So na'aqtaxanaxanec Jehú iviraxato'ot so Josafat
1Qaq so Josafat, maye nta'a ye Judá, co'ollaq ñe'eguelaxa so lma' lta'araic, maye naña ye Jerusalén, nache qaica ca machaqca da nachaalataxac. 2Qalaxaye so na'aqtaxanaxanec Jehú, som llalec so Jananí, ca'ata'aguet somaye nache inat, 'eeta': ¿Ta'ainco' da 'autauan nam qauemaicpi, qataq 'auauo'o 'anauochaxaua na npa'aguenaxauapi Ñim Nataxala'? Qaq souaxat de'era 'auo'ot, nache Ñim Nataxala', 'am dalemataỹa. 3Qalaxaye nache 'ena'am, huo'o nam 'onaxaicpi 'am talec, cha'aye 'aulaxachigui so lqui'ipi aso Aserá, maye netaña co'ollaxa ne'ena 'alhua, qataq imauec da 'arquiyaqteỹaxac da 'anmitaique Ñim Nataxala'.
So Josafat ỹauo'o so shiỹaxauapi da nmit ca nasouaxashet
4Qaq so Josafat, netaña co'ollaxa ye Jerusalén, qalaxaye tauga naxa da namaqtega som lauo' le'ecpi, som netaña ye Berseba, nache ivitta'a naxa som netaña aye qasoxonaxapi ye Efraín, da yaqto' ỹe'eguelaxa naqa'en somayepi Ñim Nataxala' maye Natamnaxala' so hua'au lta'alpi. 5Nataqa'en ỹauo'o so nataxala'pi da yaqto' nmit ca nasouaxashet, nache ñi 'oonolec somayepi ỹanaña ñi 'oonolec se'eso qanpaxattaua'a huaqta'a't nỹecpi maye ỹotta'a't naua nañalo ye Judá. 6Ime, nache 'enapega se'eso shiỹaxauapi maye nmit ca nasouaxashet, 'eeta': «Qaloitegue qome ca lataxac cam qauo'oche, cha'aye de'era qaro'onataxanaxaqui saishet da chegoqo'ot cam choche shiỹaxaua, maye nacheñi Ñim Nataxala' ñim chegoqo'ot, qaq nacheñi ñim qami' hueta'agueta qom qanmiche cam nasouaxashet. 7Qaq ỹoqo'oye huo'o naq 'enec qanqa'eñi Ñim Nataxala', qataq qauloitelec da lataxac cam qauo'oche, cha'aye Ñim Nataxala' maye Qanatamnaxala', sa ishetaxateguet da qaỹo'ot ca sanalogoñi lataxac, qataq da qalca'atagui na shiỹaxauapi, qataq sa ishetaxateguet ca qoỹoxottañi nsheetenaxanaxac.»
8Qaq so Josafat, nataqa'en ỹauo'o so ỹanaña ye Jerusalén, som leviitapi qataq so ntaxaỹaxanaxanecpi, qataq som lataxala'pi som nhuo' Israel le'ecpi, da yaqto' nmit na nasouaxashetpi da qaỹo'ot da ño'oxonnataxanaxac, qataq da ỹaỹamaxaañi nam ncotaxacpi som lma' ye Jerusalén. 9Nache 'enapega somayepi, 'eeta': «Qami' da huo'o ca qauo'oche, qalaq qoquiitelec ca 'eesa lataxac, qataq qano'onaxache da qarataxaqui, qataq huo'o naq 'enec qanqa'eñi Ñim Nataxala'. 10Qaq da huo'o camachaqca nam cotaxacpi, da qami' ndoua'alo nam netaigui nam huaqta'a't nỹecpi maye ỹotta'a't naua nañalo, da huo'otaq qanmiche ca lataxac da huo'o ca nalaatac, qalqo' da qauo'ogoxoñiỹa na nqataxacpi, na qalapaxañi lataxacpi, nam qaỹo'ot lataxacpi, qataq nam namaxasoxonaxacpi, nache qauqachiỹa namayepi da saishet da ỹauo'o ca lasouaxashet da hueto'ot naqa'en Ñim Nataxala', yaqto' da layeloxo Ñim Nataxala', saishet da qami' taleguete, qataq nam qarqaỹaipi. Qaq da qauo'oche de'era, nache qaica ca qarasouaxashiche qome. 11Qaq so lataxala' so ntaxaỹaxanaxanecpi Amarías, nacheso so ilo'ogue nam lataxacpi da ño'oxonnataxanaxac, qaq so Zebadías, som llalec so Ismael, maye lataxala' som chegoxoguetpi so Judá, nacheso so ilo'ogue da lataxac nam lo'onataxanaxacpi so nta'a, qaq nam leviitapi nataqa'en qami' itauaata'ape qome. Qaq ỹoqo'oye qana'añaxache qome nache qauacoñiilec da no'onataxanaxac, cha'aye Ñim Nataxala' hueta'aguet ca ỹo'ottac ca no'on.»
