So Micaías ỹa'axata'a da nanoxonaguec so Ajab
1Qaq so Josafat, ivira'a co'ollaxa da ỹataqta sallaxanec, qataq huo'o da llo'oxoyec, qataq ivira'a da lacho' so Ajab. 2Qaq co'ollaq mashe qaỹata'aguelo soua vi'iye, nache so Josafat, nqo'ona ye Samaria da namaqtega so Ajab, nache so Ajab, ỹo'ot so lquia'axac souaxat da ntootapeguec da lviraxac so Josafat qataq so nnaictague'pi, nache ỹalauat co'ollaxa aso qalota qaguetapi, qataq aso huacapi, huaña nache ỹayena'a somaye da nnaicapegue' da iloquiaxa'n ye Ramot maye huaigui ye Galaad. 3Nache so Ajab, maye nta'a ye Israel, inat so Josafat, som nta'a ye Judá, 'eeta':
¿Peta'a 'aushet da 'am ñenaicapegue' da ñeqo'onaxa da seloquiaxai' ye Ramot maye huaigui ye Galaad?
Nache so Josafat, 'enapeco':
Aỹem qataq na ñalleppi, 'am souaqta'aguet, da ñeqo'onaxa ca alaataxac. 4Qalaxaye aỹem 'anqouaguec da hua'auñi da 'auchemaxata ca la'aqtac Ñim Nataxala'.
5Huaña nache so nta'a ye Israel, laỹona't so cuatrocientos na'aqtaxanaxanecpi, nache inat somayepi, 'eeta':
¿Peta'a ishet da ñeqo'onaxa ye Ramot, maye huaigui ye Galaad da seloquiaxanaq, qalqo' saishet? Nache somayepi 'enapeco':
Aja', ishet da qauloquiaxañi, cha'aye Ñim Nataxala' qami' ỹanema da qo'oxoñiqui yemaye.
6Qalaxaye so Josafat, 'enapeco':
¿Peta'a qaica ca lỹa la'aqtaxanaxanec Ñim Nataxala', ne'ena souaqta'a da yaqto' nataqa'en senataq?
7Nache so nta'a ye Israel, ỹasateguet so Josafat, 'eeta':
Aja', huo'o so lỹa, maye ishet da senataq ca 'eetec ca la'aqtac Ñim Nataxala'. Qaq somaye le'enaxat Micaías, som llalec so Imla. Qalaxaye ỹataqta sa sesheteguet somaye, souaxat da saishet da aỹem da'aqtaxanem ca no'on, nda'a't da qauem na ỹa'axata'a. Qalaxaye so Josafat 'enapego' somaye, 'eeta':
Saishet taxa da 'anasaxauec de'era.
8Huaña nache so nta'a ye Israel iỹaxaneuga so 'amaqtaqaic ltaua, nache ỹamaq, 'eeta':
Sa 'anaỹaloxon qome da 'avi'iguenauga, nache 'anauegueuo ca Micaías, maye llalec so Imla.
9Qaq so nta'a ye Israel, qataq so Josafat, maye nta'a ye Judá, ñi 'oonolec soomaye nso'ootangui aso maiche nso'onaxaqui, qataq ỹaatrañi soua alogo maye lo'onataxanaxaqui' da nta'a, netraña so naponqa' maye sa qaỹapeque so ñegueuo ye Samaria. Qaq 'enauac so na'aqtaxanaxanecpi datato'oto soomaye, ỹa'axattac na l-loxocpi. 10Nache so Sedequías, som llalec so Quenaná, ỹo'o't co'ollaxa soua le'enaqtaqa lcat huaca lcoue, nache ỹa'alaqtai', 'eeta':
«Da la'aqtac Ñim Nataxala' 'eeta': ‹Ne'enaua huaca lcoue, nachenaua qome naua 'auo'ogoxonalo da 'auloquiaxan ye siiriopi, nache ivitta'a da ỹataqta nmichiguiñi 'anqa'en.›»
11Nache 'enauac se'eso na'aqtaxanaxanecpi da 'eeta'a't da la'aqtaxanaxac, da 'eetega so nta'a, 'eeta':
«'Aue, 'anqo'ona da 'auloquiaxan ye Ramot maye huaigui ye Galaad, cha'aye Ñim Nataxala', 'am ỹanem qome yemaye da 'oxonec».
12Nache so namaxashec maye ỹe'eguena'a co'ollaxa so Micaías, 'enapego' somaye, 'eeta':
So na'aqtaxanaxanecpi, 'enauac da 'eeta'a't da la'aqtaxanaxac, da da'aqtaxaatapeguem so nta'a, da taỹa'a da no'on. Qaq ỹoqo'oye aỹem, 'am ñachoxonnot da 'ano'onaxat ca 'ara'aqtaxanaxac, da 'eeta'am 'anqa'en da la'aqtaxanaxac somayepi.
13Nache so Micaías, 'enapeco':
Qaq cha'aye 'eesa da nca'altauec Ñim Nataxala', nache cam la'aqtac maye aỹem ỹanem Ñimaye, nacheca qome ca sa'axat.
14Nache somaye co'ollaq ivireua'a so nta'a, nache so nta'a, inat somaye, 'eeta':
Micaías, ¿peta'a ishet da ñeqo'onaxa ye Ramot maye huaigui ye Galaad da seloquiaxanaq, qalqo' saishet? Nache so Micaías, 'enapeco':
Aja', ishet da qanqo'oñiỹa da qauloquiaxañi yemaye, cha'aye Ñim Nataxala' qami' ỹanema qome da qoroxoñiqui yemaye.
15Qalaxaye so nta'a 'enapeco':
¿Chaq lcata naxa da 'am ñachoxonnot, da aỹem 'aua'aqtaxaatem ca ỹataqta 'eesa lataxac maye chegoqo'ot Ñim Nataxala'?
16Huaña nache so Micaías, 'enapec:
«Aỹem selota'a da 'enauac na Israel le'ecpi,
ỹataqta laguelec ana qasoxonaxapi,
'eeta'am aca qaguetapi da qaica ca ilo'ogue.
Nache da la'aqtac Ñim Nataxala', 'eeta':
‹Ne'ena shiỹaxauapi qaica ca lataxala',
qaq no'on da ñi 'oonolec namayepi
qaica cara da ỹe'eguelaxalo naua lma'ate.›»
17Nache so nta'a ye Israel, 'enapego' so Josafat, 'eeta':
¿Qaq saisheto' da mashe 'am sa'aqtaxaatapeguem, da de'era shiỹaxaua ỹataqta saỹauanego' da aỹem da'aqtaxanem ca no'on, nda'a't na qauem?
18Nache so Micaías, qaltaq 'enapec:
Qaq souaxat de'era 'ara'aqtac, nache nagui qana'axaỹaxañiỹa da la'aqtac Ñim Nataxala', 'eeta': Aỹem selota'a Ñim Nataxala' da nso'ootangui aso nso'onaxaqui, qaq so nalleppi piguem le'ecpi nachattaua'a Ñimaye, huo'o so pa'ata'ague da aloic, qataq da ne'emaq. 19Nache Ñim Nataxala', denataxan, 'eeta': ¿Negue't ca ishet da ỹayena'a ñi Ajab, maye nta'a ye Israel, da taỹa da iloquiaxan ye Ramot, maye huaigui ye Galaad, da nache huaña da ileu? Qaq somayepi ỹotta'a't dam la'aqtaxanaxac. 20Qalaxaye huo'o co'ollaxa so nachaateua'a Ñim Nataxala', nache somaye 'enapec, aỹem sayena'a qome ñimaye. Nache Ñim Nataxala', inat somaye, 'eeta': ¿Qaq ca qonetec qome? 21Nache somaye 'enapec: Qomye ñeqo'ona da so'onataxana na la'aqtaxanaxacpi so la'aqtaxanaxanecpi ñimaye, da ỹa'axat ñaqa'en da natenataxanaxac. Nache Ñim Nataxala', 'enapego' somaye, 'eeta': 'Aue, 'anqo'ona, nache 'auo'ot damaye, cha'aye 'auañoxot qome. 22Qaq nagui mashe 'auaỹaten da Ñim Nataxala', ỹachaiguilo naua ala'api da natenataxanaxac 'enauac na 'ara'aqtaxanaxanecpi, qaq Ñimaye mashe ỹa'axata'a da nache qouaigui qome que'eca 'alaataxac, da 'avireguet ca qauem. 23Huaña, nache so Sedequías, som llalec so Quenaná, ca'ata so Micaías, nache iuaxangui na lanoc, nache 'eeta':
Che ¿hua'ago' ca tateuga se'eso lamaxashec Ñim Nataxala', co'ollaq aỹem ca'ai da yaqto' 'am detaxaỹot?
24Nache so Micaías, 'eeta':
Qomye maiche 'auaỹaten qom ivita ca na'a'q qom 'ateua'alo na nma'pi da 'anqañoxottapiguiñi.
25Huaña, nache so nta'a ye Israel, 'eeta':
Qauacoñiiua'a da Micaías, nache qauaviquiỹa ca Amón, maye ilotague' ye huaqta'a't nỹecpi, qataq ca ỹalec Joás. 26Nache qoñiỹapegalo caamaye da aỹem ỹa'aqtac da qaỹapoua'a, qoỹanaigui aca ncoñetaxanaxaqui, qataq da qaiquia'axan nache nda'a't aca nauole, qataq ca 'etaxat da qoỹaata'am, nache ivitta'a qom qaltaq ye'eguelaq da qaica cara da ñachaalataxac.
27Nache so Micaías qaltaq 'enapeco':
«Qom qaica cara da 'anachaalataxac qom 'añe'eguelaq,
qache saishet da nacheñi Ñim Nataxala',
da aỹem ỹa'aqtaxanaxan.» Qaq nataqa'en 'eeta':
'Enauac qami', qaua'aqaichigui de'era nagui.
28Qaq huaña, nache so nta'a ye Israel, qataq so Josafat, maye nta'a ye Judá, je'c da nqo'oora ye Ramot, maye huaigui ye Galaad. 29Nache so nta'a ye Israel, 'enapego' so Josafat, 'eeta':
Aỹem, qom saigui ca alaataxac, nache saayiñi caua ỹaqa'alo anogo, qaq 'am qalaq nache 'aỹa'aatrañi qome naua maiche 'ogo da 'am nta'a.
Nache so nta'a ye Israel, ỹaayiñi soua ỹaqa'alo anogo nache taigui so alaataxac. 30Qalaxaye so nta'a ye Siria, hueqata co'ollaxa se'eso nataxala'pi maye netangui aso naigonapi alaataxaquipi, da saishet da iloquiaxan ca camachaqca, maye nachesota so nta'a ye Israel. 31Nache se'eso nataxala'pi, maye netangui aso naigonapi, co'ollaq ila'a so Josafat, nache 'eeta': «Yo'oqta da nachena ne'ena na nta'a ye Israel.» Nache coleesop somaye da yaqto' iloquiaxan, qalaxaye so Josafat deỹaxan co'ollaxa, nache Ñim Nataxala' itauan somaye, nache ỹo'ot da qanayeca'ai. 32Qaq somayepi co'ollaq ila'a da saishet da nacheso so nta'a ye Israel, nache ỹaxaañi da icogaxaatac somaye. 33Qalaxaye huo'o so 'oonolec se'eso alleppi da choche ỹaỹenec co'ollaxa aso lchecna, nache tagui so nta'a, tatoigui so lsoxoqui soua nalaataxaqui', nache ique'emaqchet somaye. Nache so nta'a 'enapega so laigona lo'o, 'eeta':
'Anconnaxaañi ana naigona nache aỹem 'anqateeguesop ne'ena alaataxac, cha'aye aỹem seque'emaq. 34Qaq se'eso na'a'q ỹataqta lta'araic se'eso alaataxac, qaq so nta'a ye Israel qalaq qanasoqtañi, qanachaalataxaatangui aso laigona da natata'ai' qanqa'en so siiriopi nache ivitta'a so avit, qaq co'ollaq mashe inoxooñi aso nala', nache ileu.
