Da lo'onataxanaxac so Ajaz
1Qaq so Ajaz, mashe ivi' veinte vi'iye da nachaalataxac co'ollaq ỹacoolec da lo'onataxanaxac, qaq ivi' dieciséis vi'iye da ilotague' ye Jerusalén, qalaxaye saishet co'ollaxa da ỹo'ot nam ỹaỹamaxareeta Ñim Nataxala', qaq saq 'ena'am nam ỹo'otpi so lta'a David. 2Nacherata da somaye quetelec da llecỹaxac so nta'alpi ye Israel, cha'aye ỹo'ot nataqa'en so ne'enaqtacpi lqui'ipi so Baal. 3Qataq nataqa'en ỹavigaxat so lchenaxanaxat huaña ye ca'amegue maye le'enaxat Ben Jinón, qataq ỹaneuo so llalaqpi da lachetaqtaxanaxat qaỹavigaxatta, nache ỹe'enaxatchigui da lataxac so shiỹaxauapi maye Ñim Nataxala' ỹo'orauec co'ollaxa, ỹauaachigui naqa'en so Israel le'ecpi. 4Qaq nataqa'en ỹo'ot so lachetaqtaxanaxatpi qataq ỹavigaxat so lchenaxanaxat, huaña som qaỹoqotcheguemec atamnaqa'pi, qataq aso lcomaraxalatepi, qataq som hueto'oto asom qo'oipaqpi maye qalochiguiñi ana lcouepi.
5Qaq souaxat de'era nache Ñim Nataxala' maye Natamnaxala', ỹaneguet da lhuaqỹaxac so nta'a ye Siria, nache so siiriopi loxonec somayepi, nache qalota so ỹauecpi, ỹauega ye Damasco. Qaq nataqa'en Ñim Nataxala' ỹaneguet da lhuaqỹaxac so nta'a ye Israel, nache somaye ỹataqta qalota som ỹalauatpi. 6Qaq nataqa'en so Pecaj, maye llalec so Remalías, se'eso 'oonolec na'a'q ỹalauat so ciento veinte mil ỹalleppi maye 'añaxaicpi huaña ye Judá, souaxat da ca'ai Ñim Nataxala' maye Natamnaxala' so hua'au lta'alpi. 7Qaq so Zicri, som alaataxaic maye lma' ye Efraín, ỹalauat so Maseías, som llalec so nta'a, qataq so Azricán, som 'amaqtaqaic lataxala' nam ilotague' so nma' lta'araic, qataq so Elcana, maye ltaua so nta'a. 8Qaq nataqa'en so alleppi Israel le'ecpi, loxonec so doscientos mil shiỹaxauapi maye lma' ye Judá, 'alpi, ñaqpiolec, qataq aso nogotolepi, qataq ỹacona so ỹataqta qalota nogoxoshetpi, nache ira'a ye Samaria.
9Qalaxaye huo'o so la'aqtaxanaxanec Ñim Nataxala', le'enaxat Obed, maye ca'ata'aguet so alleppi co'ollaq mashe inoxooteua'a ye Samaria, nache 'enapega, 'eeta':
Ñim Nataxala' maye Natamnaxala' so hua'au qarta'ailpi, dalemataỹa na Judá le'ecpi, ỹoqo'oye ỹaneguet namayepi da qarhuaqỹaxaqui, qalaxaye qami' qaualauache, qauroilec da ỹataqta lta'araic qarayeloxoi maye iviro'ot na piguem. 10Qaq nagui nache qaltaq qauacoñiiua'a da qauauo'oi qarlataqui na shiỹaxauapi maye lma' ye Judá, qataq ye Jerusalén. Qaq ¿peta'a saisheto' da huo'o da qarasouaxashechi hueto'ot Ñim Nataxala' maye Qanatamnaxala'ai? 11Qaq ñaq aỹem qaualaqaiguet, nache qavi'iguelaxache na qarqaỹaipi maye qo'oxoñiqui co'ollaxa, cha'aye Ñim Nataxala' ỹataqta qami' dalemataỹalo.
12Huaña nache so Azarías, som llalec so Johanán, qataq so Berequías, som llalec so Mesilemot, qataq so Ezequías, som llalec so Salún, qataq so Amasa, som llalec so Jadlay, som lataxala'ate so Efraín le'ecpi, soomaye dataỹa'agueta co'ollaxa som chegaqa'a so alaataxac. 13Nache 'enapega somayepi, 'eeta':
Saishet da qanaviquiiua'a ne'ena na qoroxoñiquipi, cha'aye damaye huo'o qome naqa'en da qarasouaxashet hueto'ot Ñim Nataxala'. Cha'aye de'era qauo'oche, ỹo'ot qome da nquiguec na qanpe'enaxacpi, qataq na qarasouaxashetpi, cha'aye mashe ỹataqta qalota nam qarasouaxashetpi, nache Ñim Nataxala' ỹataqta dalemataỹa qome na Israel le'ecpi.
14Huaña nache so alleppi ỹaxanec so loxonecpi, qataq som logoxoshetpi se'eso loxonecpi maye deuotaxanec co'ollaxa somayepi, nache ỹachaña som hueta'a soua nataxala'ate qataq 'enauac se'eso nhuo' le'ecpi. 15Ime nache se'esoua nataxala'ate, nachesoua soua huapegueto se'eso noxonecpi, nache som logoxoshetpi somayepi maye qaiuotaxanec co'ollaxa, nache qaỹachegoxotaigui som nogoxot da qoỹanaxanaxangui som huetauecpi somayepi, qataq qoỹanaxanaxangui so lapela'pi, qataq qaiquia'axan qataq qanỹomaxan, qataq qanataren na lque'emaxapi, qataq qoỹanaxanaxaalec so 'ashenapi som qaica ca la'añaxacpi, nache qaỹauega ye Jericó, yem huaqta'a't nỹecpi maye le'enaxat Chaisat, nache qoỹano'ot som lauo' le'ecpi, ime nache soomaye ỹe'eguelaxara ye Samaria.
16Qaq nache huaiguilo se'esoua na'axa'te da so nta'a Ajaz, ỹamaxa so nta'a ye Asiria, so ltaxaỹaxanaxanecpi da iỹaxanaique ca ntaunaguec somaye, 17cha'aye nataqa'en so Edom le'ecpi, naỹa co'ollaxa da iloquiaxan som Judá le'ecpi, nache huo'o so ỹauec loxonecpi. 18Qaq nataqa'en som filisteopi, da nhuotta co'ollaxa so huaqta'a't nỹecpi maye naña som nalochiguiñi 'alhua, qataq ye Néguev maye huaigui ye 'alhua ye Judá, qataq deuotaxanec ye Bet Semes, Ayalón qataq ye Gederot, nataqa'en ye Soco, Timná qataq ye Gimzo, caueegue' naqa'en nam lauoreuapi nma'piolec, qataq nache naigui somayepi. 19Cha'aye Ñim Nataxala', ỹanem co'ollaxa da qaica ca la'añaxac ye Judá, souaxat so Ajaz, som nta'a ye Judá, cha'aye somaye qaica ca l-loxoc co'ollaxa da ỹo'ot na qauempi ye Judá, nache ỹataqta sa ỹalaxaguet Ñim Nataxala'.
20Qaq nataqa'en so Tiglat Piléser, maye nta'a ye Asiria, nqo'ona co'ollaxa so Ajaz, qalaxaye saishet da itauan, nda'a't da coleesop da iloquiaxan. 21Qaq na'aictaxa co'ollaxa da so Ajaz, nqatec 'enauac som ỹataqta no'on nogoxoshetpi maye netaigui aso atamnaxaqui maye lalamaqte Ñim Nataxala', qataq so nma' lta'araic, qataq so huetaigui so lma'pi som nataxala'pi da yaqto' ỹanem so nta'a ye Asiria, qalaxaye ñaqaiyeta somaye saishet da itauan so Ajaz. 22Qaq na'aictaxa co'ollaxa de'era huaigui ncogaxanataguec so nta'a Ajaz, da nache queto'ot da sa ỹalaxaguet Ñim Nataxala'. 23Cha'aye ỹanot som lachetaqtaxanaxat som atamnaxala'pi maye naña ye Damasco, maye nacheso som que'emaxam somaye da noxonec. Cha'aye da lhuennataxa somaye 'eeta': «Nam atamnaxala'pi ye Siria, itauan nam nta'alpi yi'iye 'alhua, nache yo'oqta da nataqa'en aỹem itauan da sanot ca ỹachetaqtaxanaxat namayepi.» Qalaxaye somayepi nacheso som chegoqchigui da noxonec somaye qataq 'enauac na Israel le'ecpi. 24Qaq so Ajaz, nataqa'en laỹona't co'ollaxa so nogoxoshetpi maye huetaigui aso atamnaxaqui maye lalamaqte Ñim Lo'onatac 'Enauacna, nache ỹataqta ilaxachigui somayepi, qataq ỹapogui so lasom aso atamnaxaqui, nache damaxasoxoolec da qano'oxoosheguem aso nca'atoxonaxalatepi, nañalo naqa'en naua lamaqail ye Jerusalén. 25Qataq nauaxaỹaxaasheguem so qaỹoqotcheguemec atamnaqa'pi ỹanaña so huaqta'a't nỹecpi maye ỹotta'a't naua nañalo ye Judá, da yaqto' ỹavigaxat so lchenaxanaxat da ỹanot so ỹaqa'a atamnaxala'pi, qaq 'era dam ỹo'ot da lalemataic Ñim Nataxala' maye Natamnaxala' so hua'au lta'alpi.
26Qaq nam laỹepi na'aqtaguecpi qataq na ỹo'otpi somaye, chegoqchiguiña co'ollaq cheta'ague da do'onataxan qataq so pa'atec de'era lo'onataxanaxac, nache nanettalec aso nere maye huetalec da na'aqtaguec so nta'alpi ye Judá, qataq ye Israel. 27Qaq co'ollaq ileu so Ajaz, nache qailareñi huaqta'ai' qanqa'en so lta'alpi maye huaña ye huaqta'a't nỹecpi ye Jerusalén, qalaxaye saishet da qaỹalecnoigui so nta'alpi ye Israel. Qaq da lo'onataxanaxac da nta'a, nache talec so llalec Ezequías.
