2 Timoteo 1

₁Aỹem Pablo, aỹem lamaxashec So Jesucristo, cha'aye nachera da maiche 'eetapeguec Ñim Lo'onatac 'Enauacna da yaqto' sa'axatec da nca'alaxa maye ỹachaxanapec co'olloxocheye. Qaq de'era nca'alaxa taỹot ca mashe na'attaua'a So Cristo Jesús. ₂'Am ỹauotaxat ỹalec Timoteo, 'am samaxa ana ỹere, cha'aye ñeshetaique da 'auaconeguet da nqouagaxanaqtaic, nataqa'en da nchoxonnataxanaxa, qataq da nlagaxayec maye chegoqo'ot Ñim Qarta'a maye Lo'onatac 'Enauacna, nataqa'en So Qarataxala' Jesucristo.

₃Da tachigui ye iuel 'am, ye na'a'q qataq ye pe da ñeqouagaxaueetac, nache sanot da ña'achec Ñim Lo'onatac 'Enauacna maye so'otta'ape naua la'aqtaqa, qataq ñanomta da qaica ca hueto'ot ỹasouaxashet. Qaq de'era nachera da 'eetec nataqa'en so hua'au ita'alpi. ₄Qaq naxa da tachigui iuel da 'annoinaxac qataq da 'araquicoxo, nache huo'o da iyaxa da 'am ñauane', yaqto' ỹataqta aỹem nlaqchigui da ñetonaxac. ₅Qataq naxa da tachigui iuel dam 'arpi'iỹaxac maye huesota. De'era huesota npi'iỹaxac maye hua'auteguet aso 'arcote Loida qataq aso 'arate'e Eunice. Qaq nagui saỹateeta da nataqa'en 'am hueto'ot de'era npi'iỹaxac.

₆Ỹoqo'oye nagui 'am seqata da 'aue'eraxatoigui ñi 'anachetaxat maye 'am ỹami' co'ollaxa Ñim Lo'onatac 'Enauacna se'eso na'a'q co'ollaq 'am sasheltalec da 'am ñeqouagaxaueeteguelec. ₇Cha'aye So Saqcha'a La'añaxac Ñim Lo'onatac 'Enauacna saishet da qomi' colanqaiqa naqa'en. Nachaqrata da qomi' ỹanema da qara'añaxac da sauotaxac 'enauac na laỹepi shiỹaxauapi, qataq qomi' ỹa'añaqche't da yaqto' seshetaq da souaqtaigui da no'on achaalataxac maye chegoqo'ot So Cristo. ₈Ỹoqo'oye saisheto' da 'ancoxolec da 'aua'axatec So Qarataxala' Jesús. Nataqa'en saisheto' da huo'o da 'arcoxo, souaxat da aỹem qaicoñettai', sasoilec Somaye. Nachaqrato' da 'anhuanaua'a de'era que'eenaxac souaxat da no'on na'axaỹaxac maye chegaqaigui da nca'alaxa, qaq Ñim Lo'onatac 'Enauacna 'am itaunec qome da 'ara'añaxac da yaqto' 'anala'aguet 'enauac ne'ena 'anque'eenaxacpi. ₉Ñim Lo'onatac 'Enauacna qomi' nca'alaxatre'c, qataq qomi' iỹaxanalo da yaqto' sanaqot da qanachaalataxac. Qaq de'era qomi' ỹo'oteque, damaye nache 'eetai' da lhuennataxa. Saishet da huo'otaq choche nqopita'a ca qarataxac no'on, maye souaxat da qomi' ỹauoteque, cha'aye mashe ña'araqtaua'a So Cristo Jesús. Qataq nache 'eetai' da qomi' ỹauoteque co'ollaq saxanaqaca ana 'alhua. ₁₀Qaq de'era lsoxoyec Ñim Lo'onatac 'Enauacna ỹachaxan nagui, qalaxaye nactaigui naqa'en da llecỹaxac co'ollaxa So Qarca'alaxaqui Jesucristo, maye ilaxachigui co'ollaxa da la'añaxac da nleuaxa, qataq ỹachegoxotchigui da no'on na'axaỹaxac maye chegaqaigui da nca'alaxa, da qomi' ỹanema da nca'alaxa maye chochaq tatec.

₁₁Qaq Ñim Lo'onatac 'Enauacna ỹanagui da aỹem lamaxashec da yaqto' sa'aqtaxanem qataq sapaxaguenec da no'on na'axaỹaxac na ỹotta'a't shiỹaxauapi. ₁₂Qaq nachera da huo'omshe huo'o de'era ñeque'eenaxac nagui. Qalaxaye saishet da ñecoqtac souaxat nam sevireguetpi, cha'aye aỹem saỹateeta Ñim hueto'ot de'era ñaquitaxac. Qataq saỹateeta Ñimaye da huo'o da la'añaxac da ỹo'ot da nache queta da qaỹa'axattac da no'on na'axaỹaxac, choche ivitta'a ca loga't ana 'alhua.

₁₃Qoquetelco' da lataxac da 'am sami' napaxaguenataxanaxac maye no'on. Qataq saisheto' da 'axanec da 'arpi'iỹaxac Ñim Lo'onatac 'Enauacna qataq da nsoxoyec maye qomi' qoỹanema, cha'aye mashe ña'araqtaua'a So Cristo Jesús. ₁₄'Antelo'o' da no'onataxanaxac maye 'am ipataxalec Ñim Lo'onatac 'Enauacna, qaq So Saqcha'a Na'añaxac Qui'itta maye qomi' hueta'agueta 'am itauan qome.

₁₅Qaq 'am mashe 'auaỹateeta da na 'amqaanataxanaxaicpi maye hueta'a ye Asia aỹem ỹalat. ¡Ivira'alo soua Figelo qataq so Hermógenes aỹem no'onaxatchiguilo! ₁₆Qaq Ñim Lo'onatac 'Enauacna talec qome naqa'en da lchoxonnataxanaxa na lauo' le'ecpi so Onesíforo qataq itauan, cha'aye somaye saqalota da aỹem ỹa'añaqchet, qataq saishet da ncoxolec da ñecoñetaguec. ₁₇Nachaqrata da somaye co'ollaq choche nvita na nỹecpi na Roma, nache sa naỹaloxon da aỹem nmittaique, choche ivitta'a da aỹem ỹanata. ₁₈Qaq ỹoqo'oye huo'o da ñaquitaxac da So Qarataxala' Jesús da ỹaalec da lauotaxanaqtaic que'eca na'a'q qom Ñim Lo'onatac 'Enauacna nmit 'enauac na shiỹaxauapi. 'Am ỹataqta 'auaỹateeta da so Onesíforo ỹataqta lta'araic da ltaunaxanaxac co'ollaq souaqta'a ye Éfeso.