Co'ollaq noxonec ye Samaria qataq qaỹauec so Israel le'ecpi
1Qaq co'ollaq mashe ivi' soua doce vi'iye da lo'onataxanaxac so Ajaz, maye nta'a ye Judá, nache so Oseas som llalec so Elá, ỹacoolec da lo'onataxanaxac da ilo'ogue so Israel le'ecpi, huaña ye Samaria, qaq ivi' soua nueve vi'iye da lo'onataxanaxac da nta'a. 2Qaq somaye ỹo'ot nam ỹataqta saỹaỹamaxaren Ñim Nataxala', qalaxaye saishet da ỹapac 'eeta'am so hua'au nta'alpi ye Israel. 3Qaq so Salmanasar maye nta'a ye Asiria, nqo'ona da iloquiaxan so Oseas, qaq nache loxonec, qataq ỹauo'o lamaxashec, nache so Oseas choche desheetenaxaatac qanqa'en. 4Qalaxaye so Salmanasar, maye nta'a ye Asiria, nanoma so Oseas da dataỹa'aguet somaye, cha'aye somaye huo'oi soua lamaxa'she, ỹamaxa so nta'a So, maye nta'a ye Egipto, qataq mashe saishet da ỹaneuo ana lsheetenaxanaqte maye iuen da ỹaneuo ye 'oonolec vi'i da yaqto' isheeten so nta'a ye Asiria. Ỹoqo'oye so nta'a Salmanasar, damaxasoxoolec co'ollaxa da qaỹaconeua'a somaye, nache qaicoñe'. 5Huaña, nache so Salmanasar taỹa co'ollaxa da iloquiaxan 'enauac yi'iye 'alhua, qataq coleesop da nauan ye Samaria, qaq nache queto'ot da iloquiaxaatac yemaye soua tres vi'iye. 6Qaq co'ollaq mashe ivi' soua nueve vi'iye da lo'onataxanaxac so Oseas, nache so nta'a ye Asiria, loxonec co'ollaxa ye Samaria. Huaña nache ỹauec so Israel le'ecpi, ỹauega ye Asiria, nache ỹanalec ye 'alhua le'enaxat Jalaj, qataq ye Jabor, qataq ye tala Gozán, qataq yem huaqta'a't nỹecpi maye lalamaxat so meedopi. 7Qaq de'era, qanayeuaigui co'ollaxa souaxato' da so Israel le'ecpi, huo'o da npe'enaxac da dataỹa'aguet Ñim Nataxala' maye Natamnaxala', maye nqateeguesop co'ollaxa ye Egipto, qataq da la'añaxac so faraón, maye nta'a ye Egipto, cha'aye somayepi natamnot so ỹaqa'a atamnaxala'pi, 8nache quegue da lataxac som ỹotta'a't shiỹaxauapi, maye Ñim Nataxala' ỹo'orauec co'ollaxa ỹauaachigui naqa'en somayepi, qataq nam lataxacpi maye ỹalecneuo da lapaxañi co'ollaxa som nta'alpi ye Israel. 9Qataq so Israel le'ecpi, nataqa'en ỹoxottañi nam qauem la'aqtacpi da detaqtega Ñim Nataxala' maye Natamnaxala', qataq ỹo'ot so qaỹoqotcheguema atamnaqa'pi, ỹanaña 'enauac som huaqta'a't nỹecpi maye ỹotta'a't naua nañalo, qataq som nalec aso nalloxolatepi, qataq som huaqta'a't nỹecpi maye ỹotta'a't naua nañalo maye ỹataqta qanpaxatteua'a. 10Qataq nauaxaỹaxaasheguem nataqa'en aso coma'pi maye atamnaxalatepi, qataq so lqui'ipi aso Aserá, nache ỹanalec so qaỹoqotcheguemapi, qataq naua la'a'ye ana qo'oipaqpi maye qalochiguiñi ana lcouepi. 11Qataq ỹavigaxat so lchenaxanaxat huaña naqa'en so qaỹoqotcheguema atamnaqa'pi, nache ỹataqta quetelec da lataxac so ỹotta'a't shiỹaxauapi maye Ñim Nataxala', ỹo'orauec co'ollaxa ỹauaachigui somayepi, qataq ỹo'ot na ỹataqta qauem, maye ỹo'ot da lalemataic Ñim Nataxala'. 12Qataq natameetacot so saq 'en atamnaxala'pi, maye Ñim Nataxala' saỹashenem co'ollaxa da natamnot. 13Qataq Ñim Nataxala', mashe ime co'ollaxa da 'enapega so Israel le'ecpi, qataq so Judá le'ecpi, ỹachegoxotchigui so la'aqtaxanaxanecpi qataq som huo'oi naua l-loxoco, co'ollaq 'eeta': «Qoquiỹa'ai qome na qauem maye qauo'ocheetac, nache qaupaquiichiguilo naua ỹamaxasoxonaxaco, iqataxaco, qataq naua ỹapaxaguenataxanaxaco, maye samaxalec co'ollaxa so hua'au qarta'ailpi, maye sachegoxotchigui co'ollaxa som ỹa'aqtaxanaxanecpi maye ỹamaxashecpi.» 14Qalaxaye somayepi saishet co'ollaxa da ỹalaq, nacherata da ỹataqta qaramchigui, 'eeta'am so hua'au lta'alpi, da saishet da ỹa'amaqten Ñim Nataxala' maye Natamnaxala'. 15Nache saishet da ỹaconeguet nam lqataxacpi, qataq da naỹamaxataxac Ñimaye co'ollaq naỹamaxate' so hua'au lta'alpi, qataq na lamaxasoxonaxacpi maye ỹanem somayepi. Nache somayepi natamnot so saq 'en atamnaxala'pi maye qaica ca naigui, nache somayepi ivira'a da nataqa'en qaica ca naigui, souaxat da ỹe'enaxat da lataxac so ỹotta'a't shiỹaxauapi maye lauoreuapi, maye Ñim Nataxala' saỹashenem co'ollaxa somayepi da ỹe'enaxat. 16Nache ca'ai 'enauac na lamaxasoxonaxacpi Ñim Nataxala' maye Natamnaxala'. Nache ỹo'o't soua dos le'enaqtaqa huaca llalqa maye chegaqaigui na lcat nqachilliguishec, qataq so lqui'i aso Aserá, qataq nataqa'en natamnot 'enauac ana huaqaañipi late'eraipi maye neto'ot na piguem, qataq so Baal. 17Nataqa'en ỹaneuo so llalaqpi qataq aso llalepi da qaỹavigaxat, qataq napaxagueetega da ila'a cam saqcha'a, qataq da lli'iyaqnataxanaxac, nache ỹo'ot nam ỹataqta qauem maye sa ỹaỹamaxaren Ñim Nataxala', nache inogoqchet Ñimaye.
18Qaq ỹoqo'oye Ñim Nataxala', ỹataqta dalemataỹa so Israel le'ecpi nache ỹo'orauec, qalaxaye no'onaxatañi so maiche nalamaxat nhuo' le'ecpi maye chegoxoguet so Judá. 19Qalaxaye ñaqaiyeta se'eso nhuo' le'ecpi maye chegoxoguet so Judá, saishet da ỹalaxaguet nam lamaxasoxonaxacpi Ñim Nataxala' maye Natamnaxala', nacherata da quetalec da ỹo'ottac da lataxac maye lapaxañi co'ollaxa so Israel le'ecpi. 20Ỹoqo'oye Ñim Nataxala' ỹo'orauec co'ollaxa 'enauac som chegoxoguetpi so Israel, nache ỹauo'o da lachetataic naqa'en somayepi, qataq ỹaneguet so cachaxaicpi, nache ivitta'a da Ñimaye ỹo'orauec. 21Qaq co'ollaq Ñim Nataxala', nqateeguesop som chegoxoguetpi so David, so Israel le'ecpi, nache so Israel le'ecpi ỹauo'o lta'a so Jeroboán, maye llalec so Nabat, nache so Jeroboán, ỹo'ot da somayepi ca'ai Ñim Nataxala', nache ỹo'ot da ỹataqta lta'araic naqa'en da lasouaxashet so Israel le'ecpi. 22Nache so Israel le'ecpi ỹataqta icaachigui da ỹo'ot nam nasouaxashetpi maye ỹo'ot co'ollaxa so Jeroboán, nache saishet da ca'ai. 23Nache ivitta'a da Ñim Nataxala', ỹo'orauec co'ollaxa so Israel le'ecpi, nache ipacchigui dam ỹa'axatta'a co'ollaxa, ỹachegoxotchigui so la'aqtaxanaxanecpi maye lamaxashecpi Ñimaye. Qaq 'era da 'eetec da so Israel le'ecpi da noxonec co'ollaxa, nache qaỹauega ye Asiria, nache ivitta'a nagui.
Da 'eetec co'ollaq qaltaq qanayenalec ye Samaria
24Nache so nta'a ye Asiria, ỹauec co'ollaxa so shiỹaxauapi maye lma' ye Babilonia, Cutá, Avá, Jamat, qataq ye Sefarvayin, nache ỹanaigui somayepi ye huaqta'a't nỹecpi ye Samaria, nache nmeneguet naqa'en somayepi so Israel le'ecpi. Qaq 'era da 'eetec da ỹacona co'ollaxa ye Samaria, qataq nache naigui som huaqta'a't nỹecpi. 25Qalaxaye souaxat da se'eso shiỹaxauapi saishet da natameetacot Ñim Nataxala' co'ollaq nalec yi'iye 'alhua, nache Ñim Nataxala' namaxa somayepi so llonpi, nache se'eso shiguiỹacpi huo'o co'ollaxa so ỹalauat somayepi. 26Huaña nache qaỹa'aqtaxanem so nta'a ye Asiria, qoỹeeta':
«Ye shiỹaxauapi maye 'auauega da naigui ye huaqta'a't nỹecpi ye Samaria, yemayepi saishet da ỹaỹaten da lataxac da qaỹa'amaqten cam atamnaxala' yi'iye 'alhua. Qaq ỹoqo'oye camaye ỹamaxa yemayepi so llonpi, nache huo'o so ỹalauatpi.» 27Nache so nta'a ye Asiria, ỹan da la'aqtac, 'eeta':
Qauauo'oi qome ca qauamaqai nam ntaxaỹaxanaxanecpi maye qauachegoxochiỹa'a co'ollaxa yi'iye 'alhua, da yaqto' jec da netaigui camayepi, nache ỹapaxaguenec ca lataxac da qaỹa'amaqten que'eca atamnaxala' yi'iye 'alhua. 28Nache huo'o som 'oonolec som ntaxaỹaxanaxanecpi maye qaỹachegoxota'a co'ollaxa ye Samaria, somaye jec, nache naña ye Betel, nache ỹapaxaguenec co'ollaxa da lataxac da qanatamnot Ñim Nataxala'. 29Qalaxaye ñi 'oonolec se'eso ỹotta'a't shiỹaxauapi, ỹo'ot nam saq 'en natamnaxala'pi ỹanaña som huaqta'a't nỹecpi maye hueta'a, nache ỹanalec som qaỹoqotcheguema atamnaqa'pi, maye lo'onatacpi co'ollaxa so Samaria le'ecpi. 30Nache som chegaqa'a ye Babilonia, ỹo'ot so lqui'i so atamnaxala' Sucot Benot, qaq so Cutá le'ecpi, qalaq ỹo'ot so lqui'i so atamnaxala' Nergal, qaq so Jamat le'ecpi, qalaq ỹo'ot so lqui'i aso Asima. 31Qaq so Avá le'ecpi, qalaq ỹo'ot so lqui'i so atamnaxala' Nibhaz, qataq so Tartac. Qaq so Sefarvayin le'ecpi, qalaq ỹavigaxat na llalec da ỹanot so Adramelec, qataq so Anamelec maye natamnaxala'ate somayepi. 32Nataqa'en natameetacot Ñim Nataxala', qalaxaye nataqa'en ỹauo'o som ntaxaỹaxanaxanecpi maye maiche chegaqaigui somayepi da yaqto' ỹo'ot som lachetaqtaxanaxatpi da huaña so qaỹoqotcheguema atamnaqa'pi. 33Qaq na'aictaxa da somayepi natameetacot Ñim Nataxala', qalaxaye nache 'ena'am queto'ot da natameetacot so maiche natamnaxala'pi, maye maiche lataxac som ỹotta'a't shiỹaxauapi maye chegaqa'a co'ollaxa somayepi. 34Qaq nache ivitta'a nagui da nache queto'ot da ỹo'ottac de'era togoshec maiche lataxac co'ollaxa somayepi, nache saishet da huo'o naq 'enec naqa'en Ñim Nataxala', qataq saishet da ỹo'o't naua lapaxayiñi lataxaco, qataq naua lamaxasoxonaxaco, qataq naua lqataxaco, qataq saishet da ỹalaxagueta naua lamaxasoxonaxaco qataq naua lqataxaco Ñim Nataxala', maye ỹamaxalec co'ollaxa som chegoxoguetpi so Jacob, maye Ñimaye ỹanagui co'ollaxa da le'enaxat Israel. 35Co'ollaq Ñim Nataxala' naỹamaxate' somayepi, nache ỹamaxalec da 'eeta': «Saishet qome da qanatamñeetacot ca ỹaqa'a atamnaxala', qataq saishet da qavio'oxoyiñiitac, huo'otaq da qami' lamaxa'she da qauo'ocheetac ana nachetaqtaxanaqtepi. 36Nacheñita Ñim Nataxala' maye qami' nqateeguesopa co'ollaxa ye Egipto, ỹauota'a da lta'araic la'añaxac. Nacheñita qome da huo'o naq 'enec qanqa'eñi, qavio'oxoreñiitac, qataq qaỹa'añiỹot ana qarachetaqtaxanaqche. 37Qataq qaupaquiichigui qome da qauo'oche nam lqataxacpi, qataq na lapaxañi lataxacpi, qataq na lapaxaguenataxanaxacpi, qataq na lamaxasoxonaxacpi maye nanettañi co'ollaq qami' ỹanema, nache saishet qome da qanatamñiitacot ca ỹaqa'a atamnaxala'pi. 38Qataq saishet qome da qaucoviỹa'ai da qami' naỹamaxateto co'ollaxa Ñimaye, qataq saishet da qanatamñiitacot qome ca ỹaqa'a atamnaxala'pi, 39maye nacheñita Ñim Nataxala' maye Qanatamnaxala'ai, qaq Ñimaye nache qami' isoueeguesopa qome nam qanpa'aguenaxauaipi.» 40Qalaxaye somayepi, saishet da ỹalaq, nacherata da quegue da togoshec maiche lataxac somayepi. 41Qaq se'eso shiỹaxauapi natameetacot co'ollaxa Ñim Nataxala', qalaxaye nataqa'en natameetacot nam ỹaqauga natamnaxala'pi. Nache ivira'a nataqa'en som llalaqpi qataq som laualpi somayepi, nache ỹe'enaxatchigui da 'eetec co'ollaxa so lta'alpi, nache ivitta'a nagui.
