So David qataq so Mefiboset
1Qaq huo'o so na'a'q, nache so David denataxaatac, 'eeta': «¿Peta'a huo'o ca no'onañi lca'alaxaic so llalaqpi so Saúl, da yaqto' setauan, souaxat da ỹauotaxanaqtaic so Jonatán?»
2Qaq huo'o som lamaxashec co'ollaxa so llalaqpi so Saúl, le'enaxat Sibá, nache qaiỹaxaneuga da yaqto' taua'a so David. Nache co'ollaq ivireuo so Sibá, nache so nta'a David inat somaye, 'eeta':
¿Nache 'am Sibá?
Nache somaye 'enapeco': Aja' nachaỹem, qaq maicheye cam aỹem 'auamaxalec 'am nta'a.
3Nache so nta'a, 'enapeco': ¿Peta'a ñaq huo'o ca no'onañi so lalamaxat llalaqpi so Saúl da yaqto' setauan camaye, da talec ñaqa'en da lchoxonnataxanaxa Ñim Lo'onatac 'Enauacna?
Nache so Sibá, 'enapeco':
Ñaq huo'o so 'oonolec llalec so Jonatán, maye sa da'añiiguelo naua lchel.
4Nache so nta'a David, 'enapeco': ¿Qaq hueta'ague camaye? Nache so Sibá, 'enapeco': Qomye netaña ye Lodebar yem lma' so Maquir, maye llalec so Amiel. 5Nache so nta'a David, damaxasoxona co'ollaxa da yaqto' qanauegueua'a somaye, 6nache so Mefiboset maye llalec so Jonatán, qataq laual so Saúl, co'ollaq ivireua'a so David, nache somaye nqollemñi da iquin so nta'a, cha'aye huo'o naq 'enec naqa'en somaye.
Nache so David, 'enapeco': ¿Nache 'am Mefiboset? Nache somaye ỹasat, 'eeta': Aja', mashe netaina'a na 'aramaxashec. 7Nache so David 'enapega somaye, 'eeta':
Saishet qome da 'añi'i, cha'aye aỹem 'am saỹamaxatta qome, cha'aye saishet da secoua'ai so Jonatán maye 'arta'a. Qaq so'ot qome da 'am qaỹe'eguelaxatem 'enauac nam na'alhua co'ollaxa so 'arapi' Saúl, qataq nache 'eetai' qome da 'am iquia'axaua da seque'e. 8Nache so Mefiboset nqollemñi, nache 'eeta': ¿Ta'ainco' da 'aualecteetegueuo ne'ena 'aramaxashec, 'am nta'a, ye aỹem sheeta'am ca pioq leuaxaic? 9Qalaxaye so nta'a David, iỹaxana so Sibá, som lamaxashec co'ollaxa so Saúl, nache 'enapega 'eeta': 'Enauac na lalamaxatpi co'ollaxa so Saúl qataq som llalaqpi, talec ñaqa'en ñi Mefiboset maye laual somaye. 10Qaq ỹoqo'oye 'am qataq na 'aỹa'alaqpi, qataq na 'aramaxashecpi, qaỹa'añiilec qome na nañiguishec ye na'alhua ñi Mefiboset, nache ana ala ca nañiguishec qauaỹamaxache qome, yaqto' sa qoue na nallec ye lma' ñimaye, qalaxaye ñi Mefiboset maye laual so 'ana'aco' Saúl, ñimaye nache saq ỹet qome da iquia'axaua. Qaq so Sibá maye quince so llalaqpi qataq veinte so lamaxashecpi, 11ỹasategueto' so nta'a 'eeta': 'Enauac cam 'auamaxalec ne'ena 'aramaxashec 'am nta'a, namaye ỹo'ot qome. Qaq huaña nache so Mefiboset saq ỹet naxa da lquia'axaua so David, 'eeta'am da maiche lta'a somaye. 12Qaq so Mefiboset huo'o sotai' llalec le'enaxat Micaía. Qaq nache 'enauac so llalaqpi so Sibá da do'onataxaatacot co'ollaxa so Mefiboset. 13Qalaxaye so Mefiboset, ye sa da'añiiguelo naua lchel, nache sairaxan da netaña ye Jerusalén, cha'aye somaye nache lquia'axaua naxa so nta'a.
