1Qaq co'ollaq nvi' so nauoxo, maye huetoiguilo naxa da so nta'alpi huenoxonec da nalat, nache so David ỹamaq so Joab qataq so ltauapi nta'alpi, qataq so nalleppi Israel le'ecpi. Nache somayepi loxonec co'ollaxa so Amón le'ecpi, qataq coleesop so huaqta'a't nỹecpi ye Rabá. Qaq so David qalaq nache hueta'a co'ollaxa ye Jerusalén. 2Qaq so mashe avit, nache ñisheguem so David, chegoqtelec so lmala', nache somaye queuotapeguelec na pa'asheguem so lma' lta'araic. Qaq huaña co'ollaxa nache ila'a aso 'alo nacheltac, qaq asomaye ỹataqta 'onaxai. 3Nache so David damaxasoxon co'ollaxa da qaichemaxata chaq negue't asa'aso 'alo. Nache qaỹa'aqtaxanem somaye, da asa'aso 'alo le'enaxat Betsabé, maye llale so Elián qataq lhua so Uría som hitiita. 4Nache so David, ỹauo'o so lamaxashec da ỹe'eguenauga asomaye, qaq co'ollaq ivireuo aso Betsabé, nache so David lauañi' asomaye. Qaq co'ollaq ime da lauatañi', nache asomaye nachel, nache ỹe'eguelaxauga so lma'. 5Qaq asomaye hualaxai co'ollaxa, ime, nache da'aqtaxanem so David. 6Qaq huaña, nache so David, ỹamaxa da la'aqtac so Joab, 'eeta': Ñaq 'anamaxauo qome ca Urías cam hitiita, nache so Joab 'enapega co'ollaxa so Urías da taua'a so David. 7Qaq co'ollaq ivireuo so Urías, nache so David inat somaye da chaq 'eetec ca Joab qataq cam nalleppi, qataq ca 'eetec ca na'axaỹaxac cam alaataxac. 8Qaq ime co'ollaxa, nache so David 'enapega so Urías da tauga so lma', qataq iỹoi' naua lapia'ate. Qaq co'ollaq choche ca'ai so nỹec lta'araic so Urías, nache so nta'a ỹamaxaueegue somaye so lachetaqtaxanaxat som ỹataqta no'on nallec. 9Qalaxaye so Urías saishet co'ollaxa da tauga so lma', nda'a't da nache lo'ochaqa' so lasom so nma' lta'araic, ỹalectaigui so alleppi maye nhuataxauapi so nta'a. 10Qaq co'ollaq qaỹa'aqtaxanem so David, da so Urías saishet da tauga so lma', nache damaxasoxoneuga co'ollaxa nache inat, 'eeta': ¿Ta'ainco' ye saishet da 'auga ye 'arma' da 'aro'ochaqa', ye ỹataqta qaỹoqta yem 'auachegaqa'a? 11Nache so Urías 'enapeco': Añim arca maye laỹe' naua nqataxaco, qataq yem nalleppi na Israel le'ecpi qataq Judá, netaiguilo naua saq 'amaqtache npe'lolqa. Nataqa'en so ỹataxala' Joab qataq ye alleppi maye ltauapi, lo'ochaqa' ye no'onaxa. Qaq ¿ta'ainectoxo' da soua'a ye ima' da seque'e, qataq da ñeỹom, qataq da ỹauañe' aca ihua? ¡'A'i, aỹem saishet da so'ot de'era souaxat da qoneta, 'am nta'a! 12Nache so David 'enapego' somaye, 'eeta': Ña qoua'a nagui ne'ena, nato' qonte' nache 'avi'eguelaq. Nache so Urías no'onaña ye Jerusalén se'eso pe, ivitta'a so lỹa na'a'q. 13Qaq se'eso na'a'q, nache so David iỹaxana somaye da yaqto' lquia'axaua qataq nỹomaxaua, nache iviraxata'a da ỹataqta taxaic naqa'en. Qalaxaye so mashe pe, nache somaye jec, taỹa ye netaña so lauanaxanaxanecpi so nta'a, nache lo'ochaqa' se'eso pe, nache saishet da taỹa so lma'. 14Qaq so lỹa na'a'q, nache so David ỹauo'o aso lere taỹa'a so Joab, nache ỹamaxague so Urías da ỹache. 15Qaq so na'aqtac maye huetalec asa'aso nere, 'eeta': «Na Urías, ỹalegoigui qanqa'eñi qome ca hua'autec alleppi qom huaigui que'eca ỹataqta lta'araic alaataxac. Ime, nache qaualachiỹa'a't qome, yaqto' qaique'emaqchet nache ileu.» 16Qaq nache 'eetec so Joab, co'ollaq coleesop so huaqta'a't nỹecpi da iloquiaxan, nache somaye ipa'axaneguet so Urías, som ỹataqta 'añaxaicpi alleppi maye mpa'aguenaxauapi somayepi. 17Qaq se'eso alleppi chegoqteua'a co'ollaxa se'eso huaqta'a't nỹecpi da ca'ateguet so Joab da delogui', nache so nalleppi so David huo'oi soua ileu', qaq nache ỹalectaiguilo soomaye so Urías da ileu. 18Qaq huaña, nache so Joab ỹamaxa da la'axaỹaxac so David, ỹataqta ỹa'axatta da 'eetec se'eso loquiaxac. 19Qataq 'enapega se'eso lamaxashec somaye, 'eeta': «Qom ime da 'aua'aqtaxanem ca nta'a, 'enauac da 'eetec se'eso alaataxac, 20qaq saiuena'a da dalemata camaye, nache 'am inat, 'eeta': ‹¿Ta'ainco' ye ỹataqta sa qauỹochiỹaique co'ollaxa so lpaqtaxat yi'iye huaqta'a't nỹecpi? ¿Peta'a sa qauaỹachiñi da ishet da qami' ỹasa'q yemayepi da netasheguema ye pa'asheguem se'eso npaqtaxanaxat? 21'Eeta'am co'ollaq huaña ye Tebés, da aso 'alo ỹalauat so Abimelec, som llalec so Yerubaal, souaxat da hueto'ot na pa'aguiñi so npaqtaxanaxat, nache ỹasaxaña so namaicnaxanaxat coma'. Qaq ¿ta'ainco' ye ỹataqta sa qauỹochiỹaique co'ollaxa yi'iye npaqtaxanaxat?› Nache qoneta' qome: ‹Ye 'aramaxashec Urías maye hitiita nataqa'en ileu.›» 22Nache som namaxashec jec, qaq co'ollaq ivi' nache da'aqtaxanem so David, 'enauac na ỹamaxalecpi so Joab da ỹa'axat somaye. 23Nache so namaxashec da'aqtaxanem so David, 'eeta': So alleppi maye seloquiaqtague', somayepi mashe huotaique da qomi' loxonqa can souaqtauga ye no'onaxa, qalaxaye sañoxotaq da qoshe ñaqa'enaq, nache seviraxataqtaua'a so ñegueuo ye huaqta'a't nỹecpi. 24Huaña nache so checna lo'opi maye netasheguema na pa'asheguem se'eso npaqtaxanaxat, somayepi qomi' ỹaỹe'n, nache huo'oi soua ileu' na 'analleppi, nache ileu nataqa'en yem 'aramaxashec Urías, yem hitiita. 25Nache so David 'enapego' so namaxashec, 'eeta': Qonapega qome ca Joab, da saishet da leetapigui lauel souaxat de'era, cha'aye nache lataxac dam alaataxac. Nacherata da nache queto'ot qome da iloquiaxaatac cam netaigui que'eca huaqta'a't nỹecpi, ivitta'a da nlachiguiñi naqa'en. Qaq 'am ỹataqta 'aua'añaqchet qome camaye. 26Qaq aso Betsabé co'ollaq ỹaỹaten so lhua Urías da ileu, nache asomaye ỹo'ot da lasouaxac souaxat somaye. 27Qalaxaye co'ollaq ime dam lasouaxac asomaye, nache so David damaxasoxoneuga asomaye da yaqto' qaỹauegueua'a so lma' lta'araic, nache so David ỹauo'o lhua asomaye, qaq co'ollaq qaỹata'ague de'era, nache asomaye ñiguiñi so llalec. Qalaxaye Ñim Nataxala', ỹataqta sa ỹaỹamaxaren de'era ỹo'ot so David.
