1Qaq co'ollaq qaỹoqtegue de'era, nache ileu so Najás, som lta'a so amoniitapi, qaq da lo'onataxanaxac da nta'a somaye, nache talec qanqa'en so llalec Janún. 2Nache so David huo'o da lhuennataxa da ỹo'otec ca ỹaỹamaqchiguiñi so Janún, da ỹe'enaxatchigui da 'eetec co'ollaxa so Najás da ỹataqta ỹauotec somaye, ỹoqo'oye so David ỹama'q soua lamaxa'she da yaqto' ỹa'añaqchet so Janún souaxat da ileu so lta'a. Qalaxaye somayepi co'ollaq ivita ye na'alhua so amoniitapi, 3nache na lataxala'pi so amoniitapi, 'enapega so nta'a Janún, 'eeta': «'Am nta'a, ¿peta'a 'aupi'itaxaatega da so David huo'o naq 'enec naqa'en ye 'arta'a, ỹoqo'oye 'am namaxa na lamaxashecpi? ¡Ye namayepi yo'oqta da choche naỹa da imeten na 'alhua, ime nache ilaxachigui qome na huaqta'a't nỹecpi!» 4Nache so Janún, damaxasoxoolec da qaỹaconeua'a so lamaxashecpi so David, nache qanpetec na 'oonolec laỹe ana lqa' lauepi somayepi, qataq qancolaxatrauec naua laỹel soua lapotol, tachiguiña naua nate' laỹel qanqa'en. Ime, nache qaỹamaq da ỹe'eguelaq somayepi. 5Nache co'ollaq ỹaỹaten de'era so David, nache damaxasoxoolec da qaica'ata'aguet somayepi, cha'aye somayepi ỹataqta huo'o da la'agaxa, qataq ỹamaq da la'aqtac da qoỹenapega somayepi da nache hua'a ye Jericó, ivitta'a da qaltaq ñaxat ana lqa' laue nache ỹe'eguelaq. 6Nache so amoniitapi co'ollaq nanoma da dalemata so David, nache iỹaxana qataq ỹauo'o aso nsheetenaqte so veinte mil alleppi siiriopi, maye lma' ye Bet Rejob, qataq so lma' ye Soba qataq so mil nalleppi so nta'a Macá, qataq so doce mil Istob le'ecpi. 7Qaq so David, co'ollaq ỹaỹaten de'era, nache ỹamaq so Joab qataq 'enauac so nalleppi. 8Nache so amoniitapi taỹa so ñegueuo so huaqta'a't nỹecpi, nache naỹamaxat da nalat, qaq so siiriopi maye lma' ye Soba, Rejob, qataq so Istob le'ecpi, qataq so alleppi ye Macá, tauga so no'onaxa da naỹamaxat. 9Qaq so Joab, co'ollaq ila'a da qanataỹagui da qailoquiaxan, nache lca'aua'a so ỹataqta ỹaỹaten da l-loquiaxac so alleppi Israel le'ecpi, nache naỹamaxat da delogui' so siiriopi. 10Qaq so laỹepi so nalleppi, qalaq ỹanem so lqaỹa Abisay da ilo'ogue, da yaqto' dataỹa'aguet so amoniitapi. 11Qataq 'enapega, 'eeta': «Da 'aula'a da mashe huotaique da sa ñalo'oguet ye siiriopi, nache 'auanac qome da aỹem 'autauan, qaq da 'am sela'a da mashe huotaique da sa 'analo'oguet ye amoniitapi, nache 'am ñeqo'ona qome da 'am setauan. 12¡Qaq 'ana'añaxat qome! ¡Ña'añaxataq da seloquiaxalec na qarhuo' le'ecpi, qataq na huaqta'a't nỹecpi maye lalamaxat Ñim Lo'onatac 'Enauacna! Qaq Ñim Nataxala' maiche ỹo'ot qome cam 'eetapeguec.» 13Nache so Joab sa naỹaloxon da jec da iloquiaxan so siiriopi, qalaxaye somayepi datauec co'ollaq ila'aguet somaye. 14Nache so amoniitapi co'ollaq ila'a da datauec so siiriopi, nache somayepi nataqa'en datauec co'ollaq ila'aguet so Abisay, nache ỹe'egueneua'a so huaqta'a't nỹecpi. Nache so Joab ỹaxaañi da iloquiaxaatac co'ollaxa so amoniitapi, nache somayepi ỹe'eguelaxa ye Jerusalén. 15Qalaxaye so siiriopi co'ollaq ila'a da iqallem so Israel le'ecpi, nache qaltaq laỹona'tpi. 16Nache so Hadad Ezer damaxasoxona so laỹepi siiriopi maye netaña da pa'aitague da le'ego so tala Éufrates, nache somayepi taỹa ye Jelán, nache datalec so Sobac, som lataxala' so nalleppi so Hadad Ezer. 17Nache co'ollaq qaỹa'aqtaxanem de'era so David, nache somaye sa naỹaloxon da laỹona't 'enauac so Israel le'ecpi, ime nache ỹa'axasoxoolec so tala Jordán, nache taỹa ye Jelán. Huaña, nache so siiriopi dataỹa'aguet so David, nache qailogui' co'ollaxa somaye. 18Qalaxaye so siiriopi dataueeguesop co'ollaxa so Israel le'ecpi, cha'aye so David ỹalauat so setecientos alleppi maye netangui aso laigonapi qataq cuarenta mil so netalec so caipi. Nataqa'en ique'emaqchet so Sobac som lataxala' so siiriopi, qaq somaye nache huaña yemaye co'ollaq ileu. 19Qaq so nta'alpi maye ntaune' co'ollaxa so Hadad Ezer, co'ollaq ỹauaachigui da so Israel le'ecpi loxonec so siiriopi, nache somayepi nmane' so Israel le'ecpi, qataq nañan da nache qailo'ogue. Huaña co'ollaxa nache so siiriopi ñi'iỹa da ỹe'eguelaxalec da itauan so amoniitapi.
