Da l-leuaxa so Absalón
1So David, naloqchiiñi co'ollaxa so nalleppi, nache ỹauo'o so lataxala'pi so mil, qataq so cien alleppi. 2Qataq iỹottecache co'ollaxa se'eso nalleppi da ỹamaq, nache tres naqa'en soua lpa'axaco, qaq so hua'auchiguiñi somayepi ipataxalec da ilo'ogue so Joab, qaq so laỹepi nache ilo'ogue naqa'en so Abisay, som llalec aso Seruyá, qataq lqaỹa so Joab, qaq so laỹepi qalaq ilo'ogue naqa'en so Ilay, som Gat le'ec. Nache so nta'a David, 'enapeco': «Aỹem, nataqa'en qami' seca'atoiguilo da ñalat.» 3Qalaxaye somayepi 'enapeco': «'A'i, saishet da qomi' 'auca'ateguelo 'am nta'a. Cha'aye da huo'otaq sataxauec, huo'otaq da huo'o ca qaỹalauat da shenaqta, qaq na qampa'aguenaxauapi saishet da qomi' iteetegalo, 'am qalaxaye napacalec ca diez mil da shenaqta, de'era 'ara'amaqchec, ỹoqo'oye 'onaxaic da 'ano'onaña ne'ena huaqta'a't nỹecpi yaqto' da seqalviaq, nache huo'o ca qomi' 'auamaxaugalo da qomi' itaua'n. 4Nache so nta'a 'enapeco': Cam qauaỹamaxayiñiita, nacheca qome ca so'ot. Ime, nache hua'a na laỹe so ñegueuo so huaqta'a't nỹecpi, qaq som nalleppi nache inoictec da jec, lapootec so mil qataq so cien alleppi. 5Qaq so nta'a, nataqa'en huaqata co'ollaxa so Joab, Abisay qataq so Ilay, da ỹaỹamaxatta so llalec Absalón.» Nache 'enauac so alleppi hua'aqchigui co'ollaxa de'era nqataxac maye qoỹanema soua nataxala'ate. 6Ime, nache jec so alleppi, tauga so no'onaxa da yaqto' delogui' so Israel le'ecpi. Qaq se'eso alaataxac huaigui co'ollaxa so aviaq ye Efraín. 7Nache se'eso nalleppi so David, loxonec co'ollaxa so Israel le'ecpi. Qaq se'eso na'a'q, ỹataqta qalota so nalaatac shiỹaxauapi, ivi' veinte mil so ileu so nalleppi so Absalón. 8Qaq se'eso alaataxac imattalec co'ollaxa se'eso 'alhua, qataq qalota so ileu, que'emaxam so aviaq, qaq saq 'amaqtaq so ilem so ỹeelonec. 9Qaq so Absalón, netalec co'ollaxa so lalo mola, nache nque'elaxatta da natena'aguet so nalleppi so David. Nache so lalo mola ỹe'eguenoigui aso lcouepi aso qo'oipaq late'erai le'enaxat encina, nache somaye ỹemaxauec na lqaic, nache deqapiasheguem ntaxattañi, qaq so mola nache datauec. 10Qaq huo'o co'ollaxa so ỹauaachigui, nache taỹa so Joab da da'aqtaxanem, 'eeta': Aỹem selota'a ñi Absalón da ntaxattañi, netagui ara qo'oipaq late'erai le'enaxat encina.
11Nache so Joab, 'enapeco':
Qalaq ¿ta'ainco' ye sa 'aualauato' co'ollaxa camaye, ye mashe 'auauaachigui? Qaq aỹem 'am sesheeten taxa, 'am sanem aca diez aca lcatpiole oro, qataq ca 'oonolec saataxaqui.
12Qalaxaye se'eso ỹale 'enapeco': Na'aictoxo' da aỹem 'aỹa'anem aca mil aca lcatpiole plata, qalaxaye saishet da she'egueeta'a da salauat ñi llalec so nta'a, cha'aye 'enauac sa'axasoqchigui co'ollaxa da la'aqtac so nta'a, da 'am hueqattega, qataq so Abisay qataq so Ilay, da qanchilliỹa'a ñi llalec Absalón. 13Qaq taxa da so'ot de'era, nache ñaq 'eetalec taxa da ishet da ỹaỹaten ñi nta'a, cha'aye saishet da huo'o ca ỹetauec ñimaye, qataq 'am, saishet taxa da aỹem 'aueelec. 14Nache so Joab, 'enapeco': Saishet da 'am seme'eguet da 'am ña'aqtaxaatague'!
Nache somaye nqo'ona aso qo'oipaq late'erai le'enaxat encina maye netagui so Absalón, nache ỹaconalo soua tres la'araxanaqtel, nache ỹa'arelec ana ltogue so Absalón ỹa'atchigui añi lquiyaqte, cha'aye somaye ñaq nca'altauec co'ollaxa. 15Ime, nache anac so diez so nalleppi so Joab, nache qanatachigui so Absalón da yaqto' qaipagaqnauec da qaỹalauat. 16Ime, nache so Joab damaxasoxoolec da qaỹashiiyigui aso nasheerepi, nache so alleppi ỹaxaañi da icaatac so Israel le'ecpi, cha'aye so Joab nañaxaañi naqa'en somayepi. 17Nache qaỹacoosop so lo'ocỹaxac so Absalón, nache qaỹasaxangui so auac maye naigui so aviaq, ime nache qaimeelec, logosheguem qanqa'en na coma'. Huaña co'ollaxa nache datauec so Israel le'ecpi, taỹa so lma'pi.
18Qaq co'ollaq ña nca'altauec so Absalón, nache nauaxaỹaxaasheguem co'ollaxa so coma' da yaqto' sa qaicoua'ai somaye, naña naqa'en so ca'amapega't maye lalamaxat so nta'a, qataq ỹanagui da maiche le'enaxat somaye, cha'aye somaye qaica ca llalec. Qaq nache ivitta'a nagui da le'enaxat «Añi ncoma' so Absalón.» 19Ime, nache so Ajimaz maye llalec so Sadoc, 'enapega co'ollaxa so Joab, 'eeta': «'Onaxaic taxa da aỹem 'auasheeta da ñeqalgoqta'a ca nta'a da secoyeguen, da Ñim Nataxala' mashe isoueeguesop camaye na mpa'aguenaxauapi,» 20Qalaxaye so Joab, 'enapeco':
'Am, saishet da 'aura'a nagui ca la'axaỹaxac ca nta'a, maiche huo'o ca lỹa na'a'q, cha'aye camaye, ileu ye llalec.
21Qalaxaye so Joab, 'enapega co'ollaxa so Etiopía le'ec, 'eeta':
'Am, 'anqo'ona qome ca nta'a, nache 'aua'aqtaxanem de'era 'auauaachigui. Nache somaye ỹa'aldoto naua l-llecte so Joab, ime nache jec, nqalgoqta. 22Qalaxaye so Ajimaz, qaltaq ỹe'eguelaxalec co'ollaxa da 'enapega so Joab, 'eeta':
'Onaxaic taxa da aỹem 'auasheeta da nataqa'en ñeqalgoqta da seca'attaueegue so Etiopía le'ec. Qalaxaye so Joab, 'enapeco':
'Am ỹalcolec, ¿ta'ainco' da huotaique da qojec, 'ena'amo' da qaỹo'ot ca 'ansheetenaguec da 'auroi' ca na'axaỹaxac?
23Qalaxaye so Ajimaz 'enapeco':
Na'aictaxa, aỹem ashec, ñeqalgoqta qome.
Nache so Joab 'enapeco':
'Aue qone', 'analoxo.
Nache so Ajimaz jec, nqalgoqta, tatelec so ca'amapega't, nache napacalec so Etiopía le'ec maye hua'au co'ollaxa. 24Qaq so David, nso'ootañi co'ollaxa, netanguilo soua dos laso'omi se'eso huaqta'a't nỹecpi, qaq so nauanaxanaxanec netasheguema na pa'asheguem so lpaqtaxat so huaqta'a't nỹecpi, nalotcheguema so ñegueuo. Qaq co'ollaq namatasheguem somaye, nache ila'aguet so 'oonolec ỹale, ỹataqta nqalgoqta. 25Nache somaye nqaqaaña so nta'a, da da'aqtaxanem. Nache so nta'a 'enapeco':
Da 'oonolec camaxa, qache 'onaxaic ca qara'axaỹaxac. Qalaxaye co'ollaq mashe nayeetauo se'eso ỹale, 26nache so nauanaxanaxanec ila'aguet co'ollaxa so lỹa ỹale, maye nataqa'en nqalgoqta, nache somaye nqaqaaña so lỹa nauanaxanaxanec maye npa'atañi, nauaatac so ñegueuo, 'eeta':
¡Huo'o na lỹa ỹale, ỹataqta nqalgoqta!
Nache so nta'a 'enapeco':
Yo'oqta da nataqa'en nachetac ca 'onaxaic qara'axaỹaxac.
27Nache so nauanaxanaxanec 'enapeco':
Ana naloxo ne'ena na'auta, 'ena'am da nachena na Ajimaz maye llalec ca Sadoc.
Nache so nta'a 'enapeco':
Namaye, ỹataqta no'on da lataxac, qaq yo'oqta da nachetac ca 'onaxaic qara'axaỹaxac.
28Qaq co'ollaq nvireuo so Ajimaz, nache ỹa'aldoto naua l-llecte so nta'a nache, 'eeta':
Ỹataqta choxonnataxanaxaic Ñim Nataxala' maye Atamnaxala', 'am nta'a, cha'aye Ñimaye qomi' ỹanema da qoroxonec nam 'am ipa'agueetacpi, 'am nta'a.
29Nache so nta'a denataxan, 'eeta':
¿Peta'a qaica ca machaqca ca nsoq Absalón?
Nache so Ajimaz, 'enapeco':
Can aỹem namaq so 'aramaxashec Joab, nache sauaachigui da ỹataqta lliỹa't so ỹalleppi, qalaxaye sa saỹaten chaq negue't ca qanayeuaigui.
30Nache so nta'a 'enapeco':
Ñaq 'aicra'atai', qaq nache qoueta'a qome.
Nache so Ajimaz ỹo'ot da 'enapec so nta'a. 31Qaq mashe nvireuo so Etiopía le'ec, nache 'eeta':
'Am ñeroua'a da 'onaxaic 'ara'axaỹaxac, 'am nta'a, 'eeta': Ne'ena na'a'q Ñim Nataxala' 'am isoueeguesop da la'añaxac na 'am ipa'agueetacpi.
32Nache so nta'a inat so Etiopía le'ec, 'eeta':
¿Peta'a qaica ca machaqca ca nsoq Absalón?
Nache so Etiopía le'ec, 'eeta':
'Onaxaictaxa da 'enauac na 'am ipa'agueetacpi, 'am nta'a, da nache 'eetec qanqa'en da l-leuaxa yi'iye nsoq Absalón.
33Qaq co'ollaq hua'aqchigui de'era so nta'a, nache ỹataqta lta'araic da lqaigaxa, nache tasheguema so nỹec maye nalotcheguema so ñegueuo so lpaqtaxat so huaqta'a't nỹecpi. Qaq co'ollaq ñaq taỹasheguema somaye, nache nỹeetague' qataq detaqtac, 'eeta':
«¡Ỹalcolec Absalón, ỹalcolec, ỹalcolec Absalón! ¡Qaico' co'ollaxa da nachaỹem taxa da seleu, nache sepa'aiguet da 'arleuaxa, 'am Absalón! ¡Ỹalcolec, ỹalcolec!»
