Da lo'onataxanaxac so Asa
1Qaq co'ollaq ileu so Abías, nache qailareña so huaqta'a't nỹecpi maye lalamaxat so David. Ime, nache so llalec Asa, talec da lo'onataxanaxac somaye da nta'a. Qaq co'ollaq do'onataxaatac somaye nache yi'iye 'alhua, huo'o da nlagaxayec soua diez vi'iye.
2Qaq som Asa, ỹo'ot co'ollaxa nam no'on qataq ỹaỹamaqchiguiñi, maye ỹaỹamaxareeta Ñim Nataxala' maye Natamnaxala'. 3Cha'aye nlaxaañi co'ollaxa so natamnaxala'pi so chegaqauec shiỹaxauapi, qataq so qaỹotcheguemec atamnaqa'pi, qataq ilaxachigui aso coma'pi maye sa qaishetapec, qataq aso ne'enaqta lqui'i aso Asera. 4Qataq ỹamaxalec so Judá le'ecpi da ỹe'eguelaxa Ñim Nataxala' maye Natamnaxala' so hua'au lta'alpi, qataq da ỹalaxaguet na lqataxacpi qataq na lamaxasoxonaxacpi. 5Qataq nlaxaañi 'enauac so atamnaqa'pi maye naña 'enauac se'eso huaqta'a't nỹecpi maye ỹotta'a't naua nañalo ye Judá, qataq som naña som qaỹoqotcheguema atamnaqa'pi. Qaq nache ỹataqta huo'o da nlagaxayec co'ollaq do'onataxaatac somaye.
6Nache so Asa, no'oxoosheguem co'ollaxa so qanpaxattaua'a huaqta'a't nỹecpi maye ỹotta'a't naua nañalo ye Judá, cha'aye huo'o da nlagaxayec yi'iye 'alhua, qataq se'esoua vi'iye qaica ca alaataxac, cha'aye Ñim Nataxala' ỹan co'ollaxa da nlagaxayec. 7Qaq so Asa, 'enapega co'ollaxa so Judá le'ecpi, 'eeta': «Ño'oxonaxasheguem qome ne'ena huaqta'a't nỹecpi maye ỹotta'a't naua nañalo, qataq coleesop ñaqa'enaq ca lpaqtaxatpi maye huo'oi naua lauoqtel, lasompi qataq na la'axasoxot lcat, cha'aye mashe qaralamaxat ne'ena 'alhua, cha'aye qomi', salaxasoxoguet Ñim Nataxala' maye Qanatamnaxala', nache Ñimaye qomi' ỹanema da nlagaxayec da ñeuoonaqte' nam qarhuoreuapi.» Nache somayepi no'oxoosheguem co'ollaxa se'eso huaqta'a't nỹecpi, nache ỹataqta ỹaỹamaqchiguiñi da lo'onataxanaxac.
8Qaq so Asa, huo'o so nalleppi maye ivi' trescientos mil Judá le'ecpi, huo'o aso lpaqtaxanaqte lcat, qataq aso lataquiaxaipi, qataq so doscientos ochenta mil so Benjamín le'ecpi, maye nataqa'en huo'o aso lpaqtaxanaqtepi qataq so lchecnecpi. Qaq 'enauac se'eso alleppi ỹataqta 'añaxaicpi. 9Qaq so Zeraj, som Etiopía le'ec, taỹa co'ollaxa da nalaate' somayepi, nache lỹatec so nalleppi maye ivi' un millón, qataq aso trescientos naigona nalaataxaquipi, nache ivira'a ye Maresa. 10Nache so Asa, ca'ateguet da dataỹa'aguet somayepi, nache naloguiñi naqa'en so nalleppi da yaqto' delogui' somayepi, huaña ye ca'amegue ye Sefata, yem sa qaỹepeque ye Maresa. 11Huaña, nache so Asa iỹaxanot Ñim Nataxala', maye Natamnaxala', 'eeta':
«¡'Am Nataxala', 'am maye ishet da 'atauan cam 'añaxaic, qataq cam qaica ca la'añaxac, qaq nagui ñaq qomi' 'autaua'n qome, 'Am Nataxala' maye Qanatamnaxala', cha'aye 'am sa'amaqtenaq, qataq nachera da 'are'enaxat da souaxalec da ñanaguenaq da sataỹaqa'aguet ne'ena alleppi! Qaq 'Am Nataxala', nache 'am maye 'Am Qanatamnaxala'. ¡Ña 'auachaxan qome da qaica ca ishet da 'am dataỹa'aguet!»
12Qaq huaña, nache Ñim Nataxala', ỹanem so Asa qataq so Judá le'ecpi, da loxonec so Etiopía le'ecpi, nache somayepi datauec co'ollaxa. 13Qalaxaye so Asa, qataq so nalleppi icaalec co'ollaxa somayepi, nache iviraxatta'a ye Gerar, huaña nache loxonec so Etiopía le'ecpi, nache nmatchiguiñi da ỹalauat, cha'aye Ñim Nataxala' qataq so nalleppi Ñimaye, ỹataqta nmichiguiñi naqa'en. Nache so Judá le'ecpi ỹataqta qalota so ỹacona logoxoshetpi somayepi. 14Ime qaltaq iloquiaxan so huaqta'a't nỹecpi maye ỹotta'a't naua nañalo maye naugalo na loiguiye ye Gerar, qaq se'eso shiỹaxauapi ỹataqta lta'araic da lcolanaxa Ñim Nataxala', qaq som Judá le'ecpi ỹataqta nhuotta somayepi, cha'aye se'eso huaqta'a't nỹecpi ỹataqta lta'araic da nsallaxa. 15Qaq nataqa'en iloquiaxan som huetauga so nanataqa'pi, maye hueta'a so qalota 'atetpi, nache ỹacona aso ỹataqta qalota qaguetapi, qataq so cameellopi. Qaq co'ollaq ime nache ỹe'eguelaxa ye Jerusalén.
