1 Samuel 21

₁Qaq so David nqo'ona ye Nob, yem netaña co'ollaxa so ntaxaỹaxanaxanec Ajimélec, qaq so Ajimélec co'ollaq ilo'ot so David nache ỹe'elaq qataq inat, 'eeta':

¿Ta'ainco' da 'am 'oonolec da 'auanac?

₂Nache so David 'enapeco':

«Qomye ñi nta'a, huo'o da aỹem ỹamaxalec, qalaxaye aỹem 'enapega da qaica ca sa'aqtaxanem da huo'omshe aỹem namaq qataq dam aỹem ỹamaxalec. Qalaxaye so ñalleppi, mashe sa'aqtaxanem ye huaña da ñauane'. ₃Qaq nagui ¿negue't cam 'am hueto'ot?

Ñaq aỹem 'aỹa'anema taxa caua cinco nauole 'ayiiña, huo'otaq camachaqca lỹa nallec.»

₄Nache so ntaxaỹaxanaxanec 'enapeco':

Qaica cam aỹem hueto'ot nallec, nacheyeuate' yeua nauole 'ayiiña maye saqaisheta'ape, qalaxaye ca 'analleppi da saishet co'ollaxa da hue'eguet aca 'alo, nache ishet da 'am sanema.

₅Nache so David 'enapeco':

Qalaxaye maiche qarataxac naxa da huo'o da saxague. Nache saishet da qarauañi' ana 'alo, qaq nagui ye dam qarqueuoxoc choche pa'aỹauec, qaq ỹoqo'oye ye ñalleppi qui'itta.

₆Nache so ntaxaỹaxanaxanec ỹanem so David aso nauolepi 'ayiiña maye saqaishetapec, cha'aye qaca aca lỹa nauole nachaqasota asom qoỹanot co'ollaxa Ñim Nataxala' maye cheta'ague da qanqatec se'eso na'a'q da yaqto' nmeneguet aso dapaqtai'. ₇Qaq se'eso na'a'q hueta'a se'eso atamnaqa' maye lalamaxat Ñim Nataxala' som edomiita le'enaxat Doeg, qaq somaye nacheso so lataxala' som qagueta lo'opi maye lamaxashecpi so Saúl.

₈Nache so David inat so Ajimélec, 'eeta':

¿Peta'a huo'o aca 'am hueto'ot taquiaxai huo'otaq ỹeelonec? Cha'aye ỹataqta nque'elaxatta da aỹem ỹamaq ñi nta'a nache ỹataqta qaica ca iraqa' da sacona ca ỹainec qataq ca lỹa ỹo'ogoxonaxat.

₉Nache so ntaxaỹaxanaxanec, 'enapeco':

Aja' huo'o ye lainec so Goliat, som filisteo maye 'aualauat co'ollaxa huaña ye ca'amegue ye Elá. Qaq yemaye hueta'ague da laỹe ñi ntogue lapoxot le'enaxat efod, lpattalec ye hualoq laỹe. Qaq ishet da 'auache, cha'aye qaica ca lỹa no'ogoxonaxat cam aỹem hueto'ot.

Nache so David, 'enapeco':

Aja' 'achot, cha'aye nacheca ca ỹoqta 'onaxaic. ₁₀Qaq se'eso na'a'q, so David ñaq 'ettapeeguet so Saúl, ỹoqo'oye nqo'ona so Aquis, som nta'a ye Gat. ₁₁Nache so nataxala'pi 'enapego' so Aquis, 'eeta':

¡Saisheto' da nachena ne'ena na David, maye nta'a ne'ena 'alhua! Nam qaỹo'onaxaatalec co'ollaxa qoỹeeta':

₁₂Qaq co'ollaq hua'aqchigui de'era so David, nache huo'o da lhuogoxo qataq ỹataqta ñi'iỹa so Aquis, som nta'a ye Gat. ₁₃Qaq ỹoqo'oye co'ollaq datataigui somayepi, nache naralaxat da lataxac ỹe'enaxat ca huo'o da aloic, huaña nache ỹettac nam lasompi, qataq naañi naqa'en ana la'alle. ₁₄Nache so Aquis 'enapego' so lamaxashecpi, 'eeta':

Peta'a saqauauattoñi de'era ỹale da huo'o da aloic ¿Ta'ainco' da aỹem qanaviquiiua'a? ₁₅¿Maye seueetaico' nam huo'o da aloicpi, da aỹem qanaviquiitaua'a dam da' da yaqto' ỹachaxan da aloic da huaña na ima'? ¡Ñaq qanqacheeuec damaye!