1 Samuel 22

₁So David datauec ca'ai ye Gat, nache nqo'ona so auac maye naña ye Adulán. Qaq so lqaỹañecpi qataq so laỹepi lauo' le'ecpi somaye co'ollaq ỹaỹaten, nache nqo'ona somaye. ₂Qataq nataqa'en 'enauac som saqaiyaqnapecpi, qataq som huo'o ana lavigaxaistepi, qataq som huo'o da nqui'ic da lquiyaqteỹaxac, huaxaiguet somaye da ỹauo'o lataxala'. Qaq nache ivi' cuatrocientos da ima'a't se'eso ỹalleppi.

₃Qaq so David nache chegoqchiguiña yemaye da nqo'ona ye Mispá, maye huaña ye Moab, huaña nache 'enapega so nta'a ye Moab, 'eeta':

'Am ñachoxonnot da 'aua'aqta'a qome ñi ita'a qataq añi ỹate'e da nache qami' netaiguilo, choche ivitta'a qom saỹaten ca 'eetec ca aỹem ỹataxaateuga Ñim Lo'onatac 'Enauacna.

₄Qaq 'era da 'eetec so David co'ollaq ỹaueguereuo soua lta'al da yaqto' netro'ot so nta'a ye Moab, qaq nache netro'ot somaye imattrec soua na'axa'te maye huaiguilo da so David hueta'a so nqañoxotaqa'. ₅Qalaxaye so na'aqtaxanaxanec le'enaxat Gad, 'enapego' so David, 'eeta':

Saishet da nache qoueta'a ne'ena 'anqañoxotaqa', nacherata da 'anqo'ona ye Judá.

Huaña, nache jec so David, nache ivitta'a ye aviaq ye Jaret.

₆Qaq so Saúl, co'ollaq ñaq hueta'a ye Gabaa, nso'ootañi neto'ot na lpaqal aso qo'oipaq le'enaxat tamarisco, nasoqta'a aso lataquiaxai, qaq so lamaxashecpi coleesop somaye. Qaq co'ollaq ỹaỹaten da so David qataq so nalleppi da qaỹauana so hueta'a, ₇nache 'enapega so lamaxashecpi, 'eeta':

Qami' ỹalleppi maye qauachegoqoiguet so Benjamín, ñaq aỹem qana'axaỹaxañiỹa. ¿Peta'a qaupicheetega da so llalec so Yesé qami' ỹanema nataqa'en qome ca 'alhua qataq ca uva lma', qataq da 'enauac da qoñiita da qami' ỹanaguilo da qami' lataxala'ate ca mil, qataq ca cien alleppi? ₈Qaq yo'oqta nagui da 'enauac qami' aỹem qanpa'agueñiỹa, cha'aye qaica co'ollaxa ca aỹem icoyeguen da so ỹalec naỹamaxate' so llalec so Yesé, da yaqto' itauan somaye da aỹem npa'aguena. ₉Qaq huaña nache so Doeg, som edomiita, maye ỹalectaigui so lamaxashecpi so Saúl, 'enapeco':

Aỹem soota'a caillaye ye Nob, nache sauaachigui da so llalec so Yesé nvita yemaye da na'aqtaxane' so Ajimélec, som llalec so Ajitob. ₁₀Nache so Ajimélec nnate' Ñim Nataxala' da denataxaalec so David, huaña nache somaye ỹanem so nallec, qataq so lainec so Goliat, som filisteo.

₁₁Nache so nta'a damaxasoxona so ntaxaỹaxanaxanec Ajimélec, qataq 'enauac som laỹepi ntaxaỹaxanaxanecpi ye Nob, maye maiche lauo' le'ecpi somaye. Qaq co'ollaq ivireuo 'enauac somayepi, ₁₂nache so Saúl 'enapega so Ajimélec, 'eeta':

'Am llalec so Ajitob, ñaq aỹem 'ana'axaỹaxana.

Nache so Ajimélec 'enapeco': Aja', 'am ña'axaỹaxana 'am ỹataxala'.

₁₃Nache so Saúl inat somaye, 'eeta':

¿Ta'ainco' 'am qataq so llalec so Yesé da aỹem qauataiỹa'aguet? Aỹem saỹaten da 'am 'aỹa'anem co'ollaxa somaye aso nauole qataq so ỹeelonec, qataq 'annate' co'ollaxa Ñim Lo'onatac 'Enauacna da 'aunataxaalec somaye, da yaqto' aỹem dataỹa'aguet qataq da nmitaique ca lataxac da aỹem ique'elaxat. ₁₄Nache so Ajimélec ỹasateguet so nta'a 'eeta':

Ne'ena 'aramaxashecpi, ¿peta'a huo'o ca 'eeta'am da lataxac so David da ỹataqta 'am ỹalaxaguet? Qataq somaye saishet da nda'a't da 'araronaxanec, cha'aye nataqa'en lataxala' nam alleppi maye 'am nauaatalec, qataq huo'o da 'enec da hueta'a ñi nma' lta'araic. ₁₅Qaq ¿peta'a cheta'ago' nagui da seỹaxanot Ñim Lo'onatac 'Enauacna da senataxaalec somaye? ¡'A'i saishet! Qaq ỹoqo'oye saishet qome da 'auo'ot ca lasouaxashet ne'ena 'aramaxashec qataq nam lauo' le'ecpi, cha'aye ne'ena 'aramaxashec sa ỹaỹaten da 'ampa'agueetague' somaye.

₁₆Qalaxaye so nta'a 'enapeco':

¡Ỹataqta 'auaỹateeta 'am Ajimélec, da 'am qataq 'enauac na 'arhuo' le'ecpi qaullivi qome!

₁₇Huaña nache so nta'a saỹaỹaloxon da ỹamaq so lamaxashecpi, 'eeta':

¡Qaualauache na ltaxaỹaxanaxanecpi Ñim Nataxala'! Cha'aye namayepi itauaatac so David, qataq ỹaỹaten da nqañoxottapiguiñi somaye, qalaq saishet da aỹem da'aqtaxanem.

Qalaxaye so lamaxashecpi se'eso nta'a saishet da ỹe'egueeta'a da ỹalauat so ltaxaỹaxanaxanecpi Ñim Nataxala'. ₁₈Nache, so nta'a qaltaq ỹamaq so Doeg, 'eeta':

¡'Asoma 'am 'aualauat namayepi!

Nache so Doeg, ỹe'egueeta'a da ỹalauat se'eso ntaxaỹaxanaxanecpi, nache se'eso na'a'q ỹalauat so ochenta y cinco ỹalleppi maye ỹaatañi na nhuomaigui lomaxaqui le'enaxat efod maye chegaqaigui na lino. ₁₉Ime, qataq nqo'ona ye Nob, yem lma' so ntaxaỹaxanaxanecpi. Nache irolec so ỹeelonec da ỹalauat so ỹalleppi, 'alpi, ñaqpiolec qataq som cheta'ague da ñiguiñipi, qataq so huacapi nauegaxanaxala'pi, 'ashenapi, qataq aso qaguetapi. ₂₀Qalaxaye huo'o so 'oonolec som llalaqpi so Ajimélec, le'enaxat Abiatar maye ishet da datauec co'ollaxa, nache nqo'ona ye hueta'a so David. ₂₁Huaña nache da'aqtaxanem somaye, da 'eetec so Saúl da damaxasoxoolec da qaỹalauat so ltaxaỹaxanaxanecpi Ñim Nataxala'. ₂₂Nache so David, 'enapeco':

Se'eso na'a'q co'ollaq sela'a so Doeg da hueta'a ye Nob, nache mashe saỹaten da somaye taỹa'a da da'aqtaxanem so Saúl. Ỹoqo'oye aỹem ỹasouaxashet da qaỹalauat 'enauac som 'arhuo' le'ecpi. ₂₃Qalaxaye saishet qome da 'añi'i, nache qoueta'a na soota'a, cha'aye saishet da huo'o ca 'am ỹe'egueeta'a. Qaq da huo'o ca huotaique da 'am ỹalauat, qalaq hua'auñi qome da aỹem ỹalauat.