Da dalaxaic lataxac da lo'onataxanaxac so Asa
1Qaq da lta'araic la'añaxac Ñim Lo'onatac 'Enauacna, talec co'ollaxa so Azarías, som llalec so Obed, 2nache somaye hueqata'aguet co'ollaxa so Asa, nache 'eeta': «'Am Asa, qataq qami' Judá le'ecpi, qataq qami' Benjamín le'ecpi, ña aỹem qana'axaỹaxañiỹa: Ñim Nataxala', qami' hueta'agueta da qanmichiỹaique Ñimaye, qaq da qoquiỹa'ai, qalaq nataqa'en Ñimaye qami' ca'aisalo qome. 3Qaq na Israel le'ecpi, mashe qaỹoqteguelo soua vi'iye da saishet da natamnot Ñim ỹoqta 'eesa Atamnaxala', qataq ca ntaxaỹaxanaxanec da ỹapaxaguen namayepi, qataq ca ỹapaxaguenec na nqataxacpi. 4Qaq co'ollaq huaigui da lhuogoxo ne'ena nhuo' le'ecpi, nache ỹe'eguelaxa Ñim Nataxala' maye Natamnaxala' na Israel le'ecpi, qataq nmitaique, nache Ñimaye nachaxana namayepi. 5Qaq se'esoua vi'iye, qaica co'ollaxa ca nlagaxayec, nacherata da ỹataqta lta'araic da lhuogoxo 'enauac na netalec ne'ena 'alhuapi. 6Qaq nam ỹotta'a't shiỹaxauapi, qataq nam netaigui na huaqta'a't nỹecpi, maiche nalattega't, cha'aye Ñim Lo'onatac 'Enauacna maiche talec naqa'en na ỹotta'a't qauemsat. 7Qalaxaye qami' qana'añaxache qome, qataq saishet da qauqaulliitac, cha'aye da qaro'onataxanaxaqui huo'o qome da nsheetenaguec.»
8Qaq so Asa, co'ollaq hua'axaỹa de'era la'aqtaxanaxac so na'aqtaxanaxanec Azarías, nache ỹa'añaxachigui ye lauel, nache nlaxaañi 'enauac so ne'enaqtac atamnaxala'pi, maye netalec 'enauac yi'iye 'alhua Judá, qataq ye Benjamín, qataq som huaqta'a't nỹecpi maye loxonec co'ollaxa, maye netalec aye qasoxonaxapi ye Efraín, qataq ỹaỹamaxaañi aso nca'atoxonaxalate maye lalamaqte Ñim Nataxala', maye netaña ye datatauga aso atamnaxaqui maye lalamaqte Ñim Nataxala'. 9Qaq co'ollaq ime, nache laỹona't 'enauac so Judá le'ecpi, qataq so Benjamín le'ecpi, qataq som chegaqauecpi maye lma' co'ollaxa ye Efraín, Manasés, qataq Simeón, cha'aye qalota co'ollaxa so Israel le'ecpi maye ca'ategue so Asa, co'ollaq ila'a da Ñim Nataxala' maye Natamnaxala' hueta'aguet somaye.
10Nache somayepi laỹona't co'ollaxa huaña ye Jerusalén, soua tres ca'agoxoiqa, co'ollaq inoxoorec soua quince vi'iye da lo'onataxanaxac so Asa. 11Qaq nacheso se'eso na'a'q da somayepi ỹanot Ñim Nataxala' so setecientos huacapi, qataq aso siete mil qaguetapi, maye ỹacona co'ollaq nhuo' so npa'aguenaxauapi. 12Huaña nache ỹan so la'aqtac da ỹataqta imauec da lquiyaqteỹaxac da nmitaique Ñim Nataxala', maye Natamnaxala' so hua'au lta'alpi. 13Qataq camachaqca somayepi da saishet da nmitaique Ñim Nataxala', maye Natamnaxala' na Israel le'ecpi, na'aictaxa da ỹe, na'asa, ỹale huo'otaq 'alo, nache camaye qaỹalauat. 14Qataq ỹataqta nlamaxaren da ỹanot da la'aqtac Ñim Nataxala', qataq ỹa'alaqtai' da ntonaxac, qataq ỹalecteguet da l-lamaxa aso nasheerepi, qataq aso peenaq lcouepi. 15Nache 'enauac so Judá le'ecpi, da ỹataqta huo'o da ntonaxac, souaxat se'eso ỹan la'aqtac, cha'aye ỹataqta imauec da lquiyaqteỹaxac qataq maiche chegoqchigui somayepi da nmitaique Ñim Nataxala', nache Ñimaye nachaxana somayepi, qataq ỹanem da l-lagaxayec da ỹalectapeeguet so lauoreuapi.
16Qataq so nta'a Asa, nataqa'en nqateua'a da lo'onataxanaxac da nate'e aso lcote Macá, souaxat da asomaye damaxasoxoolec co'ollaxa da qaỹo'ot so lqui'i aso Asera. Nache so Asa, ilaxachigui co'ollaxa se'eso lqui'i aso Asera, nache ỹavigaxat huaña so la'auaxac ye Cedrón. 17Qaq na'aictaxa da saishet da imauec da qanlaxaañi so qaỹoqotcheguemec atamnaqa'pi maye naña ye Israel, qalaxaye so Asa, nache saishet da ỹaxanec da pe'etega Ñim Nataxala'. 18Nache somaye ỹanaigui aso atamnaxaqui maye lalamaqte Ñim Lo'onatac 'Enauacna, 'enauac se'eso oro, plata qataq som nogoxoshetpi maye somaye, qataq so lta'a ỹanot co'ollaxa Ñim Nataxala'. 19Qaq nache imattrec soua treinta y cinco vi'iye, da nta'a so Asa, da qaica ca alaataxac.
