So Jonatán naỹamaxate' so David
1Qaq so David co'ollaq ime da na'aqtaxaatague' so Saúl, nache so Jonatán ỹo'ot da ỹataqta nauochaxaua so David, nache ivira'a da 'eeta'am da maiche nachaalataxac da lauotaxanaqtaic somaye. 2Qaq se'eso na'a'q, so Saúl nllañi somaye, nache saỹashen da ỹe'eguelaxa so lma' so lta'a. 3Qaq huaña nache so Jonatán naỹamaxate' so David, da nache 'eetai' da auochaxau', cha'aye da lauoche somaye 'eeta'am da maiche nachaalataxac. 4Nache so Jonatán nqata'ai so ỹachetac lapo', nache ỹanem so David, qataq soua lỹa't alogo maye ỹaatrañi, nache caueegue' naqa'en so lainec, lchecnec, qataq so nsaataxaqui.
5Qaq so Saúl naxa da ỹamaq so David da delogui' so filisteopi, nache somaye loxonec naxa somayepi. Ỹoqo'oye so Saúl nache ỹanem somaye da lataxala' so nalleppi. Qaq de'era ỹataqta ỹaỹamaxareeta 'enauac so alleppi, qataq so laỹepi lataxala'pi so nalleppi so Saúl.
So Saúl ỹataqta nquiỹa da ño'oxonnataguec so David
6Qalaxaye nache chegoqta'a se'eso na'a'q co'ollaq so David ỹalauat so Goliat, da so Saúl ỹataqta huo'o da lquiỹaxa so David. Qaq ỹoqo'oye co'ollaq ñe'eguelaq so alleppi chegaqa'a so alaataxac, nache so 'alpi maye chegaqa'a som huaqta'a't nỹecpi maye ỹotta'a't naua nañalo ye Israel da ca'atta'aguet so nta'a Saúl, nache do'onaxaatagui qataq dasottagui, huota'a na lhuaxanec qataq na lasaquiaxanatac souaxat da ntonaxac. 7Qaq co'ollaq do'onaxaatagui qataq dasottagui, nache 'eeta':
«So Saúl ỹalauat so mil ỹalleppi,
qaq so David ỹalauat so diez mil.»
8Qaq de'era ỹataqta sa ỹaỹamaxaren so Saúl, ỹoqo'oye dalemata, nache 'eeta':
So David qaimatalec da qoỹeetega ỹalauat so diez mil ỹalleppi, qaq aỹem qalaq qoỹeetega mil souatai' salaua't. ¡Qaq nachaqrato' da ichiỹa'a da qoỹanagui da nta'a!
9Qaq nache chegoqchiguiña da so Saúl ỹataqta ndaxaỹa'aguet so David.
10Qaq so lỹa na'a'q, co'ollaq so David iviqueetapigui aso lvique, nache Ñim Lo'onatac 'Enauacna namaq so saqcha'a na'añaxac qauemaic da yaqto' taigui so Saúl, nache somaye 'eeta'am na huo'o da aloic da coleetegoigui so lma' lta'araic, qaq somaye nache nasoqta'a aso lataquiaxai. 11Huaña nache nauaxaỹaxaasheguem asomaye da ỹasaq so David, cha'aye huotaique da iqotaxana'aguet so nỹec da ỹa'arapec, nache dos da ỹe'eguelaxalec de'era so Saúl, qalaxaye so David dos nataqa'en da dashe'eguet asa'aso taquiaxai.
12Huaña nache so Saúl, ỹataqta ñi'iỹa so David, cha'aye ỹaỹaten da somaye hueta'aguet Ñim Nataxala', qaq so Saúl qalaq ỹaỹaten da mashe qanayeca'ai. 13Qaq ỹoqo'oye so Saúl nqatec somaye, nache ỹamaq ỹanagui da lataxala' naqa'en so mil nalleppi. 14Nache so David loxonec naxa 'enauac so l-loquiaxauapi, cha'aye Ñim Nataxala' itauaatac somaye. 15Qaq ỹoqo'oye so Saúl, co'ollaq ỹauaachigui da la'amaqchec somaye, nache ỹataqta qalota da lli'iỹaxa. 16Qalaxaye 'enauac na lma' ye Israel qataq ye Judá, ỹataqta ỹauotec so David, cha'aye nacheso som lataxala' naxa da jec da nalat, qataq da ñe'eguelaq.
17Qaq huo'o so na'a'q nache so Saúl 'enapega so David, 'eeta':
«'Am sanem qome da 'auauo'o 'arhua añi Merab maye ỹe ỹale, qalaxaye iuen da ỹataqta 'ana'añaxat qome da aỹem 'auo'onataxanot, qataq da 'auloclec Ñim Nataxala'.»
Cha'aye so Saúl lhuennataxaco' da saishet da nacheso somaye da ỹalauat, maye huotaique da ỹaneguet na filisteopi da ỹalauat somaye. 18Qalaxaye so David 'enapeco':
¿Chenegue'to' aỹem? ¿Qataq negue'to' ca 'enec na ihuo' maye hueta'a na Israel, da yaqto' aỹem laronaxanec ñi nta'a?
19Qalaxaye co'ollaq ivita so laloqo' da so Saúl ỹanem taxa so David aso llale Merab da huaroneguet, nache maltaq ỹanem so Adriel som lma' ye Meholá da ỹauo'o lhua asomaye. 20Qalaxaye aso Mical, maye llale lỹa so Saúl, asomaye ỹoqta nqopita so David. Nache co'ollaq qaỹa'aqtaxanem de'era so Saúl, nache ỹataqta ỹaỹamaxareeta, 21cha'aye so Saúl nache lhuennataxa co'ollaxa da ỹanem so David aso llale, da yaqto' asomaye ỹaneguet somaye da lhuaqỹaxac so filisteopi. Huaña nache so Saúl qaltaq 'enapego' so David, 'eeta':
Nagui maye ishet qome da 'am ỹaronaxanec.
22Ime, nache so Saúl 'enapega so ltauapi, 'eeta':
Qauỹochiỹauga qome da qana'aqtaxañi' so David, nache qaua'aqtaxañim da 'eeta': «Ñi nta'a qataq na ltauapi ỹataqta 'am ỹauotec, qaq 'onaxaic qome da 'auasateguet da 'am laronaxanec ñimaye.» 23Nache so ltauapi so Saúl jec nqo'ona so David da da'aqtaxanem 'enauac de'era, qalaxaye somaye 'enapeco':
«¿Peta'a qaupi'itaxañiitega da saqalaq da ivira'a da laronaxanec ñi nta'a ca choxoraq, qataq qaica ca ye 'eeta'am aỹem?»
24Nache so ltauapi so Saúl, jec da qaltaq da'aqtaxanem somaye da la'aqtac so David. 25Nache so Saúl, 'enapeco':
«Qaua'aqtaxañim ca David qoñeeta', ñi nta'a saishet da ỹauotaique da huo'o ca 'aỹa'anem da lasheue aso llale da yaqto' 'arhua, maye nacherata da huotaique da 'andoua'a ca cien lqaic lo'oc ñi logoxoshet na filisteopi, da yaqto' ỹauo'o ca lvi'.» Qalaxaye da lhuennataxac so Saúl, ỹauotaique da chochaq ỹaneguet da lhuaqỹaxac so filisteopi so David.
26Nache so ltauapi so Saúl da'aqtaxanem de'era la'axaỹaxac so David, nache somaye ỹaỹamaqchiguiñi naqa'en de'era, da yaqto' ishet da ivira'a da lacho' so nta'a. Qaq cha'aye ña qaỹata'a so laloqo' da laronaxac, 27nache so David co'ollaq ỹauec so nalleppi, nache ỹalauat so doscientos filisteopi, nache so lqaic lo'oc ñi logoxoshet somayepi iroua'a so nta'a da ỹanem yaqto' ishet da lacho' somaye. Qaq 'era da 'eetec so Saúl da ỹanem somaye aso llale Mical da lhua.
28Qalaxaye so Saúl co'ollaq ila'a da Ñim Nataxala' hueta'aguet so David, qataq aso llale Mical ỹataqta 'eesa da ỹauotec somaye, 29nache somaye qaltaq nquictec da lli'iỹaxa, nache quetot da saiuoten so David. 30Qataq so lataxala'pi so filisteopi naxa da inoxonec da delogui' na Israel le'ecpi, nache so David ỹataqta ỹactec da ỹaanataxanaxaic napacalec so laỹepi nalleppi so Saúl. Qaq ỹoqo'oye somaye nache nquictauec da llo'oxoyec.
