1Qaq de'era lataxac da qaỹo'ot aca ntaunaxanaqte da yaqto' qaitauan ca qara'amqaanataxanaxauapi maye hueta'a ye 'alhua Judea, qalaq damaye saishet da iuen da shiyiñi. 2Cha'aye aỹem mashe ime da saỹateeta da qami' saishet da huo'o ca qaupaquiitaique da qautaunaxañi. Qaq ỹoqo'oye aỹem ỹataqta huo'o da ña'amqaanaxac da sa'aqtaxaateguem nam hueta'a na 'alhua Macedonia da qami' maye qoviita'a na 'alhua Acaya, da ỹataqta qami' lhuotte' da qautaunaxañi so lỹa vi'i. Qaq na lma' na 'alhua Macedonia co'ollaq ỹaỹaten de'era, nache qalota namayepi na huo'o da lhuennataxac da nataqa'en detaunaxan. 3Qalaxaye nache 'ena'am aỹem ishet da qami' samaxalo so Tito qataq soua dos qarqaỹa't, yaqto' qami' ỹa'añaqche't da yaqto' qauqataxañiỹai' aca qartaunaxanaqchi; yaqto' ishet da qaỹaỹaten da qomi' 'eesora naxa da qami' ña'amaqtenaqtaleguete. 4Mashe qauaỹachiñiita'a mque' da qara'aloxo maye ishet da seviraxaguet, qaq saishet da sa'axataq dam qaviyeeguet qami' da huo'otaq huo'o ca qarqaỹa da chegaqaña na 'alhua Macedonia da ñenaicapegue' da qami' ilaleguete da saishet da qauqataxañiitai' aca qarachetaqtaxanaqche. Qaq ¡ca hueta'ague cam qanaquitaxac maye sa'axataqtac naxa da qoñiita! 5Qaq ỹoqo'oye ỹaỹamaqchiguiñi ñaqa'en da sama'q soua qarqaỹa't da hua'auyiñi da qami' nqo'onalo da yaqto' soomaye ishet da qami' itaua'n da qalapoñiỹa't aca qarachetaqtaxanaqche maye maiche qauachaxañiỹapec co'ollaxa. Huaña, nache qami' qauachaxañi da ỹataqta qanasapacheetelec da qauo'ocheetac damaye, qataq huetaigui da qarsoxoyiqui qataq saishet da choche qami' qaỹamaqtaleguete.
6Qaq qantooñita'ac de'era na'aqtac, 'eeta': Ca saq 'amaqtaq ca ỹan, qaq nataqa'en saq 'amaqtaq ca ỹaconeguet; qaq ca lta'araic ca ỹan, qaq nataqa'en lta'araic ca ỹaconeguet. 7Qaq ỹoqo'oye ñi 'oonolec ishet da ỹan cam lcata cam tachigui da lquiyaqteỹaxac da ỹan, qaq saishet da choche nacheta'a, huo'otaq da choche qaỹamaqtalec. Cha'aye Ñim Lo'onatac 'Enauacna ỹataqta ỹaỹamaxareeta cam ỹataqta machiguiñi da dachetaqtaxan. 8Ñim Lo'onatac 'Enauacna ishet da chochaq huañi naqa'en da qami' ỹanema na ỹotta'a't yo'oqchigui qana'achecỹaxaqui, yaqto' qami' ishet da huo'o 'enauac na maiche qarviñiqui. Huaña, nache ishet da qautauañi ca qarỹai. 9Cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna ỹa'axa't ca chetaqtaxanaxaic shiỹaxaua, 'eeta':
«Nache 'eetai' da itauaatac na choxoraqpi,
nache ỹo'ot na lachetaqtaxanaxat ỹataqta sa naloqnañi;
10Ñim Lo'onatac 'Enauacna, nacheñi ñi ỹan acam nañiguishe ala, yaqto' qoỹanoigui na 'alhua, qataq ca qanallec da yaqto' ỹa'añaqchet ca shiỹaxaua. Nataqa'en Ñimaye qami' ỹanema qome 'enauac ca qaviñiitaique, yaqto' ishet da qautauañi ca qarỹai. 11Qami' ỹo'oteque da qami' sallaxanaqa, yaqto' ishet da lta'araic ca qaỹa'añi. Yaqto' qalota nam ỹaatacot da na'achecỹaxac Ñim Lo'onatac 'Enauacna souaxat aca qo'omi maye qalaỹoñiỹa't da qomi' sachoq acamaye da seraxa yemayepi. 12Cha'aye de'era qartaunaxanaxaqui saishet da ndotec da na qarqaỹañicpi ỹaconeguet cam iueetaique, maye nataqa'en ỹo'otec namayepi da ỹaatacot da lta'araic na'achecỹaxac Ñim Lo'onatac 'Enauacna. 13De'era qartaunaxanaxaqui ỹachaxan da qami' ỹataqta qaualaqaiguet da no'on na'axaỹaxac maye ỹa'axat da na'aqtaguec So Cristo. Ỹoqo'oye camayepi ishet da ỹo'oxoreetac, qataq huo'o naq 'enec naqa'en Ñim Lo'onatac 'Enauacna. 14Nataqa'en nqouagaxaueetaleguete qami', cha'aye ỹataqta qalota da lauoche da qoñiita, cha'aye Ñim Lo'onatac 'Enauacna qami' ỹachaxanalo da lqouagaxanaqtaic. 15¡Sanqot da qana'achecỹaxac Ñim Lo'onatac 'Enauacna, cha'aye Ñimaye ỹataqta lta'araic da qomi' ỹanema qana'achecỹaxac, qaq damaye saishet da sañoxotaq da ỹataqta sa'axataqta!
