Da lo'onataxanaxac so Ezequías
1Qaq so Ezequías mashe ivi' veinticinco vi'iye da nachaalataxac, co'ollaq ỹacoolec da lo'onataxanaxac da ilotague' ye Jerusalén, qaq ivi' soua veintinueve vi'iye da lo'onataxanaxac. Qaq aso late'e somaye le'enaxat Abías, asom llale so Zacarías. 2Qaq nam ỹo'otpi co'ollaxa so Ezequías ỹataqta ỹaỹamaxareeta Ñim Nataxala', cha'aye 'enauac nam ỹo'otpi, nache 'eeta'am nam ỹo'otpi co'ollaxa so lta'a David. 3Qaq so la'auaxanec vi'i de'era lo'onataxanaxac somaye, qataq huetoigui so la'auaxanec ca'agoxoic da ỹauatoigui so lasompi aso atamnaxaqui maye lalamaqte Ñim Nataxala', da yaqto' ỹaỹamaxaañi asomaye. 4Nache iỹaxaneuga so ntaxaỹaxanaxanecpi qataq so leviitapi, nache laỹonqa' naqa'en so nlagaqa' maye pa'aỹa'ague da nala' lliguisheguem, 5nache 'enapega somayepi, 'eeta': «¡Ñaq aỹem qana'axaỹañiỹa qami' leviitapi! Qanqui'itaxache nagui, qataq qauqui'itaxache qome añi atamnaxaqui maye lalamaqte Ñim Nataxala' maye Natamnaxala' so hua'au qarta'ailpi. Qataq qanqacheeuec qome 'enauac nam saishet da qui'itta maye huetaigui añi atamnaxaqui. 6Cha'aye so hua'au qarta'alpi ỹataqta sa ỹalaq co'ollaxa, nache ỹo'ot nam ỹataqta qauem ỹauaachigui naqa'en Ñim Nataxala' maye Qanatamnaxala', qataq ca'ai nache ỹo'otan yem lanataqa' Ñim Nataxala'. 7Qataq ỹapoguilo soua laso'omi maye taỹaua'alo so qasoxoc, qataq ỹalamat aso ncoỹaraxanaxaquipi, qataq ỹaxaañi da ỹavigaxat so lchenaxanaxat, qataq da ỹaneuo so lachetaqtaxanaxat qaỹavigaxatta da ỹaneua'a aso atamnaxaqui maye lalamaqte Ñim Natamnaxala' na Israel le'ecpi. 8Qaq ỹoqo'oye Ñim Nataxala', dalemataỹa so lma' ye Judá, qataq ye Jerusalén, nache talec naqa'en da lchec qataq da ñi'iỹaxa qataq da ne'enaguec, dam qauauañiichigui nagui. 9Qaq ỹoqo'oye so qarta'alpi qaỹalauat co'ollaxa huaigui so alaataxac, qataq so qoyalaqpi qataq aso qoyalepi, qataq aso qarhuapi noxonapi co'ollaxa nache qaỹauec. 10Qaq ỹoqo'oye nagui huo'o da iuennataxac da ñaỹamaxate' Ñim Nataxala', maye Natamnaxala' na Israel le'ecpi, yaqto' nqateeguesop da layeloxo da shenaqta. 11Qaq ỹoqo'oye qami' ỹalaqpi, saisheto' qome da qanasamiiñi, cha'aye Ñim Nataxala' qami' lca'agui'she da nache 'eetai' da qoviito'ot Ñimaye, qataq nache 'eetai' da qauo'onataxañiitacot, qataq qauavigaxacheetac na qarchenaxanaxache.»
12Qaq 'ena na le'enaxat som leviitapi maye sa naỹaloxon co'ollaxa da do'onataxan: Som chegoxogueta so Coat, Majat, som llalec so Amasay, qataq so Joel, som llalec so Azarías, qaq soua chegoxogueta so Merari, Cis, som llalec so Abdi, qataq so Azarías, som llalec so Yalelel, qaq soua chegoxogueta so Gersón, Yoaj, som llalec so Zima, qataq so Edén, som llalec so Yoaj, 13qaq soua chegoxogueta so Elisafán: Simerí, qataq so Yeguiel, qaq soua chegoxogueta so Asaf: Zacarías qataq so Matanías, 14qaq soua chegoxogueta so Hemán: Yejiel qataq so Simey, qaq soua chegoxogueta so Jedutún: Semaías qataq so Uziel. 15Qaq somayepi hua'auñi da laỹona't so lauo' le'ecpi, nache nqui'itaxat 'enauac somayepi, huaña nache taigui aso atamnaxaqui da yaqto' iqui'itaxat, nache ipacchigui da la'aqtac Ñim Nataxala' maye ỹamaxalec co'ollaxa so nta'a.
16Qaq co'ollaq ime nache so ntaxaỹaxanaxanecpi, taigui aso atamnaxaqui maye lalamaqte Ñim Nataxala' da yaqto' iqui'itaxat. Nache ipa'axanec 'enauac so nogoxoshetpi maye saishet da qui'itta, irouga so nqasoxoc aso atamnaxaqui, huaña nache so leviitapi irouga somayepi so la'auaxac le'enaxat Cedrón. 17Qaq huetoigui so la'auaxanec na'a'q so la'auaxanec ca'agoxoic, co'ollaq qaỹacoolec da qaiqui'itaxat somayepi, qaq co'ollaq ivita so na'a'q ocho se'eso la'auaxanec ca'agoxoic, nache somayepi ivita so lasom aso atamnaxaqui maye lalamaqte Ñim Nataxala', qaq nache imattrec soua lỹa't ocho na'axa'te se'eso ca'agoxoic da qaiqui'itaxattac asomaye, qaq co'ollaq ivi' soua dieciséis na'axa'te nache ime. 18Ime co'ollaxa nache somayepi taua'a so lma' lta'araic so nta'a Ezequías, nache 'enapega 'eeta': «Mashe qui'itta ñaqa'enaq 'enauac añi atamnaxaqui maye lalamaqte Ñim Nataxala', qataq añi nca'atoxonaxalate maye lmalate ana nachetaqtaxanaqte qaỹavigaxatta, qataq 'enauac na no'onataxanaxat maye lalamaxat añimaye, qataq ye lmala' anam nauole maye qoỹaneuo naxa, qataq 'enauac nam no'onataxanaxat maye lalamaxat. 19Qataq nataqa'en saỹamaxataxañi, qataq sequi'itaxataq 'enauac yem nogoxoshetpi maye so nta'a Ajaz, co'ollaq ñaq do'onataxaatac qaq souaxat da sa ỹalaq nache ỹalat, qaq nagui yemayepi mashe huetaña yem naña añi nca'atoxonaxalate maye lalamaqte Ñim Nataxala'.»
20Qaq so nta'a Ezequías ñesheguem so nte'etom, nache laỹona't so nataxala'pi so huaqta'a't nỹecpi, ime nache taỹa aso atamnaxaqui maye lalamaqte Ñim Nataxala'. 21Qataq ỹache so siete huaca llalaqpi, siete peenaqpi, siete qagueta llalaqpi, qataq siete quetaq llalaqpi, da lachetaqtaxanaxatpi da yaqto' qaỹapalaxat na lasouaxashetpi so llalaqpi so nta'alpi, atamnaxaqui, qataq na lasouaxashetpi so Judá le'ecpi. Ime, nache so nta'a ỹamaxalec so ntaxaỹaxanaxanecpi maye chegoxoguetpi so Aarón, da ỹaneuo aso nachetaqtaxanaqte da qaỹapalaxat na nasouaxashet, ỹachalec aso nca'atoxonaxalate maye lalamaqte Ñim Nataxala'. 22Huaña nache so ntaxaỹaxanaxanecpi ỹalauat so huaca llalaqpi, qaq so ltago'q somayepi nache ichegoxolec aso nca'atoxonaxalate, ime qaltaq nache 'eetec naqa'en so peenaqpi, qataq so qagueta llalaqpi.
23Ime nache so quetaq llalaqpi maye nachetaqtaxanaxat souaxat na nasouaxashetpi, qaỹauega som hueta'a so nta'a qataq so shiỹaxauapi maye lapoota'a't da yaqto' somayepi ỹashel-lec na lqaic se'eso shiguiỹacpi. 24Qaq co'ollaq ime, nache so ntaxaỹaxanaxanecpi ỹalauat se'eso shiguiỹacpi, qaq so ltago'q somayepi nache icorelec aso nca'atoxonaxalate da yaqto' nachetaqtaxanaxat da qaỹapalaxat 'enauac na lasouaxashetpi so Israel le'ecpi, cha'aye so nta'a damaxasoxoolec da qoỹaneuo aso nachetaqtaxanaqte qaỹavigaxatta, qataq aso nachetaqtaxanaqtepi da yaqto' qaỹapalaxat 'enauac na lasouaxashetpi so Israel le'ecpi.
25Qaq so Ezequías ỹauo'o nataqa'en so leviitapi da ỹanaña aso atamnaxaqui maye lalamaqte Ñim Nataxala', maye ỹauota'a so latoviaxanatacpi, qataq aso lasheerepi, qataq aso lvique arpapi, nache qaipacchigui da lamaxasoxonaxac so David, qataq so Gad, som huo'oi naua l-loxoco maye ltaua so nta'a, qataq so na'aqtaxanaxanec Natán. Cha'aye de'era qalapaxañi lataxac damaxasoxoolec co'ollaxa Ñim Nataxala', chegoqchigui naqa'en som la'aqtaxanaxanecpi.
26Nache so leviitapi nachattañi, nasoqta'a aso lviquepi maye lalamaqtepi so David, qaq so ntaxaỹaxanaxanecpi qalaq nasoqta'a aso lasheerepi. 27Huaña nache so Ezequías damaxasoxoolec da qoỹaneuo aso nachetaqtaxanaqtepi maye qaỹavigaxatta, qaỹachalec aso nca'atoxonaxalate. Qaq co'ollaq mashe qaỹacoolec da qoỹaneuo aso nachetaqtaxanaqte qaỹavigaxatta, nache qanayecot nataqa'en so no'onaxanaxac da qaỹo'oxoren Ñim Nataxala', qataq qaỹashiiyigui aso nasheerepi nache huaqta'aguet qanqa'en aso nviquepi maye lalamaqtepi so David, maye nta'a co'ollaxa ye Israel. 28Qaq nache 'enauac se'eso lapoota'a't shiỹaxauapi da ỹa'attrañi naua l-llecte, da ỹo'ot da llo'oxonnataxanaxac, qaq so 'onaxanaxaicpi nache queto'ot da do'onaxaatac, qataq so ntaxaỹaxanaxanecpi ỹashettapigui aso lasheerepi, nache choche ivitta'a da ime da qoỹaategueuo aso nachetaqtaxanaqte maye qaỹavigaxatta. 29Qaq co'ollaq ime de'era, nache so nta'a qataq 'enauac so nnaictague'pi ỹa'alyiñi naua l-llectel, da ỹo'ot so llo'oxonnataxanaxac. 30Ime nache so nta'a Ezequías, qataq so nataxala'pi, ỹamaxalec so leviitapi da ỹo'oxoren Ñim Nataxala', ỹo'on so no'onecpi maye lo'onecpi so David, qataq so na'aqtaxanaxanec Asaf. Nache som leviitapi ỹataqta machiguiñi da do'onaxan, nache nataqa'en ỹa'alyiñi naua l-llectel da ỹo'ot da llo'oxonnataxanaxac.
31Qaq co'ollaq ime nache so Ezequías 'enapega so shiỹaxauapi, 'eeta': «Qaq cha'aye nagui mashe qanañañiỹot Ñim Nataxala', nache qauanaiua'a ana atamnaxaqui da qaỹa'añiiuo aca qarachetaqtaxanaqche da qauo'oche da qayo'oxonnataxanaxaqui.» Huaña nache so lapoota'a't shiỹaxauapi irouo aso lachetaqtaxanaqtepi, qataq ỹo'ot so llo'oxonnataxanaxac, qataq so maiche chegoqchigui da lquiyaqteỹaxac da ỹaneuo aso lachetaqtaxanaqte qaỹavigaxatta. 32Qaq ye lcata som ỹaneuo se'eso lapoota'a't shiỹaxauapi, ivi' setenta som nauegaxanaxala' huacapi, cien peenaqpi, qataq doscientos so qagueta llalaqpi. Qaq 'enauac somaye da nachetaqtaxanaxat qaỹavigaxatta da qoỹanot Ñim Nataxala'. 33Qaq da ima'a't ye lcata se'eso nachetaqtaxanaxatpi, nache ivi' seiscientos so nauegaxanaxala' huacapi, qataq tres mil aso qaguetapi.
34Qaq souaxat da sa lamai' so ntaxaỹaxanaxanecpi da nqat na lo'oc se'eso shiguiỹacpi maye nachetaqtaxanaxat qaỹavigaxatta, nache so leviitapi maye lqaỹañecpi somayepi, itauan da yaqto' ishet da imatta da ỹo'ot somaye, qaq nache ivitta'a da ime da nqui'itaxattac so ntaxaỹaxanaxanecpi, cha'aye so leviitapi lhuotta co'ollaxa da nqui'itaxat, qaq saq 'ena'am so ntaxaỹaxanaxanecpi. 35Qaq 'era da 'eetec da ỹataqta qalota aso nachetaqtaxanaqtepi qaỹavigaxatta, qataq so lcheta aso nachetaqtaxanaqte qanhuaachigui, qataq so lataxa maye lỹateuo naxa aso nachetaqtaxanaqte qaỹavigaxatta.
Qaq 'era da 'eetec da qaltaq qaỹe'eguelaxa da qaỹo'ot da ño'oxonnataxanaxac huaña aso atamnaxaqui maye lalamaqte Ñim Nataxala'. 36Qaq so Ezequías, qataq 'enauac so nhuo' le'ecpi ỹataqta machiguiñi, cha'aye Ñim Lo'onatac 'Enauacna, itaunec somayepi da ỹataqta saqaỹaloq da ime se'eso ỹo'ot.
