2 Corintios 5

₁Qaq ỹoqo'oye qomi' saỹaanaq da huo'otaq nlaguiñi de'era qaro'ocỹaxac, maye 'eeta'am ca nỹec maye saq 'eetai', qalaxaye Ñim Lo'onatac 'Enauacna sogote da iqataxaatai' ca qarma' da piguem maye qaica ca loga't. Camaye saishet da choche shiỹaxaua ca lo'onatac. ₂Qaq 'eesa da huo'otaq ña ñeca'alaqtauec nagui da ña ñachaataqtaigui de'era qaro'ocỹaxac, qalaq ỹataqta huo'o da qarachetataic, qataq huo'o da qaryaxa da ñeqochenaxa ca qarma' maye qaica ca loga't. ₃Qaq qomi' saỹaanaqta da qom souaqta'a yemaye, nache ỹataqta qomi' qanpaxattaleguete. ₄Qaq ỹoqo'oye nagui da ñaq sonaqtaigui ne'ena qarma' maye nachera da qaro'ocỹaxac, qalaq ỹataqta huo'o da qaraquicoxo qataq qarasamaxa. Qaq saishet da huo'otaq sauoqtaique da seleuaq. Nachaqrata da sauoqtaique da de'era qaro'ocỹaxac qanaralaxat, yaqto' dam taỹa'a da imeuo, damaye nmeneguet da achaalataxac maye chochaq tatec. ₅Ñim Lo'onatac 'Enauacna nacheñi Ñim ỹo'ot de'era dalaxaic qanaralaxataxac, qaq dam la'anaxat de'era qomi' ỹo'oteque, damaye chegoqchigui So Saqcha'a Na'añaxac Qui'itta maye qomi' ỹanema Ñimaye.

₆Qaq ỹoqo'oye, iuen da nache 'eetai' qome da samaqchiguiñi. Cha'aye saỹatenaq da ñaq souaqtaigui de'era qaro'ocỹaxac, nache shenaqta'am ca qaỹoqta ca neta'ague, qomi' qaỹoqtalo So Qarataxala'. ₇Qalaxaye, na'aictaxa da saishet da selaqa'a, qalaxaye huo'o da qanaquitaxac Somaye. ₈Qataq saishet da saquicoqtac, na'aictaxa da huo'o da qaryaxa da qolaqa'ai de'era qaro'ocỹaxac da qolaq da souaqta'aguet So Qarataxala'. ₉Qaq ỹoqo'oye, ñepogoxoinaqtapegue' da qomi' salaxasoxoguet So Qarataxala' nagui da ña ñachaataqtaigui da qaro'ocỹaxac, huo'otaq da mashe saishet da ñachaataqtaigui. ₁₀Cha'aye 'enauac qome qomi' ñachaataxaua'a So Cristo, cha'aye nacheso so nmit cam qaro'onataxanaxac co'ollaxa da ña ñachaataqtaigui da qaro'ocỹaxac, qataq nacheso som chegoqtot ca la'aqtac da qomi' qoỹanema ca no'on qaraueguec, huo'otaq ca qanhuaxanaguec.

₁₁Qomi' saỹatenaq da iuen da qaỹalaxaguet qataq qaỹo'oxoren Ñim Lo'onatac 'Enauacna. Qaq ỹoqo'oye ñepogoxouenaqtapegue' da sa'aqtaxanaqteguem na laỹepi shiỹaxauapi da yaqto' ỹa'amaqten Ñimaye. Ñim Lo'onatac 'Enauacna qomi' ỹauattoote', qaq ỹoqo'oye aỹem huo'o da iyaxa nataqa'en da qomi' qauauattoñiite'. ₁₂Qaq saishet da sauoqtaique da qomi' qavio'oxoyiñi'. Nachaqrata da sauoqtaique da qami' sanaxama ca ỹoqta lataxac yaqto' qomi' qana'amaqchiñiitaleguete. Huaña, nache qauaỹaañi ca qarasataxaqui da qauataiỹa'aguet nam 'eetega no'on shiỹaxauapi, qalaxaye saishet da 'eesa da no'on da lataxac. ₁₃Da huo'o ca 'eetega da huo'o da qoroic, qaq nache 'eetec souaxat da so'onataxanaqtacot Ñim Lo'onatac 'Enauacna. Qaq da huo'otaq saỹamaxasoqta, qaq damaye maiche qaraỹamaqai. ₁₄Da lsoxoyec So Cristo nachera da qomi' ỹauecta'agueta, cha'aye qomi' saỹaanaqta da 'oonolec so ileualec 'enauac na shiỹaxauapi, qaq ỹoqo'oye 'enauac na shiỹaxauapi 'eeta'am nataqa'en da ileu. ₁₅So Cristo qomi' ileualeguete, ỹoqo'oye nagui saishet da maiche qaralamaxat da qanachaalataxac. Nachaqrata da lalamaxat Somaye, maye ileu co'ollaxa qataq nca'aleeguesop da nleuaxa da yaqto' qomi' ỹanema da nca'alaxa. ₁₆Qaq ỹoqo'oye qomi' nagui saishet da choche seloqtapigui da lataxac ca shiỹaxaua da shenaqta'am nam huetalec ana 'alhua. Qaq na'aictaxa da sogote co'ollaxa da seloqtapigui da lataxac So Cristo da shenaqta'am nam huetalecna, qalaxaye nagui saishet da nache 'eetec da qarhuennataxac. _17-19Qaq nagui da ña'araqtaua'a So Cristo, nache dalaxaic da qarataxac. Qaq Ñim Lo'onatac 'Enauacna mashe saishet da tatapigui ye lauel so togoshec qarataxac, nachaqrata da naralaxat da qarataxac. Qaq 'enauac de'era maiche chegoqo'ot Ñimaye. Qomi' co'ollaxa ỹataqta ñepa'aguenaqtague' Ñim Lo'onatac 'Enauacna, qalaxaye nagui chegoqchigui So Cristo da qanauochaxaua Ñimaye qataq qomi' ipataxaleguete da sa'aqtaxanaxam 'enauac na shiỹaxauapi da no'on na'axaỹaxac. Qataq chegoqchigui So Cristo da Ñim Lo'onatac 'Enauacna ỹapalaxat na qarasouaxashetpi qataq ỹo'ot da lactapegue' 'enauac na shiỹaxauapi. ₂₀Qaq ỹoqo'oye nache qomi' la'aqtaxanaxanaqa So Cristo, qaq chegoqchiguilo naqa'en qomi' Ñim Lo'onatac 'Enauacna da 'eeta'am da qami' ñachoxorenaqtoiguilo. Qaq chegoqchigui So Cristo da qami' ñachoxorenaqtoiguilo, shenaqta': qanmañi' qome Ñim Lo'onatac 'Enauacna. ₂₁So Cristo ỹataqta qaica ca lasouaxashet. Qalaxaye souaxat qomi', nache Ñim Lo'onatac 'Enauacna, 'eeta'am naqa'en ca 'etaxaloxoic, da yaqto' chegoqchigui Somaye da qomi' ỹaỹamaxareete' Ñimaye.