1 Timoteo 6

₁'Enauac na 'amqaanataxanaxaicpi maye nlatacpi, iuen da ỹaỹaten da ỹauo'o naq 'enec ca na'aco'; yaqto' qaica ca qauem da ltaxaỹaxac da detaqtega Ñim Lo'onatac 'Enauacna, huo'otaq da napaxaguenataguec nam quetague' So Cristo. ₂Qaq ca namaxashec da huo'otaq huo'o ca na'aco' maye ỹa'amaqteetac So Cristo, qalaq saishet da huo'otaq sa ỹalaxaguet, souaxat da ỹectega da la'amqaanataxanaxaua. Nachaqrata da ỹataqta ỹaỹamaxatchiguiñi da lo'onataxanaxac, cha'aye do'onataxaatacot ca 'eeta'am la'amqaanataxanaxaua, qataq ỹataqta nauochaxaua lqaỹa. Qaq de'era sheetega ỹataqta 'auapaxaguenataxanec qataq 'aua'axat.

₃Da huo'o ca dapaxaguenataxaatapeguec cam dataỹa'aguet dam no'oita napaxaguenataxanaxac maye chegoqo'ot So Qarataxala' Jesucristo qataq da 'eesa lataxac da qara'amqaanataxanaxac, ₄nache que'eca shiỹaxaua choche na'amqaanaxaic, qalaxaye qaica ca ỹaỹaten, qataq maiche lataxac da lqopitaxat da cotaxac da ivita da qanmittaique nam naiguipi na na'aqtacpi. Qalaxaye damaye chegaqaigui da nquiỹaxanaqtaic, qataq da nayeloxo, qataq nsheunaxanaxac, qataq saishet da qaỹa'amaqten ca nỹa, ₅qataq qaica ca loga't da loquiaxac. Qaq nam shiỹaxauapi maye ỹo'ottac de'era, namayepi ỹataqta sa ỹaỹaten da ỹaỹamaxatchiguiñi ca lhuennataxac, namayepi saishet da ỹaỹaten da 'eesa lataxac. Namayepi ipi'itaxaatega da qaỹachegoxotchigui da na'amqaanataxanaxac da qanauec ca lta'araic nsallaxa. ₆'Eesa mque' da qara'amqaanataxanaxac So Qarataxala', damaye iviraxatta'a da ỹataqta qaica ca seuenaqtac, qalaxaye ca 'oonolec iuen da ntootapeguec cam hueto'ot. ₇Cha'aye qomi' saishet da huo'o ca ñachoqtec co'ollaq ñanaxa ana 'alhua. Nache 'ena'am da she'eguelaxasoq qaica ca qaya'ac. ₈Qaq ỹoqo'oye da huo'o ca qonoq qataq ca qorogoxot, qalaq nacheca ishet da ñetonaqtapeguec. ₉Qalaxaye cam nda'a't da iuennatega da nsallaxa, nache camaye lqoiñiguishec so pa'aguenataxanaxaic. Ivitta'a da lpachigui na qalota lqopitaxanaqtaicpi maye qaica ca naigui, qataq na'aqchet, nache iviraxatta'a da ỹataqta nlachiguiñi. ₁₀Cha'aye da nqopitaxanaqtaic aca yo'oqchigui anom, nachera da lpa'a' na 'enauac ỹotta'a't sa ỹaỹamaxañisat. Cha'aye mashe huo'o na ime'eguet da lqopitaxanaqtaic anamaye, nache ỹalat da lpi'iỹaxac Ñim Lo'onatac 'Enauacna, qaq nache huaña da ivireguet na qalota lqalaiguesat qataq nque'eenaxacpi.

₁₁Qalaxaye 'am Timoteo, 'am lamaxashec Ñim Lo'onatac 'Enauacna, 'auataueeguesop 'enauac ne'ena sa ỹaỹamaxañi. Ime, nache 'ampogoxoinapegue' da 'aualaxaguet Ñimaye qataq da 'am no'on lapaxaguenatac So Jesucristo. Saishet da 'axanec da 'arpi'iỹaxac Ñimaye qataq 'auauotec 'enauac na qarqaỹañicpi maye qara'amqaanataxanaxauapi. Qataq da ivita da 'auataỹa'aguet na lqalaiguesat qalaq 'auauo'o qome da 'arhualaxavic, qataq 'auauotec na laỹepi shiỹaxauapi. ₁₂'Ana'añaxaaleco' qome da 'arpi'iỹaxac, yaqto' ishet da 'anauec da achaalataxac maye choche tatec. Cha'aye de'era achaalataxac nachera da huo'omshe 'am iỹaxana Ñim Lo'onatac 'Enauacna, qataq qalota co'ollaxa na 'am ỹauaachigui da 'aua'axattac de'era 'arpi'iỹaxac. ₁₃Qaq nagui qomi' ỹauaachiguilo Ñim Lo'onatac 'Enauacna nataqa'en So Jesucristo maye saishet da datenataxan co'ollaxa datato'ot so nta'a Poncio Pilato. ₁₄Nache 'am shenapega da 'aualaxaguet 'enauac nam 'am samaxalec, yaqto' qaica ca ỹo'ot ca 'arasouaxashet. Qaq damaye ỹataqta qoqueto'ot choche ivitta'a da ñe'eguelaq So Qarataxala' Jesucristo, ₁₅qaq ca laloqo' de'era, nache maiche pa'aỹo'ot Ñim Lo'onatac 'Enauacna maye ỹo'oxoraic. Cha'aye Ñimaye nachaqñita 'oonolec da ilotague' 'enauacna; Ñimaye maye lta'a na nta'alpi, qataq lataxala' na nataxala'pi. ₁₆Ñimaye maye choche tatec, qataq huetaigui na ne'eraxa maye saishet da huo'o ca nhuogoua'a. Qaica ca shiỹaxaua ila'a co'ollaxa Ñimaye, qataq qaica ca ỹañoxot da maiche ila'a nagui. Ñimaye maye hueto'ot da qaica ca 'ena'am llo'oxoyec, qataq da la'añaxac maye chochaq tatec. Aja', nache 'eetec de'era.

₁₇Qaq cam hueto'ot da yo'oqchigui nsallaxa, qonapega da saishet da na'amaqten, qataq saishet da pe'etega da lsallaxa, cha'aye saq qalaq da deqat 'enauac nam hueto'ot. Nachaqrata da qonapega da ỹauo'o da naquitaxac Ñim Lo'onatac 'Enauacna, cha'aye Ñimaye ỹataqta soxoraic, qataq ishet da qomi' ỹanema ca seuenaqtac, da yaqto' ishet da ñetonaqtapigui'. ₁₈Qonapega nataqa'en da ỹo'ot ca ỹaỹamaqchiguiñi, yaqto' nachera da lsallaxa dam no'on lo'onataxanaxac. 'Auennataxanaxanec da qaica ca ỹectega da ỹan da detaunaxanot nam hueto'otpi. ₁₉Yaqto' huo'o ca lsallaxa cam natauo na'a'q qataq nachera da ỹauegueua'a da lactapiguiñi da huetaigui cam achaalataxac maye chochaq tatec.

₂₀'Am Timoteo, ỹataqta 'ampogoxoinapegue' da 'auaỹamaxatchiguiñi da 'aro'onataxanaxac. Saisheto' da 'ana'axaỹaxaategalo naua ltaxaỹaxaco nam saishet da ỹa'amaqten So Jesucristo, qataq saishet da 'auqocha'a nam dataỹa'agueta qataq quetapegueleguete naua qarapaxaguenataxanaxaco. Ne'ena shiỹaxauapi 'eetega da ỹaỹaten dam 'eesa lataxac, ₂₁qalaxaye huo'o na mashe ỹaxanec da lpi'iỹaxac Ñim Lo'onatac 'Enauacna souaxat da queueegue de'era qoỹeetega naỹaanec.

Qaq Ñim Lo'onatac 'Enauacna 'am ỹami' ca no'on 'icỹaxac. Aja', nache 'eetec de'era.