1Qaq Ñim Nataxala' 'enapega co'ollaxa so Jehú, maye llalec so Jananí da yaqto' 'enapega so Basá, 'eeta': 2«Aỹem 'am sachegoxottoigui co'ollaxa na lsoche na 'alhua, da 'am ñauaxaỹaxaasheguem da yaqto' 'am lataxala' ñaqa'en na ỹalamaxat nhuo' Israel le'ecpi. Qalaxaye 'am, ỹataqta qoneta'am so Jeroboán da huo'o 'anqa'en da lasouaxashet na ỹalamaxat nhuo' le'ecpi, nache aỹem 'aunogoqchet souaxat na 'arasouaxashetpi. 3Qaq ỹoqo'oye 'am Basá, ỹataqta 'am ñelaxatchiguiñi qome qataq 'enauac na 'aỹa'alaqpi, nache 'am 'eeta'am ñaqa'en da sheetec co'ollaxa so Jeroboán maye llalec so Nabat. 4Qaq nam 'arhuo' le'ecpi da huo'o ca ileuaigui cam huaqta'a't nỹecpi, nache ca pioxoppi chec qome camaye, qaq cam ileuauga ca no'onaxa qalaq chec qome ca maỹopi maye chegoqo'ot na piguem.» 5Qaq nam laỹepi na'aqtaguecpi nam ỹo'otpi so Basá, qataq da lo'onataxanaxac co'ollaq nta'a, nache 'enauac da nanettalec aso nere, maye huetalec da na'aqtaguec nam ỹo'otpi so nta'alpi ye Israel. 6Qaq co'ollaq ileu so Basá, nache qailareña ye Tirsa. Qaq da lo'onataxanaxac da nta'a nache talec so llalec Elá. 7Qaq Ñim Nataxala', 'enapega co'ollaxa so Jehú, maye llalec so Jananí da yaqto' 'enapega so Basá, qataq so llalaqpi souaxat da 'enauac na ỹo'otpi ỹataqta saỹaỹamaxaren, qataq inogoqchet Ñim Nataxala', cha'aye 'enauac na ỹo'otpi da 'eeta'am na ỹo'otpi co'ollaxa so Jeroboán qataq so llalaqpi maye nmichiguiñi naqa'en co'ollaxa Ñim Nataxala'.
Da lo'onataxanaxac so nta'a Elá qataq so Zimri
8Qaq co'ollaq mashe ivi' veintiséis vi'iye da so Asá nta'a ye Judá, nache so Elá maye llalec so Basá, ỹacoolec da lo'onataxanaxac da nta'a ye Israel, huaña ye Tirsa, qaq da lo'onataxanaxac da nta'a ivi' dos vi'iye, 9qalaxaye so Zimri maye lamaxashec somaye, som ilotague' aso laỹepi naigonapi maye alaataxaquipi, somaye dataỹa'aguet co'ollaxa so Elá. Nache so Elá co'ollaq hueta'a ye Tirsa, nache nỹomtac, nache ivira'a da ỹataqta taxaic, hueta'a so lma' so Arsa, maye ilotague' naxa so lma' lta'araic somaye, 10nache ivireuo co'ollaxa so Zimri, nache ỹalauat somaye da yaqto' so Zimri talec da no'onataxanaxac da nta'a. Qaq de'era huetoigui so vi'i veintisiete, co'ollaq so Asá nta'a ye Judá. 11Nache co'ollaq choche ỹacoolec da lo'onataxanaxac da nta'a so Zimri, nache ỹalauat 'enauac so llalaqpi so Basá. Nache ỹataqta nmichiguiñi naqa'en so lauo' le'ecpi, qataq so nauochaxauapi somaye. 12Qaq 'era da 'eetec co'ollaxa so Zimri, da ỹataqta nmichiguiñi naqa'en so llalaqpi so Basá, nache ipacchigui da la'aqtac Ñim Nataxala', maye ỹanem co'ollaxa so la'aqtaxanaxanec Jehú, da da'aqtaxanem so Basá, 13souaxat nam lasouaxashetpi so Basá, qataq so llalec Elá, maye ỹo'ot nataqa'en da lasouaxashetpi so Israel le'ecpi, souaxat da natameetacot so ỹaqa'a atamnaxala'pi, nache inogoqchet Ñim Nataxala' maye Natamnaxala' so Israel le'ecpi.
14Qaq na laỹepi na'aqtaguecpi, qataq na ỹo'otpi co'ollaxa so Elá, nache nanettalec aso nere maye huetalec nam ỹo'otpi co'ollaxa so nta'alpi ye Israel.
15Qaq co'ollaq ivi' veintisiete vi'iye da so Asá, nta'a ye Judá, nache so Zimri ỹacoolec da lo'onataxanaxac da nta'a, huaña ye Tirsa, qalaxaye ivi' siete na'axa'te da nta'a somaye. Qaq so alleppi Israel le'ecpi laỹoota'a't da huotaique da iloquiaxan so huaqta'a't nỹecpi ye Guibetón, maye lalamaxat so filisteopi, 16qaq so alleppi maye laỹoota'a'tpi co'ollaq la'axaỹaxac da so Zimri, dataỹa'aguet so nta'a qataq ỹalauat. Huaña, nache se'eso na'a'q 'enauac so Israel le'ecpi, ỹanagui da nta'a so Omri, som lataxala' so alleppi. 17Ime, nache so Omri, qataq 'enauac so alleppi Israel le'ecpi ỹaxaañi co'ollaxa da iloquiaxaatac ye Guibetón, nache nqo'ona da iloquiaxan ye Tirsa. 18Nache so Zimri co'ollaq ila'a da mashe noxonec som huaqta'a't nỹecpi, nache somaye taigui so nma' lta'araic, nache ỹavigaxat, qaq so Zimri nache pa'ataigui co'ollaxa somaye. Qaq 'era da 'eetec co'ollaq ileu somaye, 19souaxat na lasouaxashetpi, cha'aye ỹo'ot nam saỹaỹamaxarenpi Ñim Nataxala', qataq icaachigui nam qauem maye ỹo'otpi co'ollaxa so Jeroboán, maye ỹo'ot nataqa'en na lasouaxashetpi so Israel le'ecpi. 20Qaq nam laỹepi ỹo'otpi so Zimri, qataq co'ollaq dataỹa'aguet so nta'a Elá, nache nanettalec aso nere maye huetalec 'enauac nam ỹo'otpi som nta'alpi ye Israel.
Da lo'onataxanaxac so nta'a Omri
21Qaq huaña, nache so Israel le'ecpi ncolaxara'ache co'ollaxa, dos soua lpa'axaco. Nache huo'o som datalec so Tibni, som llalec so Ginat da yaqto' lta'a somayepi, qaq so laỹepi qalaq datalec so Omri da yaqto' lta'a. 22Qalaxaye som ca'ategue so Omri, nauec co'ollaxa som ca'ategue so Tibni, som llalec so Ginat. Nache so Tibni ileu, qaq so Omri qalaq ivira'a da nta'a. 23Qaq co'ollaq mashe ivi' treinta y un vi'iye da so Asá nta'a ye Judá, nache so Omri ilo'ogue co'ollaxa ye Israel, qaq somaye ivi' doce vi'iye da nta'a, qaq nache huaiguilo soomaye soua seis vi'iye, da ilotague' so netaña ye Tirsa. 24Qaq somaye desheenaxana co'ollaxa añi qasoxonaxa maye naña ye Samaria, maye lalamaqte so Semer, nache sesenta y seis kilos so lcat plata so lasheue, qaq nache ỹanaña yemaye da no'oxoosheguem so huaqta'a't nỹecpi, nache ỹanagui da le'enaxat Samaria, cha'aye le'enaxat Semer, som hua'auchiguiñi lalamaxat yemaye. 25Qaq nam ỹo'otpi so Omri, ỹataqta saỹaỹamaxaren Ñim Nataxala', cha'aye ỹapacauec da qauem na ỹo'otpi, napacalec so hua'au nta'alpi, 26cha'aye icaachigui nam qauem maye ỹo'otpi co'ollaxa so Jeroboán, som llalec so Nabat, maye ỹo'ot nataqa'en na lasouaxashetpi so Israel le'ecpi, souaxat da natameetacot so ỹaqa'a atamnaxala'pi, nache inogoqchet Ñim Nataxala' maye Natamnaxala' so Israel le'ecpi. 27Qaq 'enauac na laỹepi na'aqtaguecpi, qataq na ỹo'otpi, qataq co'ollaq nalattac so Omri, nache nanettalec aso nere maye huetalec nam ỹo'otpi so hua'au nta'alpi ye Israel. 28Qaq co'ollaq ileu somaye, nache qailareña ye Samaria. Nache so llalec Ajab, talec da lo'onataxanaxac da nta'a.
Da lo'onataxanaxac so nta'a Ajab
29Qaq co'ollaq ivi' soua treinta y ocho vi'iye da so Asá, nta'a ye Judá, nache so Ajab, maye llalec so Omri, ỹacoolec da lo'onataxanaxac da ilo'ogue so Israel le'ecpi. Nache veintidós vi'iye da ilotague' so Israel le'ecpi, huaña ye huaqta'a't nỹecpi ye Samaria. 30Qalaxaye so Ajab maye llalec so Omri, ỹo'ot co'ollaxa na ỹataqta saỹaỹamaxaren Ñim Nataxala', cha'aye ỹapacauec da qauem na ỹo'otpi, napacalec so hua'au nta'alpi, 31cha'aye qaica ca 'enec naqa'en, da icaachigui da ỹo'ot nam lasouaxashetpi so Jeroboán, maye llalec so Nabat. Qataq ivitta'a da huaroneguet aso Jezabel, asom llale so Etbaal, maye nta'a ye Sidón. Huaña, nache ivira'a da ỹo'oxoreetac, qataq natameetacot so Baal. 32Nache huaña ye Samaria da no'oxoosheguem aso nca'atoxonaxalate, qataq aso atamnaxaqui da lalamaqte naqa'en so Baal. 33Nataqa'en ỹo'ot aso le'enaqta lqui'i aso Aserá, huaña nache ỹataqta nquictec da inogoqchet Ñim Nataxala', maye Natamnaxala' so Israel le'ecpi, qaq nache ỹataqta napactelec na ỹo'otpi so hua'au nta'alpi ye Israel.
34Qaq huetoigui co'ollaq nta'a so Ajab, da so Jiel maye Betel le'ec, no'oxoosheguem co'ollaxa so huaqta'a't nỹecpi ye Jericó.
Nache co'ollaq qano'oxoosheguem so lo'oxonaxala' somaye, nache ileu so Abirán maye la'auaxanec llalec somaye, qataq co'ollaq ỹanauo so lasompi, nache ileu so Segub, som llalec na'asa. Huaña, nache ipacchigui da la'aqtac Ñim Nataxala', maye ỹanem co'ollaxa da ỹa'axat so Josué som llalec so Nun.
