto' 'auque'e. 16Qalaxaye somaye 'enapeco':
«Saishet da she'eguelaq, qataq saishet da ñeqo'ona ca 'arma', qataq saishet da sachec aca nauole huo'otaq da ñeỹomgui ca 'etaxat da huaña ne'ena. 17Cha'aye Ñim Nataxala' aỹem 'enapega 'eeta': ‹Saishet qome da qollec aca nauole, huo'otaq da 'anỹomgui ca 'etaxat, qataq da 'avi'eguelaq qalaq saishet da 'avi'eguelaqtegue ca 'ec.›» 18Nache se'eso ỹa'axaiquiolec ỹatenachet somaye, 'eeta':
Aỹem, nataqa'en aỹem na'aqtaxanaxanec, sheeta'am 'am, qaq huo'o so lamaxashec Ñim Nataxala', da aỹem 'enapega, 'eeta': 'Auauega qome ye 'arma' yaqto' deque'e qataq nỹom 'etaxat. 19Nache somaye ỹe'eguelaq, nnaicapegue' somaye, nache deque'e qataq nỹom co'ollaq hueta'a ye lma' somaye. 20Qaq co'ollaq nso'ootrañi, datatralec so nquia'axala', nache so la'aqtac Ñim Nataxala', nvita so na'aqtaxanaxanec ỹa'axaiquiolec, maye ñe'eguelaxat so na'aqtaxanaxanec maye chegaqa'a ye Judá, 21nache se'eso ỹa'axaiquiolec, ỹataqta na'axannec so la'aqtac da 'enapega so na'aqtaxanaxanec maye chegaqa'a ye Judá, 'eeta':
Da la'aqtac Ñim Nataxala', 'eeta': «Qaq souaxat da sa 'aualaxaguet da la'aqtac Ñim Nataxala', qataq saishet da 'auo'ot da lamaxasoxonaxac maye 'am ỹamaxalec Ñim Nataxala' maye 'Anatamnaxala', 22nacherata da 'añe'eguelaq, da yaqto' qollec ana nauole qataq 'anỹomgui na 'etaxat, huaña nam saishet da 'am ỹashenem Ñim Nataxala'. Qaq ỹoqo'oye de'era 'aro'ocỹaxac saishet qome da taigui qanqa'en aca nhuachiqui so hua'au 'arta'alpi.»
23Qaq co'ollaq ime da lquia'axac qataq da nỹomaxac so na'aqtaxanaxanec maye chegaqa'a ye Judá, nache so na'aqtaxanaxanec ỹa'axaiquiolec, ỹo'oolec so lalo 'ashena, 24nache so na'aqtaxanaxanec maye chegaqa'a ye Judá jec co'ollaxa. Qalaxaye co'ollaq huangui so nqa'aic nache natena'aguet so llon, nache so llon ỹalauat somaye, nache so lo'ocỹaxac somaye huetangui so nqa'aic, qaq so llon qataq so 'ashena nache datatralec co'ollaxa somaye. 25Qaq huo'oi co'ollaxa soua shiỹaxau' natreuga yemaye, nache ilotra'a co'ollaxa so leuaxaic huetangui so nqa'aic, qataq som llon nache datatalec somaye, huaña nache soomaye iroua'a da la'axaỹaxac som hueta'a so huaqta'a't nỹecpi maye naña so lma' som ỹa'axaiquiolec maye na'aqtaxanaxanec. 26Qaq co'ollaq ỹaỹaten de'era so na'aqtaxanaxanec ỹa'axaiquiolec maye ñe'eguelaxat co'ollaxa som lỹa, nache 'eeta': «Nacheye ye na'aqtaxanaxanec maye sa ỹalaxaguet da lamaxasoxonaxac Ñim Nataxala'. Ỹoqo'oye Ñim Nataxala', ỹaneguet so llon da yaqto' icolaxattega't nache ivitta'a da ỹalauat, qaq nache ipacchigui da la'aqtac Ñim Nataxala'.» 27Huaña nache sa naỹaloxon da 'enapegalo soua llalqa 'eeta': Ña qauo'ocheelec ñi ilo 'ashena, nache soomaye ỹo'ooleguete so 'ashena, 28ime nache jec somaye, nache ilalec so lo'ocỹaxac se'eso shiỹaxaua maye ileu huetangui so nqa'aic, qaq som llon qataq som 'ashena ñaq netraña yemaye, qaq som llon saishet da chec somaye huo'otaq da ỹe'egueeta'a da ỹalauat so 'ashena. 29Huaña, nache so na'aqtaxanaxanec ỹa'axaiquiolec, ỹacoosop so lo'ocỹaxac som la'aqtaxanaxanec Ñim Lo'onatac 'Enauacna maye chegaqa'a ye Judá, nache ỹachalec so lalo 'ashena da yaqto' ỹache, iroua'a yem huaqta'a't nỹecpi maye naña so lma' so na'aqtaxanaxanec ỹa'axaiquiolec, da yaqto' ỹo'ot da lasouaxac, qataq da ilayiñi somaye. 30Qaq co'ollaq ilayiñi somaye, nache ỹachaigui aso maiche lalamaqte nhuachiqui, nache nỹeetapeguelec, 'eeta': «¡Aicoue, 'am ỹaqaỹa!» 31Qaq co'ollaq ime da ilayiñi, nache 'enapegalo soua llalqa, 'eeta':
«Qom sevita da seleu, nache qom aỹem qaulayiiñi, nache aỹem qauachiỹaigui añim huachiqui, maye selaroigui yem la'aqtaxanaxanec Ñim Lo'onatac 'Enauacna. Nache caua ipi'ineqa, huaqta'ai'salo qanqa'eñi yemaye, 32cha'aye ipacchigui qome da la'aqtac Ñim Nataxala', maye ỹamaxalec co'ollaxa yemaye da ỹa'axat, da talec ca nhuaxanaguec añi nca'atoxonaxalate na Betel, qataq 'enauac nam atamnaqa'pi maye huaña ana lcomaraxalatepi yem huaqta'a't nỹecpi ye Samaria.» 33Qaq na'aictaxa co'ollaxa de'era, so Jeroboán saishet da naralaxat da lataxac, nacherata da qaltaq ỹachegoxotaigui so nhuo' le'ecpi som ntaxaỹaxanaxanecpi, da yaqto' ilo'ogue som atamnaqa'pi maye huaña aso lcomaraxalatepi. Nache maicheye ca lauela somaye da ntaxaỹaxanaxanec, nache somaye ỹanagui da ilo'ogue se'eso atamnaqa'pi. 34Qaq souaxato' de'era, nache so llalaqpi so Jeroboán 'enauac da huo'o da lasouaxashet, qataq ỹo'ot da qanmatchiguiñi somayepi da huetalec ana 'alhua.
