2 Reyes 22

₁Qaq so Josías, mashe ivi' soua ocho vi'iye da nachaalataxac co'ollaq ỹacoolec da lo'onataxanaxac, nache ivi' treinta vi'iye da lo'onataxanaxac da nta'a, huaña ye Jerusalén. Qaq aso late'e somaye, Boscat lashe, le'enaxat Yedidá, asom llale so Adaías. ₂Qaq so Josías, ỹo'ot co'ollaxa nam ỹataqta ỹaỹamaxareeta Ñim Nataxala', cha'aye icaachigui da no'on lataxac so lta'a David, da ỹataqta saishet da dasheuec.

₃Qaq co'ollaq mashe dieciocho vi'iye da nta'a so Josías, nache somaye ỹamaq so leraxanaxanec Safán, som llalec so Asalías, som laual so Mesulán, da yaqto' taua'a aso atamnaxaqui maye lalamaqte Ñim Nataxala', nache 'eeta': ₄«'Anqo'ona ca Hilcías, cam lataxala' na ntaxaỹaxanaxanecpi, nache qonapega da lapona't qome aca anom maye qairoua'a co'ollaxa añi atamnaxaqui maye lalamaqte Ñim Nataxala', acam ỹaconeguet co'ollaxa ca lasom lo'opi, ₅nache ỹanem qome cam ilotague' cam 'onataxanaxaicpi maye ỹo'ottac añi atamnaxaqui maye lalamaqte Ñim Nataxala', yaqto' camayepi isheeten cam do'onataxaatacpi maye napareetac na lpoxoỹaxapi añi atamnaxaqui, ₆cam ichectacpi na 'epaq, qataq cam dapaxaguenataxaatacpi, qataq cam nỹec lo'opi, qataq yaqto' qaisheenaxana ca 'epaq, qataq ca nchiiguishec coma' da qaỹaỹamaxaañi añi atamnaxaqui. ₇Qalaxaye nataqa'en qonapega qome da saishet da ichemaxattac cam ilotague' ca 'onataxanaxaicpi, maye qoỹanem aca'aca anom, cha'aye camayepi ỹataqta no'on da lataxac.» ₈Huaña nache so Hilcías, maye lataxala' so ntaxaỹaxanaxanecpi, da'aqtaxanem so neraxanaxanec Safán, 'eeta': «Aỹem, selalec aye nere maye huetalec na nqataxacpi, huetaigui añi atamnaxaqui maye lalamaqte Ñim Nataxala'.» Nache so Hilcías, ỹanem somaye aso nere, nache so Safán itaxaỹaxan co'ollaxa asomaye. ₉Huaña, nache so Safán jec, taỹa so nta'a da da'aqtaxanem de'era, nache 'eeta':

dam 'aramaxashecpi, mashe laỹona't aso anompi maye huetaigui añi atamnaxaqui, nache qoỹanem som ilotague'pi nam do'onataxaatacpi maye napareetac na lpoxoỹaxapi añi atamnaxaqui maye lalamaqte Ñim Nataxala'. ₁₀Qaq so neraxanaxanec Safán, nataqa'en da'aqtaxanem so nta'a, da so Hilcías maye lataxala' na ntaxaỹaxanaxanecpi, ỹanem somaye aso nere. Nache so Safán, itaxaỹaxan asa'aso nere, co'ollaq datato'ot so nta'a. ₁₁Nache so nta'a co'ollaq hua'aqchigui nam na'aqtacpi maye nanettalec asa'aso nere maye huetalec na nqataxacpi, nache ncolaxata'aisalo soua alogo souaxat da nqui'ic, ₁₂nache sanaỹaloxon da 'enapega so Hilcías, qataq so Ajicán, som llalec so Safán, qataq so Acbor, som llalec so Micaía, qataq so Safán maye neraxanaxanec, qataq so Asaías, maye 'amaqtaqaic lataxala' so nalleppi so nta'a, 'eeta': ₁₃Ñaq qaunache taxa Ñim Nataxala', da aỹem qauchemaqtaxañiilec, qataq nam nhuo' le'ecpi, qataq 'enauac na Judá le'ecpi, qataq nam na'aqtacpi maye huetalec ana'ana nere maye qailalec. Cha'aye Ñim Nataxala', yo'oqta da ỹataqta qomi' dalemataỹalo, souaxat da so hua'au qarta'alpi saishet da ỹalaxaguet nam na'aqtacpi maye nanettalec ana'ana nere, qataq saishet da ỹo'ot na nanettalec anamaye. ₁₄Nache so Hilcías, qataq so Ajicán, Acbor, Safán, qataq so Asaías, nqo'oora co'ollaxa aso na'aqtaxanaxana Julda, asom lhua so Salún, maye llalec so Ticvá, som laual so Jarjás, maye ilotague' aso laỹe' so nogoxotpi asa'aso atamnaxaqui. Qaq aso Julda, netaña co'ollaxa so dalaxaic nỹecpi, maye naigui so huaqta'a't nỹecpi ye Jerusalén, nache na'aqtaxaatrague' co'ollaxa, ₁₅nache asomaye 'enapeco':

«Da la'aqtac Ñim Nataxala', maye Natamnaxala' na Israel le'ecpi, 'eeta': ‹Qaua'aqtaxañim qome que'eca shiỹaxaua maye qami' nama'q, da aỹem qaunache, ₁₆da Aỹem Nataxala' da ỹa'aqtac, 'eeta': Aỹem ñamaxa qome ne'ena 'alhua ca lta'araic lchec, qataq talec ñaqa'en 'enauac na netalecpi namaye. Qaq nache ipacchigui 'enauac qome na ỹa'aqtacpi maye huetalec aso nere maye itaxaỹaxaatac ñi nta'a ye Judá. ₁₇Souaxat da aỹem ca'ai namayepi, qataq da ỹavigaxattac na lchenaxanaxat da ỹaatacot na ỹaqa'a atamnaxala'pi, nache ỹo'ot da ỹataqta aỹem ỹayeloqchet ne'ena ỹo'otpi. Ỹoqo'oye ỹataqta 'eroigui da ỹayeloxo, maye talec ne'ena 'alhua, nache saishet qome da 'om. ₁₈Qaq ỹoqo'oye qoñiỹapega qome cam nta'a ye Judá, maye qami' nama'q da aỹem qaunache, qoñiita': Da la'aqtac Ñim Nataxala' maye Natamnaxala' na Israel le'ecpi, 'eeta': Qaq souaxat da 'aua'aqchigui nam na'aqtacpi maye huetalec aso nere, ₁₉nache ỹataqta huo'o da 'antogotaxac, qataq da 'anmanaxac da 'ana'axaỹaxana nam sa'axata'a da talec ne'ena 'alhua, qataq nam netalecpi namaye, da taỹa'a da ñelaxaañi qataq talec da qauem ỹa'aqtac, qaq souaxat da 'ancolaxata'aisalo naua 'ogo, qataq da aỹem 'anỹeeto'ot, qaq Aỹem, nataqa'en 'am sa'aqchigui. 'Era da ỹa'aqtac, aỹem Nataxala'. ₂₀Ỹoqo'oye 'am sanem qome da 'aulactapiguiñi qom 'aleu, qataq 'aualegoigui ñaqa'en som hua'au 'arta'alpi. Nache saishet da 'auauangui qome 'enauac ne'ena lta'araic lchecpi, maye sa'axatta'a da talec ñaqa'en ne'ena 'alhua.›»

Nache so lamaxashecpi so nta'a, ỹe'eguelaq da iroi' de'era la'axaỹaxac so nta'a.