2 Corintios 8

₁Qaq nagui qami' qarqaỹa't, sauoqtaique da qami' sa'aqtaxanaxama da 'eetec da lqouagaxanaqtaic Ñim Lo'onatac 'Enauacna maye ỹanem nam 'amqaanataxanaxaicpi maye netalec ye 'alhua Macedonia. ₂Cha'aye na'aictaxa da lqalaic yemayepi souaxat da ñe'eguenataguec, qalaq nache 'ena'am ỹataqta machiguiñi. Qataq na'aictaxa yemayepi da ỹataqta choxoraq, qalaxaye ỹataqta chetaqtaxanaxaicpi, 'eeta'am da sallaxanecpi. ₃Qaq ỹataqta 'eesa da yemayepi ỹan 'enauac cam nalotaua'a. Ivira'a da ỹataqta ỹapacauec naqa'en da lachetaqtaxanaxac. Qataq saishet da choche qaỹamaqtalec, nachaqrata da ỹo'ot cha'aye maiche lhuennataxac, ₄ivira'a da qomi' nachoxoreetacoto da sa'axasoqta'a, da nache queto'ot da itauaatac nam lalamaxatpi Ñim Lo'onatac 'Enauacna. ₅Yemayepi de'era ỹo'ot, ỹataqta napacalec yem sepetaqtega da tachiguiña cam ishet. Hua'auñi da nañanot Som Qarataxala', ime, nache nataqa'en qomi'. Qaq damaye chegoqchigui Ñim Lo'onatac 'Enauacna. ₆So Tito nacheso so hua'auchiguiñi co'ollaxa da laỹootega't ana qarachetaqtaxanaqche maye qartaunaxanaqchi chegoqchigui da qarauotaxanaqtaiqui. Qaq ỹoqo'oye qomi' ñachoxorenaqtacot so Tito da yaqto' nache 'eetai' da queto'ot da ỹo'ottac de'era. ₇Cha'aye mashe 'enauac da qaỹaỹaten da qoñiita da qami' soxoraiqa: qataq da qanaquitaxaqui hueto'ot qanqa'eñi Ñim Lo'onatac 'Enauacna, cha'aye qaica ca qanqalanaxaqui da qautaqaitac. Ỹataqta huo'o na qauaỹachiñi qataq huo'o da qarasapachaqai da qoviitague' na laỹepi shiỹaxauapi qataq da lta'araic qarauotaxanaqtaiqui da shenaqta. Nagui qami' taleguete da qami' qaỹaỹamaxareete', cha'aye qauachegoxochiichigui da lta'araic qarauotaxanaqtaiqui da qoquiito'ot da qalapoñiitega't ana qartaunaxanaqchi.

₈Qaq de'era saishet da ỹamaxasoxonaxac. Nachaqrata da ñeshetaique da qami' qauaỹaañi da 'eetec da lachetaqtaxanaxac na laỹepi 'amqaanataxanaxaicpi, da yaqto' qami' ishet nataqa'en da qauachaxañi dam huesota qarsoxoyiqui. ₉Cha'aye qami' qauaỹachiñi da So Qarataxala' Jesucristo ỹataqta sallaxanec, qalaxaye ye ỹataqta ỹaguec da qami' ỹauoteque, nache naỹa ana 'alhua, nache ỹacona da choxoraq yaqto' ỹachegoxotchigui da lachoxoyec da qami' qaviyiỹa'a da qami' sallaxanaqa.

₁₀Qaq de'era maiche qaraỹamaqai da huo'omshe qami' sanema de'era iqataxac. Se'eso lỹa vi'i qami' maye qaua'aviichiguiñi da huo'o na qaỹa'añi, qataq nataqa'en ỹataqta qanasapacheetelec da qauo'ocheetac damaye. ₁₁Qaq ỹoqo'oye nagui no'on da qoquiito'ot da qauo'oche damaye, ivitta'a da qaumache. Ỹataqta qaue'enaxachiichigui da qarasapachaqai co'ollaq cheta'ague da qauachetaqtaxañi da qaỹa'añi acam qanaloitaua'a. ₁₂Cha'aye ca shiỹaxaua da ỹoqta 'eesa da lhuennataxa da huo'o ca ỹan, qalaq Ñim Lo'onatac 'Enauacna ỹataqta ỹaỹamaxareeta cam nalotaua'a da ỹan camaye. Cha'aye Ñimaye saishet da iỹaxanaique cam saishet da qanaloua'a.

₁₃Qaq damaye saishet da sauoqtaique da qautaunaxañi, ime nache qami' qaupa'aỹeeguet da qauenaxañiitapigui'. Dam shenaqtapeguec, sauoqtaique da nache qoñiita'a't da qaica ca deuenaxaatapigui'. ₁₄Nagui qami' qaica ca qaviñiitaique, ỹoqo'oye iuen da qautauañi na huo'o da lhuenaxanaxa. Cha'aye saiuena'a da namayepi da huo'o ca na'a'q da ivita da qaica ca iueetaique, nache ỹoltaq qami' itaua'n. Huaña, nache qaica ca deuenaxaatapigui'. ₁₅Cha'aye nache 'ena'ape naua nanettaleguete ana nere maye huetalec na la'aqtacpi Ñim Lo'onatac 'Enauacna maye 'eeta': «Cam qalota na lapoñiguishec, qalaq qaica ca lli'iỹoxot; qaq cam saq 'amaqtaq ca lapoñiguishec, qalaq qaica cam iueetaique.»

₁₆Qaq sanot da ña'achecỹaxac Ñim Lo'onatac 'Enauacna, cha'aye Ñimaye ỹachanguit añi lquiyaqte so Tito da 'eeta'am naqa'en aỹem da huo'o da lyaxa da qami' itaua'n. ₁₇Cha'aye somaye ỹalaxaguet dam ỹa'aqtac maye sami', qataq somaye ye nache 'eetai' da huo'o da lyaxa da qoñiita, qaq nagui maiche chegoqchigui da lquiyaqteỹaxac da qami' nqo'onalo.

₁₈Qaq saishet da nachaqsota so Tito. Nataqa'en huo'o so lỹa samaxasoq qarqaỹa som ỹataqta no'on da na'aqtaguec da na'aqtaxaatapigui 'enauac nam ỹa'amaqten So Jesús ne'ena souaqta'a, souaxat da ỹa'axattac da na'aqtac maye chegaqaigui da nca'alaxa. ₁₉Qaq saqrata de'era, cha'aye 'enauac nam 'amqaanataxanaxaicpi qalca'ateua'a se'eso qarqaỹa, da yaqto' ñenaigaqtague', qataq da yaqto' qomi' itaua'n de'era souaqtague' nachetaqtaxanaxac maye so'otaqtac, cha'aye sauoqtaique da ỹo'oxoraq Ñim Qarataxala' qataq sachaxanaq da qaryaxayec da qami' setauana'q. ₂₀Qaq shenaqtec de'era, cha'aye huo'o da qarvitaxa da huo'otaq qomi' qanayectapegueleguete souaxat ana nachetaqtaxanaqte maye llaỹonaqtac. ₂₁Qaq qomi' ñepogoxoinaqtapegue' da so'otaq ca ỹaỹamaqchiguiñi. Qaq saishet da sauoqtaique da nachaqñita Ñim Lo'onatac 'Enauacna da qomi' ỹauaachiguilo, maye nataqa'en na shiỹaxauapi.

₂₂Qaq soomaye saishet da nachaqsouate'. Nataqa'en samaxasoq so lỹa qarqaỹa maye nataqa'en qomi' saỹaanaqta da 'eetec da ltaunaxanaxac. Qaq nquictec nagui da ltaunaxanaxac souaxat da naquitaxac da qoñiita. ₂₃Qaq da huo'otaq huo'o ca denataxanec so Tito, qaq qaua'aqtaxañim camaye da so Tito maiche itaua, aỹem itauaatac da qami' souaqtegueto. Qaq da huo'otaq qainataxanec soua lỹa't qarqaỹa't, qalaq qaua'axache' da soomaye maiche lamaxa'she nam ỹa'amaqten So Jesús maye hueta'a ne'ena soota'a, qataq soomaye ỹo'oxoreetrac So Cristo. ₂₄Qaq ỹoqo'oye qami' no'on da ỹataqta qauachaxañiỹalo soomaye da qarsoxoyiqui, yaqto' na 'amqaanataxanaxaicpi maye ỹama'q soomaye ỹaỹateeta da ỹoqta qomi' 'eesora naxa da qami' sho'oxorenaqta'ape.