So David qoỹanagui da nta'a
1Nache Ñim Nataxala' 'enapego' so Samuel, 'eeta':
¿Chaq laguio', qaq 'axaañi da 'araquicoxo souaxat so Saúl? Ye aỹem mashe sa saỹamaxaren somaye da queta da lta'a na Israel le'ecpi. Ña qoñisheguem qome, nache 'auỹoxogui aca huaca lcoue ca 'arcoraxanaxat aceite, nache qojec da 'anqo'ona ye lma' ñi Yesé, maye naña ye Belén, cha'aye mashe lleca'aguishec ñi 'oonolec soua llalqa da yaqto' lta'a na Israel le'ecpi.
2Nache so Samuel, 'enapeco': ¿Qaq ca sheeteco' da ñeqo'ona? Cha'aye ñi Saúl qom ỹaỹaten de'era nache aỹem ỹalauat qome.
Nache Ñim Nataxala', 'enapeco':
Qomye 'auaconeua'a aca huaca llale, nache 'aua'aqtaxanem ñimaye da qojec da yaqto' aỹem 'aỹa'anot acamaye da 'arachetaqtaxanaqte. 3Huaña qome nache 'aucoyeguen ñi Yesé, da yaqto' ỹalectaua'a aca 'arachetaqtaxanaqte, huaña nache 'am sa'aqtaxanem qome cam 'auo'ot. Qataq 'aucorelec da nta'a qome que'eca shecteua'a.
4Nache so Samuel ỹo'ot dam ỹamaxalec Ñim Nataxala'. Qaq co'ollaq ivita ye Belén, nache so nqueroxonecpi maye lma' se'eso huaqta'a't nỹecpi ca'atta'aguet co'ollaxa somaye, qalaxaye ỹataqta huo'o da lcolanaxa, nache qainato', qoỹeeta':
«¿Peta'a qaica cara dam 'arviraxac?»
5Nache so Samuel 'enapeco': Aja', qaica cara. Aỹem ñanac da sanot aca ỹachetaqtaxanaqte Ñim Nataxala'. Qaq ỹoqo'oye qanỹoi qome, nache qauanaqui da qaualliquiitaua'a ca savigaxat ỹachetaqtaxanaxat.
Ime, nache so Samuel nqui'itaxat naqa'en so Yesé qataq soua llalqa, nache 'enapega da ỹalectaua'a som ỹo'ot lachetaqtaxanaxat. 6Nache co'ollaq nvildeuo soua llalqa somaye, nache so Samuel ila'aguet so Eliab, nache 'eetaco': «Yo'oqta da nachena ne'ena na lca'aguishec Ñim Nataxala' da yaqto' nta'a.»
7Qalaxaye Ñim Nataxala' 'enapega somaye, 'eeta': «Saishet qome da 'aulotagui da yo'oqchigui lataxac, qataq da lalogaxa, cha'aye saishet da nachera da selotagui. Cam shiỹaxaua ilotagui da yo'oqchigui nataxac, qalaxaye Aỹem saishet da selotagui da yo'oqchigui lataxac ca shiỹaxaua, nda'a't da selotagui da lquiyaqteỹaxac.»
8Nache so Yesé iỹaxana so Abinadab, nache ỹauegueua'a so Samuel. Qalaxaye so Samuel 'enapega somaye, 'eeta':
Ñaqaiyeta ne'ena saishet da nachena na lca'aguishec Ñim Nataxala'.
9Nache so Yesé ỹauegueuo so Sama, qalaxaye so Samuel qaltaq 'enapeco':
Ñaqaiyeta saishet da nachena ne'ena na lca'aguishec Ñim Nataxala'.
10Nache so Yesé ỹauegueua'a so Samuel soua siete llalqa, qalaxaye so Samuel 'enapeco', da qaica ca 'oonolec soomaye da lca'aguishec Ñim Nataxala'. 11Nache qaltaq inat somaye, 'eeta':
¿Peta'a qaicaua caua lỹa't 'aỹa'alqa?
Nache so Yesé, 'enapeco': Saxanaqca cam ỹoqta na'asolec, qalaxaye camaye ilotague' aca ilo qaguetapi.
Nache so Samuel, 'enapeco': Ña 'auamaxasoxoneuga camaye, cha'aye qom saxanaxa da nvireuo camaye, nache saishet da saconaxalec da so'otaq damaye.
12Nache so Yesé damaxasoxoneuga somaye, qaq se'eso nogotolec ỹataqta qovioxoraic, 'onaxaic, qataq nalochiguiñi da lataxac.
Nache Ñim Nataxala', 'enapega so Samuel, 'eeta':
'Ena na lleca'aguishec. Qaq ỹoqo'oye qoñisheguem qome, nache 'aucorelec da yaqto' nta'a.
13Nache so Samuel saỹaỹaloxon da ỹacona aso lcoraxanaxat laỹe' huetagui so aceite, nache ỹauaachigui naqa'en so lqaỹañecpi da icorelec se'eso nsoq maye le'enaxat David da yaqto' nta'a. Qaq huaña, nache so Saqcha'a La'añaxac Ñim Nataxala', nvita somaye, nache ỹo'ot da la'añaxac. Qaq co'ollaq ime de'era, nache so Samuel ncoyeguene' somayepi, nache ỹe'eguelaxa ye Ramá.
So David do'onataxanot so Saúl
14Qaq huaña, nache so Saqcha'a La'añaxac Ñim Nataxala' ca'ai so Saúl, nache anac so saqcha'a na'añaxac qauemaic maye lamaxashec Ñim Nataxala', nache ỹo'ot da sanaỹaten somaye. 15Qaq ỹoqo'oye som lamaxashecpi somaye 'enapego', 'eeta':
'Am qarta'a, qomi' saỹatenaq da Ñim Lo'onatac 'Enauacna, 'am namaxa so saqcha'a na'añaxac qauemaic maye ỹo'ot da sa 'anaỹaten. 16Qaq ỹoqo'oye 'auauo'o qome ca 'auamaq da shenaqta maye qomi' 'aramaxa'she, da nmitaique ca ỹaỹaten da iviigui aca nvique, yaqto' da ivita da saỹauo'o ca 'ardaqa' so saqcha'a na'añaxac qauemaic, nache camaye devicnaxan, nache qaltaq 'auamachiguiñi.
17Nache so Saúl, 'enapeco': Aja', qanmichiỹaique ca ỹaỹaten da lvicnaxanaxac, nache aỹem qanaviquiiua'a qome.
18Nache huo'o so 'oonolec somayepi, 'eeta':
Aỹem huo'o so sauatton na llalaqpi so Yesé, maye naña ye Belén, da ỹataqta ỹaỹaten da lvicnaxanaxac, qataq somaye ỹataqta 'añaxaic da loquiaxac, qataq ỹaanaxanaxaic da detaqa, qataq ỹataqta nalochiguiñi da lataxac, qataq hueta'aguet Ñim Nataxala'.
19Nache so Saúl ỹamaq so lamaxashecpi da ira'a da la'aqtac so Yesé, 'eeta': «Aỹem 'anamaxa qome ca 'aỹa'alec David, cam ilotague' naxa ana 'arelopi qaguetapi» 20Nache so Yesé ỹamaq so llalec David, da ỹamaxa so Saúl. Nache ỹamaxague so 'oonolec 'ashena maye ỹataqta pa'atañi naqa'en aso lla'aco nauole 'ayiiña, qataq aso nlaqchigui lo'oc maye laỹe' na lataxa, qataq so 'oonolec quetaq llalec. 21Huaña nache so David nachaateua'a so Saúl, qaq nache neto'ot da do'onataxaatacot. Nache so Saúl ivitta'a da ỹataqta lauotaxat somaye, nache ỹauo'o lamaxashec. 22Nache so Saúl ỹamaxa da la'aqtac so Yesé, nachoxoreetot da ỹasheeta so David da nache neto'ot somaye, cha'aye ỹataqta ỹauotec, nache ỹauo'o lamaxashec. 23Nache naxa da icogaxanapec so Saúl, so saqcha'a na'añaxac qauemaic maye lamaxashec Ñim Lo'onatac 'Enauacna, nache so David ỹacona naxa aso lvique, nache devicnaxaatac. Nache so Saúl qaltaq huo'o naxa da la'añaxac qataq machiguiñi, cha'aye so saqcha'a na'añaxac qauemaic qaltaq ca'ai naxa somaye.
