So Saúl huotaique da ỹalauat so David
1So Saúl ỹamaq so llalec Jonatán, qataq so ltauapi somaye da ỹalauat so David. Qalaxaye so Jonatán ye ỹataqta ỹauotec so David, 2nache da'aqtaxanem somaye, 'eeta':
«Ñi ita'a Saúl, nmittaique ca lataxac da 'am ỹalauat. Qaq ỹoqo'oye 'avitapigui' qome, qaq qonte' nache 'auauo'o qome ca 'anqañoxotaqa cam ỹataqta ỹapogoñi, nache qoueta'a qome. 3Qaq aỹem ñenaicapegue' qome ñi ita'a da tauga ca no'onaxa maye qoueta'a. Nache senat qome, senataxanec da qoneta, qaq qom saỹaten ca 'eetec ca la'aqtac, nache 'am sa'aqtaxanem qome.»
4Qaq so lỹa na'a'q, nache so Jonatán denataxaateguelec so David. Nache inattac so lta'a Saúl, 'eeta':
«'Am ita'a, 'onaxaictaxa da saishet da 'auo'otec ca qauem so 'aro'onataxanaxanec David, cha'aye somaye qaica da qauem ca 'am ỹo'otec, nacherata da ỹataqta no'on na 'am ỹo'otecpi, 5cha'aye somaye ỹataqta sairen co'ollaxa da nachaalataxac nache ỹalauat so filisteo, huaña nache Ñim Nataxala' ỹanem da lta'araic loxonaxanaxac na Israel le'ecpi. Qaq 'am ye ỹoqta 'auauaachigui qataq 'am ivirauga da 'auamachiguiñi. ¿Qalaq ta'ainco' da huotaique da 'auo'otec ca qauem ca qaica ca ỹasouaxat, qataq da 'auauotaique 'aualauat so David ye qaica ca huasoilec?» 6Qaq so Saúl co'ollaq hua'aqchigui de'era, nache 'enapega so Jonatán, 'eeta':
Nagui sanot da ỹa'aqtac Ñim Nataxala', da so David saishet qome da ileu.
7Huaña nache so Jonatán iỹaxana so David, nache da'aqtaxanem da 'eetec da ltaxaỹaxac so Saúl. Ime, nache ỹauegueua'a somaye so nta'a Saúl, nache so David qaltaq ỹe'eguelaxa da do'onataxanot somaye.
8Qaq huo'o so na'a'q, nache qaltaq huo'o so alaataxac, nache so David qaltaq delogui' so filisteopi, nache nauec somayepi qataq datauec naqa'en souaxat da lli'iỹaxa. 9Qaq so saqcha'a na'añaxac qauemaic maye lamaxashec Ñim Nataxala', qaltaq ỹe'eguelaxalec da icogaxaatac so Saúl, co'ollaq nso'ootañi somaye netaigui so lma' lta'araic, nache nasoqta'a aso lataquiaxai co'ollaq devicnaxaatac so David, 10nache ira'a asomaye da ỹasaq so David. Cha'aye huotaique da iqotaxana'aguet so nỹec da ỹa'arapec, qalaxaye so David dashe'eguet asomaye. Qaq nacheso se'eso pe da datauec so David. 11Nache so Saúl sanaỹaloxon da ỹauo'oi soua ỹama'q ỹale't da nqo'oora so lma' so David da naua'n, qataq da yaqto' ỹalauat somaye so lỹa na'a'q. Qalaxaye aso Mical, maye lhua so David, 'enapega co'ollaxa somaye, 'eeta':
Da saishet da 'ananeltaxan ne'ena pe, nache qonte' saishet da 'anca'altauec.
12Nache aso Mical saỹaỹaloxon so David da tachiviigui naqa'en so nalloxoqui, nache somaye datauec. 13Ime, nache aso Mical ỹacona so ne'enaqtac nqolac, nache ỹanagui na lqaic somaye so laue ana quetaq, qataq ỹachalec so lmala', ime nache ỹapolec dapoxona so nacanec. 14Qaq so Saúl co'ollaq ỹama'q soua ỹale't da yaqto' ỹacooreua'a so David, nache aso Mical ỹa'axat da sano'on somaye. 15Qalaxaye so Saúl qaltaq ỹe'eguelaxalec da damaxasoxona so David, nache 'eeta':
¡Na'aictaxa da huetalec ca lmala' camaye, qalaxaye nache 'ena'am qanaviqui yaqto' salauat! 16Nache soua ỹale't maye lamaxa'she so Saúl co'ollaq ivi't, nache pa'aroigui so lma' so David, qalaxaye chaqsota so ne'enaqtac nqolac da iloralec huetalec so mala' lapaqtalec na lqaic so quetaq laue. 17Nache so Saúl 'enapego' aso Mical, 'eeta':
¿Ta'ainco' da qonetec de'era da aỹem 'auatenachet? ¿Ta'ainco' da 'auasheetec so ñepa'aguenaxaua da jec?
Nache aso Mical, 'enapeco':
Cha'aye somaye aỹem ỹareetega da aỹem ỹalauat da sa sashen da jec.
18Qaq 'era da 'eetec co'ollaxa so David, da ishet da naneltaxan. Nache nqo'ona so Samuel maye netaña ye Ramá, nache da'aqtaxanem 'enauac nam ỹo'otecpi so Saúl. Ime, nache so David qataq so Samuel je'c nqo'oora da neraña ye Nayot. 19Qaq so Saúl co'ollaq ỹaỹaten da so David netaña ye Nayot maye huaña ye Ramá, 20nache ỹamaq so nalleppi da yaqto' ỹaconeua'a somaye, qalaxaye so lamaxashecpi so Saúl co'ollaq ivita so hueta'a so David, nache natenalec so na'aqtaxanaxanecpi, qaq so Samuel nache ỹalectaigui somayepi. Qaq huaña nache so Saqcha'a La'añaxac Ñim Lo'onatac 'Enauacna, taigui so lamaxashecpi so Saúl, nache nataqa'en somayepi ỹalegueuo da da'aqtaxaatac.
21Qaq so Saúl co'ollaq ỹaỹaten de'era nache qaltaq ỹamaq so laỹepi ỹalleppi, qalaxaye nataqa'en somayepi ỹalegueuo da da'aqtaxaatac. Ime, qaltaq ỹamaq so laỹepi ỹalleppi, qalaxaye nataqa'en somayepi ỹalegueuo da da'aqtaxaatac 'eeta'am so hua'auñi laỹepi. 22Huaña nache so Saúl ỹoqta ipaca'a da nqo'ona ye Ramá, qaq co'ollaq ivita añi late'erai nshere 'etaxat laỹe' maye naña ye Secú, nache denataxan, 'eeta': ¿Hua'ague ca huetra'ague ca Samuel qataq ca David? nache huo'o so ỹa'axa't soomaye da huetra'a ye Nayot maye huaña ye Ramá, 23nache so Saúl nqo'ona yemaye, qalaxaye so Saqcha'a La'añaxac Ñim Lo'onatac 'Enauacna, nataqa'en taigui somaye, qaq so Saúl nache queta, qataq nache queto'ot da la'aqtaxanaxac, choche ivitta'a ye Nayot maye huaña ye Ramá; 24qaq co'ollaq ivita yemaye, nache nqa't soua alogo, qaq nache huetauec da da'aqtaxaatac datato'ot so Samuel imauec se'eso na'a'q qataq se'eso pe. Qaq nache chegoqteuo'o' de'era na'aqtacaic naxa maye, 'eeta': «¿Qache nataqa'en so Saúl da na'aqtaxanaxanec?»
