So Israel le'ecpi iỹaxanaique ca lta'a
1Qaq co'ollaq mashe ỹa'axaiqui so Samuel, nache ỹaareuo soua llalqa da yaqto' lataxala'ate naqa'en so Israel le'ecpi. 2Qaq so la'auaxanec llalec le'enaxat Joel, qaq so lỹa le'enaxat Abías, nache soomaye ilotrague' co'ollaxa so netaña ye Berseba. 3Qalaxaye se'esoua llalqa, saishet da 'eeta'ama da lataxa'c so lta'a, nachaqrata da ỹataqta qopitaxanaqtaqaiqa, qataq nasheete' naxa da qaisheete'n, nache saishet da ỹo'o't ca ỹaỹamaqchiguiñi. 4Huaña, nache 'enauac so nqueroxonecpi maye lataxala'pi so Israel le'ecpi ỹauo'o so laỹonaxac, nache nqo'ona da detaxaỹapegue' so Samuel maye netaña ye Ramá, 5nache 'enapega, 'eeta': «'Am mashe 'am ỹa'axaiquiolec, qaq soua 'aỹa'alqa saishet da 'eeta'am da 'arataxac. Qaq ỹoqo'oye 'am, 'auauo'o qome ca qarta'a da yaqto' qomi' ilo'oguelo, nache shenaqta'am da lataxac 'enauac nam shiỹaxauapi maye qarhuoreuapi.»
6Qalaxaye so Samuel, ỹataqta sa ỹaỹamaxaren de'era, cha'aye qaiỹaxaatacot da ỹauo'o ca nta'a da ilo'ogue naqa'en somayepi, nache somaye nqouagaxaunot Ñim Nataxala', 7qalaxaye Ñim Nataxala' 'enapego' somaye, 'eeta':
«'Auauo'o qome ca iỹaxaataique ne'ena shiỹaxauapi, cha'aye saishet da nache 'am da 'am ỹo'otan namayepi, maye nachaỹem maye aỹem ỹo'otan da yaqto' saishet da selotague'. 8Cha'aye de'era 'am ỹo'otec namayepi nachera da 'eetec da aỹem ỹo'otec, chegoqchiguiña so na'a'q co'ollaq ñeqateeguesop ye Egipto, nache ivitta'a nagui da mashe qalota da aỹem ỹo'otan, cha'aye namayepi aỹem ca'ai, da yaqto' natamnot na ỹaqa'a atamnaxala'pi. 9Qaq ỹoqo'oye 'am, no'on qome da 'auo'ot ca iỹaxanaique namayepi, qalaxaye ỹataqta 'aua'aqtaxaatem nam lhueneguesat, qataq na ỹo'otpi ca nta'a qom ilo'ogue namayepi.»
10Nache so Samuel da'aqtaxanem de'era lasataxac Ñim Nataxala' so shiỹaxauapi maye iỹaxaataique ca lta'a. 11Nache 'enapega somayepi, 'eeta':
«'Era qome da qami' ỹo'oteque ca nta'a maye qami' ilo'oguelo, camaye laỹona't qome ca qaỹa'alquipi, nache huo'o ca ipataxaguet aca naigonapi maye alaataxaquipi, qataq huo'o ca ipataxaguet da nelec ca caipi qataq huo'o ca ỹanagui da nhuataxauapi. 12Qataq huo'o ca ipataxaguet qome da ilo'ogue ca mil alleppi, qataq ca cincuenta alleppi. Qataq da qoñiita huo'o qome ca ipataxaguet da na'attapiguisheguem naqa'en ca na'alhua camaye, qataq lapootac na ala ca lañiguishec, huo'otaq da ỹo'ot cam lo'ogoxonaxatpi, qataq cam no'otaxatpi aca nnaigonapi maye nalaataxaquipi. 13Qataq ỹaconeua'a qome da ỹauo'o lo'onataxanaxana aca qaỹa'allipi, da yaqto' 'amnaxat lo'o, qataq nhuoshec lo'o, qataq nauole lo'o. 14Qataq deuotaxanec qome na no'on 'alhua, qataq na no'on nanqa'pi ana uva qataq ana olivo maye qa'añiguishe da yaqto' ỹanem ca ltauapi nta'alpi. 15Qataq nqateua'a ca diez ca nqachiguishe ala na trigo qataq aca uva, nache ỹanem ca nta'alpi qataq ca ltauapi. 16Qataq ỹacona qome ca qaramaxashequi ỹalleppi, qataq 'alpi, qataq ca no'on qarauegaxanaxala'aipi huaca qataq ca 'ashenapi da yaqto' do'onataxaalec. 17Qataq ỹacona ñi 'oonolec caua diez ca qareloipi da ỹo'ot lalamaxat, qataq ivira'a da choche qami' l-lataqa qome camaye. 18Qaq que'eca na'a'q qom huo'otaq huo'o ca sa qauaỹamaxayiñi, souaxat que'eca qarta'ai maye qarca'aguishiqui, nache Ñim Nataxala' saishet qome da qami' iqocha'alo.»
19Qalaxaye se'eso shiỹaxauapi saishet co'ollaxa da iqocha'a so Samuel, nache 'eeta':
Aja' qalaxaye na'aictaxa. Qomi' sauoqtaique ca qarta'a, 20yaqto' shenaqta'am na laỹepi ỹotta'a't shiỹaxauapi, qataq da yaqto' qarta'a camaye nache qomi' ilo'oguelo qataq sataxalec da huo'o ca qanalaataxac.
21Nache so Samuel hua'aqchigui co'ollaxa nam la'aqtacpi se'eso shiỹaxauapi, nache somaye qaltaq da'aqtaxanem Ñim Nataxala', 22nache Ñim Nataxala' 'enapego' somaye, 'eeta':
'Auo'ot qome da lỹaxanaxac namayepi, nache 'auauo'o ca lta'a.
Huaña nache so Samuel 'enapega so Israel le'ecpi da ñi 'oonolec ỹe'eguelaxa cam chegoqchiguiña lma'.
