So Sisac deuotaxanec ye Judá
1Qaq so Roboán, co'ollaq ila'a da mashe ỹaỹamaxañi da lo'onataxanaxac, nache somaye qataq 'enauac so Israel le'ecpi, ca'ai nam lqataxacpi Ñim Nataxala'. 2Qaq souaxat da sa ipaguelec na lqataxacpi Ñim Nataxala', nache co'ollaq ivi' soua cinco vi'iye da lo'onataxanaxac so Roboán, nache so Sisac, som nta'a ye Egipto, jec co'ollaxa da iloquiaxan ye Jerusalén, 3nache nnaictague' so alleppi maye netangui aso mil doscientos alaataxaquipi naigonapi, qataq so sesenta mil alleppi maye netalec so caipi, qataq so ỹataqta qalota alleppi maye chegaqa'a ye Egipto, qataq so liibiopi, suquieenopi qataq so Etiopía le'ecpi. 4Qaq huaña nache loxonec so qaỹapotaua'a nỹecpi ye Judá, nache ivitta'a ye Jerusalén.
5Qaq huaña nache so na'aqtaxanaxanec Semaías, nqo'oneua'a so Roboán qataq som nataxala'pi ye Judá, maye lapoota'a't co'ollaxa hueta'a ye Jerusalén, souaxat de'era ỹo'ot so Sisac, nache 'eeta':
Ñim Nataxala' 'enapec ye qami' qoquiỹa'ai Ñimaye, qaq ỹoqo'oye Ñimaye qami' ca'aisalo nagui, nache qami' ỹanegueta da lhuaqỹaxac so Sisac.
6Huaña, nache so nataxala'pi ye Israel qataq so nta'a, ỹaỹateeteguet de'era nache nañan, nache 'enapeco':
¡Ỹataqta 'eesa da la'aqtac Ñim Nataxala'!
7Qaq Ñim Nataxala' co'ollaq ila'a da nañan somayepi, nache 'enapega so Semaías, 'eeta': «Qaq cha'aye nañan namayepi, nache aỹem saishet da selaxachigui qome namayepi, nacherata da sasaỹaloxon qome da ñeca'alaxatec, nache sha'axaneguet da lhuaqỹaxac so Sisac da sauo'o da nhuaxanaguec ye Jerusalén, 8qalaxaye namayepi nache do'onataxaatacot qome somaye, huaña qome nache ỹaỹaten da 'eetec da aỹem do'onataxaatacot, qataq da do'onataxaatacot nam lta'alpi na laỹepi shiỹaxauapi.»
9Ime, nache so Sisac, maye nta'a ye Egipto, taỹa da iloquiaxan ye Jerusalén, nache ỹacona aso anom laỹe' maye netaigui aso atamnaxaqui maye lalamaqte Ñim Nataxala', qataq asom netaigui so lma' lta'araic so nta'a. Nache ỹataqta imatta da ỹache, nataqa'en ỹache aso npaqtaxanaqtepi oro maye lo'onata co'ollaxa so Salomón. 10Qaq so nta'a Roboán, damaxasoxoolec co'ollaxa aso laỹepi npaqtaxanaqtepi bronce, da yaqto' nmeneguet naqa'en asom qaỹache co'ollaxa, nache ỹanem da ilo'ogue so nataxala'pi maye ilotague' so ñegueuo so lma' lta'araic somaye. 11Qaq naxa da so nta'a taua'a aso atamnaxaqui maye lalamaqte Ñim Nataxala', nache som nauanaxanaxanecpi ỹache naxa asomayepi, qaq da ime nache qaltaq ỹe'eguelaxateua'a som nỹec maye ilotague' som nauanaxanaxanecpi. 12Qaq 'era da 'eetec, co'ollaq nañan so Roboán, nache vi'iiguet da layeloxo Ñim Nataxala' maye huetalec somaye, nache saishet da nmatchiguiñi somayepi da ilaxachigui, cha'aye ñaq huo'o so no'on som hueta'a co'ollaxa ye Judá.
13Qaq so nta'a Roboán, nquictauec co'ollaxa da la'añaxac, ỹoqo'oye nache queto'ot da ilotague' ye Jerusalén. Qaq somaye ivi' cuarenta y un vi'iye da nachaalataxac co'ollaq ỹacoolec da lo'onataxanaxac, nache diecisiete vi'iye da ilotague' so netaña ye Jerusalén, yem huaqta'a't nỹecpi maye lca'aguishec Ñim Nataxala' co'ollaq lca'agui so nhuo' Israel le'ecpi, da yaqto' hueta'a da le'enaxat Ñimaye. Qaq aso late'e so Roboán, le'enaxat Noamá, maye Amón lashe. 14Qalaxaye so Roboán, ỹo'ot co'ollaxa nam qauempi, nache saishet da ỹoqta ỹalemaqtelec da ỹo'ot nam 'eetapeguecpi Ñim Nataxala'.
15Qaq nam ỹo'otpi co'ollaxa so Roboán, chegoqchiguiña so cheta'ague, qataq so pa'atec de'era lo'onataxanaxac, qataq da nalaataxac somaye co'ollaq nalattague' so Jeroboán, nache nanettalec aso nere maye huetalec da na'aqtaguec so na'aqtaxanaxanec Semaías, qataq so na'aqtaxanaxanec Iddo. 16Qaq co'ollaq ileu so Roboán, nache qailareña so huaqta'a't nỹecpi maye lalamaxat so David. Qaq co'ollaq ime, nache da lo'onataxanaxac da nta'a, talec so llalec Abías.
