Ñim Nataxala' mashe saỹaỹamaxaren da nta'a so Saúl
1Qaq huo'o so na'a'q, nache so Samuel 'enapega so Saúl, 'eeta':
«Ñim Nataxala' aỹem ỹamaxalec co'ollaxa da 'am secorelec da yaqto' 'am lta'a na Israel le'ecpi maye lalamaxatpi. Qaq ỹoqo'oye nagui 'ana'axaỹaxaachigui da la'aqtac Ñimaye. 2Da la'aqtac Ñim Nataxala' maye Qaica ca Ỹaqalanapec, 'eeta': ‹Aỹem sauo'o qome ca nhuaxanaguec na llalaqpi so Amalec, souaxat dam ỹo'otec co'ollaxa na Israel le'ecpi co'ollaq ca'ai ye Egipto, nache namayepi ỹataqta saỹashenem da quetegue so nqa'aic.› 3Qaq ỹoqo'oye nagui 'anqo'ona yemayepi, nache saishet da 'auchoxoreetac da 'auloquiaxan, nache ỹataqta 'anmatchiguiñi qome da 'aualauat 'enauac ye ỹalleppi, 'alpi, ñaqpiolec, qataq na cheta'ague da ñiguiñi, qataq aye huacapi, qaguetapi, cameellopi qataq 'ashenapi.»
4Nache so Saúl iỹaxanegue 'enauac so shiỹaxauapi, nache naloqna't co'ollaq huaña ye Telayín. Qaq ivi' doscientos mil so alleppi maye petañi qataq diez mil so alleppi Judá le'ecpi. 5Huaña nache so Saúl nqo'ona so huaqta'a't nỹecpi maye lma' so Amalec, nache lauanaxanaqa' so loigue so la'auaxac, 6qalaxaye hua'auñi da ỹamaxa da la'aqtac so queniitapi, da 'enapega 'eeta':
Qami' qauaỹamaxacheeta co'ollaxa na Israel le'ecpi co'ollaq chegaqa'a ye Egipto, ỹoqo'oye qoquiỹa'ai qome na amaleciitapi. Qauataiuec qome yaqto' saishet da qaualliquiitaigui namayepi qom ñematchiguiñi.
Nache so queniitapi ca'ai co'ollaxa so amaleciitapi. 7Nache so Saúl qataq so nalleppi iloquiaxan co'ollaxa som amaleciitapi, nache ỹachegoxotchiguiña ye Javilá da icaatac, nache iviraxatta'a so ñegueuo ye Shur, maye loga't ye 'alhua Egipto, huaña nache nauec somayepi, 8qataq loxonec so Agag, maye lta'a so amaleciitapi, nache ỹalauat 'enauac so nalleppi somaye irota'a so ỹeelonec. 9Qalaxaye so Saúl qataq so nalleppi, nache nca'alaxattauec co'ollaxa so Agag, qataq saishet da ỹalauat aso ỹataqta 'onaxai qaguetapi, qataq so huacapi, qataq so chaxaraic huaca llalaqpi, qataq qagueta lhuaraicpi, qataq saishet da ilaxachigui so ỹataqta no'on nogoxoshetpi, ndotec so qaica ca naigui, qataq qaica ca la'amaqchec da ilaxachigui.
10Huaña nache Ñim Nataxala' 'enapega so Samuel, 'eeta':
11«Ỹataqta huo'o da ñetogotaxac da sanagui da nta'a ñi Saúl, cha'aye ñimaye aỹem ca'ai qataq saỹalaxaguet na ỹamaxasoxonaxacpi.»
Nache so Samuel ỹataqta qaica ca lamaic, nache imauec se'eso pe da nqouagaxaueetacot Ñim Nataxala'. 12Qaq so lỹa na'a'q, nache ỹataqta no'ottasheguem da nqo'ona so Saúl. Qalaxaye qaicoyeguen co'ollaxa somaye da so Saúl mashe naỹa ye Carmel, yem huaña co'ollaxa da nauaxaỹaxaasheguem so coma' da yaqto' nhuennataxat, qaq ime, nache ỹe'eguelaxa da taỹa ye Gilgal. 13Nache so Samuel nqo'ona ye hueta'a so Saúl, nache so Saúl 'enapego' somaye, 'eeta':
Ñim Nataxala' 'am ỹanem qome da 'anqouagaxa. Aỹem mashe sepacchigui da so'ot da lamaxasoxonaxac Ñim Nataxala'.
14Nache so Samuel, 'enapeco': ¿Qaq negue't dam sa'aqtega la'alaxac ana qaguetapi qataq da nnoinaxac ana huacapi?
15Nache so Saúl, 'enapeco': Qomye qaỹachegoxotta'a ye Amalec, cha'aye ne'ena nhuo' le'ecpi no'onaxatañi ana ỹataqta no'on qaguetapi qataq ana huacapi da yaqto' ỹaneuo da lachetaqtaxanaqte, da ỹanot Ñim Nataxala' maye 'Anatamnaxala'. Qalaxaye so laỹepi nogoxoshetpi ỹataqta ñemataqchiguiñi da ñelaxataxañi.
16Nache so Samuel 'enapega so Saúl, 'eeta': ¡Ñaq aỹem 'ana'axaỹaxana, 'am sa'aqtaxanem da la'aqtac Ñim Nataxala' maye aỹem ỹanem so pe!
Nache so Saúl, 'enapeco': Ña 'aua'axat.
17Nache so Samuel, 'enapec:
«¿Peta'a saisheto' da nache 'am co'ollaxa da qonapec qaica ca 'ara'amaqchec? Qalaqca 'avira'a da 'am lataxala' na maiche nalamaxat nhuo' Israel le'ecpi, qataq Ñim Nataxala' 'am ỹanagui da 'am lta'a na Israel le'ecpi. 18Qaq Ñim Nataxala' da huo'otaq 'am ỹamaxalec co'ollaxa da 'anqo'ona da 'aulaxachigui se'eso 'etaxaloxoicpi amaleciitapi, qataq ỹataqta 'anmatchiguiñi da 'aualauat. 19¿Qalaq ta'ainco' da saishet da 'aualaxaguet da lamaxasoxonaxac Ñim Nataxala', nacherata da 'anache na 'arhuotaxanaxatpi maye lalamaxatpi co'ollaxa so 'ampa'aguenaxauapi, nache 'auo'ot dam sa ỹaỹamaxañi ỹauaachigui 'anqa'en Ñim Nataxala'?»
20Nache so Saúl, 'enapeco':
Aỹem ỹataqta salaxaguet da so'ot nam aỹem ỹamaxalecpi Ñim Nataxala', nache ỹataqta ñematchiguiñi so amaleciitapi, qaq ỹoqo'oye ỹoxonec ñi nta'a Agag, nache ñauega ne'ena. 21Qalaxaye na ñalleppi no'onaxatañi ana ỹataqta no'on qaguetapi, qataq ana huacapi, maye taỹa'a taxa da ỹataqta qanmatchiguiñi da qailaxachigui, da yaqto' nachetaqtaxanaqte da qoỹanot Ñim Nataxala' maye 'Anatamnaxala', da huaña ye Gilgal.
22Huaña nache so Samuel, 'enapeco':
«Ñim Nataxala' ỹataqta ỹactec da ỹaỹamaxareeta da qaỹalaxaguet,
saq 'ena'am da qoỹanot aca nachetaqtaxanaqte qaỹavigaxatta
qataq 'onaxaic naqa'en da qaỹalaxalec qataq da qailoolec ca 'enapec Ñimaye
saq 'ena'am da qoỹanot aca nachetaqtaxanaqte
huo'otaq da qaỹavigaxat na lcheta ca qagueta.
23Ỹataqta qauem da sa qaỹalaxaguet Ñimaye,
'eeta'am da 'eetec da qainattac ca ilaviigui ca lỹa
qataq 'eeta'am da qanatameetacot ca atamnaxala'pi.
Qaq cha'aye 'am saishet da 'auaconegueta naua lamaxasoxonaxaco Ñimaye,
qaq Ñimaye nataqa'en saishet da 'am ỹaconeguet da 'am nta'a.»
24Nache so Saúl 'enapega so Samuel, 'eeta':
Aja', 'eesa da huo'o da ỹasouaxashet, cha'aye aỹem ñapacalec da lamaxasoxonaxac Ñim Nataxala', qataq da 'arapaxaguenataxanaxac, souaxat da shi'iỹa'aguet caillaye na ñalleppi, nache so'ot dam la'aqtac. 25Qalaxaye aỹem 'am ñachoxonnot da 'auapalaxat qome da ỹasouaxashet, qataq da aỹem 'annaicapegue' da she'eguelaq da yaqto' ñatamnot Ñim Nataxala'.
26Nache so Samuel 'enapeco': Aỹem saishet da 'am ñenaicapegue', cha'aye mashe sa 'auaconeguet da lamaxasoxonaxac Ñim Nataxala', qataq Ñimaye mashe saishet da 'am ishetaxateguet da 'am lta'a naqa'en na Israel le'ecpi.
27Qalaxaye so Samuel co'ollaq ncolliiñi da temaq jec, nache so Saúl ỹacona'ague na laỹe so lapo', nache colaqa'ague naqa'en. 28Nache so Samuel 'enapego' so Saúl, 'eeta':
De'era qonetec nagui, nachera da 'eetec Ñim Nataxala' da ncolaxatauec nagui da 'aro'onataxanaxac da 'am lta'a na Israel le'ecpi. Qaq de'era 'aro'onataxanaxac nqat, da yaqto' ỹanem ca 'oonolec na maiche 'arhuo' le'ecpi, cam ỹataqta 'onaxaic da lataxac, saq 'ena'am da qoneta. 29Cha'aye Ñim Lo'onatac 'Enauacna nacheñi ñi llo'oxoraxat na Israel le'ecpi, Ñimaye sa datenataxan, qataq saishet da huo'o ca ntogottague'. Cha'aye Ñimaye saishet da choche shiỹaxauatto da huo'otaq ntogottac.
30Nache so Saúl 'enapeco': «Aỹem 'eesa da huo'o da ỹasouaxashet. Qalaxaye 'am ñachoxonnot da ỹauaachigui 'anqa'en 'enauac na nqueroxonecpi na Israel, qataq 'enauac na shiỹaxauapi, da nache 'eetai' qome da huo'o 'anqa'en da shenec da aỹem nta'a. Qaq ỹoqo'oye aỹem 'annaicapegue', da yaqto' ñatamnot Ñim Nataxala' maye 'Anatamnaxala'.»
31Nache so Samuel ỹasat da nnaicapegue' so Saúl, nache so Saúl natamnot Ñim Nataxala'. 32Qaq co'ollaq ime de'era, nache so Samuel, 'enapeco':
Ñaq aỹem qanaviquiiua'a ca Agag, maye lta'a na amaleciitapi.
Nache so Agag, nachaateua'a so Samuel ỹataqta ỹe'emaqtom, cha'aye ipi'itaxaatega da mashe ỹet da lchecỹaxac da nalaataguec. 33Qalaxaye so Samuel 'enapego' somaye, 'eeta':
'Am, 'auauota'a co'ollaxa so 'ainec da 'aualauat so qalota Israel le'ecpi, qaq so 'alpi qalaq 'auauota'a da qaica so llalaqpi. Qaq nache 'ena'am da 'eetec nagui aca 'arate'e.
Nache so Samuel huaña naqa'en ye Gilgal qataq ỹauaachigui naqa'en Ñim Nataxala' da ipelcapigui somaye. 34Ime, nache so Samuel ỹe'eguelaxa ye Ramá, qataq so Saúl ỹe'eguelaxa so lma' maye naña ye Gabaa. 35Qaq huaña, nache so Samuel sa lỹa da nauane' so Saúl, na'aictaxa da ỹataqta lta'araic da laquicoxo somaye, souaxat da Ñim Nataxala' ỹataqta huo'o da ntogotaxac da so Saúl ỹanagui da nta'a ye Israel.
