Da loxonaxanaxac so Jonatán
1Qaq huo'o so na'a'q nache so Jonatán, som llalec so Saúl, 'enapega so ltaua 'eeta':
Qolaq qome, sa'axasoxonaxalec so tala da ñeqo'onaxa ye lanataqa' ye filisteopi.
Qalaxaye so Jonatán saishet co'ollaxa da da'aqtaxanem de'era so lta'a, 2maye hueta'a co'ollaxa so lanataqa' maye huaña ye Gabaa, hueto'ot na la'a' aso qo'oipaq granado, nnaictague' so seiscientos nalleppi. 3Qaq so nhuomaigui lomaxaqui le'enaxat efod qalaq ỹachetac so Ahias, so llalec so Ajitob, qataq lasoshec so Icabod, som llalec so Finés, qataq laual so Elí, som ltaxaỹaxanaxanec Ñim Nataxala' co'ollaq huaña ye Silo.
Qaq se'eso nhuo' le'ecpi saỹaỹaten co'ollaxa da jec so Jonatán. 4Qaq somaye huotaique co'ollaxa da ivira'a so lanataqa' so filisteopi, qalaq iuen da quetegue so lca'amaxa maye quichiguinguilo soua lta'al coma'ye, maye le'enaqa'ate Boses qataq Sene, 5so 'oonolec soomaye pa'aỹa'ague da sheu' maye dataỹauga ye Micmas, qaq so lỹa pa'aỹa'ague da la'añaxa, maye datatauga ye Gabaa. 6Nache so Jonatán 'enapega so ltaua, 'eeta':
Qolaq qome, saxatague da le'ego, nache sevirqa'ata ye lanataqa' ye sa qara'amaqtenaxanaxauapi. Cha'aye Ñim Nataxala' yo'oqta da qomi' itaua'n, cha'aye Ñimaye qaica naqa'en ca lqalaic da ñauegaq na qampa'aguenaxauapi, na'aictaxa da ỹataqta qalota, huo'otaq saq 'amaqtaq. 7Nache so ltaua 'enapeco':
'Auo'ot qome 'enauac da 'arhuennataxa, cha'aye aỹem qaica ca shega da 'am setaunaua'a ca qonetapeguec. 8Nache so Jonatán 'enapego' somaye, 'eeta':
Qolaq saxatague da le'ego, ñeqo'onaxata ye hueta'a yemayepi, yaqto' qomi' ila'alo. 9Qaq da qomi' ila'alo, nache da qomi' 'enapegalo da nache souaqa'a cam sonaqtaña, nache qomi' seuataqa'aguet qome, saishet da saxasheguemec ye hueta'a yemayepi. 10Qalaxaye da qomi' 'enapegalo da saxasheguemec yemayepi, nache saxasheguemec qome, cha'aye damaye nachera da la'anec qome Ñim Nataxala' da qomi' ỹanema da qoroxonec. 11Qaq huaña nache soomaye nachaxanalo co'ollaxa so filisteopi maye hueta'a so lanataqa'. Qaq somayepi, co'ollaq ila'alo soomaye, nache 'enapeco': «Ña qauloỹa na hebreopi mashe nnoxoosheguem chegoqtoigui na auacpi maye nqañoxotaxaquipi.» 12Nache saỹaỹaloxon da ỹa'alaqtaña so Jonatán qataq so ltaua somaye, 'eeta':
«¡Ña qananaisheguema na souaqta'a, cha'aye huo'o da sauoqtaique qami' sa'aqtaxanaxama!»
Nache so Jonatán 'enapego' so ltaua, 'eeta':
«Aỹem 'anca'atasheguemgue qome, cha'aye Ñim Nataxala' ỹanem da loxonaxanaxac na Israel le'ecpi.» 13Nache so Jonatán nqapectasheguem da quisheguem, qaq so ltaua nache ca'attasheguemgue, huaña nache so Jonatán delogui' co'ollaxa so filisteopi, qaq som shiỹaxauapi maye nqalagoqtañi naqa'en somaye, nache so ltaua ipagaqnauec da ỹalauat. 14Nache se'eso hua'auñi l-loquiaxac so Jonatán qataq so ltaua, ỹalaua't co'ollaxa so veinte ỹalleppi, huangui se'eso sa lca'ague ñiguisheguem. 15Nache 'enauac som hueta'a se'eso lanataqa' so filisteopi, qataq som alleppi maye huetauga so no'onaxa, qataq so hueta'a so nanataqa' maye nauanaxanaqa', qataq som qalotoigui alaataxaicpi nataqa'en huo'o co'ollaxa da lcolanaxa. Qataq huo'o so lacholaxanaxa ana 'alhua, nache ỹataqta lta'araic da ncolanaxa. 16Qaq som lauanaxanaxanecpi so Saúl, maye hueta'a ye Guibea maye lma' so Benjamín, ila'a co'ollaxa so filisteopi da ỹataqta tateugalo da datauec. 17Nache so saúl 'enapego' som nalleppi maye nnaictague'pi, 'eeta':
Ñaq qaumichiñi aca ne'enaxat lmalate da yaqto' saỹatenaq negue't ca deqaptauec nam qaralamaxatpi.
Nache co'ollaq qaimeten aso ne'enaxat lmalate, nache qailalec da deqaptrauec soua Jonatán qataq so lpaqtaxanaqte lo'o. 18Qaq se'eso na'a'q ye aso arca maye laỹe' da naỹamaxataxac Ñim Lo'onatac 'Enauacna, nache netaigui so Israel le'ecpi, nache so Saúl 'enapega so Ajías, 'eeta':
'Ando'ocna'a añim arca maye laỹe' da naỹamaxataxac Ñim Lo'onatac 'Enauacna. 19Qalaxaye so Saúl co'ollaq ña detaqtague' so ntaxaỹaxanaxanec, nache dam qaica ca aỹaanaqa' maye huaña so lanataqa' so filisteopi nquictauec. Huaña nache so Saúl 'enapego' so ntaxaỹaxanaxanec, 'eeta':
«A'aye, saishet da 'andoi'.»
20Nache so Saúl qataq 'enauac so nalleppi ỹataqta sanaỹaloxon da laỹona't, nache tauga so alaataqa'. Qaq de'era 'eetec da qaica ca aỹaanaqa' maye huaigui so filisteopi, nachero' da ỹo'ot da maiche nalaara't somayepi. 21Qaq nataqa'en som hebreopi maye mashe salquishe'egue da ỹalectaigui so filisteopi qataq nache lỹatac co'ollaxa somayepi da ỹalectaigui so nalleppi, somaye huaxaiguet co'ollaxa so Israel le'ecpi maye nnaictague' so Saúl qataq so Jonatán. 22Nache so Israel le'ecpi maye nqañoxotoigui co'ollaxa ayem qasoxonaxapi ye Efraín, co'ollaq ỹaỹaten da so filisteopi datauec, nache jec da icanapec da yaqto' iloquiaxan. 23Qaq so loquiaxac ỹataqta nquictauec, nache napacalec ye Bet Avén, nache se'eso na'a'q Ñim Nataxala' nca'alaxatec so Israel le'ecpi.
Da ỹan la'aqtac so Saúl
24Qalaxaye so Israel le'ecpi ỹataqta qaica ca la'añaxac co'ollaxa se'eso na'a'q, cha'aye ỹaguec na lqouaxa souaxat da qaica ca chec, cha'aye so Saúl ỹan co'ollaxa da la'aqtac, 'eeta': «Da huo'o ca chec ca nallec qom ñaq saxanaxa da avit, qataq qom saxanaxa da huo'o ca ivi', da ñematchiguiñi da salauat na ñepa'aguenaxauapi, nache camaye huo'o qome ca nhuaxanaguec.» 25Nache so alleppi ivira'a co'ollaxa so aviaq maye huaigui na te'esaq lta'a lli'i huetalec na 'alhua. 26Qaq co'ollaq qainoxoneua'a so aviaq, nache qailota'a ana qo'oipaqpi da ỹataqta ñettañi na te'esaq lta'a lli'i, qalaxaye qaica ca ỹe'egueeta'a da ỹe'eguen souaxat da qañe'etega so qoỹan na'aqtac. 27Qalaxaye so Jonatán, ye saishet co'ollaxa da hua'aqchigui so ỹan la'aqtac so lta'a da 'enapega so nalleppi, nache somaye ỹauota'a so npon maye nasoqta'a da ỹa'areua'a na laỹe so te'esaq lta'a lli'i, nache na huagui so lsheenec somaye nache chec, qaq huaña nache pasa'a da huo'o da la'añaxac. 28Nache so 'oonolec so alleppi Israel le'ecpi 'enapego', somaye, 'eeta':
So 'arta'a huo'o da ỹan la'aqtac ỹanem na nalleppi, qaq 'enapec da huo'o ca chec ca nallec nagui, nache huo'o ca nhuaxanaguec qome. Qaq ỹoqo'oye na shiỹaxauapi ỹataqta qaica ca la'añaxac. 29Nache so Jonatán 'enapeco':
So ita'a ỹasouaxateguet da lque'emaxa na maiche nhuo' le'ecpi. Ña qaumichiñi da qaltaq dalaxaic da ỹa'añaxac, souaxat da she'eguen sotai' qapio'olec se'eso te'esaq lta'a lli'i, 30qaq ỹactec taxa da la'añaxac na shiỹaxauapi da chec nagui na lhuotaxanaxat nallec, maye lalamaxat so mpa'aguenaxauapi. ¡Qataq ỹataqta sala'axaic taxa da nanoxonaguec nam filisteopi! 31Nache se'eso na'a'q so Israel le'ecpi ỹalauat so filisteopi, chegoqchiguiña ye Micmas, nache ivitta'a ye Ayalón. Qalaxaye so alleppi Israel le'ecpi ỹataqta ỹaguec da nasamñi. 32Huaña nache se'eso alleppi ỹacona 'enauac so lalamaxatpi so mpa'aguenaxauapi, nache ỹaconeua'a aso qaguetapi, huacapi, qataq so huaca llalaqpi, nache hueta'aguet naqa'en na 'alhua da ipelecot na lqosot, nache checa'ai' na ltago'q so lapat. 33Qalaxaye huo'oi co'ollaxa soua da'aqtaxaarem so Saúl, 'eeta':
Na shiỹaxauapi huo'o da lasouaxashet hueto'ot Ñim Nataxala', cha'aye chec so lapat maye ñaq huo'o na ltago'q.
Nache so Saúl, 'enapeco':
¡Hua', cha'aye 'enauac da saqaualaqai! Qaq nagui aỹem qanamaqaiua'a ca ỹataqta lta'araic coma' nqalagoqtauo qanqa'eñi. 34Nataqa'en qoñiỹapega na shiỹaxauapi da ñi 'oonolec nauegueuo ca lalo huaca, qataq aca lalo qagueta, da yaqto' qapilliquiỹot naua lqoso'oche, nache qollequi' caamaye, qalaxaye saishet da qavi'iguelaqỹa da qollequi ca lapat da ñaq huo'o na ltago'q yaqto' saishet da huo'o ca qarasouaxashichi hueto'ot Ñim Nataxala'. 35Nache so Saúl, no'oxoosheguem aso nca'atoxonaxalate da qanatamnot Ñim Nataxala', qaq asomaye nachaso' aso hua'auchiguiñi da ỹo'ot. 36Qaq ime nache 'enapeco' so Saúl:
Senotaxaña ne'ena pe da seloquiaxanaq qataq ñeuoraq ye filisteopi seviraxataqa'aguet ca yo'oxoñi, nache qaica ca ñeca'alaxataqtauec.
Nache somayepi 'enauac da ỹasat, 'eeta':
Aja', 'auo'ot qome cam ỹaỹamaqchiguiñi 'anqa'en.
Qalaxaye so ntaxaỹaxanaxanec 'enapeco':
Ña sa'auaxanaxañi taxa da ña'aqtaxanaxai' Ñim Lo'onatac 'Enauacna.
37Nache so Saúl inat Ñim Lo'onatac 'Enauacna, 'eeta':
¿Peta'a iuen da secanapec ye filisteopi? Qataq ¿peta'a 'aỹa'anem da dauegaxan na 'aralamaxat nhuo' Israel le'ecpi?
Qalaxaye se'eso na'a'q, Ñim Nataxala' saishet da ỹasateguet somaye. 38Huaña nache so Saúl, iỹaxaneuga 'enauac so lataxala'pi se'eso nhuo' le'ecpi nache inat, 'eeta':
Ñaq aỹem qaua'aqtaxañim, chaq negue't ca lasouaxashet nagui de'era. 39¡Qalaxaye nagui san da ỹa'aqtac, hua'aqchigui Ñim Nataxala', maye lca'alaxaqui na Israel le'ecpi, da ca lasouaxashet de'era nache qaỹalauat, na'aictaxa da nacheso so ỹalec Jonatán!
Qalaxaye 'enauac se'eso alleppi qaica ca ỹasateguet somaye. 40Ỹoqo'oye so Saúl 'enapego' 'enauac so Israel le'ecpi, 'eeta':
Qami' qoviỹa'a qome ne'ena, qaq aỹem qataq da ỹalec Jonatán qalaq souaqa'a da lỹa laỹe.
Nache so alleppi 'enapeco': 'Auo'ot ca ỹaỹamaqchiguiñi 'anqa'en.
41Nache so Saúl, 'enapeco':
'Am Nataxala' maye Natamnaxala' na Israel le'ecpi ¿ta'ainco' ye saishet da 'auasateguet ne'ena 'aramaxashec? Qaq da ỹasouaxashet damaye, huo'otaq da ỹalec Jonatán, nache que'eca alletaxac qom nnoxonec ca Urim, qache qarasouaxashet damaye, qaq qom nnoxonec ca Tumim, qache lasouaxashet na 'aralamaxat Israel le'ecpi.
Nache se'eso alletaxac taaleguete soua Jonatán qataq so Saúl, nache so shiỹaxauapi huesoueeguesop so nasouaxashet. 42Huaña nache so Saúl 'enapeco':
Qanallichiigui qome da ỹalec Jonatán qataq aỹem.
Nache so alletaxac taalec so Jonatán. 43Qaq nachera da huo'omshe so Saúl 'enapego' so Jonatán, 'eeta':
Ñaq aỹem 'aua'aqtaxanem ca 'auo'ot co'ollaxa.
Nache so Jonatán ỹasat, 'eeta':
Aja', 'eesa da aỹem she'eguen caillaye sotai' qapio'olec te'esaq lta'a lli'i maye huagui na lsheenec so ñepon maye ñasoqta'a. Ỹoqo'oye nagui aỹem seleu qome. 44Nache so Saúl, 'enapeco':
¡Ñim Lo'onatac 'Enauacna ỹataqta lta'araic qome naqa'en ca ñeuaxanaguec qom saishet da 'aleu 'am Jonatán!
45Qalaxaye so shiỹaxauapi 'enapego' so Saúl, 'eeta':
¡Ca 'eeteco' da ishet da ileu da Jonatán, ye damaye ỹanem co'ollaxa da lta'araic loxonaxanaxac na Israel le'ecpi! ¡Qaq saishet qome da ileu damaye! ¡Cha'aye sanqot da qara'aqtac Ñim Nataxala', da saishet qome da choche 'oonolec laue na lqaic ca talec ana 'alhua! Cha'aye dam ỹo'ot nagui damaye, chegoqchigui da ltaunaxanaxac Ñim Lo'onatac 'Enauacna.
Qaq 'era da 'eetec so shiỹaxauapi da nca'alaxateeguesop da l-leuaxa so Jonatán. 46Huaña nache so Saúl, ỹaxaañi da icaatac so filisteopi, nache somayepi ỹe'eguelaxa so maiche na'alhua. 47Qaq 'era da 'eetec so Saúl co'ollaq mashe lta'a so Israel le'ecpi, nache 'enauaque naua pa'aiguelo naua nma'ate da deloctague' so mpa'aguenaxauapi maye lma' co'ollaxa ye Moab, Amón, Edom, qataq so nta'a ye Soba, qataq so lta'a so filisteopi, qaq nache camachaqca ca nqo'ona somayepi nache loxonec. 48Qataq laỹona't co'ollaxa so nalleppi nache loxonec so Amalec, qaq 'era da 'eetec somaye da isoueeguesop so Israel le'ecpi so cachaxaicpi. 49Qaq so Saúl, tres soua llalqa ỹale't: Jonatán, Isví qataq so Malquisúa. Qataq dos soua llale 'alo: Merab, qaq aso na'asa Mical. 50Qaq aso lhua so Saúl le'enaxat Ajinoán, asom llale so Ajimaz. Qaq so lataxala' so nalleppi somaye le'enaxat Abner, som llalec so Ner, maye ntesoqo' so Saúl. 51Qaq so Cis maye lta'a so Saúl, nache lqaỹa so Ner, som lta'a so Abner, qaq 'enauaque soomaye da lta'a so Abiel.
52Da nalaataxac so Saúl co'ollaq deloctague' so filisteopi ỹataqta lta'araic qataq qaỹoqtec, iviraxattrec soua vi'iye co'ollaq ña nta'a somaye. Ỹoqo'oye so Saúl da huo'o ñi ila'a nsoq da 'añaxaic, qataq sansatta nache ỹacona da ỹalecnoigui so nalleppi.
