Aỹem nagui lleca'aique ca doce mil ỹalleppi, yaqto' nachena ne'ena pe da secaalec so David. 2Cha'aye yo'oqta da mashe nasamñi qome, qataq qaica ca la'añaxac, nache seque'elaxatta, qataq secolanaqchet, yaqto' 'enauac qome so shiỹaxauapi maye nnaictague' datauec, qaq qom mashe ndotec so nta'a, nache salauat. 3Qaq da ime, nache 'am ñe'eguelaxateua'a 'enauac so maiche nhuo' le'ecpi. Cha'aye 'oonolec so shiỹaxaua som qoquetapegueua'a da qaỹalauat, qaq qom ñe'eguelaq somayepi, nache 'enauac qome na shiỹaxauapi da qaltaq huo'o da l-lagaxayec. 4Qaq de'era na'aqtac ỹataqta ỹaỹamaxareeta co'ollaxa so Absalón, qataq so lqueroxonecpi so Israel le'ecpi. 5Qalaxaye so Absalón, nataqa'en damaxasoxoneuga co'ollaxa so Jusay, som arquiita da yaqto' ỹauo'o nataqa'en ca la'aqtac. 6Qaq co'ollaq ivireuo so Jusay, nache so Absalón, 'eeta':
De'era la'aqtac so Ajitofel, damaye, saỹaỹamaxañi. 8Cha'aye 'am, 'auaỹateeta da so 'arta'a, qataq so nalleppi ỹataqta 'añaxaicpi, qataq nagui camaye yo'oqta da ỹataqta denotac, 'eeta'am aca shiguiỹac da qaiuotaxaneque caua llalqa. Qataq so 'arta'a ye ỹataqta nalaataxaic, nache da pe qaq yo'oqta da saishet da ỹalectaigui so nalleppi. 9Qaq nagui yo'oqta da huo'o ca nqañoxottaigui auac, huo'otaq huo'o ca lỹa hueta'ague da nqañoxottañi. Qaq nagui da 'auamaq na 'analleppi, qaq da huo'otaq huo'o ca noxonec namayepi, nache da huo'o camachaqca da ỹaỹaten de'era nache, 'eeta': Mashe noxonec na ca'attague'pi so Absalón 10Huaña qome nache ca shiỹaxaua maye 'eeta'am ca llon da ỹataqta qaramchigui añi lquiyaqte, ishet da deqalvi, cha'aye 'enauac na Israel le'ecpi ỹaỹaten da so 'arta'a qataq so nalleppi ỹataqta 'añaxaicpi. 11Qaq ỹoqo'oye nagui, 'am shenapega da 'onaxaictaxa da 'alaỹona't 'enauac ye Israel le'ecpi, maye netaña ye Dan qataq ye Berseba, maye ỹataqta qalota 'eeta'am na coma' lsoche, maye hueto'ot na loigue aso auaxai, qataq nache 'am qome da 'am datalec yemayepi que'eca alaataxac. 12Huaña qome nache seloquiaxanaq so 'arta'a, na'aictaxa cam hueta'ague, nache shenaqta'am na 'aỹa da talec na 'alhua, nache somaye qataq so nalleppi saishet da huo'o ca nca'altauec ñaqa'enaq. 13Qaq da huo'otaq nqañoxotoigui ca huaqta'a't nỹecpi, nache 'enauac qome na Israel le'ecpi da sachoq ca nañecpi da ñeqo'onaxa camaye da ñelaxataxañi, nache ñi 'oonolec ca coma'pi maye lo'oxonaxat que'eca huaqta'a't nỹecpi, saugonnaqauga ca la'auaxac, nache ivitta'a ñaqa'enaq da qaica ca no'onañi coma'. 14Nache so Absalón qataq 'enauac so Israel le'ecpi, ỹaỹamaxareeta de'era la'aqtac so Jusay, cha'aye ỹoqta ỹaỹamaqchiguiñi naqa'en, saq 'ena'am da lapaxañi la'aqtac so Ajitofel. Cha'aye Ñim Nataxala', nache 'ena'ac co'ollaxa da yaqto' saipac naqa'en da laỹaanataxanaxac so Ajitofel, qataq taỹa'a naqa'en da l-leuaxa so Absalón. 15Qaq co'ollaq ime de'era, nache so Jusay, da'aqtaxanema co'ollaxa soua ntaxaỹaxanaxanaqa, Sadoc qataq so Abiatar da la'aqtac so Ajitofel maye ỹanem so Absalón, qataq so nqueroxonecpi maye lataxala'pi so Israel le'ecpi, qataq da la'aqtac maye ỹanem somaye, 16da yaqto' sa ỹaỹaloxon da ỹamaxa ca la'axaỹaxac so David, da yaqto' saishet da hua'a se'eso pe, ye nalochiguiñi ye toolec 'alhua, nacherata da taitague da le'ego so tala Jordán, yaqto' saishet da qaỹalauat somaye, qataq so nalleppi. 17Qaq so Jonatán qataq so Ajimaz, huetra'a co'ollaxa ye Roguel, cha'aye saishet da nachaxanalo so netaña se'eso huaqta'a't nỹecpi, ỹoqo'oye huo'o aso namaxashe 'alo da icoyegue'n, nache soomaye sa naỹaloxo'n da ca'atra da icoyegue'n so David. 18Qalaxaye huo'o so nsoqolec da ỹauaachiguilo soomaye, nache se'eso nsoqolec, jec da da'aqtaxanem so Absalón. Nache soomaye iỹalapigui'salo da je'c, nache ivilda'a so lma' so shiỹaxaua maye naña ye Bajurín, nache tayingui aso nshere maye nalec ye nqasoxoc somaye. 19Qaq aso lhua se'eso ỹale, ỹapolec co'ollaxa aso nshere. Ime, nache ilagaxaalec so nchegoxoshec trigo so mpa'asheguem so lapoxot asomaye. Da yaqto' saishet da qanpi'itaxana. 20Qaq co'ollaq nvildeuo soua lamaxa'she so Absalón, nache inattaco' aso 'alo, 'eeta': ¿Hua'ague ca neta'ague ca Ajimaz qataq ca Jonatán? Nache asomaye 'enapeco': Qomye natreuga ne'ena, qalaxaye tairaxaama so tala. Nache soua lamaxa'she so Absalón icaaleguete soomaye. Qalaxaye co'ollaq saishet da ỹanatalo nache ỹe'eguelaxalo ye Jerusalén. 21Qaq co'ollaq ỹoxoguelo soua namaxa'she, nache so Ajimaz qataq so Jonatán nnoxooyishegue'm co'ollaxa, nache ỹataqta nqalgoqte' da yaqto' icoyegue'n so nta'a David, da sanaỹaloxon da taitague da le'ego so tala Jordán, cha'aye so Ajitofel mashe damaxasoxoolec somaye da qailoquiaxan. 22Nache so David qataq 'enauac so laỹepi, sanaỹaloxon co'ollaxa da taitague da le'ego so tala Jordán, nache so mashe yo'oxolec na 'alhua so lỹa na'a'q, nache mashe hueta'atague da le'ego somayepi. 23Qaq so Ajitofel co'ollaq ila'a, da so Absalón saishet da ỹo'ot da la'aqtac somaye. Nache lapaxalec so lauala' so lalo 'ashena nache jec, taỹa so lma' maye lañoqo' co'ollaxa. Qaq co'ollaq ime da naỹamaxate' so lalamaxat lauo' le'ecpi, nache icoñerot na lqosot da maiche nalaala't. Qaq 'era da 'eetec da l-leuaxa somaye, nache qailaroigui aso nhuachiqui so lta'a. 24Nache so Absalón qataq 'enauac so Israel le'ecpi, co'ollaq ñaq ỹa'axasoxootapeguelec so tala Jordán, nache so David mashe ivita ye Majanayin. 25Qaq so Absalón, qalaq ỹanem so Amasa da lataxala' naqa'en na nalleppi somaye, da nmeneguet so Joab, qaq so lta'a so Amasa, le'enaxat Itra maye ismaeliita, qaq somaye huaroneguet co'ollaxa aso Abigaíl, asom llale so Najás, qataq lqaỹa aso Seruyá asom late'e so Joab. 26Nache so Absalón qataq so Israel le'ecpi hua'a co'ollaxa ye 'alhua Galaad. 27Qaq so David co'ollaq ivita ye Majanayin, nache huaqata'agueta somaye so Sobi, som llalec so Najás, maye lma' ye Rabá yem 'alhua Amón, qataq so Maquir, som llalec so Amiel maye lma' ye Lodebar, qataq so Barzilay maye lma' ye Roguelim, yem huaigui ye 'alhua Galaad. 28Nache somayepi nacheuec so nacanecpi, ỹomaxaquipi, taxaquipi 'alhua, qataq so trigo, cebada, 'ayiiña qataq aso nqachilliguishe ala na nañiguishe habas, qataq lenteja, 29te'esaq lli'i, qataq so isaxa't huaca lche', qataq qagueta lche', yaqto' deque'e so David qataq so shiỹaxauapi maye nnaictague'pi somaye. Cha'aye somayepi da lhuennataxa co'ollaxa, 'eeta': Yo'oqta da nasamñi, iqouat qataq huo'o na laquip namayepi, cha'aye chegoqtauga ye toolec 'alhua.
