1So Yotán mashe ivi' veinticinco vi'iye da nachaalataxac co'ollaq ỹacoolec da lo'onataxanaxac da nta'a, nache ivi' dieciséis vi'iye da ilotague' ye Jerusalén. Qaq aso late'e somaye le'enaxat Jerusa, asom llale so Sadoc.
2Qaq so Yotán ỹo'ot co'ollaxa nam ỹataqta ỹaỹamaxareeta Ñim Nataxala', cha'aye ỹataqta quetelec 'enauac nam ỹo'otpi co'ollaxa so lta'a Uzías, qalaxaye saishet da taigui co'ollaxa aso atamnaxaqui maye lalamaqte Ñim Nataxala' da ỹavigaxat na lchenaxanaxat. Qalaxaye ỹasheetem som shiỹaxauapi da nache queto'ot da natameetacot so atamnaxala'pi maye saq'en. 3Qaq so Yotán, nacheso som ỹo'ot so lasom lta'araic asom atamnaxaqui maye lalamaqte Ñim Nataxala', qataq ỹo'ot so qalota no'onataxat so npaqtaxanaxat ye Ofel. 4Qataq nataqa'en no'oxoosheguem so qalota huaqta'a't nỹecpi, nalec naqa'en aye qasoxonaxapi ye Judá, qataq no'oxoosheguem aso ñe'eguenaxaquipi qataq aso nalloxolatepi naña naqa'en so aviaq. 5Qaq so Yotán, nataqa'en nalattague' co'ollaxa so lta'a so Amón le'ecpi, nache loxonec, qaq huaña nache imattrec soua tres vi'iye da so Amón le'ecpi ỹaata'am somaye aso lsheetenaxanaqte ye 'oonolec vi'i, maye ivi' tres mil trescientos kilos so plata, qataq diez mil kilos so trigo, qataq diez mil kilos so cebada.
6Qaq 'era da 'eetec so Yotán da ỹataqta 'añaxaic, cha'aye ỹo'ot nam ỹataqta ỹaỹamaxareeta Ñim Nataxala' maye Natamnaxala'. 7Qaq na laỹepi na'aqtaguecpi so Yotán, da nalaataxac qataq da llecỹaxac, nache nanettalec aso nere maye huetalec da na'aqtaguec so nta'alpi ye Israel qataq ye Judá.
8Qaq so Yotán co'ollaq ỹacoolec da lo'onataxanaxac nache mashe ivi' veinticinco vi'iye da nachaalataxac, qataq dieciséis vi'iye da ilotague' ye Jerusalén. 9Qaq co'ollaq ileu so Yotán, nache qailareña ye huaqta'a't nỹecpi maye lalamaxat so David. Qaq so llalec Ajaz, nache talec da lo'onataxanaxac da nta'a.
