2 Crónicas 34

₁Qaq so Josías, mashe ivi' soua ocho vi'iye da nachaalataxac co'ollaq ỹacoolec da lo'onataxanaxac, nache ivi' treinta y un vi'iye da lo'onataxanaxac da nta'a, da ilotague' ye Jerusalén. ₂Qaq so Josías, ỹo'ot co'ollaxa nam ỹataqta ỹaỹamaxareeta Ñim Nataxala', cha'aye icaachigui da no'on lataxac som chegoxoguet David, da ỹataqta saishet da dasheuec.

₃Qaq co'ollaq ivi' soua ocho vi'iye da lo'onataxanaxac, co'ollaq ñaq nsoqolec so Josías, nache somaye nmitaique Ñim Natamnaxala' som chegoxoguet David. Qaq so vi'i doce da lo'onataxanaxac, nache ỹacoolec da iqui'itaxat ye Judá qataq ye Jerusalén nqateua'a so atamnaqa'pi maye huaña so qaỹoqotcheguemec, qataq so lqui'ipi aso Asera qataq so nqolacpi, qataq so ne'enaqtacpi maye chegaqaigui so nqatelliguishec lcat, ₄qataq ỹauaachigui qanqa'en somaye, co'ollaq qailaxachigui aso nca'atoxonaxalatepi, qataq som ỹotta'a't lqui'ipi so Baal. Qaq so Josías nataqa'en damaxasoxoolec co'ollaxa da qailaxachigui aso nca'atoxonaxalatepi maye qaỹachalec naxa da qaỹavigaxat so nchenaxanaxat. Qataq nataqa'en damaxasoxoolec da qailaxachigui so ne'enaqtacpi maye lqui'ipi aso Asera, qataq so nqolacpi, qataq so ne'enaqtacpi maye chegaqaigui so nqatelliguishec lcat, nache ỹataqta dolachigui qanqa'en, ime nache qaỹasaxalec aso nhuachiquipi som ỹaatacot co'ollaxa aso lachetaqtaxanaqtepi somayepi. ₅Qataq nataqa'en ỹachalec aso nca'atoxonaxalatepi so lpi'inecpi so na'aqtaxanaxanecpi da ỹavigaxat, qaq 'era da 'eetec da iqui'itaxat ye Judá qataq ye Jerusalén. ₆Qaq nataqa'en ỹo'otec de'era so huaqta'a't nỹecpi maye ỹotta'a't naua nañalo ye Manasés, Efraín qataq Simeón nache ivitta'a ye Neftalí, qataq so nma'pi maye lauoreuapi. ₇Qataq ỹamaxañi aso nca'atoxonaxalatepi, qataq so lqui'ipi aso Asera, qataq so nqolacpi nache ỹataqta nda'a't lsoche naqa'en, qataq nlaxaañi 'enauac aso nca'atoxonaxalatepi maye qaỹachalec naxa so nchenaxanaxat maye ama na laita, maye hueta'a 'enauac nam 'alhuapi ye Israel. Qaq ime co'ollaxa nache ỹe'eguelaxa ye Jerusalén.

₈Qaq co'ollaq ivi' soua dieciocho vi'iye da lo'onataxanaxac so Josías, co'ollaq ime da iqui'itaxat yi'iye 'alhua qataq aso atamnaxaqui, nache ỹamaq so Safán, som llalec so Azalía, ỹamaxa so nta'a Maseías maye ilotague' som huaqta'a't nỹecpi, qataq so leraxanaxanec Yoaj, som llalec so Joacaz, da yaqto' ỹaỹamaxaañi aso atamnaxaqui maye lalamaqte Ñim Nataxala' maye Natamnaxala'. ₉Qaq huaña nache soomaye je'c da nqo'ooreua'a so ntaxaỹaxanaxanec Hilcías, nache ỹanema somaye aso anom maye qoỹaneua'a co'ollaxa aso atamnaxaqui maye lalamaqte Ñim Lo'onatac 'Enauacna, asom lapoñiguishe som leviitapi maye nauaatalec so lasom, ỹachegoxotaigui som netaña ye Manasés, qataq ye Efraín, qataq som shiỹaxauapi maye no'onaña co'ollaxa ye Israel, qataq 'enauac som netaña ye Judá qataq ye Benjamín, qataq 'enauac som netaña ye Jerusalén. ₁₀Ime, nache ỹanem so ilotague'pi da no'onataxanaxac, som ỹo'ottac aso atamnaxaqui maye lalamaqte Ñim Nataxala', da yaqto' somayepi isheeten som do'onataxaatacpi, maye napareetac na lpoxoỹaxapi aso atamnaxaqui. ₁₁Qaq nataqa'en ỹanem aso anom som ỹo'ottacpi so qo'oipaqpi, qataq so ỹapaxagueetaua'a som 'onataxanaxaicpi, da yaqto' desheenaxana so ncheguec coma', qataq so qo'oipaqpi da yaqto' llecnaxanaxatpi so nỹecpi maye ilaxachigui co'ollaxa so nta'alpi ye Judá. ₁₂Qaq se'eso shiỹaxauapi ỹataqta ipacchigui da lataxac da lo'onataxanaxac, qaq soua lataxala'ate somayepi nachesoua soua leviita, Yajat qataq so Abdías, som chegoxogueta so Merari, qataq so Zacarías qataq so Mesulán, som chegoxogueta so Coat maye nataxala'ate. ₁₃Soomaye nataqa'en lataxala'ate so nỹoxosoxonaqpi, qataq ilotague' 'enauac so 'onataxanaxaicpi. Qaq 'enauac so leviitapi da nvicnaxanaqpi, qataq huo'o so neraxanaqpi, nmeenaxanaxanecpi, qataq so ilotague' so lasompi. ₁₄Qaq co'ollaq qanqatec aso anom maye qairoua'a co'ollaxa aso atamnaxaqui maye lalamaqte Ñim Nataxala', nache so ntaxaỹaxanaxanec Hilcías, ilalec aso nere maye huetalec na lqataxacpi Ñim Nataxala', maye ỹan co'ollaxa Ñimaye chegoqchigui naqa'en so Moisés. ₁₅Qaq nache saỹaỹaloxon da da'aqtaxanem so Safán, da somaye ilalec aso nere maye huetalec da nqataxac, huaigui aso atamnaxaqui maye lalamaqte Ñim Nataxala', nache ỹanem asa'aso nere so Safán, ₁₆qaq so Safán nache iroua'a so nta'a aso nere, qaq co'ollaq ñaq ỹa'axattac dam 'eetec co'ollaq ilalec asomaye, nache nataqa'en 'eeta': «'Am nta'a, nam 'aramaxashecpi ỹo'ottac 'enauac nam 'auamaxalecpi co'ollaxa. ₁₇Namayepi laỹona't aso anom maye huetaigui añi atamnaxaqui, nache ỹanem na ilotague' da no'onataxanaxac qataq nam ỹo'ottac na no'onatacpi. ₁₈Qaq so Safán nataqa'en da'aqtaxanem co'ollaxa so nta'a da so ntaxaỹaxanaxanec Hilcías, ỹanem co'ollaxa asa'aso nere.» Qaq co'ollaq 'enapec de'era nache so Safán itaxaỹaxan asomaye, hua'aqchigui naqa'en so nta'a. ₁₉Qaq so nta'a co'ollaq hua'axaỹa so nanettalec aso nere maye huetalec na nqataxacpi, nache ncolaxata'aisalo soua alogo, ₂₀nache sanaỹaloxon da 'enapega so Hilcías, qataq so Ajicán, som llalec so Safán, qataq so Abdón, som llalec so Micaías, qataq so Safán maye neraxanaxanec, qataq so lamaxashec Asaías, 'eeta': ₂₁«Qauesomiỹa qaunache Ñim Nataxala', qaunataxañiilec aỹem qataq na shiỹaxauapi maye no'onaña na Israel, qataq ye Judá, qataq nam nanettalec ana nere maye qailalec, cha'aye Ñim Nataxala' yo'oqta da ỹataqta dalemataỹalo qomi', souaxat da som sachegoxosoxoguetpi sa na'axaỹaxana co'ollaxa dam 'enapec Ñim Nataxala', qataq saishet da napaxaguena da ỹo'ot 'enauac nam nanettalec ana'ana nere.» ₂₂Qaq so Hilcías, qataq soua ỹama'q so nta'a, je'c da nqo'oora aso na'aqtaxanaxana Julda, asom lhua so Salún, som llalec so Ticva, qataq laual so Jarjás, som ilotague' so laỹe' so nogoxotpi aso atamnaxaqui. Qaq aso Julda, netaña co'ollaxa so dalaxaic nỹecpi ye Jerusalén, qaq co'ollaq qaỹa'aqtaxanem, ₂₃nache asomaye 'enapeco':

«Da la'aqtac Ñim Nataxala', maye Natamnaxala' na Israel le'ecpi, 'eeta': ‹Qaua'aqtaxañim qome que'eca shiỹaxaua, maye qami' nama'q da aỹem qaunache, ₂₄da Aỹem Nataxala', shenapec: Aỹem ñamaq qome ca qauem, da talec ñaqa'en ne'ena nma', qataq nam shiỹaxauapi maye hueta'a namaye, ipacchigui qome 'enauac nam qauem maye nanettalec aso nere, maye hua'aqchigui qanqa'en ñi nta'a ye Judá co'ollaq qaitaxaỹaxan. ₂₅Cha'aye aỹem ca'ai namayepi, qataq ỹavigaxat so lchenaxanaxat da ỹaatacot so ỹaqa'a atamnaxala'pi, nache ỹo'ot da ỹataqta salemata, souaxat 'enauac nam ỹo'otpi, qaq ỹoqo'oye ỹataqta 'eroigui da ỹayeloxo, maye talec qome ne'ena 'alhua, nache saishet qome da 'om. ₂₆Qaq qoñiỹapega qome cam nta'a ye Judá, maye qami' nama'q da qaunache Ñim Nataxala' maye Natamnaxala' na Israel le'ecpi, da Ñimaye 'eeta': Qaq souaxat da 'aualaxaguet nam 'ana'axaỹaxaategapi maye huetalec aso nere, ₂₇qataq souaxat da huo'o da 'arhuogoxo, qataq Aỹem 'anañanot co'ollaq 'aua'axaỹa dam sa'axattac maye talec qome ne'ena nma', qataq nam shiỹaxauapi maye hueta'a namaye, qataq souaxat da Aỹem 'anmanot co'ollaq 'ancolaxata'aisalo soua 'ogo, qataq Aỹem 'anỹeeto'ot, qaq Aỹem nataqa'en 'am sa'axaỹa co'ollaxa. Qaq Aỹem Nataxala' 'era da ỹa'aqtac. ₂₈Aỹem 'am sanem qome da 'aulactapiguiñi qom 'aleu, qataq 'aualegoigui ñaqa'en som hua'au 'arta'alpi, yaqto' saishet da 'auauangui qome 'enauac ne'ena lta'araic lchecpi, maye sa'axatta'a da talec ñaqa'en qome ne'ena 'alhua, qataq nam shiỹaxauapi maye netalec namaye.›»

Nache so lamaxashecpi so nta'a, ỹe'eguelaq da iroi' de'era la'axaỹaxac so nta'a. ₂₉Qaq huaña nache so nta'a damaxasoxoneuga da qanauegueuo so nqueroxonecpi ye Judá, qataq ye Jerusalén, da yaqto' dataiguet. ₃₀Qaq ime, nache so nta'a, qataq 'enauac so shiỹaxauapi maye lma' ye Judá, Jerusalén, ntaxaỹaxanaxanecpi, na'aqtaxanaxanecpi, qataq 'enauac se'eso shiỹaxauapi yi'iye 'alhua, ivira'a so ñaqpiolec qataq som ỹepi, da taua'a aso atamnaxaqui maye lalamaqte Ñim Nataxala'. Qaq nache huaña yemaye da so nta'a, nlamaxaren da itaxaỹaxan 'enauac so nanettalec aso nere maye huetalec so aỹamaxataxac, maye qailalec co'ollaxa huetaigui aso atamnaxaqui maye lalamaqte Ñim Nataxala'. ₃₁Qaq co'ollaq ime de'era, nache so nta'a nachaañi, hua'a so saqaỹapeque aso nhuoqte, nache ỹanot da la'aqtac Ñim Nataxala' da ỹalaxaguet, qataq ipacchigui da ỹo'ot na lamaxasoxonaxacpi, qataq nam lapaxañi lataxacpi, qataq na lqataxacpi Ñimaye, qataq ipacchigui da ỹo'ot da lataxac de'era aỹamaxataxac maye nanettalec asa'aso nere. ₃₂Qaq ime nache nataqa'en 'enapega so shiỹaxauapi ye Jerusalén, qataq ye Benjamín, maye hueta'a yemaye, da ipacchigui cam ỹan la'aqtac. Qaq som hueta'a ye Jerusalén, ipacchigui da ỹo'ot da naỹamaxataxac Ñim Lo'onatac 'Enauacna, Ñim Natamnaxala' som hua'au lta'alpi. ₃₃Qaq ime, nache so Josías nlaxaañi 'enauac so ne'enaqtacpi maye nqaigaxat maye hueta'a 'enauac ye na'alhua so Israel le'ecpi, nache 'enapega 'enauac som netalec ye 'alhua Israel, da ỹo'oxoren Ñim Nataxala' maye Natamnaxala'. Qaq co'ollaq ña nca'altauec so Josías, nache somayepi saishet da ca'ai Ñim Nataxala', Ñim Natamnaxala' som hua'au lta'alpi.