Da lo'onataxanaxac so Amasías
1Qaq so Amasías mashe ivi' veinticinco vi'iye da nachaalataxac co'ollaq ỹacoolec da lo'onataxanaxac da nta'a, nache ivi' soua veintinueve vi'iye da ilotague' ye Jerusalén. Qaq aso late'e somaye le'enaxat Yoadán, qaq asomaye lma' ye Jerusalén. 2Qaq nam ỹo'otpi so Amasías ỹataqta ỹaỹamaxareeta Ñim Nataxala', qalaxaye somaye saishet da ỹoqta no'on da lquiyaqteỹaxac. 3Cha'aye somaye co'ollaq mashe ỹaỹamaxalec da lo'onataxanaxac, nache ỹalauat 'enauac som 'amaqtaqaicpi nataxala'pi maye ỹalauat co'ollaxa so lta'a somaye. 4Qalaxaye saishet da ỹalauat som llalaqpi somayepi, cha'aye nache 'eetec som nanettañi nqataxac maye huetalec aso lere so Moisés, maye da la'aqtac co'ollaxa Ñim Nataxala', 'eeta': «Nam nta'alpi saishet qome da qaỹalauat souaxat cam lasouaxashetpi cam llalaqpi, qataq cam ñalaqpi saishet qome da qaỹalauat souaxat cam lasouaxashetpi ca lta'alpi, maye nacherata da qaỹalauat ñi 'oonolec souaxat ca maiche lasouaxashet.»
5Nache so Amasías laỹona't 'enauac som ỹalleppi maye lma' ye Judá, qataq ye Benjamín, nache ỹaỹamaxatchiguiñi se'eso nhuo' le'ecpi da ỹauo'o so lataxala'pi so mil alleppi, qataq so cien alleppi. Ime nache ỹauo'o aso lmalate da naloqna't som napacteleguete naua veinte vi'iye da nachaalataxac, huaña nache ỹaỹaten da ivi' trescientos mil so alleppi maye nca'aguishecpi, maye ỹataqta lhuotta da nalat, qataq ỹaỹaten da do'ogoxona ana taquiaxai qataq ana npaqtaxanaqte. 6Qaq nataqa'en naỹamaxate' so cien mil alleppi Israel le'ecpi nache isheeten, ỹanem so tres mil trescientos kilos so plata.
7Qalaxaye huo'o som nale Ñim Lo'onatac 'Enauacna da ivita somaye, nache 'enapega 'eeta':
«'Am nta'a, saishet qome da 'annaicapegue' na alleppi Israel le'ecpi, cha'aye Ñim Nataxala' saishet da hueta'aguet na Israel le'ecpi, maye chegoxoguet so Efraín. 8Qalaxaye da 'auauotaique da nquictec 'anqa'en da la'añaxac na 'analleppi da 'antaune' na Israel le'ecpi da 'anqo'ona ca alaataxac, nache Ñim Lo'onatac 'Enauacna 'am ỹaneguet qome da 'am loxonec ca 'ampa'aguenaxauapi, cha'aye Ñim Lo'onatac 'Enauacna huo'o da la'añaxac da detaunaxan qataq da huo'o ca ilaxachigui.»
9Nache so Amasías inat som nale Ñim Lo'onatac 'Enauacna, 'eeta': «Qaq ¿ca 'eeteco' qome ca lataxac som tres mil trescientos kilos so plata maye sanem so alleppi Israel le'ecpi?»
Nache som nale Ñim Lo'onatac 'Enauacna ỹasateguet somaye, 'eeta':
«Ñim Nataxala' ishet da ỹactec naqa'en cam 'am ỹanem, napacalec naqa'en somaye.»
10Huaña nache so Amasías 'enapega som alleppi Israel le'ecpi maye naỹa co'ollaxa somaye da ntaune', da ỹe'eguelaxa so lma'. Qalaxaye somayepi dalemataỹa so Judá le'ecpi, nache ỹe'eguelaxa so lma' qalaxaye ỹachetec da lalemataic.
11Huaña nache so Amasías ỹa'añaxachigui ye lauel da ỹauec so nalleppi, taỹa ye Ca'amapega't 'Alhua maye huaña na Toue, nache ỹalauat so diez mil llalaqpi so Seír. 12Qaq so Judá le'ecpi ỹaconeua'a nataqa'en so diez mil, nache nca'alaxattauec da ỹaviguisheguema aso qaỹoqotcheguemec qasoxonaxa, ime nache ỹamaxauec nache 'enauac somayepi ỹataqta dolachigui.
13Qaq som alleppi maye ỹe'eguelaxat co'ollaxa so Amasías, da yaqto' saishet da ntaune' da nqo'ona so alaataxac, qalaq iloquiaxaatac so shiỹaxauapi maye hueta'a so huaqta'a't nỹecpi maye ỹotta'a't naua nañalo ye Judá, chegoqchiguiña naqa'en ye Samaria, nache ivitta'a ye Bet Jorón, nache somayepi ỹalauat so tres mil shiỹaxauapi, qataq ỹache so qalota nogoxoshetpi.
14Qaq so Amasías co'ollaq ime da nmatchiguiñi da ỹalauat so Edom le'ecpi nache ỹe'eguelaq, ỹache so ne'enaqtacpi maye natamnaxala' som llalaqpi so Seír, nache ỹauo'o natamnaxala' somayepi, nache ỹataqta ỹo'oxoreetac, qataq ỹavigaxat so lchenaxanaxat da ỹanot somayepi. 15Qaq ỹoqo'oye Ñim Lo'onatac 'Enauacna ỹataqta dalemataỹa so Amasías, nache ỹamaq so la'aqtaxanaxanec da 'enapega somaye, 'eeta':
«¿Ta'ainco' ye 'aupe'etega na atamnaxala'pi maye saishet nca'alaxatec som shiỹaxauapi maye natameetacot co'ollaxa namayepi, da yaqto' npaxateguet da 'arhuaqỹaxac?»
16Qalaxaye co'ollaq ñaq detaqtac som la'aqtaxanaxanec Ñim Lo'onatac 'Enauacna, nache so nta'a 'enapega somaye, 'eeta':
«¿Negue'to' ca 'am ỹanem co'ollaxa da 'am la'aqtaxanaxanec na nta'a? Ñaq 'aue'enaxaatai' taxa. ¿Qalqo' huotaique da 'am qaỹalauat?»
Nache so na'aqtaxanaxanec saishet da qaltaq 'enapega, qalaxaye nacherata da 'eeta':
«Aỹem saỹaten da Ñim Lo'onatac 'Enauacna 'am ilaxachigui qome, souaxat da 'auo'ot de'era, qataq saishet da 'aualaxaguet da iqataxac.»
17Qalaxaye so Amasías, maye nta'a ye Judá, quegue co'ollaxa da lqataxac so laỹepi shiỹaxauapi, nache ỹamaxa da la'aqtac so Joás, maye nta'a ye Israel, som llalec so Joacaz, qataq laual so Jehú, nache 'eeta': «Ñaq 'auanac yaqto' ỹataqta ñataỹaqa'a't.» 18Qalaxaye so Joás, maye nta'a ye Israel, ỹasateguet co'ollaxa so Amasías, maye nta'a ye Judá, 'eeta': «Aso cotaque ỹamaxa da la'aqtac aso cedro maye naña ye Líbano, 'eeta': 'Aỹa'anem taxa ñi ỹalec añim 'aỹa'ale da yaqto' ỹauo'o lhua. Qalaxaye so chaqaic shiguiỹacpi maye hueta'a ye Líbano, nateugueye co'ollaxa nache dapaxañi naqa'en aso cotaque. 19Qaq 'am ye qonapec 'oxonec so Edom le'ecpi, qaq nachera da huo'omshe 'am nlaqchigui da 'año'oxonnaxac, qataq 'anmittaique da nquiguec da 'ayo'oxoyec. Qalaxaye 'onaxaic taxa da 'aue'enaxaatai', qoueta'a ca 'arma'. ¿Ta'ainec da maiche 'anmitta'a da 'am talec ca qauem, qataq nam Judá le'ecpi?»
20Qalaxaye so Amasías saishet da ỹalaxaguet somaye, cha'aye Ñim Lo'onatac 'Enauacna nache 'ena'ac co'ollaxa de'era da yaqto' ỹaneguet somaye da lhuaqỹaxac so Joás, souaxat da somaye ỹo'oxoreetac qataq natameetacot som natamnaxala'pi so Edom le'ecpi. 21Qaq huaña nache jec so Joás, som nta'a ye Israel, da yaqto' ỹataqta nma'ai' da dataỹa'aguet so Amasías, huaña ye Bet Semes maye huaigui ye 'alhua Judá. 22Huaña nache so Israel le'ecpi loxonec so Judá le'ecpi, nache ñi 'oonolec so Judá le'ecpi datauec, ỹe'eguenalo naua lma'ate. 23Qaq huaña nache so Joás, som nta'a ye Israel, loxonec so Amasías, maye nta'a ye Judá, huaña ye Bet Semes, ime nache ỹauega ye Jerusalén, qaq huaña nache ỹauatec so ciento ochenta metros so lpaqtaxat yemaye, chegoqchiguiña so Lasom maye le'enaxat Efraín, nache ivitta'a so Lasom maye naña aso Lamaqai. 24Qataq nataqa'en ỹacona 'enauac so oro qataq so plata, qataq 'enauac so nogoxoshetpi maye lalamaxat aso atamnaxaqui maye lalamaqte Ñim Lo'onatac 'Enauacna, maye ilotague' so Obed Edom, qataq som no'on nogoxoshetpi maye huetaigui so lma' so nta'a, qataq ỹaconeua'a da icoñi' so llalaqpi som 'amaqtaqaicpi, ime nache ỹe'eguelaxa ye Samaria.
25Qaq so Amasías, som llalec so Joás, maye nta'a ye Judá, somaye ña nca'altauec co'ollaq mashe ivi' soua quince vi'iye da ileu so Joás, som llalec so Joacaz, maye nta'a ye Israel. 26Qaq nam laỹepi na'aqtaguecpi so Amasías, chegoqchiguiña co'ollaq cheta'ague da do'onataxan, nache ivitta'a so pa'atec lo'onataxanaxac, nache nanettalec aso nere maye huetalec da na'aqtaguec so nta'alpi ye Israel. 27Qaq nache chegoqchiguiña co'ollaq so Amasías ca'ai Ñim Nataxala', nache qaỹataỹa'aguet somaye huaña ye Jerusalén, nache somaye datauec taỹa ye Laquis, qalaxaye qaicaalec nache qaiviraxatta'a so huaqta'a't nỹecpi, qaq huaña somaye nache qaỹalauat. 28Ime nache qaỹache qaỹasaxalec so caaỹo, nache qailareñi huaqta'ai' qanqa'en som hua'au lta'alpi, maye huaigui so huaqta'a't nỹecpi maye lalamaxat so David.
