Da lo'onataxanaxac so Josafat
1Qaq da lo'onataxanaxac da nta'a so Asá, talec so llalec Josafat, qaq somaye ỹataqta huo'o da la'añaxac co'ollaq dataỹa'aguet so Israel le'ecpi. 2Qaq somaye ỹauo'o co'ollaxa so nalleppi, da ỹanaña so huo'o na lpaqtaxat huaqta'a't nỹecpi maye ỹotta'a't naua nañalo ye Judá, qataq ỹauo'o so lauanaxanaxanecpi da nauaatalec 'enauac ye 'alhua Judá, qataq so huaqta'a't nỹecpi maye ỹotta'a't naua nañalo ye Efraín, maye loxonec co'ollaxa so Asá, som lta'a somaye.
3Qaq Ñim Nataxala' ỹataqta hueta'aguet co'ollaxa so Josafat, cha'aye somaye ỹataqta quetelec da llecỹaxac so David, maye hua'au lta'a somaye, cha'aye somaye saishet da ca'ategue da natamnot so lqui'ipi so Baal, 4nacherata da natamnot Ñim Natamnaxala' so lta'a, qataq ỹalaxalec nam lamaxasoxonaxacpi Ñim Lo'onatac 'Enauacna, nache saishet da quegue nam ỹo'ottacpi so Israel le'ecpi. 5Qaq ỹoqo'oye Ñim Nataxala', ỹanem da la'amaqchec da lo'onataxanaxac somaye, nache 'enauac so Judá le'ecpi da ndotegueua'a somaye so lachetaqtaxanaxatpi, nache somaye ivira'a da ỹataqta lta'araic da lsallaxa, qataq da llo'oxoyec. 6Qaq somaye ỹataqta lquiyaqteỹaxac da quetelec da llecỹaxac Ñim Nataxala', nache nlaxaañi som qaỹoqotcheguemec atamnaqa'pi, qataq som lqui'ipi aso Aserá maye netaña ye Judá.
7Qaq co'ollaq mashe tres vi'iye da lo'onataxanaxac da nta'a so Josafat, nache ỹama'q soua ltau', Ben Jayil, Abdías, Zacarías, Natanael qataq so Micaías, da yaqto' ỹapaxaguen som netaña so huaqta'a't nỹecpi maye ỹotta'a't naua nañalo ye Judá, 8nache lỹatec so leviitapi, Semaías, Netanías, Sebadías, Asael, Semiramot, Jonatán, Adinías, Tobías qataq so Tobadonías. Qataq nnaictagueto soua ntaxaỹaxanaxanaqa Elisama qataq so Jorán. 9Nache ỹachetrac aso nere maye huetalec na lqataxacpi Ñim Nataxala', da yaqto' ỹapaxaguen so shiỹaxauapi maye netaña ye Judá. Nache somayepi coleeteguelec 'enauac so huaqta'a't nỹecpi maye ỹotta'a't naua nañalo ye Judá, nache ỹapaxagueetac se'eso nhuo' le'ecpi.
10Nache 'enauac se'eso nta'alpi maye ilotague' so 'alhuapi maye lauoreuapi ye Judá, ỹataqta lta'araic da lcolanaxa da ñi'iỹa Ñim Nataxala', ỹoqo'oye saishet da delogui' so Josafat. 11Nacherata da som filisteopi, ỹauo'o naxa na nda'a so Josafat na lachetaqtaxanaxat plata, qataq na laỹepi lachetaqtaxanaxatpi, qataq so Arabia le'ecpi nataqa'en nda'a somaye so siete mil setecientos peenaqpi, qataq siete mil setecientos quetaqpi. 12Qaq so Josafat, nquictasheguem da la'añaxac, nache somaye no'oxoosheguem so npaqtaxanaxatpi ye Judá, qataq so huaqta'a't nỹecpi maye ỹotta'a't na nañapi da yaqto' naỹamaqtaxanaqa'pi, 13qataq qalota som lalamaxatpi, som huaqta'a't nỹecpi maye ỹotta'a't naua nañalo ye Judá, qataq hueta'a ye Jerusalén so ỹataqta 'añaxaicpi nalleppi. 14Qaq 'ana ana lmalate somayepi, ỹataqtac som chegoxoguet lta'alpi, som 'amaqtaqaic lataxala' som alleppi Judá le'ecpi, le'enaxat Adná, qaq nache nnaictague' so trescientos mil alleppi. 15Qaq somaye nache huaqta'aguet so lỹa nataxala' le'enaxat Johanán, qaq nache nnaictague' so doscientos ochenta mil alleppi, 16qataq nnaictague' somaye so Amasías, som llalec so Zicri, som maiche chegoqchigui co'ollaxa da ỹasat da do'onataxanot Ñim Nataxala', qaq somaye nache nnaictague' so doscientos mil 'añaxaicpi alleppi.
17Qataq som chegoxoguet so Benjamín, le'enaxat Eliada, som ỹataqta 'añaxaic alaataxaic, nache nnaictague' so doscientos mil alleppi maye ỹachetac so lchecnecpi qataq aso lpaqtaxanaqtepi, 18qataq nnaictague' somaye so Jozabad, qaq somaye nache nnaictague' so ciento ochenta mil alleppi maye petañepi, maye lhuotta da nalat.
19Qaq somayepi 'enauac da do'onataxaatacot so nta'a, qalaxaye saishet da qanaloqneuo som ỹamaqpi co'ollaxa so nta'a, da ilotague' som qanpaxattaua'a huaqta'a't nỹecpi maye ỹotta'a't naua nañalo ye Judá.
