So Ajías ỹa'axata'a dam ñaq taỹa'a da talec so Jeroboán
1Qaq se'esoua na'axa'te, nache dalola so Abías, som llalec so Jeroboán. 2Nache so Jeroboán, 'enapega co'ollaxa aso lhua, 'eeta':
«Ña qoñisheguem nagui, nache 'anaralaxat da 'ano'otaxac yaqto' qaica ca 'am ỹauatton da nache 'am ihua. Ime, nache 'anqo'ona ye Silo, yem naña ca na'aqtaxanaxanec Ajías, maye aỹem da'aqtaxanem co'ollaxa da nachaỹem da aỹem lta'a ne'ena nhuo' le'ecpi. 3Nache 'auache qome aca diez nauolepi, qataq aca ntoñiguishepi maye lalegue na ama, qataq ca te'esaq lli'i, nache 'anqo'ona qome da yaqto' 'am da'aqtaxanem ca 'eetec ne'ena nogotolec. 4Qaq nache ỹo'ot co'ollaxa de'era aso lhua so Jeroboán, nache jec, da taỹa ye Silo, nache iviraua'a ye lma' so Ajías.
Qaq so Ajías mashe sa nauaañi, souaxat da ỹataqta mashe ỹa'axaiquiolec, 5qalaxaye Ñim Nataxala' mashe da'aqtaxanem co'ollaxa so Ajías, da aso lhua so Jeroboán naỹa somaye, da dechemaqtaxaalec so llalec souaxat da dalola. Qataq nataqa'en da'aqtaxanem da 'eetec da la'aqtac da denataxan asomaye, qataq da asomaye, naralaxat da no'otaxac.» 6Nache so Ajías co'ollaq hua'aqta'aguet da l-lamaxa naua lapia'ate asomaye nache co'ollaq inoxoneua'a so lasom, nache 'eeta':
Ña 'ampa'auo, 'am maye 'am lhua so Jeroboán. ¿Ta'ainco' ye 'avi'inaxat da no'otaxac aca camachaqaca 'alo? Aỹem, qaỹamaxalec da 'am sa'aqtaxanem da qauem 'ara'axaỹaxac, 7ỹoqo'oye 'avi'eguelaq qome nache qonapega ca Jeroboán, qoneta': «Ñim Nataxala' maye Natamnaxala' na Israel le'ecpi, 'eeta': ‹Aỹem, 'am sachegoxotaigui co'ollaxa na nhuo' le'ecpi da yaqto' sauo'o 'am lataxala' nam ỹalamaxat nhuo' Israel le'ecpi. 8Aỹem, seuotaxanec co'ollaxa da lo'onataxanaxac da nta'a na llalaqpi so David, da yaqto' 'am sanem. Qalaxaye 'am saishet da qoneta'am so David, som ỹamaxashec maye ỹataqta ỹalaxagueta co'ollaxa naua iqataxaco, qataq ỹataqta lquiyaqteỹaxac da Aỹem quetague', qaq 'enauac nam ỹo'otpi ỹataqta saỹamaxareeta. 9Qaq 'am, qalaxaye ỹataqta ỹapactec da qauem nam 'auo'otpi, saq 'ena'am so hua'au nataxala'pi co'ollaq saxanaxa da 'am huo'o, cha'aye 'am 'auo'ot na ỹaqa'a atamnaxala'pi qataq nam ne'enaqtacpi lcat, da yaqto' Aỹem 'aunogoqchet qataq Aỹem qoca'ai. 10Qaq ỹoqo'oye 'enauac ca 'am chegoxoguetpi, talec qome ñaqa'en ca qauem, qataq ileu ñaqa'en 'enauac na ỹalleppi, maye 'am chegoxoguetpi maye netaña na Israel, na'aictaxa da nlatac, huo'otaq nam saishet da nlatac. Nache qaica ca no'onañi da nca'altauec ñaqa'en, 'eeta'am na la'atec na shiguiỹac da qanquelogosheguem nache ỹataqta qanmatta, nache qaica ca no'onañi qanqa'en. 11Qaq cam huaña na huaqta'a't nỹecpi da ileu, qalaq chec qome ca pioxoppi, qaq ca ileuauga ca no'onaxa, qalaq chec ca maỹopi maye chegoqo'ot na piguem, cha'aye nache la'aqtac Ñim Nataxala'.›» 12«Qaq 'am 'alo, ñaq 'avi'eguelaxa qome ca 'arma'. Qaq qom choche 'avireua'a ye huaqta'a't nỹecpi, nache ileu qome que'eca nogotolec. 13Huaña nache 'enauac qome na Israel le'ecpi da nỹeelec camaye qataq ilayiñi. Cha'aye 'enauac nam chegoxoguetpi so Jeroboán, nachecata que'eca nogotolec maye ishet da qailareñi, cha'aye nachaqcata da ỹaỹamaxareeta Ñim Nataxala' maye Natamnaxala' na Israel le'ecpi. 14Qaq qom ime, nache Ñim Nataxala' ỹauo'o ca lta'a na Israel le'ecpi, qaq camaye nacheca qome ca imeuo naqa'en nam chegoxoguetpi so Jeroboán. Qaq de'era, saqaỹaloq qome da ỹo'ot Ñimaye, 15nache Ñim Nataxala' ỹataqta sa iren qome da ỹacholaxan na Israel le'ecpi, 'eeta'am naqa'en na la'auataxa so tala da ỹacholaxan ana na'aatepi. Nache nqateeguesop na Israel le'ecpi, yem netaña no'on 'alhua maye ỹanem co'ollaxa so hua'au lta'alpi, nache ilagaxaalec namayepi ye ỹataqta qaỹoqta ye Éufrates, souaxat da ỹo'ot na le'enaqtacpi lqui'ipi aso Astarté, nache inogoqchet Ñim Nataxala'. 16Nache Ñim Nataxala', ca'ai qome na Israel le'ecpi, souaxat na lasouaxashetpi so Jeroboán, maye ỹo'ot nataqa'en na lasouaxashetpi nam Israel le'ecpi.»
17Nache aso lhua so Jeroboán, ñisheguem co'ollaxa nache jec, taỹa ye Tirsa, qaq co'ollaq choche inoxoneua'a so lma' nache ileu so nogotolec. 18Nache 'enauac so Israel le'ecpi ca'ateueegue co'ollaq qailareñi, qataq nỹeetapeguelec somaye, nache ipacchigui da la'aqtac Ñim Nataxala', maye ỹanem co'ollaxa da ỹa'axat so lamaxashec Ajías. 19Qaq nam laỹepi maye ỹo'otpi so Jeroboán, co'ollaq nalattac, qataq da lo'onataxanaxac co'ollaq nta'a, nache 'enauac da nanettalec aso nere, maye nanettalec da na'aqtaguec nam ỹo'otpi so nta'alpi ye Israel. 20Nache da lo'onataxanaxac so nta'a Jeroboán, ivi' veintidós vi'iye, qaq co'ollaq ileu, nache so llalec Nadab talec da lo'onataxanaxac somaye.
Da lo'onataxanaxac da nta'a so Roboán
21Qaq so Roboán maye llalec so Salomón, somaye nta'a ye Judá. Qaq somaye ivi' cuarenta y un vi'iye da nachaalataxac co'ollaq qoỹanagui da nta'a, nache da lo'onataxanaxac da nta'a ivi' diecisiete vi'iye da ilotague' ye Jerusalén, yem huaqta'a't nỹecpi maye lca'aguishec Ñim Nataxala' co'ollaq lca'agui 'enauac nam huaqta'a't nỹecpi maye lalamaxat nam nhuo' le'ecpi ye Israel, da yaqto' hueta'a da le'enaxat Ñimaye. Qaq aso late'e so Roboán, le'enaxat da Noamá, qaq asomaye Amón lashe. 22Qalaxaye som Judá le'ecpi, ỹo'ottac co'ollaxa na ỹataqta saỹaỹamaxaren Ñim Nataxala', nache ỹataqta inogoqchet Ñimaye souaxat ne'ena lasouaxashetpi, cha'aye nam ỹo'otpi ỹataqta napacalec co'ollaxa som hua'au lta'alpi. 23Cha'aye somayepi nataqa'en nauaxaỹaxaasheguem so natamnaqa'pi, nalec naqa'en aso lcomaraxalatepi, qataq ỹo'ot so le'enaqtacpi maye lqui'ipi aso Aserá, qataq no'oxoosheguem aso natamnaxalate coma' qataq aso 'epaq lamo, no'ot naqa'en aso qo'oipaq late'erai maye qalochiguiñi ana lcouepi. 24Qataq so shiỹaxauapi se'eso 'alhua nquisheshigui de'era la'amqaanataxanaxac, nache ỹe'enaxat dam ỹataqta qaiqaiga lataxac nam ỹotta'a't shiỹaxauapi, maye Ñim Nataxala' ỹo'orauec co'ollaxa, ỹauaachigui naqa'en so Israel le'ecpi. 25Qaq co'ollaq ivi' soua cinco vi'iye da lo'onataxanaxac da nta'a so Roboán, nache so Sisac maye nta'a ye Egipto, taỹa ye Jerusalén da iloquiaxan so netaña somaye, 26nache deuotaxanec so nogoxoshetpi maye lalamaxatpi aso atamnaxaqui maye lalamaqte Ñim Nataxala', qataq ỹache 'enauac so huetaigui so nma' lta'araic. Nataqa'en ỹache aso npaqtaxanaqtepi oro maye lo'onata co'ollaxa so Salomón. 27Nache so nta'a Roboán, qaltaq ỹo'ot co'ollaxa aso dalaxai npaqtaxanaqtepi bronce, da yaqto' nmeneguet naqa'en asomayepi, nache ỹanem da ilo'ogue naqa'en so alleppi maye nauaatalec so ñegueuo so nma' lta'araic. 28Qaq so nta'a naxa da taua'a aso atamnaxaqui maye lalamaqte Ñim Nataxala', nache se'eso nauanaxanaxanecpi ỹache da nauaatalec somaye, qaq naxa da ime, nache qaltaq ỹe'eguelaxata da ỹanaña som lauanaxanaqa' somayepi. 29Qaq nam laỹepi na'aqtaguecpi da lo'onataxanaxac so Roboán, qataq nam ỹo'otpi, nache 'enauac da nanettalec aso nere, maye nanettalec da na'aqtaguec nam ỹo'otpi so nta'alpi ye Judá. 30Qataq de'era lo'onataxanaxac so Roboán, nache huetoigui da queto'ot co'ollaxa da nalattague' so Jeroboán. 31Qaq co'ollaq ileu so Roboán, nache qailareñi qaỹauaxaỹaxana'ai' so hua'au lta'alpi, maye huaña ye huaqta'a't nỹecpi maye lalamaxat so David. Qaq aso late'e somaye, le'enaxat Noamá, asomaye Amón lashe. Qaq da lo'onataxanaxac somaye da nta'a, qalaq talec so llalec Abián.
